Guðrúnarbikarinn er bikar sem gefinn var árið 2000 af Össurri Aðalsteinssyni til minningar um eiginkonu hans Guðrúnu Pálsdóttur.

Reglur

Handhafi hans skal valinn ár hvert af stjórn Íþróttasambands Fatlaðra.

Bikarinn skal afhendast árlega við það tilefni sem stjórn ÍF ákveður og verður því farandbikar, þar sem á verður áletrað nafn handhafa.

Bikarinn skal afhendast konu þeirri sem hefur starfað sérlega vel í þágu fatlaðs íþróttafólks. Bikarinn má afhenda fyrir störf að þjálfun, félagsstörfum eða öðrum þeim verkefnum sem talin eru hafa stuðlað að bættum hag fatlaðs íþróttafólks á árinu. Bikarinn skal afhendast árlega í 10 ár en eftir það skal hann varðveitast hjá Íþróttasambandi Fatlaðra.

Handhafi Guðrúnarbikarsins 2006

Reykjavík 13. 12. 2006

Íþróttasamband Fatlaðra, nýtur aðstoðar aðildarfélaga sinna, við val á þeirri konu sem hljóta skal Guðrúnarbikarinn. Eftir að tilnefningar höfðu borist fyrir árið 2006 komst stjórn ÍF að eftirfarandi niðurstöðu;

Guðrúnarbikarinn 2006, hlýtur Valgerður Hróðmarsdóttir

Valgerður Hróðmarsdóttir er ein af stofnendum íþróttafélagsins Fjarðar í Hafnarfirði. Foreldrar fatlaðra barna í Hafnarfirði voru helstu hvatamenna að stofnun félagsins en Valgerður á tvo fatlaða syni. Hún sat í fyrstu stjórn félagsins og var gjaldkeri félagsins í 12 ár. Eftir að hún hætti í stjórn félagsins hefur hún haldið áfram að sinna verkefnum fyrir félagið og hefur allt frá upphafi tekið virkan þátt í íþrótta- og félagsstarfi Fjarðar. Hún hefur verið fararstjóri og þjálfari á vegum ÍF á leikum Special Olympics erlendis og á norrænu barna og unglingamóti. Þá hefur hún verið fararstjóri á vegum íþróttafélagsins Fjarðar á fjölmörgum mótum og er einn helsti máttarstólpi félagsins.

Valgerður hefur verið sérlega góður liðsmaður sem er tilbúin til aðstoðar hvenær sem til hennar er leitað og hennar framlag til íþróttahreyfingar fatlaðra er mikils virði.

Stjórn Íþróttasambands Fatlaðra, telur að Valgerður Hróðmarsdóttir sé mjög vel að því komin að hljóta Guðrúnarbikarinn 2006