ÍF og Össur hf. taka stefnuna á Ríó: Nýr samstarfs- og styrktarsamningur

Íþróttasamband fatlaðra og Össur hf. hafa gert með sér nýjan samstarfs- og styrktarsamning sem gildir til og með Ólympíumóti fatlaðra 2016. Össur hf. er einn af helstu samstarfs- og styrktaraðilum sambandsins og nú, sem fyrr, horfa báðir aðilar björtum augum fram á veginn en undirbúningur fyrir þátttöku Íslands í Ríó er þegar hafinn í herbúðum ÍF.

Sveinn Áki Lúðvíksson formaður ÍF kvaðst afar ánægður með nýja samninginn. „Össur hf. hefur ávallt fylgt okkur vel að málum og við hjá ÍF fögnum þessum nýja samstarfs- og styrktarsamningi heils hugar. Verkefni ÍF eru æði mörg og kostnaðarsöm og Össur hefur fullan skilning á því hvað þurfi til að tefla fram íþróttafólki á heimsmælikvarða.“

Mynd/ Sigurborg Arnarsdóttir frá Össuri og Sveinn Áki Lúðvíksson formaður ÍF við undirritun nýja samningsins.