Íþróttasamband Fatlaðra hefur það að markmiði að auka enn frekar samstarf við Sérsambönd ÍSÍ.
Ýmis samstarfsverkefni verið þróuð með góðum árangri en sum verkefni hafa ekki skilað þeim árangri sem stefnt var að og nýjar greinar ekki náð að festast í sessi.
Með nýrri stefnu um skóla án aðgreiningu og áherslu á að fötluð börn séu með sínum jafnöldrum er mikilvægt að komið sé til móts við þennan hóp hjá almennum íþróttafélögum. Mikilvægt er að skapa valkosti og gefa fötluðum börnum tækifæri á að velja greinar sem ekki eru í boði hjá aðildarfélögum ÍF:

Ný samstarfsverkefni haustið 2008
Í tengslum við þátttöku Íslands í Alþjóðavetrarleikum Special Olympics 2009 hefur verið óskað samstarfs við Skautasamband Íslands og aðildarfélög þess.  Markmið er að efla þátttöku fatlaðra í skautaíþróttum.  Badmintonsamband Íslands hefur sýnt áhuga á samstarfi í þeim tilgangi að efla þátttöku fatlaðra í badminton en keppt er í badminton á alþjóðaleikum Special Olympics.  Fyrirhugaður er  fundur  frjálsíþróttanefndar ÍF með Frjálsíþróttasambandi Íslands en nefndin vinnur nú að áætlun um aukna þátttöku fatlaðra í frjálsum íþróttum og árangurstengd markmið.

Ýmis samstarfsverkefni sem verið hafa í gangi undanfarin ár
Íþróttasamband Fatlaðra hefur undanfarin ár þróað samstarf við ýmis sérsambönd innan ÍSÍ.  Samstarf hefur verið við Fimleikasamband Íslands í tengslum við starfsemi Special Olympics og fimleikafélagið Gerpla hefur staðið fyrir fimleikaæfingum fyrir fatlaða í samstarfi við íþróttafélagið Ösp.  Samstarf við  Golfsamband Íslands var þróað í þann farveg að komið var á fót Golfsamtökum fatlaðra á Íslandi en forsvarsmaður er Hörður Barðdal.   Samstarf við  Knattspyrnusamband Íslands hefur tengst Íslandsleikum Special Olympics og Sparkvallaátaki þar sem meginmarkmið er að efla þátttöku fatlaðra í knattspyrnu.  Samstarf við Sundssamband Íslands hefur falist í ýmsum verkefnum m.s. aðstoð dómara frá SSÍ á Íslandsmótum ÍF.  Samstarf við önnur sérsambönd hefur verið óformlegt en m.a. hefur Frjálsíþróttasamband Fatlaðra lagt til landsliðsbúninga fyrir fatlað frjálsíþróttafólk sem keppir erlendis.
Samstarf við borðtennissamband Íslands hefur tengst ráðgjöf og mótahaldi en þjálfarar ÍF hafa tengst starfi BTÍ. 

Fyrir nokkrum árum var farið í samstarf við Siglingasamband Íslands þar sem markmið var að kynna sérhannaða báta fyrir fatlaðra.  Samstarf við Danssamband Íslands var  fyrir nokkrum árum þar sem markmið var að kynna hjólastóladans og  samstarf var við Körfuknattleikssamband Íslands vegna hjólastólakörfubolta.   Ýmsar greinar sem kynntar hafa verið í samstarfi við sérsambönd hafa verið í boði í ákveðinn tíma en ekki náð fótfestu. 

Samstarf hefur einnig verið við erlenda aðila vegna ákveðinna greina s.s. Challenge Aspen og Winter Park í Colorado vegna vetraríþrótta og samstarf við aðila í Noregi og Bretlandi vegna þróunarverkefna á sviði reiðmennsku og reiðþjálfunar fatlaðra.