Guðrúnarbikarinn er bikar sem gefinn var árið 2000 af Össurri Aðalsteinssyni til minningar um eiginkonu hans Guðrúnu Pálsdóttur.

Reglur

Handhafi hans skal valinn ár hvert af stjórn Íþróttasambands Fatlaðra.

Bikarinn skal afhendast árlega við það tilefni sem stjórn ÍF ákveður og verður því farandbikar, þar sem á verður áletrað nafn handhafa.

Bikarinn skal afhendast konu þeirri sem hefur starfað sérlega vel í þágu fatlaðs íþróttafólks. Bikarinn má afhenda fyrir störf að þjálfun, félagsstörfum eða öðrum þeim verkefnum sem talin eru hafa stuðlað að bættum hag fatlaðs íþróttafólks á árinu. Bikarinn skal afhendast árlega í 10 ár en eftir það skal hann varðveitast hjá Íþróttasambandi Fatlaðra.

Handhafi Guðrúnarbikarsins 2007

Reykjavík 12. 12. 2007

Handhafi Guðrúnarbikarsins árið 2007 er Margrét Kristjánsdóttir

Margrét Kristjánsdóttir, hefur tekið virkan þátt í starfi með íþróttafélaginu Ösp.

Hún hefur víða lagt hönd á plóg í íþrótta- og félagsstarfi Aspar og hefur ætíð verið tilbúin að leggja fram krafta sína fyrir félagið.

Þá hefur hún verið fararstjóri og/eða aðstoðarmaður á vegum íþróttafélagsins Aspar á fjölmörgum mótum og er einn helsti máttarstólpi félagsins.

Margrét hefur einnig starfað að margvíslegum verkefnum fyrir Íþróttasamband Fatlaðra. Hún hefur farið sem aðstoðarmaður á mót erlendis á vegum ÍF og ætíð verið tilbúin til að starfa í sjálfboðavinnu fyrir ÍF sé til hennar leitað.

Hún var í undirbúningsnefnd norræna barna og unglingamótsins sem haldið var á Íslandi 2007 og var mjög virk við störf að undirbúningi og framkvæmd mótsins.

Margrét hefur verið sérlega góður liðsmaður sem er tilbúin til aðstoðar hvenær sem þörf er á. Slíkir liðsmenn eru ómetanlegir og hennar framlag hefur verið mikils virði fyrir íþróttahreyfingu fatlaðra á Íslandi.

Stjórn Íþróttasambands Fatlaðra, telur að Margrét Kristjánsdóttir sé mjög vel að því komin að hljóta Guðrúnarbikarinn 2007