Eyþór Þrastarson er fæddur árið 1991 og er uppalinn Reykvíkingur.

Eyþór Þrastarson er nemandi við Kvennaskólann í Reykjavík.  Hann hefur undanfarið ár tekið miklum framförum í sundlauginni og er nú einn besti sundmaður í flokki blindra sem Ísland hefur átt.
Eyþór er blindur frá fæðingu og keppir í flokki S11 en hann syndir fyrir Íþróttafélag fatlaðra í Reykjavík, ÍFR  og Sundfélagið Ægi þar sem hann hefur stundað æfingar frá því er Ólympíumótinu í Peking 2008 lauk. Þjálfarar Eyþórs frá upphafi eru Erlingur Jóhannsson, Jón Heiðar Jónsson, Halldór Guðbergsson hjá ÍFR og Jacky Pellerin hjá Ægi.

Árangur Eyþórs á árinu 2009 

• Í mars tók Eyþór þátt í Íslandsmóti ÍF í 50m. laug og vann þar þrenn gullverðlaun sem og að sigra í 400m. skriðsundi í opnum flokki. Í nóvember vann Eyþór til fernra gullverðlauna á Íslandsmóti ÍF í 25 m. laug sem fram fór í Laugardal. 
• Á Ármannsmótinu sem fram fór í aprílmánuði og fatlaðir voru meðal keppenda bætti Eyþór 12 og 13 ára gamalt Íslandsmet sundkappans Birkis Rúnars Gunnarssonar í 200 m og 400 m skriðsundi
• Í maí tók Eyþór þátt á Opna þýska meistaramótinu í sundi þar sem hann gerði sér lítið fyrir og setti Evrópumet í flokki blindra í 800 m skriðsundi.  Þetta er jafnframt Íslandmet í greininni.
• Í október sl. tók Eyþór í fyrsta sinn þátt í Evrópumeistaramóti  fatlaðra í sundi sem fram fór hér á landi. Þar var Eyþór eini Íslendingurinn sem vann til verðlauna er hann hlaut silfurverðlaun í 400 m skriðsundi. Þá sló hann einnig 13 ára gamalt Íslandsmet Birkis Rúnars í 50 m skriðsundi auk þess að hafna í 8. sæti í 100 m skriðsundi og 7. sæti í 100 m baksundi.
• Alls hefur Eyþór nú á árinu sett fjögur Íslandsmet sem öll voru áður í eigu Birkis Rúnars Gunnarssonar, þess öfluga sundmanns frá árum áður.