Tvö brons hjá Ernu í desember

Erna Friðriksdóttir sem á dögunum var útnefnd Íþróttakona ársins hjá Íþróttasambandi fatlaðra er nú stödd í Colorado við skíðaæfingar á mono-sleða. Um miðjan desember mánuð tók Erna þátt í nokkrum mótum þar sem hún landaði m.a. tveimur bronsverðlaunum.

Erna keppti á Ski Spectacular Copper Mountain 2010 – NorAm. ,,Við dvöldum á hóteli í litlum sætum bæ sem heitir Frisco. Á svona ferðalögum er ótrúlegt hvað tíminn er fljótur að líða! Við komuna til Frisco var dótið tekið úr bílnum og við fengum lyklana af herbergjunum okkar. Síðan fórum við upp á skíðasvæði, skoðuðum okkur aðeins um og fengum lyftukortin okkar. Næstu fjóra daga kepptum við,” sagði Erna í samtali við heimasíðu ÍF.

Árangur Ernu á mótinu:
13.12.2010 - Keppt í stórsvigi. Endaði í 3. sæti.
14.12.2010 - Keppt í stórsvigi. Endaði í 4. sæti.
15.12.2010 - Keppt í svigi. Féll úr keppni eftir fyrri umferð eftir að hafa misst úr hlið.
16.12.2010 - Keppt í svigi. Endaði í 3. sæti.

Erna kvað æfingarnar í Winter Park ganga mjög vel og er núna þegar þetta er ritað að taka þátt í öðru móti sem fer fram á æfingasvæðinu í Winter Park.

Mynd úr einkasafni Ernu/ Meira að segja fuglarnir hafa áhuga á því sem Erna er að gera!

Til baka Tweet