Útivistarhjólastólar - Forsaga málsins

Í júní 2005 stóðu 365 ljósvakamiðlar/ Ísland í býtið / Bylgjan fyrir söfnun í samvinnu við Íþróttasamband Fatlaðra þar sem safnað var fyrir kaupum á torfærustólum fyrir hreyfihamlaða

Fyrsti útivistarhjólastóllinn var pantaður í kjölfar þess að Heimir Karlsson og félagar á Stöð2 unnu um 200.000 kr. í getraunum og vildu að ÍF fengi að njóta afrakstursins.

Áhugi var á að finna einhvern hlut eða tæki sem kæmi hreyfingunni vel og ÍF leitaði til Paul Speight hjá fyrirtækinu Spoke´n motion í USA sem hefur framleitt m.a. vetraríþróttatæki fyrir fatlaða. Hann benti á þennan stól sem var nýkominn á markað og í framhaldi af því var hann pantaður til landsins.

Meðfylgjandi myndir eru frá afhendingu stólsins mánudaginn 6. júní 2005 en þá prófaði Svanur Ingvarsson stólinn í fjörunni og sjónum í Nauthólsvík. Þetta var algjörlega ný upplifun fyrir hann sem er hreyfihamlaður og mikill áhugamaður um útivist. Þegar fjölskyldan hefur farið í fjöruferð hefur hann beðið í bílnum þegar farið er í fjöruna en þetta tæki breytir því.

Stóllinn hentar vel til ferða á stöðum þar sem ekki er greiðfært á venjulegum hjólastólum og gefur hreyfihömluðum ný tækifæri til útivistar.

Við afhendingu stólsins í júní 2005 sköpuðust umræður um þá staðreynd að hefðbundnir hjólastólar eru hannaðir fyrir slétt undirlag og henta ekki til almennrar útivistar utan malbiksins.

Í kjölfar afhendingar stólsins og að frumkvæði Heimis Karlssonar hófu 365 ljósvakamiðlar / Ísland í Býtið/ Bylgjan, vikusöfnun í samvinnu við Íþróttasamband Fatlaðra. Markmið var að safna fyrir stólum sem staðsettir skyldu verða í hverjum landsfjórðungi til afnota fyrir hreyfihamlað fólk á öllum aldri. Kynnt var gildi þessa nýja tækis og fjölmargir gestir komu í þáttinn Ísland í Býtið til að ræða útivistarmöguleika hreyfihamlaðra.

Útkoma þessa verkefnis varð sú að pantaðir voru til landsins 11 stólar og komu þeir til landsins í janúar 2006. Sótt var um niðurfellingu á aðflutningsgjöldum en þeirri beiðni var hafnað á forsendum laga og reglugerða um undanþágur. Í kjölfarið var málið kært og nánari skilgreining mörkuð um formlega eigendur stólanna.

Í júlí 2006 barst loks svar þar sem staðfest var að málið hefði verið afgreitt með samþykki um niðurfellingu aðflutningsgjalda og í framhaldi af því var unnið að því að fá stólana leysta út.

Þeir verða sendir til skráðra eigenda en umsjónarmenn stóla verða þeir aðilar sem munu hafa yfirsýn yfir útlán og nýtingu þeirra á hverju svæði.

Þetta samstarfsverkefni hefur verið mjög lærdómsríkt og hefur skapað umræður um gildi þess að hreyfihamlaðir njóti útivistar eins og aðrir. Einnig hefur þetta verkefni sýnt fram á brýna þörf á að endurskoða lög og reglugerðir sem varða kaup á tækjum til útivistar fyrir hreyfihamlaða.

Þrátt fyrir þreytandi baráttu við kerfið er þetta eitt ánægjulegasta samstarfsverkefni sem ÍF hefur unnið að. ÍF hefur unnið að því að kynna ný tæki og búnað en mikill kostnaður fylgir slíku kynningarstarfi og því hefur það gengið mjög hægt. Þessi stuðningur er því ómetanlegur.

365 ljósvakamiðlar/Ísland í Býtið/Bylgjan og ekki síst Heimir Karlsson eiga skilið að fá miklar þakkir fyrir þeirra framlag.