Úrslit á Íslandsmótinu í bogfimi

Íslandsmót ÍF í bogfimi fór fram um helgina í Frjálsíþróttahöllinni í Laugardal. Keppt var bæði laugardag og sunnudag þar sem þrjú met féllu. Í Recurve flokki karla var sett nýtt met 1.087 stig og það gerði Guðmundur Smári Gunnarsson. Þá setti Óskar Birgisson met í langbogaflokki karla eða 520 stig. Þá var einnig sett met í langbogaflokki kvenna en það gerði Indíana Elín Ingólfsdóttir og fékk hún alls 454 stig.

Alls voru 35 keppendur skráðir til leiks en nokkur afföll urðu svo aðeins 27 tóku þátt. Félagar í Hringhorna og Rimmugýg tóku einnig þátt á mótinu eins og siður er orðinn og setti fólkið skemmtilegan svip á mótið.

Skorkort hvers keppanda er hægt að nálgast inn á www.bogfimi.net en heildarúrslit mótsins eru einnig aðgengileg hér.

Ljósmynd/ Sölvi Logason: Frá keppni á Íslandsmótinu í bogfimi.

Til baka Tweet