Sumarbúðir ÍF hljóta styrk úr Pokasjóði

Pokasjóður úthlutar árlega styrkjum til hinna ýmsu verkefna á sviði umhverfis- og mannúðarmála. Sjóðurinn veitti á dögunum 71 milljón króna í 82 verkefni við hátíðlega athöfn í Salnum í Kópavogi. Lögð var áhersla á að styrkja verkefni á sviði umhverfismála, menningar, mannúðar, íþrótta og útivistar um allt land.

Stuðningur við verkefni fyrir börn og unglinga er áberandi að þessu sinni, en samtals er 20 milljónum króna úthlutað til fjölbreyttra úrræða  á því sviði. Styrkir til umhverfismála nema tæpum 38 milljónum króna. Frá upphafi hefur Pokasjóður úthlutað um 1.300 milljónum króna,
Skógræktarfélag Reykjavíkur fékk styrk að upphæð tvær og hálf milljón fyrir göngustígagerð í Esjuhlíðum. Þá fengu Lundur forvarnafélag, Reykjanesbæ, Húsgull, Húsavík, vegna uppgræðslu á Hólasandi á Hólsfjöllum, Íþróttasamband fatlaðra, Reykjavík fyrir sumarbúðir fatlaðra á Laugarvatni, SÁÁ, Reykjavík, fyrir forvarnarverkefni fyrir börn alkóhólista í uppbyggingu á vefsvæði, Útilífsmiðstöð skáta, Úlfljótsvatni, fyrir umhverfisendurbætur, flotbryggju, varnargarða og tjaldstæðaveg og einnig  Vinir Þórsmerkur, Hvolsvelli, vegna viðhalds stíga í Þórsmörk og gerð brúar yfir Hrunaá í Goðalandi styrk að upphæð tvær milljónir hvert.

Íþróttasamband fatlaðra færir stjórn Pokasjóðs sínar bestu þakkir fyrir velvilja og veittan stuðning nú sem áður. Stuðningur Pokasjóðs er Íþróttasambandi fatlaðra, sumarbúðunum og þeim sem þær sækja mikils virði og gerir sambandinu kleift að standa jafn myndarlega að starfseminni og raun ber vitni.