Æfingabúðum í Stoke Mandeville lokið

Íslenski sundhópurinn sem náði lágmörkum fyrir Ólympíumót fatlaðra í London var á dögunum við æfingabúðir í Stoke Mandeville á Englandi. Sundmennirnir Jón Margeir Sverrisson og Kolbrún Alda Stefánsdóttir sem keppa í London voru við æfingar ásamt Anítu Ósk Hrafnsdóttur sem náði einnig lágmarki fyrir mótið en eins og kunnugt er fékk Ísland aðeins þátttökurétt fyrir tvo sundmenn, einn karl og eina konu.

Morgunæfingin fór jafnan fram í Stoke Mandeville Stadium en seinni parts æfingin í Aqua Vale í Aylsburry sem var mjög góð tilbreyting. Dagskipulagið í búðunum var frekar einfalt þessa vikuna, morgunæfing, morgunmatur, hvíld, hádegismatur, sundæfing, kvöldmatur og hvíld.

Á miðvikudeginum fékk liðið frí á seinni æfingunni og nánasta umhverfið  var skoðað og nokkrum pundum eytt. Eftir æfingu á föstudag var gengið niður í miðbæ og borðað saman. Það var svo þreyttur en ánægður hópur sem kom heim og hlakkar til að koma aftur til Englands í lok ágúst.

Mynd/ Jón, Kolbrún og Aníta í Stoke Mandeville þar sem æfingabúðirnar fóru fram.