Keppni hafin á HM fatlaðra í sundi - Íslandsmet hjá Hirti

Keppni á HM fatlaðra í sundi hófst í morgun og þá voru í eldlínunni og kepptu í undanrásum  þeir Eyþór Þrastarson og Hjörtur Már Ingvarsson. Eyþór hafnaði í 11. sæti í sínum flokki S11(flokki blindra), synti á tímanum 2.57.23 sem er persónulegt met hjá honum en hans besti tími áður var 3:08.52. 

Hjörtur synti síðan í undanrásum í flokki S5 (flokki hreyfihamlaðra) og hafnaði í 16. sæti, synti á tímanum 45.57 sek sem er nýtt Íslandsmet í flokki S5.
 
Lokaflokkun keppenda á mótinu hefur nú farið fram og var Pálmi Guðlaugson flokkaður upp um flokk, fer úr S6 í flokk S7, sem þýðir að Pálmi hefur ekki tilskilin lágmörk til þátttöku. Pálmi, sem er aldurforseti hópsins, mun því verða öðrum keppendum til halds og trausts og koma síðan tvíelfdur til leiks og tilbúinn til að ná þeim lágmörkum sem hin nýja flokkun S7 setur honum.

Á morgun keppir Anna Kristín Jensdóttir í 100 m bringusundi í flokki hreyfihamlaðra SB5

Nokkrar  staðreyndir um HM fatlaðra í sundi:
• Verndari mótsins er Pieter van den Hoogenband margfaldur Ólympíumeistari í sundi
• 54 þátttökuþjóðir
• 600 sundmenn (40% konur, 60% karlar)
• 386 þjálfarar, fararstjórar, fylgdarmenn
• Fjölmennasta þjóðin á mótinu Rússar með 49 sundmenn og 21 aðstoðarmenn
• 400 sjálfboðaliðar
• Rúmlega 26 þúsund matarskammtar framreiddir meðan á mótinu stendur
• 712 verðlaunum verður útdeilt í 212 verðlaunaafhendingum

Ljósmynd/ Hjörtur Már, sitjandi, ásamt Jóni Margeiri Sverrissyni og Ragnari Inga Magnússyni á keppnisstað í Hollandi. Hjörtur setti Íslandsmet í morgun en hafnaði þrátt fyrir það í 16. sæti í 50m. skirðsundi.

Til baka Tweet