Árið 1998 hófst samstarf við fyrirtækið vegna Ólympíumótsins í Sydney 2000 og nú hefur verið staðfestur áframhaldandi samningur vegna Ólympíumótsins í Aþenu 2004.
Íþróttasamband Fatlaðra, hefur fylgt sömu stefnu nú og fyrir undangengin Ólympíumót fatlaðra og lagt áherslu á markvissan undirbúning sem skipulagður er í samráði við landsliðsþjálfara ÍF. Mikill kostnaður fylgir slíkum undirbúningi og áhersla er lögð á að undirbúningshópurinn geti tekið þátt í sterkum mótum erlendis.
Sveinn Áki Lúðvíksson formaður ÍF, sem undirritaði samninginn fyrir hönd ÍF sagðist mjög ánægður með það samstarf sem verið hefur í gangi á milli ÍF og Haraldar Böðvarssonar hf og fagnaði því að fyrirtækið hefði ákveðið að endurnýja þennan samning nú, með það að markmiði að styðja ÍF vegna Ólympíumótsins í Aþenu 2004.
Haraldur Sturlaugsson framkvæmdastjóri, sem undirritaði samninginn fyrir hönd Haraldar Böðvarssonar hf, sagðist vona að þessi samstarfssamningur gerði ÍF kleift að undirbúa keppendur sem best fyrir Ólympíumótið í Aþenu og sagðist vera stoltur af því íþróttafólki sem keppt hefur fyrir Íslands hönd á Ólympíumótum fatlaðra.
Það væri fyrirtækinu sérstök ánægja að styðja fatlað íþróttafólk til dáða og styðja á þennan hátt starfsemi Íþróttasambands Fatlaðra.
 T.v. Haraldur Sturlaugsson framkvæmdastj. HB, t.h. Sveinn Áki Lúðvíksson formaður ÍF |
 Nýjasta skipi fyrirtækisins, Ingunni AK 150. Þarna er skipið búið að fylla sig af loðnu við Snæfellsjökul og hefur sett stefnuna á Akranes. |