Frábært framtak einstaklings!

Sælkerakvöld á Broadway 3. september

Þann 3. september 2004 verður sérstakt sælkerakvöld á Broadway, þar sem boðið verður upp á glæsilegan mat og dagskrá en jafnframt aflað fjár til stuðnings starfsemi ÍF.

Tilefni þessa er mjög athyglisvert en að baki stendur einstaklingur, Þórarinn Guðlaugsson, matreiðslumeistari sem sjálfur varð fyrir því að upplifa erfið veikindi, náði sér aftur á strik og er ákveðinn í að láta gott af sér leiða.

Íþróttasamband Fatlaðra fagnar þessu framtaki sem er mjög þýðingarmikið sem fjáröflun fyrir ÍF en ekki síður sem hvatning til annarra sem lent hafa í svipaðri aðstöðu.

Sælkerakvöld, skemmtikvöld, uppboð og dansleikur.

Til styrktar starfi íþróttasambands fatlaðra og ólympíuförum þess 2004.

Sælkerakvöldið verður haldið á Broadway föstudagskvöldið 3. september og mun landslið matreiðslumeistara sjá um að útbúa glæsilega matarveislu.

Forréttur; Hreindýrapate - Lúðupate – Koníakslax

Aðalréttur; Lambalæri a la landslið matreiðslumanna

Eftirréttur; Súkkulaði “Surprise”

Landsþekktir skemmtikraftar koma fram m.a. Jón Ólafsson, Steinn Ármann Magnússon og Stefán Karl Stefánsson, dansarar sýna listir sínar og uppboð verður

haldið þar sem spennandi hlutir verða í boði.

Að lokinni glæsilegri dagskrá verður dansleikur með hljómsveitinni Karma

Veislustjóri verður leikkonan og grínarinn Guðlaug Elísabet Ólafsdóttir.

Verð aðgöngumiða er kr. 5.000.- Kr. 1000.- á dansleik kl. 24.00.

Húsið opnar kl. 19.00 og borðhald hefst kl. 20.00.

Miðapantanir eru í síma 5331100 á Broadway.

Fyrirtæki geta einnig pantað miða á skrifstofu ÍF í síma 514 4080 og í síma

894 1305. Fyrirtæki sem óska eftir, fá sérútbúna kvittun.

Forsagan að baki þessa verkefnis

Ég, Þórarinn Guðlaugsson matreiðslumeistari er búinn að vera að berjast við Parkinson veikina undanfarin ár. Á síðasta ári var ég orðinn það slæmur af veikinni að ég átti erfitt með gang, var þvoglumæltur og hafði litla stjórn á hreyfingum líkama míns. Í nóvember fór ég svo til Svíþjóðar í aðgerð til að reyna að sporna við veikinni. Ég hét því þá að ef ég fengi heilsu til myndi nota þekkingu mína og krafta til að hjálpa þeim sem eru hjálpar þurfi. Heilsa mín eftir aðgerðina er sem kraftaverk

og eru verstu dagar mínir núna á við bestu daga fyrir aðgerð. Því er ég farinn af stað og er núna ásamt góðu fólki að skipuleggja þennan hátíðarkvöldverð til styrktar fötluðum. Ég ætla ekki að láta staðar numið eftir þessa veislu því að ég mun halda ótrauður áfram og ljá samtökum parkinsonsjúklinga og öðrum góðum samtökum krafta mína og allan þann stuðning sem þau eiga skilið.

Það er von Íþróttasambands Fatlaðra að sem flestir sjái ástæðu til þess að kaupa miða á þetta glæsilega sælkerakvöld á Broadway, njóta glæsilegrar kvölddagskrár og styrkja um leið gott málefni.