Handhafi Guðrúnarbikarsins árið 2009 er Jóna B. H. Jónsdóttir
Guðrúnarbikarinn er bikar sem gefinn var ÍF árið 2000 af Össurri Aðalsteinssyni, félagsmanni í Kiwanisklúbbnum Esju til minningar um eiginkonu hans Guðrúnu Pálsdóttur.

Reglur

Handhafi hans skal valinn ár hvert af stjórn Íþróttasambands Fatlaðra. Bikarinn skal afhendast árlega við það tilefni sem stjórn ÍF ákveður og verður því farandbikar, þar sem á verður áletrað nafn handhafa. Bikarinn skal afhendast konu þeirri sem hefur starfað sérlega vel í þágu fatlaðs íþróttafólks. Bikarinn má afhenda fyrir störf að þjálfun, félags-störfum eða öðrum þeim verkefnum sem talin eru hafa stuðlað að bættum hag fatlaðs íþróttafólks á árinu. Bikarinn skal afhendast árlega í 10 ár en eftir það skal hann varðveitast hjá Íþróttasambandi Fatlaðra.

Jóna B.H. Jónsdóttir

Handhafi Guðrúnarbikarsins árið 2009 er Jóna B. H. Jónsdóttir

Jóna B. H. Jónsdóttir hefur verið virkur félagi í ÍFR, íþróttafélagi fatlaðra í Reykjavík í fjölmörg ár. Fyrst sem keppandi í boccia, síðan sem aðstoðarmaður á æfingum og í ferðum á vegum ÍFR. Undanfarin ár hefur hún starfað sem þjálfari hjá félaginu. Í þeim fjölmörgu ferðum sem Jóna hefur farið á vegum ÍFR hefur hún ekki látið fötlun sína aftra sér frá því að aðstoða aðra sem eiga við jafnmikla eða jafnvel meiri fötlun að stríða en hún sjálf. Jákvætt viðhorf hennar til íþróttastarfs fatlaðra er og hefur verið öðrum mikil hvatning. Hún lætur hindranir ekki aftra sér frá því að takast á við krefjandi verkefni, er fyrirmyndarfélagi, jákvæð og dugleg og alltaf reiðubúin til að aðstoða ef til hennar er leitað. Slíkir liðsmenn eru ómetanlegir í starfi Íþróttasambands fatlaðra og aðildarfélaga ÍF.

Stjórn ÍF samþykkti samhljóða að handhafi Guðrúnarbikarsins árið 2009
væri Jóna B. H. Jónsdóttir.