Helgi með Íslandsmet á Ítalíu

Helgi Sveinsson setti í dag nýtt og glæsilegt Íslandsmet í 100m. spretthlaupi á frjálsíþróttamóti sem nú fer fram á Ítalíu. Helgi keppir í flokki T42 á koltrefjafæti frá Össuri. Helgi stórbætti árangur sinn í dag en í Túnis fyrr á þessu ári hljóp hann 100 metrana á 15,30 sek. en nýji tíminn sem kom í hús í morgun var 14,82 sek.

Glæsilegur árangur hjá Helga sem hefur ótrauður sett stefnuna á Ólympíumót fatlaðra síðar á þessu ári. Þau mál skýrast betur síðar í þessum mánuði en árangur Helga í 100m. hlaupinu í dag er tólfti besti árangurinn í flokki T42 síðustu tvö ár.

Mynd/ Helgi t.v. og Baldur Ævar Baldursson langstökkvari t.h. Mynd frá æfingu Helga og Baldurs á Ítalíu í gær þar sem Helgi fullyrti að hann myndi éta skóinn sinn ef hann bætti sig ekki. Til allrar lukku hafðist markmiðið enda hlaupaskór einstaklega tormeltir.