Norrænt barna- og unglingamót 2007

Norrænt barna- og unglingamót fatlaðra verður haldið á Íslandi dagana 29. júní til 6. júlí 2007 en mótin eru haldin annað hvert ár til skiptis á Norðurlöndunum. Þannig stóð Ísland/Íþróttasamband Fatlaðra að framkvæmd mótanna 1985 í Reykjavík og 1995 í Garðabæ.

Keppt verður í borðtennis, sundi og frjálsum íþróttum og verður mótið haldið í íþróttamannvirkjunum í Laugardal í Reykjavík en á mótið koma 140 þátttakendur (keppendur, fararstjórar, þjálfarar o.fl.).

Þátttakendur á þessum mótum eru á aldrinum 12-16 ára og hefur val miðast við að 5 þátttakendur séu hreyfihamlaðir, 5 heyrnarlausir / skertir, 5 þroskaheftir og 5 blindir/sjónskertir. Undanþága er þó veitt frá þessari reglu.

Hér á landi er valið úr tilnefningum aðildarfélaga ÍF auk þess sem reynt er að finna “nýja” iðkendur úti um land, sem ekki hafa fengið tækifæri til þátttöku í íþróttum.

Þetta mót er ekki eingöngu keppni heldur er lagt mikið upp úr félagslega þættinum þar sem farið verður í leiki, útsýnisferðir og haldnar kvöldvökur en af þessum mótum hafa einstaklingar komið heim með meiri reynslu og þekkingu á sjálfum sér og sinni getu ásamt því að kynnast erlendum börnum í svipuðum aðstæðum. Þetta mót hefur oftar en ekki orðið til þess að þessir einstaklingar fái aðra sýn á hvað þeir geta gert og hvað þeir vilja gera í framtíðinni, jafnt í íþróttum sem og öðru sem þeir taka sér fyrir hendur.

ÓSK UM AÐSTOÐ VEGNA FARARSTJÓRNAR

Hvert land má senda allt að 25 þátttakendur og 10 fararstjóra á þetta mót. Starf fararstjóra felst m.a. í umsjón með 1-3 börnum/unglingum alla dagana en mótið stendur yfir í viku. Aðstoðin við þessa keppendur er margvísleg, alveg frá því að minna á salernisferðir, lyfjatöku og upp í það að aðstoða við að mata, skera matinn, aðstoða á salerni, keyra hjólastóla o.s.frv.

Eins og staðan er núna að þá erum við búin að fá staðfesta 5 fararstjóra og vantar því 4 fararstjóra en áður var búið að ákveða að á þessu móti yrði íslenski hópurinn með 9 fararstjóra. Íslensku keppendurnir eru 23 talsins.

Við hvetjum alla þá sem hafa áhuga á að aðstoða við þetta skemmtilega en þó mjög krefjandi verkefni sem fararstjórn er, að hafa samband við skrifstofu Íþróttasambands Fatlaðra í síma 514 4080. Ekki er krafist þess að viðkomandi einstaklingur hafi reynslu af starfi með fötluðum en þó æskilegt.

Þeir einstaklingar sem valdir hafa verið hingað til í fararstjórn á þessum mótum hafa m.a. komið úr röðum foreldra/systkina fatlaðra, sjúkraþjálfara, þroskaþjálfa, íþróttakennara og kennara eða einfaldlega fólk sem hefur unnið lengi að málefnum fatlaðra á einhvern hátt og hefur þar af leiðandi mikla og góða reynslu.

Með von um skjót og jákvæð viðbrögð

F.h. undirbúningsnefndar NBU 2007

_____________________________

Anna Guðrún Sigurðardóttir

Sviðsstjóri Þjónustusviðs ÍF

if@isisport.is eða s. 514 4080