Mótið var sérlega glæsilegt og mikið var lagt í mótssetningu og lokahóf. Á lokahófinu var Ólafur Ragnar Grímsson, forseti Íslands sérstakur heiðursgestur og á myndinni sést hann ávarpa gestina. Þar sagði hann m.a. að það hefði verið honum sérstök og eftirminnileg lífsreynsla að vera viðstaddur alþjóðaleika Special Olympics í Bandaríkjunum árið 1999.
Framtak Hængsmanna hefur vakið mikla athygli en frá því þeir hófu framkvæmd og skipulagningu íþróttamóts fyrir fatlaða fyrir 20 árum, hafa fleiri klúbbar fylgt í kjölfarið og staðið fyrir slíkum viðburðum í sínum heimabæ.
Það er mikilvægt fyrir íþróttahreyfinguna að hafa slíka liðsmenn til staðar og sérstaklega ánægjulegt í dag þegar sífellt reynist erfiðara að fá fólk til sjálfboðaliðastarfa innan íþróttahreyfingarinnar.
