Lokadagurinn runninn upp hjá Matthildi

Frjálsíþróttakonan Matthildur Ylfa Þorsteinsdóttir lýkur keppni á Ólympíumóti fatlaðra í dag þegar hún keppir í 200m spretthlaupi í flokki T37 en flokkurinn er flokkur spastískra. Hlaupið hjá Matthildi hefst kl. 10:50 hér ytra eða kl. 09:50 að íslenskum tíma. Matthildur hleypur í undanriðli 1 en með henni í riðlinum verður heimakonan Katrina Hart sem á næstbesta tíma ársins á 29,91 sekúndu.

Matthildur á besta tímann 33,76 sek. en þeim tíma náði hún fyrr á þessu ári á alþjóðlegu móti í Túnis. Reyndar hljóp hún á betri tíma á EM í Hollandi en sá árangur fékkst ekki gildur þar sem um of mikinn vind í því hlaupi var að ræða.

Nú þegar sjöundi keppnisdagur er að hefjast hér í London er ekki úr vegi að kíkja eldsnöggt á þær þjóðir sem hafa verið hvað atkvæðamestar. Kínverjar hafa unnið til 132 verðlauna og þar af eru 53 gull! Í öðru sæti eru heimamenn frá Bretlandi með 79 verðlaun og 23 gullverðlaun. Rússar eru í 3. sæti með 62 verðlaun og 23 gullverðlaun rétt eins og heimamenn í Bretlandi. Hér má sjá heildarlista verðlaunahafa en til gamans má geta að sé litið til höfðatölukeppninnar góðu þá hefur Ísland unnið flest gullverðlaun á mótinu miðað við fjölda íbúa.

Mynd/ Matthildur Ylfa verður vafalítið vopnuð sínu fræga brosi á eftir þegar hún reynir fyrir sér í 200m hlaupi frammi fyrir 80.000 manns á Ólympíumótsleikvanginum.