Rúmlega 200 manns frá 15 aðildarfélögum ÍF tóku þátt í Íslandsmótinu í einliðaleik í boccia sem fram fór í Laugardalshöll.  Sú hefð hefur skapast að aðildarfélög ÍF eru framkvæmdaraðilar þessa Íslandsmóts en tilgangur þess er m.a. að kynna starfsemi þeirra félaga sem standa að mótinu.
Íþróttafélagið Ösp var framkvæmdaraðili að þessu sinni í samvinnu við Íþróttasamband fatlaðra.
Nemendur frá Fjölbrautskólanum í Breiðholti aðstoðuðu við dómgæslu og fjölmargir aðstoðuðu íþróttafélagið Ösp við framkvæmd mótsins.  Lokahóf var haldið í Fjörukránni í Hafnarfirði þar sem mikil stemming ríkti í gærkvöldi.  Skipulag og framkvæmd mótsins var íþróttafélaginu Ösp til mikils sóma og Íþróttasamband Fatlaðra óskar félaginu til hamingju með glæsilegt Íslandsmót.

Upplýsingar um Íþróttafélagið Ösp   www.ospin.is

Íþróttafélagið Ösp var stofnað 18. maí, 1980 af foreldra- og kennarafélagi Öskjuhlíðarskóla, með stuðningi frá Íþróttasambandi Fatlaðra. Stofnfundurinn fór fram á Þingvöllum.

Markmið Íþróttafélagsins Aspar er að standa fyrir íþróttastarfi sem byggir á því að hver og einn iðkandi fái að njóta sín sem best.  Í boði eru fjölbreyttar íþróttagreinar á vegum félagsins og einnig eru fimleikaæfingar í nafni félagsins í samstarfi við fimleikafélagið Gerplu.