Góður árangur hjá Matthildi Ylfu og Huldu á RIG

Fatlaðir frjálsíþróttamenn náðu afbragðsárangri á Stórmóti ÍR sem haldið var í tengslum við Reykjavíkurleikana nú um helgina.

Þannig stórbætti Ólympíumótsfarinn Matthildur Ylfa Þorsteinsdóttir árangur sinn í 60 m hlaupi sem hún hljóp á 9,61 sek sem er Íslandsmet innanhúss í flokki 16 – 17 ára, 18 – 19 ára, 20 – 22 ára og flokki fullorðinna, fyrra metið var 10,27 sek í 60 m sem hún setti á Stórmóti ÍR í fyrra.

Þá setti Matthildur Ylfa, sem keppir í flokki spastískra T37, einnig Íslandsmet innanhúss í 200 m hlaupi sem hún hljóp á 32,06 sek sem er bæting úr 34,86 sek á sama móti í fyrra. Til samanburðar var tími hennar í 200 m á leikunum í London 32,16 sek.  Matthildur keppti auk þess í langstökki og stökk 4:03 m. 

Hulda Sigurjónsdóttir sem keppir í flokki þroskahamlaðra F20 stórbætti einnig árangur sinn í kúluvarpi og setti Íslandsmet innanhúss er hún kastaði 8,47 m.