Íslandsleikar Special Olympics í knattspyrnu innanhúss í Risanum nýju knatthúsi FH-inga í Hafnarfirði laugardaginn 23. apríl 2005.

Níundu Íslandsleikar SO í knattspyrnu voru haldnir í nýju knatthúsi FH-inga í Kaplakrika í Hafnarfirði 23. apríl en þessir leikar eru samvinna ÍF og KSÍ. Þetta mót er fyrsta knattspyrnumótið sem haldið er í þessu nýja knatthúsi FH-inga. Knattspyrnusamband Íslands leggur m.a. til dómara í leikina. Þetta voru fimmtu leikarnir sem haldnir eru innanhúss. Innanhúss leikarnir hafa að jafnaði verið haldnir í mars eða byrjun apríl og verið í tengslum við knattspyrnuviku þroskaheftra í Evrópu sem nýtur mikils stuðnings Knattspyrnusambands Evrópu, UEFA. Leikarnir hafa farið fram í Laugardalshöll, Reykjaneshöllinni, íþróttahúsinu á Selfossi og í Boganum Akureyri.

Mótið hófst kl. 9:00 á laugardeginum með því að Kristinn Guðlaugsson formaður knattspyrnunefndar ÍF bauð alla keppendur velkomna og setti mótið. Jón Rúnar Halldórsson formaður hlutafélagsins FH-knatthús sem sér um rekstur hússins bauð alla keppendur velkomna í Risann.

Það voru 6 lið sem mættu til leiks frá 4 félögum og voru keppendur um 50 talsins. Til að fá fleiri leiki í A-riðli var sett saman eitt Unified lið með þjálfurum og tveimur leikmönnum Þjótar. Um kl. 9:20 hófst síðan keppnin og var keppt í tveimur riðlum A og B riðlum. Hver leikur stóð í 10 mínútur og sáu dómarar frá KSÍ til þess að lögum og reglum knattspyrnunnar væri framfylgt. Leikirnir fóru mjög vel fram þó hart væri barist í hverjum leik Úrslit á leikunum urðu eftirfarandi.

A-riðill

ÍFR – Nes 2-4 Ösp – Blandan 3-2 ÍFR – Ösp 0-5 Nes – Blandan 0-2 ÍFR – Blandan 2-1 Nes – Ösp 0-1

Lokaúrslit U J T Mörk Stig Ösp 3 0 0 9-2 9 Nes 1 0 2 4-5 3 ÍFR 1 0 2 4-10 3 Blandan* 1 0 2 5-5 3

* Unified lið

B-riðill

Ösp – Nes 1-0 Nes – Eik 2-1 Eik – Ösp 0-2 Nes - Ösp 0-2 Eik – Nes 2-4 Ösp - Eik 2-0

Lokaúrslit U J T Mörk Stig Ösp 4 0 0 7-0 12 Nes 2 0 2 6-3 6 Eik 0 0 4 3-10 0

Það er gaman að geta þess að það var leikmaður ÍFR sem skoraði fyrsta markið í nýja knatthúsinu í opinberum knattspyrnuleik. Aðalstyrktaraðili Special Olympics á Íslandi er Íslandsbanki Sjóvá og fulltrúi fyrirtækjanna Pálín Helgadóttir kom og veitti verðlaun. Veitt eru gull- og silfurverðlaun fyrir tvö efstu sætin en aðrir þátttakendur fá bronspening fyrir þátttökuna í leikunum.

Að móti loknu var slegið upp í pizzuveislu frá Hróa Hetti.

Talið er að um 25 þúsund þroskaheftir einstaklingar stundi knattspyrnu víðs vegar í Evrópu og markmið með knattspyrnuvikum af þessu tagi er að tvöfalda þann fjölda fyrir árið 2005, fá fleiri þjálfara að þjálfun þessara einstaklinga og síðast en ekki síst að auka þau tækifæri sem þroskaheftum gefast til knattspyrnuiðkunar.

Verkefnið nýtur stuðnings UEFA sem hefur mælst til þess að knattspyrnusambönd hinna ýmsu Evrópulanda styðji við bak þeirra sem fyrir verkefninu standa. KSÍ hefur tekið virkan þátt í Íslandsleikunum og vonandi verður þess ekki langt að bíða að knattspyrnufélög bjóði í auknum mæli upp á æfingar fyrir þennan hóp. Knattspyrnuæfingar eru á vegum nokkurra aðildarfélaga ÍF en mörg þeirra hafa ekki tök á að bjóða upp á þessa grein í heimahéraði nema í samvinnu við knattspyrnufélagið á staðnum. Slík samvinna er að mati ÍF grundvöllur þess að vakning verði í greininni meðal fatlaðs íþróttafólks.

Kristinn Guðlaugsson.