| Fundur Evrópuráðs Special Olympics og Evrópuráðstefna Special Olympics Fundur Evrópuráðs Special Olympics, EEAC var haldinn dagana 23. - 23. nóvember í Tallinn í Eistlandi. Anna Karólína Vilhjálmsdóttir, framkvæmdastjóri Special Olympics á Íslandi hefur verið fulltrúi í Evrópuráði EEAC frá árinu 2001 og var kjörin varaformaður ráðsins í Tallinn í nóvember. Hlutverk EEAC "European Eurasia Advicory Council"er að vera ráðgefandi við skrifstofu Special Olympics í Brussel varðandi stefnumál Special Olympics í Evrópu og tengiliður Evrópu við alþjóðastjórn Special Olympics. Mörg málefni lágu fyrir fundinum en m.a. var tekin fyrir umsókn frá Belgíu og Póllandi vegna næstu Evrópuleika Special Olympics. 5 manna sendinefnd kom frá Belgíu vegna málsins, fulltrúar styrktaraðila og ráðgjafafyrirtækis ásamt formanni og framkvæmdastjóra Special Olympics í Belgíu. Ákveðið var að óska eftir frekari upplýsingum frá löndunum og niðurstaða verður staðfest á fundi ráðsins í Brussel í apríl 2007. Tækninefnd er starfandi á vegum Special Olympics í Evrópu en nefndin er ráðgefandi varðandi hverja íþróttagrein og við skipulag Evrópuleika í hverri grein. Skýrsla nefndarinnar var lögð fyrir Evrópuráðið og þar voru m.a. upplýsingar um úttekt á framkvæmd Evrópuleikana í Ítalíu. Evrópuráðstefna Special Olympics Í kjölfar fundar EEAC var Evrópuráðstefna Special Olympics haldin í Tallinn dagana 24. - 25. nóvember. Fulltrúar Íslands voru Anna Karólína Vilhjálmsdóttir og Ásta Katrín Helgadóttir, íþróttagreinastjóri Special Olympics á Íslandi í frjálsum íþróttum. Helstu málefni ráðstefnunnar voru kynningar á fjölbreyttum verkefnum sem fram hafa farið auk þess sem kynnt voru ýmis alþjóðleg samstarfsverkefni. Samstarfsverkefni við heilbrigðis- og menntakerfið verða sífellt stærri þáttur á vegum samtakanna og sífellt meiri áhersla er lögð á samstarf vegna rannsókna og fræðistarfa. Íþróttastarfið er þó sá grunnþáttur sem starfsemin byggist á. Kynnt voru verkefni sem unnin hafa verið í tilgangi að efla samstarf við alþjóðasérsambönd og auka fjölbreytni í íþróttastarfinu. Spennandi samstarfsverkefni fatlaðra og ófatlaðra ungmenna voru kynnt á ráðstefnunni og kynnt var rannsókn um viðhorf þátttakenda í slíku samstarfsverkefni. Farið var yfir helstu atriði vegna alþjóðaleikanna í Shanghai 2007 en Kínverjar munu leggja mikinn metnað í undirbúning og ætla sér að gera opnunarhátíðina enn glæsilegri en opnunarhátíð ólympíuleikanna í Peking 2008! Löndunum var skipt í umræðuhópa þar sem rætt var um fjáraflanaleiðir, gæði starfsins, samskipti við fjölmiðla og fleira. Hópsstjórar skráðu niðurstöður og verða þær sendar til landanna en markmið var að safna hugmyndum og auka samvinnu milli landa. Samkvæmt þeim upplýsingum sem lagðar voru fyrir á ráðstefnunni er skráður fjöldi þátttakenda á vegum Special Olympics í Evrópu 436.000 en var um 200.000 árið 2000. Á alþjóðavettvangi eru skráðir þátttakendur yfir 2. 2 milljónir. Helstu markmið Special Olympics í Evrópu árin 2006 - 2010 eru eftirfarandi; Að auka gæði starfsins í hverju landi Að efla fjáraflanaleiðir í hverju landi Að efla samstarf við fjölmiðla og kynningarstarf í hverju landi Í lok ráðstefnunnar fór fram spennandi kjör um þrjú laus sæti í Evrópuráðinu. Fulltrúar frá Ítalíu , Tyrklandi og Uzbekistan náðu kjöri en aðeins munaði 5 atkvæðum á fulltrúa Ítalíu og Danmerkur |