Íþróttasamband fatlaðra hefur valið Jóhann Rúnar Kristjánsson íþróttamann ársins 2007.

Jóhann Rúnar Kristjánsson er fæddur 22.12. 1973 og er uppalinn í Keflavík

Jóhann Rúnar hefur unnið hjá Verkalýðs og sjómannafélagi Keflavíkur í um 8 ár en hann slasaðist í mótorhjólaslysi árið 1994 og var um 9 mánuði í endurhæfingu. Hann er með svokallaða þverlömun og er hann lamaður upp að brjósti. Hann keppir í fötlunarflokki C2 en á alþjóðlegum mótum er keppt í flokkum C1 til C10 þar sem lægsta talan gefur til kynna mestu fötlun og sú hæsta minnstu fötlun. Flokkar C1 - C5 eru sitjandi flokkar og C6 - C10 standandi flokkar.

Jóhann hóf að iðka borðtennis á Reykjalundi meðan á endurhæfingunni stóð en hóf markvissar æfingar 1997. Það sama ár tók hann þátt í sínu fyrsta Evrópumóti en alls hefur hann tekið þátt í sex Evrópumeistaramótum, tveimur Heimsmeistaramótum auk þess sem hann var meðal keppenda á Ólympíumótinu í Aþenu 2004. Auk þessa hefur hann tekið þátt í fjölmörgum öðrum mótum á erlendri grundu. Þjálfarar Jóhanns gegnum tíðina hafa verið þeir Helgi Þór Gunnarsson og Kristján Jónasson. Hann er félagi í íþróttafélaginu Nesi í Reykjanesbæ en hefur æft með Íþróttafélagi fatlaðra í Reykjavík, HK og Íþróttaakademíunni í Reykjanesbæ. Jóhann Rúnar hefur á undanförnum mánuðum farið víða og tekið þátt í mótum sem veita stig inn á styrkleikalista alþjóðaborðtennisnefndar fatlaðra. Hefur hann staðið sig með miklum ágætum og hægt og bítandi þokast upp styrkleikalistann en 14 efstu öðlast þátttökurétt á Ólympíumóti fatlaðra í Peking 2008. Jóhann, sem átti í erfiðum meiðslum á síðasta ári, hefur nú loks náð þeim stöðugleika sem til þarf því á þeim mótum sem hann hefur keppt í á árinu hefur hann oftar en ekki náð verðlaunasæti og sjaldnast verið neðar en í fimmta til áttunda sæti. Meðal þeirra móta sem Jóhann hefur tekið þátt í eru Evrópumeistaramót fatlaðra í borðtennis, opna argentínska-, opna ítalska-, opna þýska- og opna írska borðtennismótið svo nokkur séu nefnd.

Í dag skipar Jóhann Rúnar 14. sæti ofangreinds styrkleikalista en endanlegur listi fyrir Ólympíumótið 2008 hefur enn ekki verið birtur. Jóhann heldur ótrauður áfram að ná sér í þau stig sem nauðsynleg eru til að tryggja sér þátttökurétt á Ólympíumótinu og mun gera lokaatlögu að settu marki með þátttöku í opna bandaríska meistaramótinu sem fram fer 28. - 30. desember nk. Vonandi skilar þátttaka í þessum mótum tilskildum árangri þannig að Jóhann uppskeri árangur erfiðis síns og verði meðal þátttakenda á Ólympíumótinu 2008.

Ísl. mót ÍF	mars	3 gull, vann alla flokka sem keppt var í
Ísl. mót BTÍ	mars	3.-4. sæti í 1. flokki karla, ófatlaðir
Dublin	apríl	silfur í einliðaleik og liðakeppni
Akureyri	maí	Hængsmótsmeistari
Rúmenía	maí	3. sæti í liðakeppni í flokki C3
Landsmót UMFÍ	júlí	6. sæti, ófatlaðir
Wuppertal	september	3. sæti í liðakeppni, 5.-8. sæti einliðaleik
Lignano	september	2. sæti í liðakeppni, 5.-8. sæti í einliðaleik
Argentína	nóvember	3. sæti í liðakeppni , 4. sæti einliðaleik
BTÍ mót	nóvember	3.-4. sæti í 1. flokki karla, ófatlaðir