Myndasafn: Fjórði Sjómannabikar Fjarðar

Í gær landaði Kolbrún Alda Stefánsdóttir Sjómannabikarnum í fjórða sinn fyrir hönd Íþróttafélagsins Fjarðar þegar Nýárssundmót barna og unglinga fór fram í innilauginni í Laugardal. Þó Fjörður hafi unnið Sjómannabikarinn alls fjórum sinnum hafa aðeins þrír sundmenn komið nafni sínu á hann en þær eru Hulda H. Agnarsdóttir (2006), Karen B. Gísladóttir (2007 og 2008) og svo Kolbrún Alda.

Veglegt myndasafn frá mótinu í gær má finna hér en mótið er fyrir fötluð börn og ungmenni 17 ára og yngri. Það var því um breiðan hóp að ræða enda slegið þátttökumet þar sem um 100 krakkar tóku þátt. Landsliðskrakkar og byrjendur komu saman og gerðu gott mót og sýndu allar sínar bestu hliðar.

Íþróttasamband fatlaðra vill koma á framfæri innilegu þakklæti til allra þeirra sem tóku þátt í því að skapa sterka og góða umgjörð á mótinu enda heppnaðist það afar vel í alla staði.

Sögulegar staðreyndir um Nýárssundmót fatlaðra barna og unglinga:

-Fyrst haldið árið 1984 þar sem Sigrún Pétursdóttir frá ÍFR var fyrsti sigurvegarinn, fékk þá 482 stig í 50m. baksundi.
-Fyrirkomulag mótsins er stigamót, sá sem nær bestum tíma í sinni grein út frá heimsmeti fatlaðra í greininni hlýtur flest stig og þar af leiðandi Sjómannabikarinn.
-Sigmar Ólason sjómaður á Reyðarfirði gaf ÍF Sjómannabikarinn.
-Þrír sundmenn hafa unnið Sjómannabikarinn til eignar en þeir eru Birkir Rúnar Gunnarsson, Gunnar Örn Ólafsson og Guðrún Sigurðardóttir.
-Fyrsti heiðursgesturinn árið 1984 var frú Vigdís Finnbogadóttir, þáverandi forseti Íslands.
-Erlingur Þ. Jóhannsson var mótsstjóri Nýárssundmótsins í 27 ár, hann lést seint á síðasta ári eftir langvarandi veikindi og tók Kristín Guðmundsdóttir núverandi landsliðsþjálfari ÍF í sundi við keflinu af Erlingi. Kristín var mótsstjóri í fyrsta sinn á Nýárssundmótinu nú síðastliðinn sunnudag.
-Á Nýárssundmótinu 2011 var minnisvarði afhjúpaður til minningar um Erling Þ. Jóhannsson og mun hann standa við tímatökubúrið í innilauginni í Laugardal um ókomin ár.

Til baka Tweet