Íþróttasamband Fatlaðra | þriðjudagur 27. desember 11:27
Camilla sæmd Gullmerki ÍSÍ
Framkvæmdastjórn ÍSÍ samþykkti á dögunum einróma að sæma Camillu Th. Hallgrímsson, varaformann Íþróttasambands fatlaðra, Gullmerki ÍSÍ fyrir góð störf í þágu íþróttahreyfingarinnar. Þann 14. desember sl. var jólamatur framreiddur í Íþróttamiðstöðinni í Laugardal og við það tækifæri afhenti Ellert B. Schram, forseti ÍSÍ, Camillu gullmerkið.

Íþróttasamband Fatlaðra | þriðjudagur 20. desember 12:52
Golfnámskeið fyrir hreyfihamlaða
GSFÍ, golfsamtök fatlaðra á Íslandi hafa staðið fyrir golfnámskeiðum undanfarin ár fyrir fatlaða einstaklinga. Þessi námskeið hafa verið vinsæl og margir hafa þar stigið sín fyrstu skref í golfi.
Nýtt golfnámskeið fyrir hreyfihamlaða hefst 4. janúar 2006. Æfingar verða á miðvikudögum kl. 16.00 - 18.00 hjá GR á Korpu. Þjálfari er David G Barnwell
Nánari upplýsingar veitir Hörður Barðdal, formaður GSFÍ, hordur@ehp.is

Íþróttasamband Fatlaðra | fimmtudagur 15. desember 16:46
Special Olympics á Íslandi hlýtur viðurkenningu KSÍ og UEFA
KSÍ og UEFA veittu Special Olympics á Íslandi viðurkenningu fyrir besta grasrótarviðburðinn í knattspyrnu fyrir fatlaða (Best disabled football event).
Viðurkenningin er fyrir vel skipulagða og árangursríka Íslandsleika Special Olympics, sem haldnir eru að jafnaði tvisvar á ári, en verið hefur gott samstarf milli KSÍ og Special Olympics á Íslandi, varðandi viðburðinn.
KSÍ hefur þegar afhent 50 knetti og 50 boli merkta UEFA sem munu verða afhentir keppendum á næstu Íslandsleikum sem verða í apríl 2006.

Á mynd f.v.: Anna Karólína Vilhjálmsdóttir framkvæmdastjóri Special Olympics á Íslandi, Ólafur Magnússon framkvæmdastjóri ÍF, Sveinn Áki Lúðvíksson forseti Special Olympics á Islandi, Geir Þorsteinsson framkvæmdastjóri KSÍ og Halldór Örn Þorsteinsson starfsmaður mótadeildar KSÍ

Íþróttasamband Fatlaðra | fimmtudagur 15. desember 14:43
Rúmfatalagerinn afhendir styrk
Í tengslum við útnefningu íþróttamanns og íþróttakonu ársins 2005 úr röðum fatlaðra afhentu fulltrúar Rúmfatalagersins styrk til Íþróttasambands Fatlaðra að upphæð þrjár milljónir króna.
Rúmfatalagerinn og Íþróttasamband Fatlaðra endurnýjuðu í byrjun þessa árs samstarfs- og styrktarsamning sín í milli samtals að upphæð tólf milljónir króna vegna undirbúnings og þátttöku Íslands í Ólympíumóti fatlaðra sem fram fer í Peking 2008 en með þessum samstarfssamningi þessum er Rúmfatalagerinn stærsti einstaki styrktaraðili sambandsins.
Það var Sveinn Áki Lúðvíksson, formaður Íþróttasambands Fatlaðra sem veitti styrkupphæðinni viðtöku frá fulltrúum Rúmfatalagersins þeim Magnúsi Sigurðssyni, framkvæmdastjóra og Bjarka Beck markaðs- og auglýsingastóra.

Íþróttasamband Fatlaðra | fimmtudagur 15. desember 14:09
ÍÞRÓTTAMAÐUR OG ÍÞRÓTTAKONA ÁRSINS 2005
Miðvikudaginn 14. desember s.l. hélt Íþróttasamband Fatlaðra hóf, á Radisson SAS - Hótel Sögu þar sem tilkynnti var hvaða íþróttamaður og íþróttakona hlutu titlana Íþróttamaður og Íþróttakona ársins 2005.
Að þessu sinni voru það þau Kristín Rós Hákonardóttir, sundkona úr Fjölni og Jón Oddur Halldórsson, frjálsíþróttamaður úr Reyni sem hlutu viðurkenningarnar.
Í tengslum við valið var einnig afhentur svokallaður "Guðrúnarbikar" en þann bikar hlýtur sú kona sem þykir hafa staðið sig einstaklega vel í félags,- stjórnar eða þjálfunarstörfum í tengslum við íþróttir fatlaðra.
Að þessu sinni hlaut Erna Maríusardóttir keiluþjálfari hjá Íþróttafélaginu Ösp bikarinn. Erna hefur verið keiluþjálfari Aspar í um 15 ár og auk þess sinnt óeigingjörnu starfi s.s. við aðstoð og fararstjórn á mótum innanlands og erlendis.
Nánar

Íþróttasamband Fatlaðra | þriðjudagur 13. desember 16:06
Styrkur til Íþróttasambands fatlaðra
Faxaflóahafnir sf. afhentu á dögunum Íþróttasambandi Fatlaðra styrk til starfsemi sambandsins. Sú hefð hefur skapast hjá Faxaflóahöfnum sf. að í stað þess að senda út jólakort er sambærilegri peningaupphæð veitt til stuðnings góðra málefna og varð Íþróttasamband Fatlaðra fyrir valinu að þessu sinni.
Ólafur Magnússon, framkvæmdastjóri fjármála- og afrekssviðs ÍF veitti styrknum viðtöku en það var Árni Þór Sigurðsson, formaður stjórnar, sem afhenti styrkinn.

Íþróttasamband Fatlaðra færir Faxaflóahöfnum sf. sínar bestu þakkir fyrir þennan höfðinglega styrk.

Íþróttasamband Fatlaðra | föstudagur 9. desember 15:27
Kristín Rós og Jón Oddur hljóta afreksstyrk ÍSÍ
[Frétt af www.olympic.is]
ÍSÍ úthlutar rúmlega 60 milljónum til afreksstarfs
ÍSÍ hélt blaðamannafund nú í hádeginu þar sem tilkynnt var um afgreiðslu framkvæmdastjórnar ÍSÍ á tillögum til styrkveitinga úr Afrekssjóði ÍSÍ, Ólympíufjölskyldu og Sjóði ungra og efnilegra íþróttamanna fyrir árið 2006. Með því að ákveða styrki með svo góðum fyrirvara er sérsamböndum og íþróttafólki auðveldað að gera áætlanir.
Styrkveitingar að þessu sinni nema samtals rúmlega 60 milljónum króna. Afrekssjóður hefur enn fjármagn til aflögu á næsta ári og verður það fjármagn nýtt í samræmi við árangur og verkefni sérsambandanna.
Þrátt fyrir góðan styrk að þessu sinni er enn langt í land að styrkir ÍSÍ standi undir afreksstarfi sérsambandanna. Þegar skoðaðar eru umsóknir sérsambandanna í hina þrjá sjóði ÍSÍ, sést eftirfarandi:
• Kostnaðaráætlanir sérsambanda vegna verkefna umsókna til Afrekssjóðs ÍSÍ 2006 nema 270 milljónum króna. Framlag ríkisins til Afrekssjóðs ÍSÍ nemur 30 milljónum króna á árinu 2006, eða um 11% af umsóknum sérsambanda. Framlag Afrekssjóðs ÍSÍ til sérsambanda nemur um 15% af kostnaðaráætlun þeirra.
• Kostnaðaráætlanir sérsambanda vegna verkefna Ólympíufjölskyldu nema um 170 milljónum króna og framlag því 5% af kostnaðaráætlun. Rétt er að taka fram að í sumum tilfellum er sótt um sömu verkefnin í þessa tvo sjóði.
• Kostnaðaráætlanir sérsambanda vegna umsókna í Sjóð ungra og efnilegra nam um 100 milljónum króna. Framlag sjóðsins að þessu sinni er um 10 milljónir eða um 10% af kostnaðaráætlunum.

Íþróttasamband Fatlaðra | föstudagur 9. desember 14:55
Borðtennis; HM þroskaheftra og Stockholm Games

Nýverið tóku íslenskir borðtennismenn þátt í Heimsmeistaramóti þroskaheftra sem fram fór í Frakklandi og í Stockholm Games sem haldið var í Svíþóð. Á Heimsmeistaramóti þroskaheftra sem fram fór í Thouars í Frakklandi tóku þær Gyða Gunnarsdóttir og Sunna Jónsdóttir þátt fyrir Íslands hönd Í liðakeppni sigruðu þær portúgalska liðið og höfnuðu í 5.-6. sæti af 10 liðum. Í einliðaleik unnu stúlkurnar einn leik hvor í sínum riðli. Tóku þær síðan þátt í aukakeppni þeirra sem ekki komust áfram úr sínum riðlum en í aukakeppninni hafnaði Gyða í 2. sæti og Sunna í 5.-8. sæti. Í tvíliðaleik höfnuðu þær í 5.-8. sæti af 10 pörum en þær stöllur töpuðu á móti pari frá Hong Kong sem síðan vann keppnina. Texti og myndir

Á Stockholm open kepptu þeir Jóhann R. Kristjánsson sem keppir í flokki C2 og Viðar Árnason sem keppir í flokki flokki C4 Jóhann varð í 3. sæti í einliðaleik í sínum flokki C2. Hann varð einnig í 3. sæti í liðakeppni þar sem hann keppti með Ítalaum Julius Lampacher. Þar var svo jöfn keppni að það varð að telja lotur svo að úrslit fengust þar sem að liðin í sætum 1 - 3 voru öll jöfn. Í opnum flokki lenti Jóhann á móti næst sterkasta spilaranum í flokki C5 og það var ójafn leikur. Viðar Árnason vann ekki leik á Svíþjóðarmótinu að þessu sinni.

Íþróttasamband Fatlaðra | mánudagur 5. desember 09:42
Sarah Reinertsen á Íslandi
Þessa dagana er stödd hér á landi í boði Össurar hf. Sarah Reinertsen. Sarah, sem nú starfar fyrir Össur er aflimuð og hefur náð frábærum árangri sem íþróttamaður. Þannig hefur hún m.a. tekið þátt í Ólympíumótum fatlaðra en síðasta afrek hennar var að hún komst í gegnum Iron-man keppnina í Bandaríkjunum þar sem þarf að hlaupa, hjóla og synda í sjó og er hún er fyrsta aflimaða konan sem nær þessum árangir. Í kjölfarið hefur hún hlotið mikla athygli og komið víða fram til að segja sína sögu um hverju íþróttir fái áorkað.
Nánar

Íþróttasamband Fatlaðra | miðvikudagur 30. nóvember 18:07
Aðalfundur IPC
Á aðalfundi IPC (Alþjóða Ólympíuhreyfingar fatlaðra) sem haldinn var í Peking 18. - 19. nóvember sl. voru málefni þroskaheftra íþróttamann meðal annars til umfjöllunar. Í skýrslu stjórnar IPC, sem lögð var fram á aðalfundinum, kom fram að flokkunarform það sem INAS-Fid (Alþjóðasamtök þroskaheftra íþróttamanna) ynni nú eftir teldist fullnægjandi, auk þess sem rannsóknarvinnu varðandi tengsl þroskahömlunar og íþróttalegrar getu miðaði vel áfram. Lagði stjórn IPC því til við aðalfundinn að stjórninni, í samvinnu og samráði við íþróttanefndir, yrði gert að taka endanlega ákvörðun um þátttöku þroskaheftra íþróttamanna á Ólympíumótinu 2008 eigi síðar en í júnímánuði 2006. Var tillaga þessi samþykkt og má því fastlega ætla að þroskaheftir íþróttamenn verði aftur meðal þátttakenda á Ólympíumótum fatlaðra en þeim var í kjölfar svindlmála sem upp komu í Sydney árið 2000 meinuð þátttaka í íþróttamótum sem fram hafa farið á vegum IPC.
Nánar

Íþróttasamband Fatlaðra | mánudagur 28. nóvember 23:14
Íslandsmót Íþróttasambands Fatlaðra í sundi - 25m laug
Íslandsmót Íþróttasambands Fatlaðra í sundi í 25 metra laug varið haldið í nýju sundlauginni í Laugardal.
Á mótinu tóku alls þátt um 100 keppendur frá 7 aðildarfélögum ÍF.
Úrslit mótsins
Myndir frá mótinu

Íþróttasamband Fatlaðra | föstudagur 25. nóvember 22:03
Íslandsmót Íþróttasambands Fatlaðra í sundi í 25 m laug
Íslandsmót Íþróttasambands Fatlaðra í sundi í 25 m laug fer fram helgina 26. - 27. nóvember í nýju sundlauginni í Laugardal í Reykjavík .
Mótið hefst kl 15.00 og stendur til 17.00/ 17.30 á laugardag og kl. 10.00 - 12.00 /12.30 á sunnudag.
Umsjón og framkvæmd er í höndum sundnefndar ÍF og allar nánari upplýsingar gefur Ingi Þór Einarsson, s. 6947323.
Fötluð börn og foreldrar þeirra eru sérstaklega hvött til þess að koma og fylgjast með.

Íþróttasamband Fatlaðra | miðvikudagur 16. nóvember 17:28
Formannafundur ÍF
Formannafundur ÍF var haldinn laugardaginn 12. nóvember í Íþróttamiðstöðinni í Laugardal.
Helstu mál fundarins voru málefni sem varða Íslandsmót ÍF, alþjóðleg flokkunarmál og samstarf IF og ÍSÍ varðandi reglugerð afreksmannasjóðs ÍSÍ.
Rætt var m.a. um gildi þess fyrir aðildarfélög ÍF að standa að Íslandsmótum ÍF í heimabyggð. Kynnt voru svör við spurningalista til aðildarfélaga ÍF, stjórna, iðkenda, foreldra og þjálfara. Unnið verður að uppbyggingu starfsins m.t.t. þess sem fram kom en tveir meginþættir komu fram í svörum allra hópa. Aukin fjölbreytni og gildi góðs samstarfs á ýmsum sviðum, voru taldir meginþættir til eflingar starfsins. Kynnt voru ýmis alþjóðamál, s.s. málefni IPC og INAS FID.
Kynnt voru verkefni á vegum Special Olympics en helsta verkefni framundan eru Evrópuleikar í Róm, árið 2006. Einnig voru kynnt ýmis samstarfsverkefni innanlands og fyrirhuguð heimsókn skíðakennara frá Challenge Aspen til Íslands í febrúar 2006. Lagður var fram verkefnalisti ársins 2006, innanlands og erlendis. Aðildarfélögum ÍF var þakkað gott samstarf vegna átaks félaga undanfarin ár við nýliðunarstarf en markviss áhersla hefur verið lögð á kynningu á starfi nokkurra félaga og hefur það skilað sér mjög vel með fjölgun ungra iðkenda sérstaklega í sundíþróttinni. Óskað var eftir því að fleiri félög fylgi fordæmi þeirra félaga sem náð hafa árangri með sínu markvissa kynningarstarfi. Kynnt var áframhaldandi átak við að ná til barna og unglinga en bæklingur sem gefinn var út í þeim tilgangi árið 2003 hefur verið endurútgefinn og stefnt er að því að hægt verði að dreifa honum markvisst um land allt.
Fundargerð formannafundar verður aðgengileg á heimasíðu ÍF auk skýrslu ÍF fyrir formannafund.

Íþróttasamband Fatlaðra | föstudagur 11. nóvember 19:46
Nefndarfundur ÍF
Fundur með fulltrúum íþróttanefnda ÍF var haldinn 9. nóvember sl. í Íþróttamiðstöðinni í Laugardal.
Meðal þess sem rætt var um á fundinum var tímasetning Íslandsmóta ÍF, samtenging greina og fyrirvari tilkynninga vegna móta. Einnig var verkefnaáætlun og markmiðssetning íþróttanefnda rædd en í tengslum við gerð kostaðnaðaráætlana og eftirfylgni við afreksstefnu ÍF ber íþróttanefndunum að senda árlega til skrifstofu ÍF slíkar upplýsingar.
Eins og ávallt á nefndarfundum ÍF urðu líflegar umræður um ofangreind mál sem og önnur mál sem snéru að framtíð íþrótta fatlaðra.
Næsti fundur með íþróttanefndum ÍF er fyrirhugaður um miðjan maímánuð 2006.

Íþróttasamband Fatlaðra | þriðjudagur 1. nóvember 11:55
Námskeiði um sundþjálfun fatlaðra
Nýverið stóð sundnefnd ÍF fyrir námskeiði um sundþjálfun fatlaðra. Á námskeiðinu var meðal annars farið yfir skipulag tækniþjálfunar fatlaðra sundmanna, tæknigreiningu, þau lágmörk sem í gildi eru vegna móta ársins 2006 og fleira tengdu fræðslu fyrir sundþjálfara fatlaðra.
Samhliða námskeiðinu fór fram Reykjavíkurmót fatlaðra í sundi þar en þar gafst þátttakendum á námskeiðinu kostur á að fylgjast með og greina tækni þeirra sundmanna sem þar kepptu.
Námskeiðið þótti takast mjög og gefur þátttakendum án efa hvatningu auk nýrra hugmynda varðandi sundþjálfun fatlaðra.
Leiðbeinendur á námskeiðinu voru þau Ingi Þór Einarsson, formaður sundnefndar ÍF og Kristín Guðmundsdóttir, annar landsliðsþjálfara IF í sundi.
Glærukynning

Íþróttasamband Fatlaðra | föstudagur 28. október 12:03
Heimsmeistaramót þroskaheftra í borðtennis
Dagana 24.-30. október 2005 er haldið í Frakklandi Heimsmeistaramót þroskaheftra í borðtennis og er þetta í 4 skipti sem mótið er haldið.

Ísland sendir nú í fyrsta skipti keppendur á þetta mót og eru það þær Gyða K. Guðmundsdóttir og Sunna Jónsdóttir sem keppa fyrir Íslands hönd. Þjálfari þeirra er Helgi Þ. Gunnarsson.

Íþróttasamband Fatlaðra | föstudagur 28. október 09:13
Stjórnarfundur Nord HIF
Stjórnarfundur Nord HIF fór fram í Kiruna í Svíþjóð, dagana 21. - 23. október. Á fundinum voru tekin fyrir málefni sem tengjast íþróttastarfi fatlaðra, norrænt samstarf á sviði mótahalds og barna og unglingastarfs og alþjóðasamstarf. Á dagskrá fundarins var m.a.lögð fram ný reglugerð vegna norræns barna og unglingamóts sem haldið er annað hvert ár en næsta mót verður haldið á Íslandi árið 2007. Nánar

Íþróttasamband Fatlaðra | þriðjudagur 18. október 13:14
Úrslit Opna Reykjavíkurmótsins í sundi
Opna Reykjavíkurmótið í sundi fór fram nú um helgin þann 15. október samhliða áður auglýstri fræðsluhelgi. Á mótinu féllu 8 Íslandsmet.
Úrslit mótsins

Íþróttasamband Fatlaðra | þriðjudagur 11. október 15:17
Fræðsluhelgi 14. - 16. október - Sundþjálfun fatlaðra
Sundnefnd IF stendur fyrir "Fræðsluhelgi" 14. - 16. október í Laugardalslaug.
Þar verður boðið upp á fjölbreytta dagskrá alla helgina sem tengist fræðslu fyrir sundþjálfara fatlaðs sundfólk.
Æfingabúðir verða í boði sem opnar eru öllu áhugasömu sundfólki sem hefur metnað til að ná langt.
Opna Reykjavíkurmótið í sundi verður einnig sett á í tengslum við dagskrá helgarinnar. ÍF útvegar þjálfurum af landsbyggðinni flugmiða hjá FÍ og séð verður um fæði á meðan á dagskrá stendur. Annar kostnaður, gisting og uppihald er greitt af þátttakendum.
Dagskrá helgarinnar

Íþróttasamband Fatlaðra | þriðjudagur 11. október 14:57
Úrslit frá Evrópumeistaramótinu í borðtennis
Nýverið lauk Evrópumeistaramóti fatlaðra í borðtennis sem fram fór í Jesolo á Ítalíu. Á mótinu, sem stóð yfir frá 15. - 26. september sl., tóku þátt 336 keppendur frá 35 löndum en þeirra á meðal voru þeir Jóhann R. Kristjánsson sem keppir í flokki C2 og Viðar Árnason sem keppir í flokki C4.
Á alþjóðlegum mótum er keppt í flokkum C1 til C10 þar sem lægsta talan gefur til kynna mestu fötlun og sú hæsta minnstu fötlun. Flokkar C1 - C5 eru sitjandi flokkar og C6 - C10 standandi flokkar.
Jóhann vann einn leik í sínum flokki C2 auk þess að vinna einn leik í liðakeppni í flokki C4 en þar keppti Jóhann “upp fyrir sig” þ.e. keppti móti einstalingum með minni fötlun. Athygli vekur einnig að Jóhann tapar nánast öllum viðureignum sínum mjög naumlega og oftast í oddaleikjum - vafalaust kemur því fyrr en seinna að sigrarnir lenda hans megin.
Viðar tapaði hins vegar öllum sínum leikjum á mótinu.
Nýverið lauk Evrópumeistaramóti fatlaðra í borðtennis sem fram fór í Jesolo á Ítalíu. Á mótinu, sem stóð yfir frá 15. - 26. september sl., tóku þátt 336 keppendur frá 35 löndum en þeirra á meðal voru þeir Jóhann R. Kristjánsson sem keppir í flokki C2 og Viðar Árnason sem keppir í flokki C4.
Á alþjóðlegum mótum er keppt í flokkum C1 til C10 þar sem lægsta talan gefur til kynna mestu fötlun og sú hæsta minnstu fötlun. Flokkar C1 - C5 eru sitjandi flokkar og C6 - C10 standandi flokkar.
Jóhann vann einn leik í sínum flokki C2 auk þess að vinna einn leik í liðakeppni í flokki C4 en þar keppti Jóhann “upp fyrir sig” þ.e. keppti móti einstalingum með minni fötlun. Athygli vekur einnig að Jóhann tapar nánast öllum viðureignum sínum mjög naumlega og oftast í oddaleikjum - vafalaust kemur því fyrr en seinna að sigrarnir lenda hans megin.
Viðar tapaði hins vegar öllum sínum leikjum á mótinu.
Nánar

Íþróttasamband Fatlaðra | mánudagur 10. október 14:05
Íslandsleikar Special Olympics í knattspyrnu
Íslandsleikar Special Olympics í knattspyrnu fóru fram á Sauðárkróki 24. september.
Upphitun var í höndum Sveinbjörns Jóns Ásgrímssonar þjálfara meistaraflokks Tindastóls í knattspyrnu. Framkvæmdastjóri knattspyrnudeildar Tindastóls sá um röðun leikja, útvegaði aðstöðu og kom okkur í skjól þegar þurfti að færa mótið inn í hús vegna vetrarveðurs norðan heiða.
Haukur formaður Eikar sá um að setja mótið fyrir hönd Norðanmanna.
Lið Grósku tefldi fram liði í fyrsta sinn í þessum mótum og höfðu margir á orði að í Skagafirðinum leynist margur knattspyrnusnillingurinn ef vel er að gáð. Salmína formaður Grósku hafði fengið nokkra liðsmenn meistaraflokks Tindastóls í lið með sér til að kenna heimamönnun nokkur grundvallaratriði í knattspyrnu þegar Gróskumenn höfðu ákveðið að vera þátttakendur í SO í knattspyrnu. Vonum við svo sannarlega að við eigum eftir að sjá leikmenn frá Grósku á næstu SO leikum í knattspyrnu.
Í lokin var öllum boðið í pizzuveislu í félagsheimilið Merkigil en þar réð Salmína formaður Grósku ríkjum og hennar maður Steini og reiddu þau hverja pizzuna af fætur annari fram á borð.
Íþróttasamband Fatlaðra þakkar knattspyrnunefnd ÍF og KSÍ, Knattspyrnudeild Tindastóls og íþróttafélaginu Grósku fyrir gott samstarf.
Úrslit
Myndir frá mótinu

Íþróttasamband Fatlaðra | miðvikudagur 5. október 21:02
Þjálfararáðstefna Nord-HIF 2005
Dagana 23. - 25. september sl. var haldinn í Malmö í Svíþjóð Norræn þjálfara og leiðbeinendaráðstefna. Ráðstefna þessi var haldin á vegum Nord-HIF (Íþróttasambanda fatlaðra á Norðurlöndum) og með fjárhagslegum styrk Norðurlandaráðs en tilgangur hennar var að fá fram hugmyndir um aukið og betra samstarf Norðurlandanna um málefni íþrótta fatlaðra.
Ráðstefnuna sóttu fulltrúar þeirra íþróttagreina sem keppendur eiga á Ólympíumótum fatlaðra auk þeirra aðila sem tengjast afrekssviðum hvers lands.
Nánar

Íþróttasamband Fatlaðra | mánudagur 3. október 12:40
Frábært samstarfsverkefni íþróttafélaga á Austurlandi
Íslandsmót Íþróttasambands Fatlaðra í boccia einstaklingskeppni, fór fram um helgina á Seyðisfirði Mótið var haldið í umsjón íþróttafélagsins Örvars á Egilsstöðum og Viljans á Seyðisfirði.
Félagar úr Lionsklúbbnum Múla á Egilsstöðum og Lionsklúbbi Seyðisfjarðar sáu um dómgæslu á mótinu en Lionsmenn hafa stutt íþróttastarfsemi fatlaðra á Austfjörðum í fjölda ára. Fjölmargir heimamenn aðstoðaðu íþróttafélögin við framkvæmd mótsins og fólk tók frí úr vinnu til að leggja hönd á plóg. Eldri grunnskólanemendur aðstoðuðu dómarana og yngstu bekkir grunnskóla og leikskólabörn mættu á mótssetninguna með starfsfólki skólanna.
Að venju gaf Lionsklúbburinn Víðarr öll verðlaun á mótinu en klúbburinn gefur öll verðlaun á Íslandsmótum Íþróttasambands Fatlaðra.
Öll framkvæmd mótsins tókst mjög vel og samstarf félaganna á Austurlandi var til mikillar fyrirmyndar.
Íslandsmót í boccia einstaklingskeppni hefur undanfarin ár verið haldið á haustin og mótið hefur verið staðsett á þeim stöðum sem aðildarfélög ÍF eru með starfsemi sína. Tilgangur með því að þetta mót sé í umsjón aðildarfélaga hefur verið að vekja athygli á starfseminni á hverjum stað, bæta aðstöðu ef þörf er á m.t.t aðgengismála og efla starfið á landsvísu.
Íþróttasamband Fatlaðra vill koma á framfæri þakklæti til þeirra sem stóðu að mótinu og óskar Austfirðingum til hamingju með glæsilega framkvæmd.
Úrslit mótsins

Íþróttasamband Fatlaðra | fimmtudagur 29. september 09:43
Íslandslmót ÍF í boccia einstaklingskeppni
Íslandslmót Íþróttasambands Fatlaðra í boccia einstaklingskeppni, fer fram á Seyðisfirði, dagana 31. sept - 1. okt.

Umsjónaraðilar eru íþróttafélögin Örvar á Egilsstöðum og Viljinn á Seyðisfirði. Keppendur koma víða af að landinu.
Þetta Íslandsmót hefur undanfarin ár verið haldið á ýmsum stöðum á landinu í umsjón aðildarfélaga ÍF á hverjum stað.

Áhersla hefur verið lögð á að halda mótin úti á landsbyggðinni, vekja athygli á starfi aðildarfélaga ÍF og stuðla þannig að uppbyggingu íþróttastarfsins og úrbótum í aðgengismálum.

Íþróttasamband Fatlaðra fagnar framtaki félaganna á Austurlandi að standa saman að skipulagi þessa Íslandsmóts en keppt verður í glæsilegu nýju íþróttahúsi á Seyðisfirði.

Íþróttasamband Fatlaðra | miðvikudagur 14. september 11:20
Evrópumeistaramót í borðtennis
Dagana 15. - 26. september n.k. munu tveir íslenskir borðtennismenn, þeir Jóhann R. Kristjánsson og Viðar Árnason taka þátt í Evrópumeistaramóti fatlaðra í borðtennis en mótið fer fram í Jesolo á Ítalíu.
Jóhann Rúnar keppir í flokki C2 og Viðar í flokki C5 en rúmlega 350 keppendur eru skráðir til leiks í flokka C1 - C10.
Jóhann Rúnar var einn af íslensku keppendunum sem þátt tóku í Ólympíumóti fatlaðra í Aþenu 2004 sýndi þar að hann er kominn í hóp sterkustu borðtennismanna heims í sínum flokki og verður fróðlegt að fylgjast með frammistöðu hans á þessu móti.
Þjálfari og fararstjóri er Kristján Jónasson.

Allar nánari upplýsingar um mótið má finna á www.ttecjesolo2005.it

Íþróttasamband Fatlaðra | mánudagur 12. september 15:13
Bronsverðlaun Báru Bergmann
Í dag lauk keppni á Heimsmeistaramóti þroskaheftra í sundi. Íslensku sundmennirnir tóku þátt í fjórum úrslitasundum og var afraksturinn ein verðlaun þar sem Bára Bergmann Erlingsdóttir hafnaði í þriðja sæti í 200 m bringusundi, synti á tímanum 3:37.60 mín. Í 200 m flugsundi hafnaði hún í fjórða sæti eins og Gunnar Örn Ólafsson sem hafnaði í fjórða sæti í 50 m flugsundi, sjónarmun eftir þeim sem verðlaun hlutu í sundinu.

Alls unnu því íslensku keppendurnir til þriggja silfurverðlauna og fimm bronsverðaluna auk þess að setja þrjú Íslandsmet.

Íþróttasamband Fatlaðra | föstudagur 9. september 12:41
Úrslit á HM þroskaheftra 8. september
Árangur okkar fólks í dag var eftirfarandi.

Gunnar Örn Ólafsson vann í dag til þriggja bronsverðlauna í 100 m flugsundi sem hann synti á tímanum 1:06.73, í 200 m fjórsundi á tímanum 2:29.94 og í 200 m baksundi sem hann synti á tímanum 2:31.96.

Hin síunga, 33 ára gamla Bára Bergmann vann til bronsverðlauna í 400 m fjórsundi, synti á tímanum 6:34.70 og setti síðan Íslandsmet í 400 m skriðsundi sem hún synti á tímanum 5:34.04 mín.

Jón Gunnarsson hafnaði í 5. sæti í 200 m fjórsundi og Úrslúla Baldursdóttir í 8. sæti í 100 m baksundi.

Íþróttasamband Fatlaðra | fimmtudagur 8. september 09:38
Silfurverðlaun Gunnars Arnar
Í morgun tóku þau Gunnar Örn Ólafsson, Jón Gunnarsson og Úrslúla Baldvinsdóttir þátt í undanrásum á HM þroskaheftra, Gunnar Örn og Jón Gunnarsson í 50 m baksundi og 100 m skriðsundi og Úrsúla Baldvinsdóttir í 100 m bringusundi.
Gunnar Örn synti sig “inn” í úrslitin sem og Úrsúla auk þess sem hún tekur þátt í úrslitum í 200 m skriðsundi.

Í úrslitum í 100 m skriðsundi hafnaði Gunnar Örn í öðru sæti, synti á tímanum 58.65 sek sem er nýtt í flokki þroskaheftra. Gunnar hafnaði síðan í 8. sæti í 50 m baksundi.
Úrsúla Baldvinsdóttir hafnaði síðan í 5. sæti bæði í 100 m bringusundi og 200 m skriðsundi.

Íþróttasamband Fatlaðra | miðvikudagur 7. september 16:13
Tvenn silfurverðlaun á HM þroskaheftra
Nú stendur yfir í Liberec í Tékklandi Heimsmeistaramót þroskaheftra í sundi.
Keppni á mótinu hófst í dag af aflokinni veglegri opnunarathöfn en þá tóku þau Gunnar Örn, Jón Gunnarsson, Bára Bergmann og Úrsúla Baldursdóttir öll í undanrásum þeirra greina sem þau voru skráð til þátttöku í.
Öll syntu þau sig “inn” í úrslit, Gunnar Örn í 100 m baksundi sem hann synti á tímanum 1:07.91 sem er nýtt Íslandsmet í flokki þroskaheftra, Jón Gunnarsson í 400 m skriðsundi, Bara i 100 m flugsund og 800 m skriðsundi og Úrsúla í 200m fjórsundi og 800 m skriðsundi.
Í úrslitasundinu sem fram fór nú síðdegis hafnaði Gunnar Örn í 2. sæti í 100 m baksundi og bætti Íslandsmet sitt frá því fyrr um daginn er hann synti á 1:07.45 mín.
Í 200 m fjórsundi hafnaði Úrsúla Baldursdóttir í 2. sæti í 200 m fjórsundi, synti á 3:05.44 mín. Í 800 m skriðsundi hafnaði Úrsúla í 6. sæti og hin gamalreynda Bára Bergmann hafnaði í 5. sæti í sama sundi synti á 11:33.94 mín sem er aðeins 5 sekúndubrotum frá Íslandsmeti hennar sem hún setti 1998.
Í 100 m flugsundi endaði Bára í 6. sæti og að lokum hafnaði Jón Gunnarsson í 8. sæti í 400 m skriðsundi.
Keppnisdagskráin framundan

Íþróttasamband Fatlaðra | mánudagur 5. september 14:25
HM þroskaheftra í sundi, Liberec Tékklandi
Dagana 6. - 10. september fer fram í Liberec í Tékklandi Heimsmeistaramót þroskaheftra í sundi.
Fjórir íslenskir sundmenn taka þátt í mótinu en það eru þau Gunnar Örn Ólafsson, Jón Gunnarsson, Bára B. Erlingsdóttir og Úrsúla Baldursdóttir.
Allir sterkustu sundmenn þroskaheftra munu taka þátt í mótinu en keppendur koma frá 20 löndum. Á Heimsmeistaramótinu sem haldið var í Hong Kong í ársbyrjun 2004 vann Gunnar Örn m.a. tveggja gullverðlauna, einna silfurverðlauna og þriggja bronsverðlauna. Vonandi nær hann að fylgja þeim glæsilega árangri eftir því hann er óumdeilanlega einn besti sundmaður þroskaheftra í heiminum í dag.
Þjálfarar og fararstjórar eru þau Ingigerður M. Stefánsdóttir og Ólafur Þórarinsson.
Nánar

Íþróttasamband Fatlaðra | föstudagur 2. september 15:18
Nú er Kjartan að koma!
Síðustu 89 daga hefur Kjartan Jakob Hauksson, ræðari, unnið að því hörðum höndum að róa kringum Ísland. Ekkert bendir til annars en að það takist og Kjartan komi í höfn á morgun, laugardaginn 3. sept. og leggi árabáti sínum „Frelsinu“ við Ægisgarð. Síðasta mánudagskvöld kom Kjartan til Sandgerðis og hafði þá róið í rúmlega 10 klukkustundir frá Grindavík og lagt að baki 26,7 sjómílur eða rétt tæpa 50 kílómetra.

Tilgangur Kjartans með ferðinni er að láta gamlan draum rætast en eftir að hann kom til liðs við Sjálfsbjörg sem hjálparliði, ákvað hann að freista þess að safna fé í hjálparliðasjóð samtakanna, sem þá var þurrausinn.

Ferð sína nefnir Kjartan FRELSI. Með því vill hann benda þeim á sem hjálparlaust komumst ferða sinna, að sumir samferðamenn okkar komast ekkert án hjálpar. Því varð hjálparliðasjóðurinn og hópur hjálparliða til.

Um leið og við óskum þér farsældar í framtíðinni, vonum við að þú sjáir þér fært að taka á móti Kjartani, sem mun leggja að vesturhöfninni við Ægisgarð, að öllu óbreyttu á morgun, laugardag á milli kl. 16 og 17.

Íslenskt veðurfar getur sett strik í reikninginn og Kjartan tafist, en veðurspá lofar góðu. Þess vegna verður komutími hans auglýstur í fjölmiðlum og einnig á vefsíðu Sjálfsbjargar - sjalfsbjorg.is en þar er jafnframt hægt að kynna sér ferð Kjartans á leið hans kringum landið.

Með bestu kveðju,
f.h Hjálparliðasjóðs Sjálfsbjargar
Guðríður Ólafsdóttir formaður.

Íþróttasamband Fatlaðra | fimmtudagur 25. ágúst 17:45
Breyting á reglugerð afreksmannasjóðs
Stjórnir Íþrótta- og Ólympíusambands Íslands (ÍSÍ) og Íþróttasambands Fatlaðra (ÍF) hafa einróma komist að samkomulagi varðandi styrkjafyrirkomulag til framtíðar fyrir fatlaða íþróttamenn.
Hingað til hefur ÍF fengið árlega styrkupphæð frá Afrekssjóði ÍSÍ til að styrkja íþróttamenn sína. Stjórnir ÍSÍ og ÍF leggja áherslu á að fatlaðir íþróttamenn hafi sömu réttindi og skyldur og ófatlaðir íþróttamenn.
Frá og með 1. janúar 2006 getur ÍF sótt um afreksstyrki fyrir sitt íþróttafólk á sama grundvelli og önnur sérsambönd ÍSÍ. ÍSÍ mun krefjast upplýsinga um stöðu íþróttamanna á styrkleikalistum alþjóðasambanda og gera kröfur um árangur, ástundun og eftirlit.
Í dag eru a.m.k. 2 - 3 íþróttamenn á vegum ÍF sem falla undir A-skilgreiningar Afrekssjóðs ÍSÍ og nokkri aðrir efnilegir íþróttamenn munu án efa bætast í þann hóp á næstunni.
Með þessu samkomulagi er jafnrétti á þessu sviði tryggt og vonast samböndin til að hið nýja fyrirkomulag verði hvati fyrir fatlaða íþróttamenn til frekari framfara í íþrótt sinni.
Nánari upplýsingar um málið gefa Stefán Konráðsson framkvæmdastjóri ÍSÍ í síma 514 4000 og Ólafur Magnússon framkvæmdastjóri ÍF í síma 514 4080.

Íþróttasamband Fatlaðra | fimmtudagur 25. ágúst 17:37
Silfurverðlaun til Jóns Odds
Íslensku keppendurnir á Evrópumeistaramóti fatlaðra í Espoo í Finnlandi luku báðir keppni í dag.
Í morgun keppti Baldur Ævar Baldursson í undanrásum í 100 m hlaupi flokki T37. Hlaut hann tímann 14.9 sek og komst ekki í úrslit.
Jón Oddur Halldórsson keppti nú síðdegis í úrslitum í 200 m hlaupi, flokki T35 og hafnaði í 2. sæti á tímanum 28.18 sek 1/100 úr sek á eftir fyrrum heimsmeistaranum Lloyd Upsedel frá Bretlandi.
Jón Oddur vann því til gull- og silfurverðlauna á mótinu sem teljast verður góður árangur þó svo að vonir hafi staðið til þess að hann myndi verja Evróputitla sína bæi í 100 og 200 m hlaupi.
Þjálfari og fararstjóri í þessari ferð var Kári Jónsson sem hrósaði Finnum fyrir alla umgjörð og framkvæmd þessa móts.

Íþróttasamband Fatlaðra | miðvikudagur 24. ágúst 18:14
Baldur með Íslandsmet
Í dag keppti Baldur Ævar Baldursson í kúluvarpi, flokki F37 á Evrópumeistaramóti fatlaðra í frjálsum íþróttum. Baldur hafnaði þar í 8. sæti en tvíbætti þar Íslandsmet sitt, fyrst þegar hann varpaði kúlunni 10.14 m og síðan 10.22 m. Pólverjinn Tomasz Blatkiewicz varð Evrópumeistari en hann kastaði 13.42 metra.

Á morgun, fimmtudag keppir Baldur í undanrásum í 100 m hlaupi flokki T37 og Jón Oddur í úrslitum í 100 m hlaupi flokki T35. Meðfylgjandi er mynd af Baldur Ævari í kúluvarpskeppninni í dag.

Íþróttasamband Fatlaðra | mánudagur 22. ágúst 23:56
Jón Oddur sigurvegari i 100m á EM í Espoo
Í dag keppti Jón Oddur Halldórsson í 100 m hlaupi, flokki T35 á Evrópumeistaramóti fatlaðra í frjálsum íþróttum sem nú fer fram í Espoo í Finnlandi. Þetta var úrslitahlaup, þar sem aðeins var einn riðill í hans fötlunarflokki, og sigraði Jón Oddur í hlaupinu á tímanum 13.76 sek og endurtók þar með afrek sitt frá því á Evrópumótinu í Assen 2003. Í öðru sæti var Huges Quiatol frá Frakklandi á tímanum 24.sek og Ioannis Letkas, Grikklandi í þriðja sæti á tímanum 14.57 sek. Vindur var töluvert á móti eða -2.1m/sek en eins og sjá má á tímunum voru yfirburðir Jóns töluverðir i hlaupinu og sigurinn aldrei i hættu.
Jón Oddur hefur með þessum árangri sínum fest sig í sessi sem einn besti spretthlaupari þessa fötlunarflokks og sýndi enn og sannaði að silfurverðlaun hans á Ólympíumótinu í Aþenu á síðasta ári var eingin tilviljun.

Jón Oddur keppir næst í 200m hlaupi fimmtudaginn 25. ágúst en meðal mótherja Jóns þá verður fyrrum heimsmetshafinn Loyd Upsdel.
Allar frekari upplýsingar um mótið má fá á www.espoo2005.fi

Íþróttasamband Fatlaðra | mánudagur 22. ágúst 10:55
Setning EM fatlaðra í frjálsum
Evrópumeistaramót fatlaðra var sett við hátíðlega athöfn í dag 21. ágúst í Espoo í Finnlandi. Fánaberi Íslands var Baldur Baldursson sem ásamt Jóni Oddi Halldórssyni tekur þátt í mótinu.
Á morgun, mánudaginn 22. ágúst mun Jón Oddur Halldórsson síðan hefja keppni í 100 m hlaupi en hann keppir í flokki T35. Aðeins einn riðill er í þessum flokki og er því hér um úrslitahlaup að ræða.

Neðanmáls er keppnisdagskrá þeirra Jóns Odds og Baldurs.

Mánudagur 22. ágúst
Kl. 18:52 T35 100 m Jón Oddur Halldórsson

Miðvikudagur 24. ágúst
Kl. 16:30 F37 Kúluvarp Baldur Baldursson

Fimmtudagur 25. ágúst
Kl. 17:25 T35 200 m Jón Oddur Halldórsson

Föstudagur 26. ágúst
Kl. 17:32 T37 100 m Baldur Baldursson

Meðfylgjandi mynd sýnir íslensku keppendurna við upphaf setningarathafnarinnar.

Íþróttasamband Fatlaðra | mánudagur 22. ágúst 10:08
Evrópumeistaramót fatlaðra í frjálsum íþróttum

Dagana 21. - 28. fer fram í Espoo i Finnlandi Evrópumeistaramót fatlaðra í frjálsum íþróttum. Tveir íslenskir keppendur verða meðal þátttakenda á mótinu, þeir Jón Oddur Halldórsson og Baldur Ævar Baldursson. Jón Oddur sem keppir í flokki T35 tekur þátt í 100 og 200 m hlaupi og Baldur í 100 m hlaupi og kúluvarpi en hann keppir í flokki T-37. Baldur hefur sýnt stöðugar framfarir undanfarin ár og skipar nú m.a. 4. sæti afrekalistans í sínum flokki í kúluvarpi Jón Oddur, sem sællar minningar vann til tveggja silfurverðlauna á Ólympíumóti fatlaðra í Aþenu á síðasta ári, hefur Evrópumeistaratitla að verja frá því Assen í Hollandi 1993 og verður því spennandi að fylgjast með árangri þeirra félaga á mótinu. Þjálfari þeirra og fararstjóri er Kári Jónsson. Frekari upplýsingar um mótið má fá á vefsíðu þess www.espoo2005.fi

Íþróttasamband Fatlaðra | þriðjudagur 9. ágúst 10:46
Íslandsgöngunni lokið
Þeir Guðbrandur Einarsson og Bjarki Birgisson luku í gær formlega Íslandsgöngu sinni, Haltur leiðir blindan. Það sem gerir þetta þrekvirki einstakt hjá þeim félögum er að Bjarki er hreyfihamlaður og Guðbrandur nær blindur. Það voru þreyttir en glaðir göngugarpar sem stigu síðustu skrefin inn á Ingólfstorg með vinum og vandamönnum í gær. Þeir lögðu af stað úr Reykjavík þriðjudaginn 20. Júní og lögðu að baki rúmlega 1300 km á 45 dögum . Veðrið var þeim hagstætt og móttökur afar góðar á öllum viðkomustöðum.
Nánar

Íþróttasamband Fatlaðra | fimmtudagur 4. ágúst 11:36
Haltur leiðir blindan, lokaáfanginn farinn kl. 16:30 í dag
Í dag, fimmtudaginn 4. Ágúst, munu þeir Guðbrandur Einarsson og Bjarki Birgisson ganga lokaáfanga Íslandsgöngu sinnar - Haltur leiðir blindan.
Þá munu göngugarparnir, ásamt fylgdarliði, ljúka verkefninu formlega með því að ganga kl. 16.30 frá Hljómskálanum (horni Sóleyjargötu og Skothúsvegar), meðfram Tjörninni og að Ingólfstorgi.

Á Ingólfstorgi hefst eftirfarandi dagskrá kl. 17:00
Teygjuæfingar - Ásdís Sigurðardóttir, íþróttakennari og stafgönguþjálfari hjá ÍSÍ
Ávörp
Félagsmálaráðherra, Árni Magnússon
Forseti borgarstjórnar, Alfreð Þorsteinsson
Formaður stjórnar Sjónarhóls-ráðgjafarmiðstöðvar ses., Andrés Ragnarsson
Forseti Íþrótta- og Ólympíusambands Íslands, Ellert B. Schram
Formaður ferðamálaráðs, Einar K. Guðfinnsson

Skemmtiatriði
Blikandi stjörnur, sönghópur á vegum Hins hússins
Umsjón og stjórn: Ingveldur Ýr Jónsdóttir

Guðbrandur og Bjarki hafa með göngu sinni unnið líkamlegt, andlegt og félagslegt þrekvirki.
Sýnum að framtak þeirra sé metið að verðleikum með því að fylgja þeim síðasta spölinn og taka þátt í lokaathöfninni á Ingólfstorgi.

Gangan var skipulögð í samstarfi við Sjónarhól - ráðgjafarmiðstöð ses., Íþróttasamband fatlaðra (ÍF) og Íþrótta- og Ólympíusamband Íslands (ÍSÍ).

Meðfylgjandi er skemmtileg mynd af göngugörpunum Bjarka og Guðbrandi með Sigríði Önnu Þórðardóttur umhverfisráðherra sem gekk með þeim félögum yfir Kattarhrygg.

Íþróttasamband Fatlaðra | föstudagur 8. júlí 18:24
Íslandsganga undir kjörorðinu "Haltur leiðir blindan"
Bjarki Birgisson, sem er hreyfihamlaður og Guðbrandur Einarsson sem er sjónskertur, láta sér ekki allt fyrir brjósti brenna og eru stórhuga menn. Þeir hófu hringferð um landið mánudaginn 20. júní undir kjörorðinu "Haltur leiðir blindan" en tilgangur með göngunni er að vekja athygli á málefnum barna með sérþarfir og kynna ráðgjafastöðina Sjónarhól.
Íþróttta- og ólympíusamband Íslands og Íþróttasamband Fatlaðra hafa verið í samstarfi við þá félaga og Sjónarhól vegna þessa verkefnis. ISI og IF hvetja fólk til að ganga með þeim félögum og taka vel á móti þeim þegar þeir koma að bæjarmörkum.
Heimasíða þeirra er www.gangan.is og þar er hægt að fylgjast með ferðatilhögun.

Íþróttasamband Fatlaðra | föstudagur 8. júlí 18:10
Þakkarskjal afhent Skautafélaginu Birninum
Skautafélagið Björninn fékk þakkarskjal frá Íþróttasambandi Fatlaðra vegna samstarfs við IF vegna Vetrarleika Special Olympics.
Rætt var m.a. frekara samstarf á sviði skautaíþrótta fyrir fatlaða en áhugi er á að bjóða upp á æfingar fyrir fatlaða næsta vetur.
Á myndinni er fulltrúi ÍF ásamt formanni Bjarnarsins, formanni listhlaupadeildar og þjálfara.

Íþróttasamband Fatlaðra | miðvikudagur 6. júlí 15:06
Icelandair einn af aðalsamstarfsaðilum Íþróttasambands Fatlaðra
Nýlega var undirritaður samstarfssamningur milli Íþróttasambands Fatlaðra og Icelandair um ferðir íþróttafólks sambandsins á flugleiðum Icelandair.

Samningurinn sem nær til ársins 2007 felur meðal annars í sér að allt íþróttafólk og aðrir sem ferðast á vegum sambandsins til og frá Íslandi fljúgi með Icelandair á hagstæðustu fargjöldum sem bjóðast. Þá fær Íþróttasamband Fatlaðra ákveðna styrktarupphæð árlega greidda inn á viðskiptareikning sinn auk ákveðins fjölda flugmiða á ári á gildistíma samningsins. Flugleiðir er með þessum samningi einn af aðalsamstarfs og stuðningsaðilum Íþróttasambandsins vegna Ólympíumóts fatlaðra í Peking árið 2008.
Nánar

Íþróttasamband Fatlaðra | miðvikudagur 29. júní 14:31
Opna Þýska meistaramótið í sundi fatlaðra - 1 Heimsmet og 14 Íslandsmet
Þann 23. til 24. júní fór fram í Berlín opna Þýska meistaramótið í sundi fyrir fatlaða.
Alls tóku 324 keppendur þátt í mótinu frá Austuríki, Tékklandi, Danmörku, Spáni, Ungverjalandi, Írlandi, Íslandi, Ísrael, Pólandi, Sviss, Svíþjóð og Þýskalandi.

Árangur okkar manna var mjög góður.
Kristín Rós Hákonardóttir flokki S7 setti Heimsmet í 200 m baksundi og synti á tímanum 3:08,23
Nánar

Íþróttasamband Fatlaðra | föstudagur 24. júní 15:55
Norrænt barna- og unglingamót í Noregi dagana 26. júní-3. júlí 2005
Nú er enn komið að því að Íslandi taki þátt í norrænu barna og unglingamóti fatlaðra sem haldið er annað hvert ár til skiptis á norðurlöndunum, og að þessu sinni verður mótið haldið í Tønsberg í Noregi.

Þátttakendur á þessum mótum eru á aldrinum 12-16 ára og eru tilnefndir af aðildarfélögum ÍF og einstaka keppandi er valinn til þátttöku eftir ábendingum frá einstaklingum eða samtökum þar sem viðkomandi hefur ekki tekið þátt í íþróttastarfi fatlaðra áður.

Þær greinar sem íslensku keppendurnir taka þátt í á mótinu eru SUND, FRJÁLSAR ÍÞRÓTTIR og BORÐTENNIS
Nánar

Íþróttasamband Fatlaðra | miðvikudagur 22. júní 01:19
Íþróttasamband Fatlaðra sendir 15 keppendur á opna þýska meistaramótið í sundi fatlaðra sem fram fer í Berlín 23. - 27. júní 2005
Einn nýliði er í hópnum Eyþór Þrastarson og aðrir keppendur eru;
Kristín Rós Hákonardóttir, Gunnar Örn Ólafsson, Jóna Dagbjört Pétursdóttir, Guðrún Lilja Sigurðardóttir, Pálmi Guðlaugsson, Skúli Steinar Pétursson, Jón Gunnarsson, Adrian Oscar Ervin, Anton Kristjánsson, Bára Bergmann Erlingsdóttir, Hulda Hrönn Agnarsdóttir, Ursula K. Baldursdóttir, Lára Steinarsdóttir, Sonja Sigurðardóttir.
Fararstjórar og þjálfarar eru; Kristín Guðmundsdóttir, Inga Maggý Stefánsdóttir, Sabína S. Halldórsdóttir, Ólafur Þórarinsson og Halldór Guðbergsson

Íþróttasamband Fatlaðra | miðvikudagur 15. júní 13:39
Ferð Kjartans Jakobs Haukssonar á árabáti hringinn í kringum landið
Kjartan Jakob Hauksson er nú á ferð á árabát hringinn í kringum landið. Tilgangur ferðarinnar er að safna pening í Hjálparliðasjóð Sjálfsbjargar, landssambands fatlaðra.
Hjálparliðasjóður Sjálfsbjargar var stofnaður árið 1997 með það markmið að gera hreyfihömluðum auðveldara að ferðast. Stjórn sjóðsins er skipuð 2 fulltrúum Sjálfsbjargar, lsf og einum frá Rauða krossi Íslands en stofnfé sjóðsins kom m.a. frá Rauða krossinum.
Frá stofnum sjóðsins hafa margir styrkir verið veittir en lítið sem ekkert fé komið inn í sjóðinn í staðinn. Ákveðið var því árið 2004 að loka sjóðnum tímabundið - Það er því brýnt að taka höndum saman og afla fjár í sjóðinn.
Tilgangur sjóðsins er að gera hreyfihömluðum kleift að ferðast innanlands og utan á jafnréttisgrundvelli.
Nánar

Íþróttasamband Fatlaðra | mánudagur 13. júní 13:29
Úrslit frá opna breska frjálsíþróttamótinu
Nú um helgina tóku þeir Jón Oddur Halldórsson og Baldur Baldursson þátt í opna breska frjálsíþróttamótinu fyrir fatlaða en mótið fór fram í Manchester í Englandi.

Á mótinu sigraði Jón Oddur í 100 og 200 m hlaupi í flokki T35, hljóp 100 m á 13.58 sek og 200 m á 28.03 sek. Baldur Baldursson sem keppir í flokki T37 hafnaði í 2. sæti í kúluvarpi kastaði 10.10 m og í 4 sæti í 100 m hlaupi á 14.09 sek.

Þátttaka í móti þessu er liður í undirbúningi þeirra fyrir Evrópumeistaramót fatlaðra í frjálsum íþróttum sem fram fer í Espoo í Finnlandi um miðjan ágúst en þar hefur Jón Oddur titla að verja þar sem hann sigraði bæði í 100 og 200 m hlaupi á Evrópumeistaramótinu sem fram fór í Assen í Hollandi 2003

Íþróttasamband Fatlaðra | fimmtudagur 9. júní 12:47
Evrópumeistaramót í boccia
Evrópumeistaramót í boccia fer fram í Portúgal 11. - 19. júní.
Á myndinni má sjá keppendur sem 'Iþróttasamband Fatlaðra sendir á mótið en þau eru f.v. Margrét Edda Stefánsdóttir, Aðalheiður Bára Steinsdóttir, Kristín Jónsdóttir og Árni Sævar Gylfason.

Íþróttasamband Fatlaðra | miðvikudagur 8. júní 12:50
Torfærustóll fyrir hreyfihamlaða - Nýung á Íslandi
Heimir Karlsson og Stöð 2 standa fyrir söfnun þessa viku þar sem stefnt er að því að safna fyrir kaupum á torfærustólum fyrir hreyfihamlaða en slíkur stóll var kynntur hér á landi í síðustu viku.


Fyrsti stóllinn var pantaður í kjölfar þess að Heimir og félagar á Stöð2 unnu um 200.000 kr. í getraunum og vildu að ÍF fengi að njóta afrakstursins.
Áhugi var á að finna einhvern hlut eða tæki sem kæmi hreyfingunni vel og ÍF leitaði til Paul Speight sem hefur framleitt m.a. vetraríþróttatæki fyrir fatlaða og óskaði eftir ábendingum. Hann benti á þennan stól og í framhaldi af því var stóllinn pantaður og hefur verið afhentur ÍF. www.spokesnmotion.com
Nánar

Íþróttasamband Fatlaðra | miðvikudagur 8. júní 12:50
Íslandsgangan - Haltur leiðir blindan
Mánudaginn 20. júní munu þeir Guðbrandur Einarsson (nær blindur) og Bjarki
Birgisson (hreyfihamlaður) hefja Íslandsgöngu sína, hringinn í kringum landið, undir
kjörorðinu ,,Haltur leiðir blindan”. Dorrit Moussaieff forsetafrú er verndari göngunnar.
Tilgangur hennar er að vekja athygli á málefnum, þörfum og aðstæðum barna með
sérþarfir um allt land og stuðla að samfélagi án aðgreiningar.
Kynningarbréf (3mb pdf)
Ferðatilhögun

Íþróttasamband Fatlaðra | þriðjudagur 31. maí 15:39
Skemmtileg keppni í boccia á Þingeyri
Íþróttafélagið Ívar stóð fyrir bocciamóti á Þingeyri í gær sunnudag. Keppt var um Halldórs Högna bikarinn en það er bikar sem Halldór Högni Georgsson gaf íþróttafélaginu í fyrra er hann flutti suður, en Halldór Högni tók virkan þátt í boccia hjá íþróttafélaginu Ívari er hann bjó hér fyrir vestan. Var þetta í fyrsta sinn sem keppt var um bikarinn en þetta á að verða árlegur viðburður og bikarinn sem Halldór Högni gaf verður farandbikar.
30 manns kepptu á mótinu og voru þátttakendur frá íþróttafélaginu Ívari, Hlíf á Ísafirði, Þingeyri og frá félagi eldriborgara á Bíldudal. Keppt var í tveimur riðlum og léku til úrslita B lið Þingeyrar og A lið íþróttafélagsins Ívars. B lið Þingeyrar bar sigur úr bítum eftir skemmtilega keppni.
Fjöldi áhorfenda fyldist með mótinu, og þegar mest var voru um 70 manns í salnum.
Myndir frá mótinu

Íþróttasamband Fatlaðra | þriðjudagur 31. maí 14:33
Íslandsmót ÍF í frjálsum íþróttum
Íslandsmót ÍF í frjálsum íþróttum utanhúss fór fram á Kópavogsvelli þann 28. maí síðastliðinn.
Sjá úrslit mótsins

Íþróttasamband Fatlaðra | fimmtudagur 26. maí 11:27
Íþróttafélagið Ösp 25 ára
Íþróttafélagið Ösp hélt upp á 25. ára afmæli sitt með veglegum afmælisfagnaði 22. maí sl. en félagið var stofnað 18. maí 1980.
Í tilefni þessara tímamóta voru félaginu færðar veglegar gjafir og heillaóskir bárust víðs vegar að. Meðal þeirra sem færðu félaginu heillaóskir voru Ellert B. Schram, forseti Íþrótta- og Ólympíusambands Íslands auk þess sem Sveinn Áki Lúðvíksson, formaður Íþróttasambands Fatlaðra færði félaginu að gjöf útskorið ræðupúlt. Þá veitti Sveinn Áki nokkrum einstaklingum heiðursmerki ÍF en þeir voru;
Árna Sævar Gylfason og Kristínu Jónsdóttur hlutu bronsmerki ÍF en merkið er veitt þeim einstaklingum sem fram koma á stórmótum innanlands og erlendis. Silfurmerki ÍF, sem veitt er fyrir skipulags og stjórnunarstörf í þágu fatlaðra, veitti hann fyrrum stjórnarmönnum Aspar þeim Sólborgu Bjarnadóttur, Guðmundi L. Kristjánssyni og Margréti Hallgrímsdóttur og Kristni Guðlaugssyni, knattspyrnuþjálfara Aspar til margra ára.
Fréttabréf í tilefni afmælisins

Íþróttasamband Fatlaðra | föstudagur 13. maí 13:09
Stjórnarfundur Nord-HIF og landskeppni í borðtennis
Í apríl sl. var haldinn stjórnarfundur Nord-HIF sem eru samtök íþróttasambanda fatlaðra á Norðurlöndum.
Fundurinn var haldinn í Færeyjum í tengslum við 25 ára afmæli færeyska sambandsins - Itrottasambandið fyri Brekað.
Nánar

Íþróttasamband Fatlaðra | þriðjudagur 10. maí 14:22
Endurnýjun samnings KB banka og Íþróttasambands Fatlaðra
Nýlega endurnýjuðu KB-banki og Íþróttasamband Fatlaðra (ÍF) samning um samstarf og stuðning bankans við starfsemi Íþróttasambands Fatlaðra.
KB banki er með þessum samningi einn af aðalsamstarfs- og styrktaraðilum Íþróttasambands Fatlaðra vegna undirbúnings og þátttöku fatlaðra íþróttamanna í Ólympíumóti fatlaðra sem haldið verður í Peking árið 2008. Þess ber að geta að bankinn hefur allt frá stofnun sambandsins verið einn stærsti styrktaraðili íþrótta fatlaðra hér á landi og aðalviðskiptabanki sambandsins þau 25 ár sem liðin eru frá stofnun þess.
Nánar

Íþróttasamband Fatlaðra | þriðjudagur 10. maí 09:36
Íslandsmótið í frjálsum íþróttum utanhúss
Íslandsmótið í frjálsum íþróttum utanhúss verður haldið laugardaginn 28. maí á Kópavogsvelli.
Skráningar hjá Íþróttasambandi Fatlaðra, fyrir 20 maí.

Íþróttasamband Fatlaðra | mánudagur 2. maí 11:35
Listavika þroskahjálpar
Í tengslum við Listaviku Þroskahjálpar ( sjá dagskrá) taka fatlaðir skautaiðkendur þátt í sýningu í Egilshöll sunnudaginn 8. maí.

Sunnudaginn 8. maí
Listdans á skautum.
Staðsetning: Egilshöll. Tími 13.00-14:00. Félagar úr Skautafélaginu Birninum sýna listir sínar. Yfirskrift sýningarinnar er "Allir með". Sýnd verða skautaatriði við kvikmyndatónlist. Meðal sýnenda verða Sandra Ólafsdóttir og Stefán Erlensson sem unnu til verðlauna á Special Olympic í Japan. Kynnir: Helga Olsen.
Opnun myndlistarsýningar í Gerðubergi.

Íþróttasamband Fatlaðra | mánudagur 2. maí 11:31
Spennandi starf í Ingunnarskóla til að stuðla að auknum hreyfiþroska.
Sabína Halldórsdóttir, íþróttakennari í Ingunnarskóla í Grafarholti hefur í vetur verið með nemendur í sértímum þar sem lögð er áhersla á hreyfiþroska og aukna líkamlega færni. Valið er í hópinn samkvæmt hreyfiprófi sem hún leggur fyrir nemendur og hafa skólastjórnendur sýnt þessu verkefni sérlega mikinn skilning. Alls eru 5 tímar á viku nýttir sem aukatímar til þessa verkefnis og skipulegar árangursmælingar fara fram meðan verkefni stendur yfir og þegar því lýkur.
Það sem er sérstakt við þetta verkefni fyrir utan þann mikla velvilja og skilning sem ríkir hjá skólastjórnendum varðandi aukatíma í hreyfingu, þá er aðstaðan sem nýtt er ekki síður athyglisverð. Farið er m.a. með nemendur út í náttúruna þar sem hugmyndaflugið fær að njóta sín og á myndinni má sjá Sabínu á lóð við skólann, þar sem nemendur hafa safnað saman ýmsu efni og búið til n.k. æfingabraut sem nýtt er í kennslunni.
Þeir nemendur sem þurfa á aukinni hreyfiþjálfun að halda eru margir um land allt en mjög misjafnt er hvernig tekið er á þeim málum í hverjum skóla. Sértímar í lestri og stærðfræði eru mikilvægir en sá tími hlýtur að vera komin að horft er á þessa þætti í samhengi, góð líkamleg færni skiptir miklu máli fyrir hvern einstakling.
Vonandi eru mál að þróast til betri vegar og fleiri skólar sem sýna slík fordæmi sem Ingunnarskóli.

Íþróttasamband Fatlaðra | miðvikudagur 27. apríl 13:02
Íslandsleikar Special Olympics í knattspyrnu innanhúss í Risanum nýju knatthúsi FH-inga í Hafnarfirði laugardaginn 23. apríl 2005
Níundu Íslandsleikar SO í knattspyrnu voru haldnir í nýju knatthúsi FH-inga í Kaplakrika í Hafnarfirði 23. apríl en þessir leikar eru samvinna ÍF og KSÍ. Þetta mót er fyrsta knattspyrnumótið sem haldið er í þessu nýja knatthúsi FH-inga. Knattspyrnusamband Íslands leggur m.a. til dómara í leikina. Þetta voru fimmtu leikarnir sem haldnir eru innanhúss. Innanhúss leikarnir hafa að jafnaði verið haldnir í mars eða byrjun apríl og verið í tengslum við knattspyrnuviku þroskaheftra í Evrópu sem nýtur mikils stuðnings Knattspyrnusambands Evrópu, UEFA. Leikarnir hafa farið fram í Laugardalshöll, Reykjaneshöllinni, íþróttahúsinu á Selfossi og í Boganum Akureyri.
Nánar

Íþróttasamband Fatlaðra | föstudagur 22. apríl 12:55
Íslandsleikar Special Olympics í knattspyrnu
Íslandsleikar Special Olympics í knattspyrnu fara fram laugardaginn 23. apríl í nýja íþróttahúsinu í Hafnarfirði. Þessir leikar eru samstarfsverkefni Íþróttasambands Fatlaðra og Knattspyrnusambands Íslands og fara fram í tengslum við knattspyrnuviku Special Olympics í Evrópu.

Keppni fer fram kl. 09 - 11.00 og er í tengslum við annað mót sem þarna fer fram um helgina en þar mun fara fram yngri flokka mót í knattspyrnu tileinkað minningu Þóris Jónssonar.

Keppendur á Íslandsleikum Special Olympics koma frá íþróttafélögunum, ÍFR og Ösp Reykjavík, Þjóti Akranesi og Eik Akureyri.

Keppni hefst kl 09.00 og lýkur kl. 11.00

Aðalstyrktaraðili Special Olympics á Íslandi er Íslandsbanki Sjóvá.

Íþróttasamband Fatlaðra | þriðjudagur 19. apríl 15:46
Heimsmeistaramóti ófatlaðra í bogfimi innanhúss
Í lok mars sl. tóku þeir Guðmundur Þormóðsson og kristmann Einarsson þátt í Heimsmeistaramóti ófatlaðra í bogfimi innanhúss en mótið fór fram í Álaborg í Danmörku.
Í flokki keppenda með hefðbundinn boga hafnaði Guðmundur í 56. sæti af 58 keppendum hlaut 543 stig. Kristmann, sem keppti í flokki keppenda með trissuboga, náði sínum besta árangri á alþjóðlegu móti en hann hafnaði í 25. af 100 keppendum hlaut 581 stig.
Bogfimi hér á landi er stunduð hjá tveimur félögum fatlaðra þ.e. Íþróttafélagi fatlaðra í Reykjavík og Íþróttafélaginu Akri á Akureyri og eru æfingar opnar bæði fötluðum og ófötluðum skyttum.

Íþróttasamband Fatlaðra | þriðjudagur 19. apríl 15:46
Kiwanisklúbburinn Hekla styrkir þátttöku á Norræna barna- og unglinamótinu
Kiwanis- og Lionshreyfingarnar hér á landi hafa allt frá stofnun Íþróttasambands Fatlaðra verið dyggustu stuðningsaðilar sambandsins.
Nýlega færðu fulltrúar Kiwansiklúbbsins Heklu sambandinu styrk vegna þátttöku Íslands í Norræna barna- og unglingamótinu sem fram fer í Noregi í júnímánuði n.k.
Á myndinni má sjá fulltrúa Kwk. Heklu ásamt Sveini Áka Lúðvikssyni, formanni ÍF við afhendingu styrksins.

Íþróttasamband Fatlaðra | laugardagur 16. apríl 00:05
Viltu prófa hjólastólatennis
Tennisdeild Ungmennafélagsins Fjölnis ætlar í maí að halda námsskeið í hjólastólatennis.
Námsskeiðið er ætlað byrjendum og einnig þeim sem hafa reynslu af því að spila.
Deildin hefur afburða þjálfara þær Önnu Podolskaiu sem er með meistarapróf í íþróttaþjálfun og Carolu Frank Aðalbjörnsson doktor í hreyfifræði barna og meistarapróf í íþróttaþjálfun fatlaðra.
Námsskeiðið fer fram í íþróttahúsi Fjölnis í Dalhúsum (sem er í sömu byggingu og sundlaug Grafarvogs).
Þar sem þetta er fyrsta námsskeiðið af þessu tagi sem við höldum væri gott að þeir sem áhuga hafa skrái þáttöku til Carolu annað hvort með því að hringja í hana (sími:856-1028) eða með rafpósti: (cadalbjornsson@actavis.com).

Íþróttasamband Fatlaðra | föstudagur 15. apríl 22:01
Osta- og smjörsalan sf. styður starfsemi Íþróttasambands Fatlaðra
Nýlega endurnýjuðu Osta- og smjörsalan sf . og Íþróttasamband Fatlaðra (ÍF) samning um samstarf og stuðning fyrirtækisins við starfsemi Íþróttasambands Fatlaðra.
Osta- og smjörsalan sf. hefur undanfarin ár styrkt starfsemi Íþróttasambands Fatlaðra og var meðal annars eitt þeirra fyrirtækja sem studdi sambandið vegna undirbúning og þátttöku þess í Ólympíumótinu í Aþenu árið 2004.
Með hliðsjón af þeim glæsta árangri sem þar náðist ákvað Osta- og smjörsalan sf. að endurnýja samstarfssamning sinn við Íþróttasamband Fatlaðra og renna þannig styrkari stoðum undir starf Íþróttasambands Fatlaðra í þágu fatlaðra íþróttamanna.

Sveinn Áki Lúðvíksson, formaður Íþróttasambands Fatlaðra, sem undirritaði samninginn fyrir hönd sambandsins sagði við þetta tækifæri að glæsilegur árangur fatlaðra íþróttamanna á Ólympíumóti fatlaðra í Aþenu 2004 hefði ekki síst verið ávöxtur samstarfs Osta- og smjörsölunnar sf. og annarra samstarfsaðila Íþróttasambands Fatlaðra. Endurnýjun samstarfssamnings við Osta- og smjörsöluna sf. væri því mikil viðurkenning á starfi Íþróttasambands Fatlaðra og mikilvæg hvatning til áframhaldandi uppbyggingar íþrótta fatlaðra í landinu.
Nánar

Íþróttasamband Fatlaðra | þriðjudagur 12. apríl 12:13
Sambandsþing Íþróttasambands Fatlaðra
Sambandsþing ÍF var haldið 9. apríl sl. á Radisson SAS hótels Sögu. Dagskrá var samkvæmt lögum sambandsins en þingið sóttu um 50 fulltrúar aðildarfélaga ÍF. Meðal gesta sem ávörpuðu þingið var forseti Íslands, hr. Ólafur Ragnar Grímsson, Árni Magnússon félagsmálaráðherra og Ellert B. Schram forseti ÍSÍ
Stærsta mál þingsins var tillaga um nýtt flokkakerfi fyrir þroskahefta íþróttamenn. Með það að markmiði að tryggja sem mestan jöfnuð í keppni er öllum íþróttasamtökum fatlaðra í heiminum nú gert skylt að kröfu alþjóðahreyfinga fatlaðra (IPC og INAS-Fid) að skrá fötlun allra þeirra sem þátt taka í íþróttum þroskaheftra á alþjóðavettvangi. Tillagan var samþykkt sem þýðir að í framtíðinni munu þroskaheftir keppa í tveimur flokkum á Íslandi en hingað til hefur þessi fötlunarfokkur keppt í einum opnum flokki.
Þingið heimilaði einnig stjórn ÍF að ganga til viðræðna við framkvæmdastjórn ÍSÍ um breytingar á reglugerð um afreksmannasjóð ÍF.
Nánar

Íþróttasamband Fatlaðra | fimmtudagur 31. mars 13:58
Námskeiði á vegum ÍF, VMÍ og Challenge Aspen aflýst
Af óviðráðanlegum ástæðum hefur verið ákveðið að fresta vetraríþróttanámskeiði fatlaðra í Hlíðarfjalli fram til vorsins 2006.
Upplýsingar um tímasetningu námskeiðs árið 2006 verða staðfestar síðar.
Þeir sem hafa áhuga á útivistartilboðum fyrir fatlaða er bent á að kynna sér starfsemi Challenge Aspen sem stendur fyrir útivistartilboðum fyrir fatlaða jafnt sumar sem vetur. www.aspen.com/challengeaspen
Einnig er áhugavert að kynna sér heimasíðu Paul Speight sem hefur framleitt tæki sem ÍF hefur pantað og hefur nú m.a. kynnt nýtt tæki n.k. "rallyhjólastól" www.spokesnmotion.com
Okkur þykir leitt að þurfa að staðfesta þetta en vonum að þeir sem ætluðu að mæta, komi á námskeiðið á næsta ári.

Íþróttasamband Fatlaðra | miðvikudagur 30. mars 18:46
Austurbakki og ÍF framlengja samstarfssamningi sínum
Austurbakki hf og Íþróttasamband Fatlaðra (ÍF) hafa framlengt samstarfssamningi sínum. Samningurinn er til fjögurra ára. Afreksfólk Íþróttasambands Fatlaðra mun því nú eins og undanfarin ár klæðast íþróttafatnaði frá NIKE og fleiri vörumerkjum sem Austurbakki verslar með en Austurbakki hf hefur verið einn af samstarfsaðilum ÍF síðastliðin 12 ár. Samningurinn gildir frá 2005 til 2008.
Nánar

Íþróttasamband Fatlaðra | mánudagur 21. mars 19:00
HM í bogfimi
Dagana 23. - 28. mars n.k. taka þeir Guðmundur Þormóðsson og Kristmann Einarsson þátt í Heimsmeistarmóti ófatlaðra í bogfimi sem fram fer í Álaborg í Danmörku.
Bogfimi hér á landi er einungis stunduð hjá tveimur félögum þ.e. Íþróttaféglagi fatlaðra í Reykjavík og íþróttafélaginu Akri á Akureyri og æfa þar saman jafnt fatlaðar sem ófaltaðra bogaskyttur en þátttaka þeirra félaga er með fullu samþykki og stuðningi bæði Íþrótta- og Ólympíusambands Íslands og Íþróttasambands Fatlaðra.

Íþróttasamband Fatlaðra | miðvikudagur 16. mars 09:37
ÍSLANDSMÓT ÍÞRÓTTASAMBANDS FATLAÐRA
Íslandsmót Íþróttasambands Fatlaðra 2005 í boccia, sveitakeppni, bogfimi, borðtennis og lyftingum fór fram 12.-13. mars í íþróttahúsi Seljaskóla og íþróttahúsi ÍFR.
Á mótinu tóku þátt um 250 keppendur frá 16 aðildarfélögum ÍF.
Mótinu lauk síðan á sunnudagskvöldi með veglegu lokahófi sem haldið var í Gullhömrum í Grafarholti.
Heildarúrslit

Íþróttasamband Fatlaðra | þriðjudagur 15. mars 09:48
Opna Danska sundmeistaramótið Esbjerg 2005
Árangur á Opna Danska sundmeistaramótinu um helgina var mjög góður. Flestir voru við sitt besta eða bættu árangur sinn.
Mótið fór fram í Esbjerg, keppendur komu frá Noregi, Finnlandi, Svíþjóð, Þýskalandi, Írlandi, Grikklandi, Bretlandi og Spáni.
Íslensku keppendurnir voru í sérflokki og unnu fjölmargar greinar á mótinu. Umræða fer fram um það hvort beina eigi sjónum að mótum utan norðurlandanna fyrir þennan keppnishóp en það mál verður skoðað nánar.
12 Íslandsmet féllu og hópurinn kom heim með fjölda verðlauna.
Nánar

Íþróttasamband Fatlaðra | laugardagur 12. mars 17:41
Íslandsmót fatlaðra 2005 - borðtennis
Nú stendur yfir í íþróttahúsi Seljaskóla og íþróttahúsi ÍFR Íslandsmót Íþróttasambands Fatlaðra í boccia, bogfimi, borðennis og lyftingum.
Keppni er lokið í borðtennis en urðu þrefaldir sigurvegarar þau Jóhann R. Kristjásson iþróttafélaginu Nes, Reykjanesbæ og Sunna Jónsdóttir íþróttafélaginu Ösp. Jóhann sigraði í einliðaleik í sitjandi flokki hreyfihamlaðra, tvíliðaleik og opnum flokki og Sunna í einliðaleik í flokki þroskaheftra, tvíliðaleik og opnum flokki.
Meðal keppenda á mótinu voru þrír færeyskir borðtennismenn og settu þeir skemmtilegan svip á keppnina og unnu meðal annars til bronsverðlauna í tvíliðaleik og opnum flokki kvenna.
Úrslit mótsins

Íþróttasamband Fatlaðra | föstudagur 11. mars 13:27
ÍSLANDSMÓT ÍÞRÓTTASAMBANDS FATLAÐRA
Íslandsmót Íþróttasambands Fatlaðra 2005 í boccia,sveitakeppni, bogfimi, borðtennis og lyftingum fara fram 12.-13. mars n.k. í íþróttahúsi Seljaskóla og íþróttahúsi ÍFR.
Á mótið eru skráðir um 250 keppendur frá 16 aðildarfélögum ÍF.
Mótinu lýkur síðan á sunnudagskvöldinu með veglegu lokahófi sem haldið verður í Gullhömrum í Grafarholti.
Nánar

Íþróttasamband Fatlaðra | föstudagur 11. mars 13:23
Skíðaiðkun og útivera fyrir fatlaða - Námskeið á Akureyri
Skíða- og útivistarnámskeið fyrir fatlaða verður haldið í Hlíðarfjalli við Akureyri 14.-17. apríl 2005. Verkefnið er samstarfsverkefni, Challenge Aspen, Íþróttasambands Fatlaðra og Vetraríþróttamiðstöðvar Íslands.
Nánar

Íþróttasamband Fatlaðra | föstudagur 4. mars 15:29
Heimasíða Stefáns og fjölskyldu í Japan
Ferðadagbók og nánari fréttir af hópnum í Japan má finna hér á síðunni: japan.siberia.is
Hópurinn kemur heim á sunnudagskvöld 6. mars kl. 22.30

Íþróttasamband Fatlaðra | miðvikudagur 2. mars 15:10
VETRARLEIKAR SPECIAL OLYMPICS
Keppni íslensku keppendanna á Vetrarleikum Special Olympics í Nagano í Japan var að ljúka og myndir voru að berast frá leikunum.
Þau Sandra Ólafsdóttir og Stefán Erlendsson, vöktu mikla athygli fyrir faglega útfærslu sinna atriða. Á leikum Special Olympics keppa allir við sína jafningja og því er möguleiki til verðlauna til staðar fyrir alla, jafnt byrjendur sem lengra komna.
Skv. fréttum frá fararstjóra gekk báðum keppendum mjög vel í lokakeppninni og bæði fengu verðlaun í sínum flokki. Sandra var í fyrsta sæti og Stefán var í þriðja sæti.
Á stigagjöfinni að dæma vann Sandra með glæsibrag og var töluvert í næsta keppanda. Þau Sandra og Stefán hafa hlotið mikla og verðskuldaða athygli og hafa margir komið að máli við fararstjórana og hælt þeim fyrir góða skautamennsku og frammistöðu. Margir eiga erfitt með að trúa því að þau hafi byrjað að skauta fyrir aðeins þremur mánuðum.
Nánar

Íþróttasamband Fatlaðra | miðvikudagur 2. mars 09:52
Íslandsmót ÍF í sundi 2005
Íslandsmót ÍF í sundi fer fram 5. - 6. mars n.k í hinni nýju glæsilegu innlaug í Laugardalnum. Meðal keppenda vera m.a. Ólympíumóts-meistarinn frá Aþenu 2004 Kristín Rós Hákonardóttir, tvöfaldur heimsmeistari í flokki þroskaheftra frá því í Hong Kong 2004 Gunnar Örn Ólafsson auk þriggja færeyskra sundmanna sem keppa sem gestir á mótinu.
Í tengslum við mótið er hér staddur formaður sundnefndar IPC Anne Green. Hún mun ásamt læknaráði flokka keppendur (hreyfihamlaða) sem ekki hafa fengið flokkun áður.
Dagskrá o.fl.

Íþróttasamband Fatlaðra | mánudagur 28. febrúar 12:16
Frá Nagano
Hópurinn er nú kominn til Japan og sendi nokkrar myndir heim frá opnunarhátíðinni o.fl. Allt gengur vel og myndir verða sendar frá keppninni þegar hún hefst.
Skoða myndir sem hópurinn sendi

Íþróttasamband Fatlaðra | mánudagur 28. febrúar 10:11
Vetrarleikar Special Olympics
Hópurinn er kominn til Japan og þar var vel tekið á móti þeim. Opnunarhátíðin var 26. mars.
Á leikum Special Olympics fara fyrstu dagarnir í undankeppni og skiptingu í úrslitaflokka en hjálagt er dagskráin Skipulag æfing og keppni.
24. - 27. verða notaðir til æfinga. Fyrstu tvo dagana frá 9-12 og seinni tvo frá 8.30 til 13.35 og 16.45 28. feb og 1. mars framkvæma þau prógrömmin sín og þeim skipt í deildir kl. 8.30-16 2. - 4. mars eru úrslitin kl. 8.30 til 17.00 Þau keppa alla dagana.

Íþróttasamband Fatlaðra | mánudagur 28. febrúar 10:01
Flugfélag Íslands einn af stuðningsaðilum Íþróttasambands fatlaðra
Nýlega var endurnýjaður samstarfssamningur milli Íþróttasambands fatlaðra og Flugfélags Íslands um flutninga á meðlimum íþróttasambandsins á flugleiðum félagsis og áheit Flugfélags Íslands til íþróttasambandsins vegna Ólympíumóts fatlaðra árið 2008.
Samningurinn sem nær til ársins 2008 felur meðal annars í sér að allt íþróttafólk sem ferðast á vegum sambandsins með flugi innanlands fljúgi með Flugfélagi Íslands og býður Flugfélag Íslands íþróttasambandinu sérfargjöld á öllum leiðum félagsins innanlands. Einnig fær íþróttasambandið ákveðinn fjölda flugmiða á ári á gildistíma samningsins án endurgjalds. Flugfélag Íslands er með þessum samningi einn af stuðningsaðilum Íþróttasambands fatlaðra vegna undirbúnings og þátttöku sambandsins í Ólympíumótinu 2008.
Nánar

Íþróttasamband Fatlaðra | fimmtudagur 24. febrúar 11:44
Vetrarleikar Special Olympics EKKI Vetrarólympíumót fatlaðra
Sandra Ólafsdóttir og Stefán Erlendsson sem keppa munu í listhlaupi á skautum á Vetrarleikum Special Olympics, koma til Japan í dag ásamt fararstjórum. Þau keppa í byrjendaflokki, level 1 og verða fyrstu dagarnir notaðir til æfinga og í undankeppni þar sem keppendum er skipt í jafna hópa sem keppa munu í úrslitum.
Mikilvægt er að fólk geri sér grein fyrir því að keppni á vegum Special Olympics er gjörólík keppni á ólympíumótum þar sem aðeins þeir bestu komast til keppni. Það að velja 2 keppendur úr hópi byrjenda er ekki síst til þess ætlað að vekja athygli á því gjörólíka formi sem er á leikum á vegum Special Olympics samtakanna og hefðbundum mótum sem flestir þekkja.
Fyrir íþróttahreyfinguna alla er lærdómsríkt að kynna sér keppnisform Special Olympics samtakanna, ekki síst m.t.t. íþrótta barna og unglinga.
Það er óvenjulegt að iðkendur eins og Sandra og Stefán fái tækifæri til þátttöku í jafn glæsilegum leikum eins og fram fara í Nagano, slík umgjörð tengist oftar keppni "afreksfólksins". Það hefur ekki síst verið ástæða þess að fólk telur um hefðbundið vetrarólympíumót að ræða en það er aðeins umgjörðin sem líkist ólympíumóti, keppnisformið er byggt upp m.t.t. þess að ALLIR geta verið með, líka þeir sem aldrei verða "afreksfólk".

Íþróttasamband Fatlaðra | fimmtudagur 24. febrúar 11:28
Íslandsbanki og Sjóvá styrkja Special Olympics á Íslandi
Íslandsbanki og Sjóvá undirrituðu samstarfssamning við Special Olympics á Íslandi laugardaginn 19. febrúar. Fyrirtækin verða aðalstyrktaraðilar Special Olympics á Íslandi fram yfir alþjóðaleika samtakanna í Kína árið 2007. Styrknum verður varið til uppbyggingar á starfsemi Special Olympics hér á landi og þátttöku í verkefnum erlendis. Samstarfssamningurinn er mjög þýðingarmikill fyrir uppbyggingu og þróun á starfi samtakanna hér á landi. Special Olympics samtökin hafa skapað ný tækifæri fyrir þroskaheft íþróttafólk en markmið þeirra er að allir hafi sömu möguleika til þátttöku á leikum samtakanna. Í samningnum er einnig ákvæði um að Sjóvá mun sjá um allar vátryggingar Íþróttasambands fatlaðra .
Heildarvirði samningsins er 8. milljónir króna.
Nánar

Íþróttasamband Fatlaðra | fimmtudagur 17. febrúar 11:01
Íslandsmót Íþróttasambands Fatlaðra 2005 í frjálsum íþróttum
Nemar íþróttakennaraskorar KHÍ á Laugarvatni voru starfsmenn Íslandsmóts ÍF í frjálsum íþróttum en þetta verkefni er hluti af námi þeirra við skólann, sem tengist íþróttastarfi fatlaðra og kennslu og þjálfun fatlaðra.

Það er ómetanlegt fyrir ÍF að fá þennan hóp til aðstoðar og eins og sjá má á myndunum tók hópurinn sig vel út og hafði gaman að verkefninu.

Íþróttasamband Fatlaðra | sunnudagur 13. febrúar 22:21
Íslandsmót Íþróttasambands Fatlaðra 2005 í frjálsum íþróttum
Íslandsmót Íþróttasambands Fatlaðra í frjálsum íþróttum fór fram í Laugardalshöll og Baldurshaga, í dag, sunnudaginn 13. febrúar 2005.
Keppendur voru alls 70 frá 9 aðildarfélögum ÍF.
Sveinn Áki Lúðvíksson, formaður Íþróttasambands Fatlaðra setti mótið sem hófst kl. 09.30 í Laugardalshöll. Þar var í morgun keppt í hástökki, langstökki án atrennu og kúluvarpi en kl. 13.00 hófst keppni í Baldurshaga þar sem keppt var í 60 m hlaupi og langstökki með atrennu.
Nemendur Kennaraháskóla Íslands, Íþróttaskorar á Laugarvatni, voru starfsmenn mótsins en þetta verkefni þeirra er liður í námi þeirra þar sem m.a. er tekið fyrir íþróttastarf fatlaðra og þjálfun og kennsla fatlaðra nemenda. Nemarnir munu einnig aðstoða ÍF vegna Íslandsmóta ÍF í mars og þetta samstarf hefur verið mjög þýðingarmikið fyrir Íþróttasamband Fatlaðra og sett skemmtilegan svip á Íslandsmótin.
Úrslit mótsins

Íþróttasamband Fatlaðra | föstudagur 11. febrúar 19:26
Íslandsmót Íþróttasambands Fatlaðra 2005 í frjálsum íþróttum
Íslandsmót Íþróttasambands Fatlaðra í frjálsum íþróttum fer fram í Laugardalshöll og Baldurshaga, sunnudaginn 13. febrúar 2005.
Keppendur eru 70 frá 9 aðildarfélögum ÍF.
Mótið hefst kl. 09.30 í Laugardalshöll þar sem verður keppt í hástökki, langstökki án atrennu og kúluvarpi.
Kl. 13.00 hefst keppni í Baldurshaga þar sem keppt verður í 60 m hlaupi og langstökki með atrennu.
Nemendur KHÍ, íþróttakennaraskorar verður starfsfólk mótsins og verður hópnum skipt niður, f.h. og e.h.
Sveinn Áki setur mótið kl. 09.30 en flýta þurfti mótinu vegna keppni í körfubolta í Laugardalshöll eftir hádegi.
Lionsklúbburinn Víðarr gefur öll verðlaun á mótinu.
Tímaseðill mótsins

Íþróttasamband Fatlaðra | mánudagur 7. febrúar 15:27
2 íslenskir keppendur til Nagano í Japan Vetrarleikar Special Olympics
Alþjóðavetrarleikar Special Olympics 2005 - Ísland í fyrsta skipti með í keppni í listhlaupi á skautum

2 íslenskir keppendur munu taka þátt í alþjóðavetrarleikum Special Olympics í Nagano í Japan, dagana 25.02 - 05.03 2005

Þetta eru þau Sandra Ólafsdóttir og Stefán Erlendsson, sem bæði eru nemendur í sérdeild Fjölbrautaskólans í Breiðholti. Fararstjórar, þjálfarar og aðstoðarmenn verða Jóhann Arnarson, stjórnarmaður í ÍF og kennari við við FB og Guðrún Hallgrímsdóttir, deildarstjóri sérdeildar FB.
Nánar

Íþróttasamband Fatlaðra | mánudagur 7. febrúar 15:05
ALP Athlete Leadership program - Ráðstefna á Grand Hótel 28. - 30. janúar 2005
Íþróttasamband Fatlaðra sem hefur umsjón með starfi Special Olympics á Íslandi
stóð fyrir ráðstefnu á Grand Hótel, helgina 28. - 30. janúar þar sem þátttakendur
voru einstaklingar sem hafa tekið þátt í leikum Special Olympics.
Ráðstefnan var á vegum Special Olympics í Evrópu og er haldin í tengslum við
átaksverkefnið ALP, athlete Leadership programm, þar sem markmið er að auka
þátttöku íþróttafólks í ákvarðanatöku og í félagsstarfi og þjálfa einstaklinga í að koma fram og tjá sín sjónarmið varðandi íþróttastarfið.
Nánar

Íþróttasamband Fatlaðra | föstudagur 28. janúar 14:37
ALP - "Athlete Leadership Program" ráðstefna á Grand Hótel
Helgina 28 - 30 janúar verður haldin á Grand Hótel, ráðstefna þar sem þroskaheft íþróttafólk tekur þátt í umræðu um starfsemi Special Olympics og er þjálfað í að koma fram, halda smáræðu og taka þátt í nefnda og fundarstörfum. Ráðstefnan hefur verið haldin víða á vegum Evrópusamtaka Special Olympics og tengist verkefni "ALP" "Athlete Leadership Programm" Fulltrúar íþróttafólksins taka þátt í Evrópuráðstefnu Special Olympics og sífellt meiri áhersla er lögð á virka þátttöku íþróttafólks í ákvarðanatöku samtakanna í hverju landi.
Ráðstefnan á Íslandi er styrkt af SOE og verða valdir 9 þátttakendur auk aðstoðarfólks.
Dagskrá ráðstefnunnar er frá kl. 18.00 á föstudegi 28. janúar og fram að hádegi sunnudaginn 30. janúar.
Dagskrá ráðstefnunnar
Glærukynning (8 mb.)

Íþróttasamband Fatlaðra | þriðjudagur 25. janúar 11:23
Kristín Rós - Íþróttamaður Reykjavíkur 2004
Miðvikudaginn 19. janúar sl. var tilkynnt um val á Íþróttamanni Reykjavíkur 2004 ásamt því að veittar voru viðurkenningar úr Afreks- og styrktarsjóði Reykjavíkur. Einnig fengu sjö reykvíkskir íþróttamenn viðurkenningu fyrir góðan árangur á árinu 2004. Athöfnin fór fram í Höfða.

Íþróttamaður Reykjavíkur árið 2004 er Krisín Rós Hákonardóttir sundkona úr Fjölni og Íþróttafélagi fatlaðra í Reykjavík. Kristín setti heimsmet í 100m baksundi og vann til gullverðlauna á Ólympíuleikum fatlaðra í Aþenu í sumar. Hún vann að auki til silfurverðlauna á Ólympíuleikunum í 100m bringusundi. Kristín náði einnig góðum árangri á Opna Danska og Opna Þýska Meistaramótinu þar sem hún vann annars vegar þrjú gull og hinsvegar fjögur gull. Kristín á Íslandsmet í öllum þeim sundgreinum sem keppt er í í hennar flokki. Kristín fékk til varðveislu farandbikar og eignarbikar ásamt 150.000 kr. styrk frá ÍBR af þessu tilefni.
Nánar

Íþróttasamband Fatlaðra | föstudagur 14. janúar 09:12
Opna Reykjavíkurmótið í frjálsum íþróttum
Opna Reykjavíkurmótið í frjálsum íþróttum fer fram í Baldurshaga, undir stúku Laugardalsvallar laugardaginn 15. janúar og hefjist kl. 10:00. Meðal keppenda verði Jón Oddur Halldórsson, silfurverðlaunahafi frá Ólympíumótinu í Aþenu 2004.
Úrslit mótsins

Íþróttasamband Fatlaðra | þriðjudagur 4. janúar 10:49
Nýárssundmót fatlaðra barna og unglinga
Nýárssundmót fatlaðra barna og unglinga fór fram í 21. sinn í hinni nývígðu 50 m innanhússlaug í Laugardalnum.
Borgarstjórinn í Reykjavík, frú Steinunn Valdís Óskarsdóttir var heiðursgestur mótsins að þessu sinni og ávarpaði hún mótsgesti við upphaf móts en áður höfðu íþróttamenn ársins 2004, þau Kristín Rós Hákonardóttir og Gunnar Örn Ólafsson, verið meðal þeirra sundmanna tóku fyrstu sundtökin í lauginni í tilefni vígslu hennar.
Þetta Nýárssundmót er eitt það fjölmennasta sem haldið hefur verið og voru um 80 þátttakendur frá 5 félögum skráð til leiks.
Besta afrek mósins samkvæmt stiga og forgjafaútreikningi vann Guðrún Lilja Sigurðardóttir, íþróttafélagi fatlaðra Reykjavík, hlaut 528 stig fyrir 50 m skriðsund sem hún synti á tímanum 35,20 sek. Í öðru sæti varð Lára Steinarsdóttir, Firði sem hlaut 484 stig fyrir 50 m bringusund á tímanum 48,84 sek og í þriðja sæti Hulda Hrönn Agnarsdóttir einnig úr Firði sem hlaut 408 stig fyrir 50 m skriðsund sem hún synti á tímanum 40,02 sek. Þess má geta að þetta er í þriðja sinn sem Guðrún Lilja vinnur þennan bikar og þar með til eignar.
Nánar
Úrslit mótsins má finna hér