Íþróttasamband fatlaðra óskar landsmönnum öllum gleðilegra jóla og farsældar á komandi ári. Þökkum samfylgdina á árinu 2009. 

Sérstakar þakkir til allra þeirra sem aðstoðuðu við Evrópumeisaramót fatlaðra í sundi og gerðu það jafn glæsilegt og raun bar vitni.

Helgina 12. – 14. febrúar 2010 verður haldið skíðanámskeið í Hlíðarfjalli í samstarfi ÍF, VMÍ og Winter Park.

Markhópar á námskeiðinu eru tveir;

1. Einstaklingar sem þurfa að nýta sérhannaða skíðasleða vegna fötlunar.
   Sleðar verða á staðnum, bæði sleðar fyrir byrjendur og lengra komna.
   Hámarksfjöld 12 manns.
2. Leiðbeinendur, skíðaþjálfarar, starfsfólk skíðasvæða og aðrir þeir sem áhuga hafa að læra notkun skíðasleða fyrir fatlaða og aðstoða við uppbyggingarstarfið á þessu sviði hér á landi. Sérstaklega er mikilvægt að starfsfólk skíðasvæða sé með þekkingu á notkun sleðana í lyftum.

Skráningafrestur er til 1. febrúar 2010.

Sjá nánar

Í hófi sem Íþróttasamband fatlaðra hélt á Radisson SAS Hótel Sögu þann 16. desember sl. var sundfólkið Eyþór Þrastarson, ÍFR og Sonja Sigurðardóttir, ÍFR kjörið íþróttamaður og íþróttakona ÍF fyrir árið 2009.

Umsögn um Eyþór Þrastarson

Umsögn um Sonju Sigurðardóttir

Þá var Jónu B. H. Jónsdóttur ÍFR afhendur Guðrúnarbikarinn fyrir störf sín að íþróttamálum fatlaðra.

Umsögn um Jónu B. H. Jónsdóttur

Fatlaðir íslenskir íþróttamenn hafa verið á ferð og flugi þetta árið eins og mörg undangengin ár. Þó svo að komið hafi verið upp frábærri íþróttaaðstöðu hér innanlands og okkar fólk taki þátt í fjölda móta á innlendum vettvangi er ávallt nauðsyn að fremsta afreksfólk úr röðum fatlaðra taki þátt í mótum erlendis. Snýst þátttaka þeirra í þessum erlendu mótum um að ná tilskyldum lágmörkum og/eða styrkleikastigum sem nauðsynleg eru til þátttöku í hinum ýmsu mótum sem Alþjóðaólympíuhreyfing fatlaðra stendur fyrir s.s. Evrópu- eða Heimsmeistaramótum.

Sá sem mest hefur verið á ferðinni þetta árið er borðtenniskappinn Jóhann R. Kristjánsson úr Nes, Reykjanesbæ sem alls tók þátt í átta mótum á erlendis.  Þar með talið er Evrópumeistaramót fatlaðra í borðtennis sem fram fór í Genoa á Ítalíu sem fram fór í júnímánuði síðast liðnum og áður hefur verið fjallað um.

Nánar

Opið Jólamót Aspar og Munins í frjálsum-íþróttum verður haldið sunnudaginn 13. desember í Laugardalshöll, Reykjavík. Skráningar berist fyrir 6. desember.

Dagskrá
Skráningarform

Vetraríþróttanámskeið fyrir fatlaða hafa verið haldin í Híðarfjalli í samstarfi Íþróttasambands Fatlaðra og Vetraríþróttamiðstöðvar Íslands frá árinu 2000.  Samstarf hófst árið 2000 við Challenge Aspen í Colorado og árið 2006 við NSCD, Winter Park, Colorado. Leiðbeinendur hafa komið til Íslands og Íslendingar hafa notið leiðsagnar og ráðgjafar í Colorado.   ÍF hefur notið mikilvægrar aðstoðar starfsfsfólks á Grensásdeild við að hvetja fólk til að kynna sér möguleika á útivistartilboðum fatlaðra. Arna Sigríður Albertsdóttir og Kristín Sigurðardóttir  sem höfðu verið í endurhæfingu á Grensásdeild mættu á námskeið ÍF og VMÍ í febrúar 2009 þar sem leiðbeinandi var m.a. Beth Fox frá Winter Park.  Þær sýndu strax mikinn áhuga á að læra að nota sleðana og eru nú staddar á námskeiði í Winter Park.  Þær eru  með bloggsíðu www.kristinogarna.bloggar.is  

Myndir frá námskeiði ÍF, VMÍ og Winter Park í  Hlíðarfjalli í febrúar 2009 eru á www.123.is/if

Eftirfarandi frétt um ferð Örnu Sigríðar og Kristínar til Bandaríkjanna er á mbl.is

Nú er lokið Íslandsmeistaramót fatlaðra í sundi 25 m laug sem fram fór í Laugardalslaug.
Tæplega 90 keppendur frá 9 félögum taka þátt í mótinu og meðal þeirra allir íslensku þátttakendurnir sem þátt tóku í Evrópumeistaramótinu sem fram fór hér á landi í októbermánuði n.k.
Í dag líkt og í gær voru sett 9 Íslandsmet og urðu metin því 18 í allt, 14 í flokkum hreyfihamlaðra og 4 í flokki blindra og sjónskertra. Í sundi fatlaðra er keppt í 10 flokkum hreyfihamlaðra S1 – S10 þar sem S1 táknar mestu fötlun og S10 minnstu fötlun, þremur flokkum blindra og sjónskertra S11 – S13 þar sem S11 eru blindir og S12 og 13 sjónskertir og flokki í þroskaheftra S14.

Þeir sem Íslandsmet settu voru:
Hjörtur M. Ingvarsson, ÍFR flokki S5 í 50 m, 100 m, 200 m og 400 m skriðsundi
Pálmi Guðlaugsson, Fjölni flokki S6 í 100 m flugsundi, 100 m skriðsundi og 200 m fjórsundi
Hrafnkell Björnsson, ÍFR flokki S5 í 50 og 100 m baksundi og 50 m bringusundi
Ragney L Stefánsdóttir, Ívari flokki S10 í 50 m skriðsundi
Sonja Sigurðardóttir, ÍFR flokki S4 í 100 m bringusundi
Anna K. Jensdóttir, ÍFR flokki SB5 í 50 m bringusundi
Vignir G. Hauksson, ÍFR flokki SB 5 í 100 m bringusundi
Vaka Þórsdóttir, Firði flokki S11 í 50 m og 100 m skriðsundi og 50 m og 100 m baksundi

Úrslit mótsins

Ný stjórn Alþjóðaólympíuhreyfingar fatlaðra – IPC var kosin á aðalfundi samtakanna sem fram fór í Kuala Lumpur 21. – 22. nóvember sl. 
Sir Phil Craven frá Bretlandi var endurkjörinn forseti IPC og varaforseti Greg Hartung frá Ástralíu.  Meðstjórnendur voru kosnir;
Rita van Driel, Hollandi, Miguel Sagarra, Spáni, Alan Dicson, Bretlandi, Patrick Jarvis, Kanada, Ann Cody, Bandaríkjunum, Andrew Parsons, Brasilíu, Dato Zainal Abu-Zarin, Malaísu, Jose Luis Campo, Argentínu, Hyang-Sook Jang, Kóreu.
Því miður náði eini Norðurlandabúinn, Karl Vilhelm Nielsen frá Danmörku ekki kjöri en í hina nýju stjórn voru kosnir fulltrúar frá öllum heimsálfum auk þess sem hina nýju stjórn skipa nú þrjár konur. 
Þetta ætti að endurspegla vel hin ýmsu sjónarmið sem fram kunna að koma og verður vonandi IPC til gæfu í framtíðinni.

Á aðalfundi Alþjóðaólympíuhreyfingar fatlaðra – IPC, sem nú stendur yfir í Kuala Lumpur í Malasíu var samþykkt að heimila þroskaheftum íþróttamönnum þátttöku í Ólympíumótum fatlaðra að nýju.

Í kjölfar svindlmála, sem upp komu á Ólympíumótinu í Sidney árið 2000, setti IPC bann á þátttöku þeirra þar til viðunandi lausn fengist á flokkunarmálum þessa hóps. Undanfarin ár hefur hópur vísindamanna og sérfræðinga í þroskahömlun unnið að þessum málum og kynntu þeir niðurstöður sínar um takmörkun þroskahömlunar á íþróttalega getu á ráðstefnu sem haldinn var í tengslum við aðalfundinn.

Samþykkt aðalfundarins opnar dyr þroskaheftra íþróttamanna að Ólympíumótum framtíðarinnar að uppfylltum tveimur skilyrðum. Annars vegar að undangengnu mati um þroskahömlun viðkomandi og hins vegar mati sérfræðinga viðkomandi íþróttagreinar um hæfni viðkomandi íþróttamanns til þátttöku í greininni. Slíkt hæfnismat er byggt upp á prófum sem tengjast “íþróttalegri greind” viðkomandi í þeirri íþróttagrein sem hann stundar og unnt er að framkvæma á staðnum. Enn sem komið er eru próf þau er hér um ræðir ekki fullmótuð en stefnt er að því að þau verði tilbúinn og öllum opin um mitt ár 2010.

Ofangreind samþykkt heimilar þorskaheftum íþróttamönnum að keppa í fjórum íþróttagreinum á Ólympíumóti fatlaðra í London árið 2012 þ.e. sundi, frjálsum íþróttum, borðtennis og róðri en stefnt er að þátttöku þeirra í fleiri greinum í Ólympíumótum framtíðarinnar. Upplýsingar um lágmörk í þeim greinum sem þroskaheftir taka þátt í, veða líkt og annarra fötlunarflokka, birt í byrjun árs 2010.

Með samþykkt þessari lýkur áralangri baráttu Íslands og annarra landa um lausn þessa máls en það voru fulltrúar Íslands, sem á aðalfundi IPC árið 2007, lögðu fram tillögu sem leiddi til þessarar farsælu lausnar. Tengdri tillögu þessari tók Ísland að sér að standa að framkvæmd Evrópumeistaramóts fatlaðra í sundi þar sem þroskaheftir sundmenn voru, í fyrsta sinn síðan árið 2000, með í móti sem IPC stendur fyrir. Á mótinu voru m.a. þau próf og mælingar sem að ofan greinir notuð og sannreynd og útkoma þeirra og fleiri prófa notuð til að kynna niðurstöður á ráðstefnunni sem tengd var aðalfundinum.

Um leið og Íþróttasamband fatlaðra fagnar niðurstöðu þessari vill sambandið koma á framfæri þökkum til allra þeirra sem lagt hafa þessu máli lið sem og fulltrúum ríkisvaldsins fyrir þeirra aðstoð.

Íslandsmót Fatlaðra fer fram í Sundlaug Laugardals 28. og 29. nóvember nk.

Laugardagur 28. nóvember
Upphitun hefst klukkan 14:00 og mót 15:00

Sunnudagur 29. nóvember
Upphitun hefst klukkan 09:00 og mót 10:00

Skráningum skal skilað ÍF (if@isisport.is) í síðastalagi 24:00 mánudaginn 23. nóv ef skilað er á HyTEK formi annars föstudaginn 21. nóv ef skilað er á EXCEL formi.

Nánar

Sem formaður Íþróttasambands fatlaðra er ég bæði stoltur og þakklátur fyrir frábært Evrópumeistaramót fatlaðra í sundi 2009 sem nú er nýafstaðið.

Þegar ÍF tók að sér að halda mótið vissum við að við ættum stuðning margra til að gera mótið sem best úr garði. Við fengum vilyrði ríkisvaldsins og Reykjavíkurborgar um fjárhagsaðstoð og okkar góðu samstarfsaðilar létu heldur ekki sitt eftir liggja en það mundi svo mest reyna á starfsmenn ÍF við framkvæmd mótsins.

Að mínu áliti fór mótið fram úr björtustu vonum og hjálpaðist allt að, góð þátttaka, framúrskarandi keppendur, mótsstaðurinn og aðstaðan og ekki síst framkvæmdin sjálf. Þar var úrvalsfólk í hverju rúmi og samstarf Íþróttasambands fatlaðra við mótsstjóra og sjálfboðaliða var eins og um eina heild væri að ræða. Þarna blandaðist saman fagfólk og sjálfboðaliðar undir styrkri stjórn Gústafs Adólfs Hjaltasonar og unnu saman eins og þeir væru að halda sitt 10. stórmót.

Að viðbættri aðkomu Íþrótta- og Ólympíusambands Íslands, Sundsambands Íslands og dómara á þeirra vegum, sýndi það sig og sannaði að Íslendingar geta auðveldlega tekið að sér að halda sundmót af öllum stærðargráðum, slík var fagmennskan. Jafnvel lagði Knattspyrnusamband Íslands okkur lið.

Ég vil þakka öllum þessum aðilum fyrir þeirra framlag en sérstaklega langar mig að færa stjórnar- og starfsmönnum ÍF þakkir fyrir þeirra fórnfúsa starf sem fór fram úr öllum veruleika.

Sveinn Áki Lúðvíksson
Formaður Íþróttasambands fatlaðra

Jóhann Rúnar Kristjánsson borðtennismaður frá NES landaði silfurverðlaunum í 1. flokki á punktamóti Víkings og Nings um síðustu helgi. Jóhann var að keppa í 1. flokki ófatlaðra þar sem hann lagði Sindra Þór Sigurðsson 3-2 í undanúrslitum.

Jóhann mætti Sigurbirni Sigfússyni í úrslitum þar sem Sigurbjörn hafði betur 3-1. Fyrsta lota fór 11-1 fyrir Sigurbirni en Jóhann náði þó að stríða honum lítið eitt í næstu lotum. Jóhann vann aðra lotu 11-7 en tapaði svo 4-11 og 6-11.

Næsta verkefni á dagskrá hjá Jóhanni er opna ítalska meistaramótið í Lignano á Ítalíu í byrjun nóvembermánaðar.

Nú rétt í þessu lauk Evrópumeistaramóti fatlaðra í sundi í innilauginni í Laugardal. Að loknum sjö veglegum keppnisdögum hafa níu Íslandsmet fallið en 73 Evrópumet og 24 heimsmet hafa verið slegin og ljóst að allir sterkustu sundmenn álfunnar komu í fantaformi til Íslands.

Þrír íslenskir sundmenn tóku þátt í úrslitum í kvöld þar sem Hjörtur Már Ingvarsson bætti sig enn frekar í 200m. skriðsundi er hann synti á tímanum 3.50,35 mín og bætti því Íslandsmetið sitt frá því í undanrásum í morgun um rúmar 10 sekúndur. Það þýðir að Hjörtur bætti tímann sinn í dag í 200m. skriðsundi um hálfa mínútu! Hjörtur hefur lagt mikið á sig í undirbúningnum fyrir EM og ljóst að allt erfiðið skilaði sér og gott betur.

Pálmi Guðlaugsson keppti í kvöld í 100m. baksundi og náði ekki að skáka Íslandsmeti sínu sem er 1.47,90 mín. því Pálmi synti á tímanum 1.48,42 mín í úrslitum.

Eyþór Þrastarson náði sér ekki á strik í kvöld í 100m. skriðsundi í flokki S11 þegar hann synti á tímanum 1.09,24 mín. og hafnaði hann í áttunda og síðasta sæti.

Íslendingar telfdu fram efnilegu liði á mótinu á aldursbilinu 14-18 ára og ljóst að þar finnast sundmenn sem vafalítið munu láta að sér kveða í framtíðinni.

Íþróttasamband fatlaðra vill koma á framfæri innilegu þakklæti til allra þeirra sem lögðu mótinu lið og hjálpuðu við að gera það ógleymanlegt. Verkefnið er það stærsta í sögu Íþróttasambands fatlaðra og viðeigandi hápunktur á 30 ára afmælisárinu.

Mynd/ Íslenski hópurinn við lok EM ásamt þjálfurum sínum.

Evrópumeistaramót fatlaðra í sundi hefur gengið vonum framar í innilauginni í Laugardal og það er ekki síst þeim fjölmörgu sjálfboðaliðum að þakka hversu vel hefur gengið. Ef þeirra hefði ekki notið við hefði framkvæmd mótsins aldrei verið möguleg sagði Ólafur Magnússon framkvæmdastjóri afreks- og fjármálasviðs Íþróttasambands fatlaðra.

,,Það er aðdáunarvert að sjá þessa hundruðir sjálfboðaliða vinna hörðum höndum að því að gera Evrópumótið sem best úr garði. Fyrir tilstilli þeirra höfum við unnið þrekvirki þar sem EM hefur ekki verið haldið í næstum því áratug,“ sagði Ólafur en í dag kl. 17:00 hefst síðasti keppnishluti mótsins og eldsnemma í fyrramálið halda flestir keppendur aftur til síns heima.

Íþróttasamband fatlaðra hefur m.a. starfrækt veitingaaðstöðu og blaðamannaaðstöðu í innilauginni í Laugardal þar sem meðfylgjandi myndir voru teknar en Laugardalslaug hefur iðað af lífi síðustu vikuna.

Þrekmennið Hjörtur Már úr Þorlákshöfn var fyrstur á blokkina í morgun og venju samkvæmt fór pilturinn á kostum enda á hann 14 ára afmæli í dag. Hjörtur rústaði gamla Íslandsmetinu sínu í 200m. skriðsundi í flokki S5. Hjörtur var skráður á mótið með tímann 4.20,04 mín. í 200m. skriðsundi en í morgun í undanrásum synti hann sig inn í úrslitin á nýju og glæsilegu Íslandsmeti, 4.01,02 mín. Magnaður árangur hjá þessum unga kappa úr Þorlákshöfn sem mun láta að sér kveða í úrslitum í kvöld.

Eyþór Þrastarson komst með naumindum inn í úrslit í 100m. skriðsundi í flokki S11 er hann synti á tímanum 1.07,71 mín. í undanrásum. Eyþór var skráður inn á mótíð með tímann 1.06,75 mín. og var því snöggtum yfir sínum besta tíma en verður engu að síður með í úrslitum í kvöld.

Íslendingar telfdu fram liði í 4x100m. skriðsundi og komu í mark á tímanum 6.40,54 mín. og komst liðið ekki í úrslit. Sveitina skipuðu þeir Hrafnkell Björnsson, Guðmundur Hermannsson, Pálmi Guðlaugsson og Hjörtur Már Ingvarsson.

Mynd/ Afmæliskappinn Hjörtur Már Ingvarsson á laugarbakkanum í morgun þar sem hann synti sig niður eftir undanrásirnar.

Tvö Íslandsmet féllu í kvöld þegar sjötti og næstsíðasti keppnisdagur Evrópumeistaramóts fatlaðra í sundi fór fram. Þrekmennið úr Þorlákshöfn, Hjörtur Már Ingvarsson, rúllaði upp gamla Íslandsmetinu sínu í 100m. skriðsundi er hann bætti það um 10 sekúndur. Pálmi Guðlaugsson var líka í stuði er hann bætti sitt eigið Íslandsmet í 50m. flugsundi.

Eyþór Þrastarson gerir nú harða atlögu að langflestum Íslandsmetum Birkis Rúnar Gunnarssonar en í kvöld var Eyþór í fyrsta sundi þar sem hann synti á 1.18,94 mín. í 100m. baksundi. Tíminn dugði Eyþóri í 7. sæti en Birkir Rúnar heldur enn í Íslandsmetið sem er 1.17,53 mín. Eyþór er þó byrjaður að hrifsa metin af Birki en á dögunum sló Eyþór Íslandsmetið í 50m. skriðsundi en þá hafði met Birkis staðið í 13 ár! Eyþór var skráður á EM í baksundið með tímann 1.20,94 mín. og bætti sig því töluvert í dag en hann á þó eitt sund eftir sem er á morgun þegar hann syndir í 100m. skriðsundi.

Næstur á svið var Hjörtur Már Ingvarsson, sem verður 14 ára gamall á morgun, en Hjörtur fór gersamlega hamförum og bætti sitt eigið Íslandsmet um heilar 10 sekúndur! Gamla met Hjartar í 100m. skriðsundi í flokki S5 var 1.58,57 mín. en Hjörtur kom í bakkann í kvöld á tímanum 1.48,42 mín. og hefur Þorlákshafnarbúinn þrekmikli svo sannarlega sýnt á mótinu að hann ætli sér mikla hluti í framtíðinni. Þrátt fyrir bætinguna hafnaði Hjörtur í 8. sæti úrslitanna en getur vel við unað og verður forvitnilegt að fylgjast með kappanum í 200m. skriðsundi á morgun.

Sonja Sigurðardóttir var næst á pall í 100m. skriðsundi í flokki S5 og synti hún á tímanum 2.08,97 sem var 0,2 sekúndum lakari tími en skráningartími hennar á mótið. Þar með hefur Sonja lokið keppni á EM að þessu sinni.

Hið næstum því ómögulega gerðist í kvöld þegar félagarnir Jón Margeir Sverrisson og Ragnar Ingi Magnússon kepptu í 100m. skriðsundi í flokki S14. Jón Margeir hafnaði í 5. sæti og synti á nákvæmlega sama tíma og hann gerði í morgun í undarásum, 1.00,83 mín. Stærðfræðilegar líkur á þessum tíma hjá Jóni eru hverfandi og of flóknar fyrir greinarhöfund til að reikna en flestir geta sammælst um að synda upp á sekúndubrot í undanrásum og úrslitum sé afar ólíklegt.

Ragnar Ingi synti á tímanum 1.06,38 mín. sem er næstum því tveimur sekúndum lakari tími en hann synti á í undanrásum í morgun. Að svo búnu hafa allir fimm sundmennirnir frá Íslandi í flokki S14 lokið keppni á mótinu og hafa þeir allir staðið sig með mikilli prýði. Þær Anna Kristín Jensdóttir og Ragney Líf Stefánsdóttir hafa einnig lokið keppni en á morgun mun Hrafnkell Björnsson synda í sinni einu grein á mótinu sem verður 4x100m. boðsund (skrið).

Hjörtur Már var ekki einn um að setja Íslandsmet í kvöld því slíkt hið sama gerði Pálmi Guðlaugsson í flokki S6 er hann synti á tímanum 43,72 sek. í 50m. flugsundi. Pálmi komst naumlega inn í úrslitin á tímanum 44,95 sek. þar sem hann hafði betur gegn Antum Brazak frá Króatíu sem synti í morgun á tímanum 44,98 sek. Eldra Íslandsmet Pálma var 44,13 sek. sem hann setti í Ásvallalaug í mars á þessu ári.

Á morgun keppir Eyþór Þrastarson í 100m. skriðsundi S11, Pálmi Guðlaugsson keppir í 100m. baksundi í S6 og Hjörtur Már Ingvarsson keppir í 200m. skriðsundi S5. Þá verða fjórir sundmenn í 4x100m. skriðsundi en þeir eru Hrafnkell Björnsson, Guðmundur Hermannsson, Hjörtur Már Ingvarsson og Pálmi Guðlaugsson.

Mynd/Sölvi Logason: Hjörtur Már hefur farið á kostum í skriðsundi S5.

Undanrásum á sjötta keppnisdegi Evrópumeistaramóts fatlaðra í sundi var enda við að ljúka þar sem þrír íslenskir sundmenn syntu sig inn í úrslit í kvöld. Félagarnir Jón Margeir Sverrisson og Ragnar Ingi Magnússon komust í úrslit í 100m. skriðsundi í flokki S14 og Pálmi Guðlaugsson komst með sögulegum naumindum í úrslit í 50m. flugsundi í flokki S6.

Ragnar Ingi var fyrstur af stað í morgun og komst í úrslit er hann synti á 1.04,51 mín. í 100m. skriðsundi S14. Niðurstaðan var tæplega tveggja sekúndna bæting hjá Ragnari sem skráður var inn á mótið með tímann 1.06,05 mín.

Strax í næsta riðli var Jón Margeir Sverrisson og hann komst líka í úrslit á tímanum 1.00,83 og gerði þar veglega atlögu að Íslandsmeti Gunnars Arnar Ólafssonar. Íslandsmet Gunnars í 100m. skriðsundi er 59,18 sek. og verður fróðlegt að sjá hvort það met standi eftir kvöldið í kvöld. Bætingin var líka veruleg hjá Jóni sem skráður var inn á mótið með tímann 1.02,55 mín.

Aníta Ósk Hrafnsdóttir keppti líka í 100m. skriðsundi S14 í kvennaflokki og kom í mark á tímanum 1.25,12 mín. sem var persónuleg bæting hjá Anítu um 0,8 sek. en tíminn dugði henni ekki inn í úrslitin.

Pálmi Guðlaugsson var síðastur íslensku keppendanna í undanrásum er hann keppti í 50m. flugsundi í flokki S6. Fyrirfram var vitað að hörð barátta yrði framundan hjá Pálma við að tryggja sér sæti í úrslitum en kappanum tókst það engu að síður þar sem níundi maður var með 0,03 sek. lakari tíma en Pálmi. Hafnfirðingurinn öflugi syndir því í úrslitum í kvöld þar sem hann var með tímann 44,95 sek. sem er tæpum 0,8 sek. lakari tími en hann var með skráðan inn á mótið.

Í úrslitum í kvöld keppa líka þau Eyþór Þrastarson, Sonja Sigurðardóttir og Hjörtur Már Ingvarsson. Eyþór ríður á vaðið kl. 17:00 100m. baksundi í flokki S11 (blindir).

Þau sem keppa í úrslitum í kvöld eru:
Eyþór Þrastarson
Hjörtur Már Ingvarsson
Sonja Sigurðardóttir
Jón Margeir Sverrisson
Ragnar Ingi Magnússon
Pálmi Guðlaugsson

Mynd/ Jón Margeir Sverrisson stingur sér til sunds í undanrásum í morgun.

Þeir Jón Margeir Sverrisson og Adrian Óskar Sindelka Erwin voru rétt í þessu að ljúka keppni í 200m. fjórsundi í flokki S14 (þroskahamlaðra) á Evrópumóti fatlaðra í sundi. Jón Margeir hafnaði í 4. sæti og Adrian Óskar bætti sig verulega frá undanrásunum í morgun.

Jón Margeir synti á tímanum 2.36,79 mín. í undanrásum í morgun en í úrslitum í kvöld synti hann á tímanum 2.36,04 mín. og landaði fjórða sæti. Adrian Óskar synti á tímanum 2.57,79mín. í úrslitum í kvöld en í morgun synti hann á 2.59,33 mín. og bætti sig því um tæpar tvær sekúndur.

Aðrir íslenskir sundmenn komust ekki í úrslit í kvöld en á morgun keppa sjö íslenskir sundmenn og má finna ráslista morgundagins inni á vefsíðu keppninnar, www.ifsport.is/ec2009

Mynd/Stefán Þór Borgþórsson: Adrian Óskar bætti sig í 200m. fjórsundi í kvöld sem dugði honum í 7. sætið.

Undanrásum á fimmta keppnisdegi var rétt í þessu að ljúka þar sem tveir íslenskir sundmenn tryggðu sér sæti í úrslitum í kvöld. Þeir Jón Margeir Sverrisson og Adrian Óskar Sindelka Erwin komust í úrslit í 200m. fjórsundi í flokki S14 (þroskahamlaðra). Báðir bættu þeir tímana sína í sundinu og Jón Margeir fór á kostum er hann bætti tímann sinn um 9 sekúndur!

Anna Kristín Jensdóttir var fyrst íslensku keppendanna í lauginni í dag er hún synti í 100m. bringusundi í flokki SB5 (B fyrir bringusund). Anna komst ekki í úrslit þar sem hún synti á tímanum 2.31,31 en hún var skráð inn á mótið á tímanum 2.29,86.

Guðmundur Hermannsson hélt uppteknum hætti er hann synti á 32,46 sek. í 50m. skriðsundi í flokki S9 en Guðmundur var skráður inn á mótið á tímanum 35,24 sek. Frábær frammistaða hjá Guðmundi sem hefur bætt tímana sína verulega á mótinu en þrátt fyrir þessa vösku framgöngu tókst honum ekki að tryggja sér sæti í úrslitum.

Ísafjarðarmærin Ragney Líf Stefánsdóttir var þriðja í röðinni er hún keppti í 50m. skriðsundi í flokki S9. Ragney komst ekki í úrslit þrátt fyrir að hafa bætt tímann sinn en hún synti á 34,91 sek. og bætti sig um tæpar tvær sekúndur þar sem hún fór inn á mótið með tímann 36,09 sek. Íslandsmetið í greininni á Lilja María Snorradóttir en metið í flokknum hefur staðið frá árinu 1992 þar sem Lilja María setti metið á Ólympíumóti fatlaðra í Barcelona.

Félagarnir Jón Margeir Sverrisson og Adrian Óskar Sindelka Erwin kepptu svo saman í undanrásum í 200m. fjórsundi í flokki S14. Jón Margeir var í ham og bætti tímann sinn um 9 sekúndur er hann synti á tímanum 2.36,04 mín en hann fór á mótið með tímann 2.45,74 mín. Arian Óskar var skráður til leiks á tímanum 3.00,86 en synti á tímanum 2.59,33 mín. Jón Margeir á fjórða besta tímann inn í úrslit en Adrian á sjöunda besta tímann en ef íslensku piltarnir hafa hug á því að komast á pall verða þeir að bretta upp ermar þar sem þrír bestu tímarnir eru um 10 sekúndum betri en tími Jóns Margeirs.

Aníta Ósk Hrafnsdóttir synti einnig í 200m. fjórsundi í flokki S14 en komst ekki í úrslit þrátt fyrir að hafa synt á sínum besta tíma, 3.28,59 mín.

Pálmi Guðlaugsson setti nýtt Íslandsmet í 100m. skriðsundi í flokki S6 er hann synti á tímanum 1.24,54 og þar með bætti hann sitt eigið Íslandsmet sem var 1.24,72 mín. en það met setti hann í febrúar á þessu ári. Þrátt fyrir Íslandsmetið komst Pálmi ekki í úrslit.

Þess má síðan geta að Evrópumeistaramótið verður í beinni útsendingu hjá RÚV kl. 17:00-18:00 í dag.

Myndir/Stefán Þór Borgþórsson: Jón Margeir bætti sig verulega en hann er hér á efri myndinni en á þeirri neðri er Ísafjarðarmærin Ragney Líf Stefánsdóttir.

Nýlega endurnýjuðu VISA Ísland og Íþróttasamband fatlaðra (ÍF) samning um samstarf og stuðning fyrirtækisins við starfsemi Íþróttasambands fatlaðra.

Með samningi þessum gerist VISA Ísland eitt af fjölmörgum fyrirtækjum sem styrkja sambandið vegna framkvæmdar Evrópumeistaramóts fatlaðra sem fram fer hér á landi um þessar mundir. Samningurinn er einnig langtímasamningur sem gerir VISA Ísland einn af aðalsamstarfs- og styrktaraðilum Íþróttasambands fatlaðra vegna undirbúnings og þátttöku fatlaðra íþróttamanna í Ólympíumóti fatlaðra sem haldið verður í London árið 2012.

Í tilefni af undirritun samningsins sagði Sveinn Áki Lúðvíksson formaður Íþróttasambands fatlaðra að mikil ánægja væri innan sambandsins með áframhaldandi stuðning VISA Íslands við íþróttastarf fatlaðra hér á landi. Velgengni fatlaðra íslenskra íþróttamanna væri ekki síst áratuga árangursríku samstarfi við fyrirtækið að þakka.

Höskuldur Ólafsson, forstjóri VISA Ísland, sem undirritaði samninginn fyrir hönd fyrirtækins lýsti yfir mikilli ánægju með það að fyrirtækið væri einn af aðal samstarfs- og stuðningsaðilum Íþróttasambands fatlaðra. Það væri VISA Íslandi afar mikilvægt að taka virkan þátt í að styðja við íþróttalíf landsins og væri samningur þessi hluti af þátttöku fyrirtækins í starfi íþróttahreyfingarinnar á Íslandi. VISA Íslandi væri heiður sýndur með því að fá tækifæri til þess að taka þátt í því að efla íþróttir fatlaðra hér á landi

Samningur VISA Íslands og Íþróttasambands Fatlaðra gildir fram yfir Ólympíumót fatlaðra í London 2012.

Mynd/ Höskuldur Ólafsson VISA og Sveinn Áki Lúðvíksson ÍF handsala samninginn.

Evrópumeistaramót fatlaðra í sundi er nú langt á veg komið og að fjórum keppnisdögum loknum hafa Íslendingar einu sinni komist á verðlaunapall eftir að Eyþór Þrastarson lét að sér kveða í 400m. skriðsundi. Í kvöld áttu Íslendingar tvo sundmenn í úrlsitum en það voru þeir Adrian Óskar Sindelka Erwin og Skúli Steinar Pétursson.

Adrian stórbætti tímann sinn í 100m. bringusundi í flokki S14 (þroskahamlaðra) er hann synti á tímanum 1.29,39 mín. en Adrian var skráður til leiks á mótið á tímanum 1.34,84 mín. Frábært sund hjá Adrian sem tryggði honum fjórða sætið í greininni. Nágrannar okkar frá Færeyjum lönduðu bronsverðlaunum í þessari grein en einn sundmaður kemur frá Færeyjum á Evrópumeistaramótinu en sá heitir Ragnvaldur Atlason Jensen og synti á tímanum 1.17,20 mín.

Skúli Steinar Pétursson synti á 1.32,28 mín. en sund hans var dæmt ógilt í kvöld.

Á morgun verður mikið um að vera hjá íslensku keppendunum þar sem sjö þeirra munu synda. Fyrst af stað er Anna Kristín Jensdóttir í 100m. bringusundi í flokki SB5 (B fyrir bringusund). Þess má geta að sunddívan Kirsten Bruhn frá Þýskalandi verður í sama riðli og Anna en Bruhn á heimsmetið í greininni sem er 1.34,02 mín sem hún setti á Ólympíumóti fatlaðra í Peking.

Guðmundur Hermannsson er næstur í 50m. skriðsundi karla í flokki S9. Á eftir Guðmundi kemur Ragney Líf Stefánsdóttir í 50m. skriðsundi í flokki S10 kvenna. Þá koma næstir þeir Jón Margeir Sverrisson og Adrian Óskar í 200m. fjórsundi í flokki S14. Strax þar á eftir, eða í næstu grein, er Aníta Ósk Hrafnsdóttir í 200m. fjórsundi í kvennaflokki S14. Pálmi Guðlaugsson verður svo í undanrásum í 100m. skriðsundi karla í flokki S6 og þar verður hann í riðli með goðsögninni frá Svíþjóð, Anders Olsson sem á heimsmetið í greininni en Olsson hefur farið á kostum á Íslandi en kappinn er 44 ára gamall og í toppformi.

Allir íslensku sundmennirnir fara því í undanrásir á morgun og verður fróðlegt að sjá hverjir þeirra skila sér inn í úrslitin.

Bretar hafa farið mikinn á mótinu og unnið til 36 verðlauna eða mest allra þjóða. Úkraínumenn koma næstir Bretum með 24 verðlaun og Spánverjar verma þriðja sætið með 19 verðlaun.

Hér má svo sjá ráslistann fyrir morgundaginn þar sem Íslendingar verða fyrirferðamiklir í undanrásum.

Mynd/Stefán Þór Borgþórsson: Adrian stóð sig með sóma í bringusundinu í kvöld.

Þrír íslenskir sundmenn tóku þátt í undanrásum á Evrópumeistaramóti fatlaðra í morgun þegar fjórði keppnisdagur af sjö fór af stað. Eyþór Þrastarson sem í gærkvöldi landaði silfurverðlaunum í 400m. skriðsundi keppti í 50m. skriðsundi í morgun og bætti 13 ára gamalt Íslandsmet Birkis Rúnars Gunnarssonar.

Eyþór synti á tímanum 30,86 sek. en Birkir Rúnar átti gamla metið sem var 31,04 sem hann setti á Ólympíumóti fatlaðra í Atlanta árið 1996. Glæsilegt met hjá Eyþóri sem engu að síður komst ekki í úrslit í greininni.

Guðmundur Hermannsson var fyrstur Íslendinga í laugina í morgun en Guðmundur keppti í 400m. sundi í flokki S9. Um gríðarlega tímabætinu var að ræða hjá Guðmundi sem var skráður til leiks á mótið með tímann 5.36,12 mín. en Guðmundur synti á tímanum 5.16,12 mín. í morgun og bætti sig því um 20 sekúndur. Magnaður árangur hjá þessum unga sundmanni en hann keppir einmitt í sama flokki og Ólafur Eiríksson gerði forðum daga. Íslandsmet Ólafs í greininni er 4.41,07 mín. sem hann setti á Ólympíumóti fatlaðra í Barcelona árið 1992.

Aníta Ósk Hrafnsdóttir keppti síðustu Íslendinga í undanrásum í 100m. bringusundi í flokki S14. Aníta synti á tímanum 1.45,60 mín. en sund hennar var dæmt ógilt og því átti hún ekki kost á því að komast í úrslit í kvöld.

Það var því enginn íslenskur sundmaður í undanrásum sem komst í úrslit fyrir kvöldið en þeir Adrian Óskar Sindelka Erwin og Skúli Steinar Pétursson keppa í beinum úrslitum í 100m. bringusundi í flokki S14 í kvöld.

Mynd/Stefán Þór Borgþórsson: Guðmundur Hermannsson bætti sig um 20 sekúndur í 400m. skriðsundi í flokki S9.

Mikið var um að vera í gær hjá íslensku sundmönnunum sem keppa á Evrópumeistaramóti fatlaðra í Laugardalslaug. Eyþór Þrastarson varð fyrstur úr íslenska hópnum til þess að komast á verðlaunapall en bæði hann og Pálmi Guðlaugsson voru kampakátir þegar RÚV náði tali af þeim í Laugardal.

Sjá viðtalið við Pálma

Sjá viðtalið við Eyþór

Svipmyndir frá þriðja keppnisdegi

Mynd/Stefán Þór Borgþórsson: Pálmi Guðlaugsson stingur sér til sunds.

Þriðja keppnisdegi á Evrópumeistaramóti fatlaðra í sundi er nú lokið og dró það helst til tíðinda hjá íslensku keppendunum í dag að Eyþór Þrastarson vann til silfurverðlauna í 400m. skriðsundi í flokki S11 (blindir).

Eyþór synti á tímanum 5.11,54 mín. sem er nokkuð undir hans besta tíma sem er 5.07,51 mín. sem hann náði á Opna þýska meistaramótinu í Berlín í sumar.

Strax á eftir Eyþóri keppti Pálmi Guðlaugsson í úrslitum í 50m. skriðsundi í flokki S6 þar sem Pálmi hafnaði í 8. sæti á tímanum 37,38 sek. en Pálmi synti í undanrásum á 37,15 sek. sem var nýtt Íslandsmet í flokki S6.

Sonja Sigurðardóttir keppti síðan í 50m. baksundi en það er sama grein og hún keppti í á Ólympíumóti fatlaðra í Peking. Sonja synti á tímanum 1.00,67 mín. en hún var skráð inn í mótið á tímanum 57,90 sek.

Síðastur í röðinni í dag var Ragnar Ingi Magnússon sem synti í 100m. baksundi í flokki S14. Ragnar stórbætti tímann sinn í morgun er hann synti á tímanum 1.16,21 mín en í úrslitum synti hann á tímanum 1.18,16 mín og hafnaði í 7. sæti.

Á morgun eru fimm íslenskir sundmenn sem synda á Evrópumótinu. Þrír í undanrásum og tveir fara í bein úrslit.

Undanrásir:
9:00: Guðmundur Hermannsson – 400m. skriðsund – S9
9:33: Eyþór Þrastarson – 50m. skriðsund – S11
9:45: Aníta Ósk Hrafnsdóttir – 100m. bringusund – S14

Bein úrslit:
20:14:  Ragnar Ingi Magnússson – 100m. bringusund – S14
Skúli Steinar Pétursson – 100m. bringusund – S14

Mynd/Stefán Þór Borgþórsson: Eyþór Þrastarson var að vonum sáttur við árangurinn í dag.

Sundmaðurinn Eyþór Þrastarson var rétt í þessu að taka á móti silfurverðlaunum á Evrópumeistaramóti fatlaðra í sundi. Eyþór synti á tímanum 5:11,54 mín. í 400m. skriðsundi í flokki S11 (blindra) og varð annar á eftir Oleksandr Myroshnychenko frá Úkraínu sem hafnaði í 1. sæti.

Frábær árangur hjá Eyþóri sem er fyrstur Íslendinga á mótinu til að vinna til verðlauna. Pálmi Guðlaugsson keppti í 50m. skriðsundi í flokki S6 og hafnaði í 6. sæti á tímanum 37,38 sek. Anders Olsson var að vanda fyrirferðamikill í flokknum hjá Pálma og nældi sér í gullverðlaun í sundinu.

Til hamingju Eyþór!

Mynd/Stefán Þór Borgþórsson: Eyþór Þrastarson á verðlaunapalli í Laugardal.

Í kvöld verða það fjórir íslenskir sundmenn sem synda til úrslita á Evrópumeistaramóti fatlaðra í Laugardalslaug. Sundmennirnir eru Eyþór Þrastarson, Sonja Sigurðardóttir, Pálmi Guðlaugsson og Ragnar Ingi Magnússon. Eyþór ríður fyrstur á vaðið í 400m. skriðsundi sem hefst kl. 17:12.

Í morgun var Pálmi fyrstur íslensku keppendanna er hann keppti í skriðsundi í flokki S6. Pálmi synti á nýju Íslandsmeti á tímanum 37,15 sek. og var áttundi maður inn í úrslitin. Fyrra Íslandsmetið setti Pálmi í mars fyrr á þessu ári en þá var tími hans 37,85 sek. Pálmi verður í sterkum riðli í kvöld en þar hittir hann fyrir Evrópumethafann Anders Olsson frá Svíþjóð sem m.a. hefur þegar sett eitt heimsmet á mótinu.

Félagarnir Skúli Steinar Pétursson og Ragnar Ingi Magnússon voru næstir í 100m. baksundi í flokki S14 þar sem Ragnar komst inn í úrslitin en Skúli náði ekki á tímanum 1.25,36 mín. Ragnar Ingi synti á tímanum 1.16,21 mín. og bætti sig um tæpar fjórar sekúndur þar sem hann var skráður inn á mótið á tímanum 1.20,48 mín.

Aníta Ósk Hrafnsdóttir var síðust Íslendinganna í undanrásum í 100m. baksundi kvenna í flokki S14. Aníta synti á tímanum 1:41,67 mín. og var þar rétt yfir tímanum sem hún var skráð á í mótið en sá tími var 1:39,65 mín.

Eyþór Þrastarson og Sonja Sigurðardóttir þurftu ekki að synda í undanrásum í morgun heldur fóru þau beint inn í úrslit.

Keppnisröð íslensku sundmannanna í kvöld:

Kl. 17:12: Eyþór Þrastarson – 400m. skriðsund – S11
Kl. 17:18: Pálmi Guðlaugsson – 50m. skriðsund – S6
Kl. 20:03: Sonja Sigurðardóttir – 50m. baksund – S5
Kl. 20:28: Ragnar Ingi Magnússon – 50. baksund – S14

(Tímasetningar birtar með fyrirvara, tímasetningarnar eru endanlegar og munu haldast þær sömu ef tekst að halda áætlun. Viðbúið að smávægilegar tafir geti orðið á greinunum)

Myndir frá Laugardalslaug í morgun

Mynd/Stefán Þór Borgþórsson: Ragnar Ingi Magnússon á fullri ferð í baksundinu í morgun.

Sannkallað metaregn var í innilauginni í Laugardal í kvöld þegar annar keppnisdagurinn á Evrópumeistaramóti fatlaðra í sundi fór fram. Alls voru það 10 heimsmet sem féllu og 14 Evrópumet!

Enginn íslensku keppendanna synti í dag en sex þeirra synda á morgun en það eru þau Eyþór Þrastarson, Sonja Sigurðardóttir, Pálmi Guðlaugsson, Skúli Steinar Pétursson, Aníta Ósk Hrafnsdóttir og Ragnar Ingi Magnússon.

Þess má geta að á meðal keppenda sem settu met í kvöld var þýska sundkonan Kirsten Bruhn en hún setti Evrópumet í 400m. skriðsundi í flokki S7 er hún synti á tímanum 5:24,91. Bruhn þessi stóð lengi í skugganum af einum albesta sundmanni Íslands, Kristínu Rós Hákonardóttur, sem einnig keppti í flokki S7. Bruhn tók við keflinu þar sem Kristín Rós skildi við það er hún lagði afrekssundmennskuna á hilluna. Kristín Rós Hákonardóttir hefur þó ekki sagt sitt síðasta í sundi því hún er verndari Evrópumeistaramótsins.

Greinar íslensku keppendanna á morgun:

Eyþór 400 skrið
Pálmi 50 skrið
Sonja 50 bak
Skúli Steinar 100 bak
Ragnar Ingi 100 bak
Aníta 100 bak

Það verður Pálmi Guðlaugsson sem ríður á vaðið í fyrramálið en hann keppir í annarri grein í undanrásum sem hefjast kl. 09:00. Sjá ráslista morgundagsins.

Mynd/Sölvi Logason: Frá EM í Laugardal.

Fyrsta keppnisdeginum á Evrópumeistaramóti fatlaðra í sundi er nú lokið og bar það helst til tíðinda af íslensku keppendunum að Hjörtur Már Ingvarsson sundmaður hjá ÍFR tvíbætti sitt eigið Íslandsmet í dag.

Hjörtur átti fyrir daginn í dag Íslandsmetið í 50m. skriðsundi karla í flokki S5 en metið setti hann í mars í Ásvallalaug og var það 54,23 sek. Í undanrásum í morgun synti Hjörtur Már á 50,36 sek. og bætti þar metið sitt um tæpar 4 sekúndur. Í úrslitum í kvöld hafnaði Hjörtur í 8. sæti en bætti engu að síður Íslandsmetið á nýjan leik er hann synti á tímanum 50,09 sek. Magnaður árangur hjá þessum 14 ára gamla sundmanni sem er að keppa á sínu fyrsta alþjóðlega stórmóti.

Sonja Sigurðardóttir hafnaði svo í 8. sæti í 50m. skriðsundi kvenna. Hún var síðust inn í úrslit eftir undanrásir í dag á tímanum á 57,22 sek. en hún synti svo á tímanum 58,62 sek. í úrslitum.

Alls voru það sex heimsmet og átta Evrópumet sem féllu á þessum fyrsta keppnisdegi í dag og ljóst að allir helstu og bestu sundmenn álfunnar úr röðum fatlaðra eru komnir í Laugardalinn til þess að láta vel að sér kveða.

Úrslit og ráslista má finna á www.ifsport.is/ec2009

Sjá dagskrá mótsins hér

Myndir/ Sölvi Logason: Brosmildi baráttujaxlinn frá Þorlákshöfn, Hjörtur Már Ingvarsson, er hér á efri myndinni en á þeirri neðri er Reykjavíkurmærin Sonja Sigurðardóttir. Þess má geta að bæði Hjörtur og Sonja synda fyrir Íþróttafélag fatlaðra í Reykjavík, ÍFR.

Tveir íslenskir sundmenn tóku þátt í undanrásum á Evrópumeistaramóti fatlaðra sem hófst í innilauginni í Laugardal í dag. Hjörtur Már Ingvarsson komst í úrslit í 50m. skriðsundi í flokki S5 þegar hann synti á nýju Íslandsmeti 50;36 sek. Þar með bætti Hjörtur sitt eigið Íslandsmet sem hann setti í Ásvallalaug í mars á þessu ári en gamla metið var 54,23 sek.

Á eftir kl. 17:00 hefjast svo úrslit en Hjörtur syndir ekki fyrr en um kl. 19:00 þar sem hann keppir í næstsíðustu grein kvöldsins.

Sonja Sigurðardóttir synti einnig í dag í undanrásum og var síðustu inn í úrslit í 50m. skriðsundi þegar hún kom í mark á tímanum 57,22 sek sem er um 7 sekúndum frá Íslandsmeti hennar í flokki S5. Sonja syndir í síðustu grein kvöldsins.

Mynd: Hjörtur Már stórbætti eigið Íslandsmet í morgun. Verður hann í stuði í kvöld?

Setningarathöfn Evrópumeistaramóts fatlaðra í sundi tókst með miklum myndarbrag í innilauginni í Laugardal í kvöld. Keppni á mótinu hefst svo í fyrramálið kl. 09:00 með undanrásum og úrslit hefjast svo kl. 17:00.

Troðfullt var í innilauginni þar sem Regína Ósk tók m.a. lagið, trúðar skemmtu gestum og Brassbandið lék ljúfa tóna fyrir athafnargesti ásamt mörgum öðrum mögnuðum sýningaratriðum. Að athöfn lokinni héldu keppendur, þjálfarar og fleiri í Laugardalshöll en þar er matsalur mótsins staðsettur og mikið verður þar um að vera á matmálstímum næstu vikuna enda nærri 700 manns skráðir til leiks.

Sundmennirnir Hrafnkell Björnsson og Jón Margeir Sverrisson voru fulltrúar Íslands í innmarseringu setningarathafnarinnar og uppskáru mikið og gott lófatak áhorfenda þegar þeir gengu inn í salinn með íslenska fánann.

Á morgun, eins og fyrr greinir, hefst keppnin og á meðal keppenda eru tveir íslenskir sundmenn, þau Sonja Sigurðardóttir og Hjörtur Már Ingvarsson. Hjörtur keppir í undanrásum í fyrramálið um kl. 09.40 í 50m. skriðsundi og þar strax á eftir, í næstu grein keppir Sonja Sigurðardóttir, líka í 50m. skriðsundi.

Sjá ráslistana fyrir keppnisdag 1

Myndir: Sölvi Logason: Frá setningarathöfninni í Laugardalslaug í kvöld.

Fjölmenni hefur hreiðrað um sig í innilauginni í Laugardal en þar hefst Evrópumeistaramót fatlaðra í sundi n.k. sunnudag. Undirbúningur mótsins er nú á lokasprettinum og spennan farin að gera vart um sig enda von á sterku móti þar sem bestu sundmenn álfunnar eru samankomnir.

Keppnin hefst á sunnudag kl. 09:00 með  undanrásum og þann sama dag kl. 17:00 hefjast úrslit. Mótið mun svo standa yfir til 24. október. Mikið líf var í innilauginni í dag þar sem gestaþjóðirnar æfðu af kappi sem og íslenska sveitin sem telur 13 manns á mótinu.

Mynd: Liðsmenn tækniherbergisins unnu hörðum höndum í allan dag en gáfu sér þó tíma til að brosa þegar ljósmyndari ÍF leit við.

Evrópumeistaramót fatlaðra í sundi hefst fimmtudaginn 15. október og stendur yfir til 25. október en verkefnið er það stærsta í sögu mótahalds Íþróttasambands fatlaðra. Við undirbúning í viðlíka verkefni er mikilvægt að eiga góða að en Pétur Bauer og liðsmenn í Opnum Kerfum hafa sýnt mótinu stuðning með því að leggja til tölvubúnað.

Búnaðurinn frá Opnum Kerfum verður m.a. notaður í fjölmiðlaaðstöðu á mótinu sem og í tækniherbergi mótsins þar sem öll úrslitavinnsla fer fram. Það voru þeir Sveinn Áki Lúðvíksson formaður ÍF og Pétur Bauer, framkvæmdastjóri innkaupa og dreifingarsviðs Opinna Kerfa, sem handsöluðu samninginn.

Þessu til viðbótar munu Opin Kerfi styrkja ÍF um fartölvu sem verður sérstaklega uppsett vegna keyrslu mótsins en sem mun nýtast við öll sundmót, fatlaðra sem ófatlaðra í framtíðinni.

Mynd: Pétur Bauer t.v. og Sveinn Áki Lúðvíksson t.h.

Íþróttasamband fatlaðra og Síminn hafa gert með sér samstarfssamning fyrir Evrópumeistaramót fatlaðra í sundi sem hefst fimmtudaginn 15. október næstkomandi. Síminn mun sjá innilauginni í Laugardal fyrir nettengingum á meðan móti stendur ásamt því ganga úr skugga um að forsvarsmenn allra sem sækja Ísland heim vegna mótsins geti átt góð samskipti við undirbúning- og framkvæmdanefnd mótsins.

Þeir Sævar Freyr Þráinsson forstjóri Símans og Sveinn Áki Lúðvíksson formaður Íþróttasambands fatlaðra undirrituðu samninginn í Íþróttamiðstöðinni í Laugardal. Síminn hefur síðustu ár stutt myndarlega við bakið á ÍF og breytir hvergi af þeirri stefnu í tengslum við þetta stærsta verkefni sambandsins frá upphafi.

Mynd: Sævar t.v. og Sveinn Áki t.h. við undirritun samstarfssamningsins.

Fimmtudaginn 15. október næstkomandi hefst Evrópumeistaramót fatlaðra í sundi en mótið stendur til sunnudagsins 25. október. Keppnin sjálf fer fram dagana 18.-24. október en í mörg horn er að líta og undirbúningur stendur nú sem hæst.

Á meðfylgjandi mynd sést hvar þessar ungu konur voru í óðaönn við að undirbúa gjafpoka sem afhentir verða keppendum á mótinu en Össur hf. gaf pokana og í þeim munu keppendur finna ýmislegt um mótið ásamt öðru kynningarefni.

Von er á fyrstu keppendunum til landsins þriðjudaginn 13. október en flestir koma þó dagana 15. og 16. október. Þá verður mikið líf í Flugstöð Leifs Eiríkssonar en það eru Pálmar Sigurðsson og félagar hjá Hópbílum sem sjá um að ferja keppendur og aðstoðarfólk þeirra frá Leifsstöð. Keppnishótelin eru svo Park Inn Island, Grand Hótel og Hótel Cabin og urðu hótelin fyrir valinu sökum nálægðar þeirra við innilaugina í Laugardal, þar sem mótið fer fram.

Verkefnið er það stærsta sem Íþróttasamband fatlaðra hefur tekið sér fyrir hendur og mun mótið setja mikinn svip á Laugardal á meðan á því stendur. Þá er mótið stærsta alþjóðlega sundmótið sem fram hefur farið á Íslandi.

Mynd: Handtökin voru óteljandi á skrifstofu ÍF síðasta föstudag þegar gjafapokar fyrir tæplega 700 manns voru skipulagðir.

Vífilfell og Íþróttasamband fatlaðra hafa gert með sér samstarfssamning í tengslum við Evrópumeistaramót fatlaðra sem fram fer á Íslandi dagana 15.-25. október næstkomandi. Þeir Árni Stefánsson forstjóri Vífilfells og Sveinn Áki Lúðvíksson formaður ÍF undirrituðu samninginn í höfuðstöðvum Vífilfells fimmtudaginn 8. október.

Á Evrópumeistaramótinu mun Vífilfell m.a. útvega mótshöldurum Pure Icelandic vatn. Flöskunum verður dreift til keppenda á laugarsvæði sem og í matsal sem staðsettur verður í nýja anddyri Laugardalshallar.

Vífilfell mun einnig leggja til sjálfboðaliða úr röðum starfsfólks fyrirtækisins til aðstoðar við framkvæmd mótsins en þar liggja ófá handtökin enda um að ræða stærsta alþjóðlega sundmót sem haldið hefur verið á Íslandi.

Við þennan nýja samning bætist Vífilfell í öflugan hóp samstarfsaðila mótsins sem er það stærsta í sögu Íþróttasambands fatlaðra og glæsilegur hápunktur á 30 ára afmælisári sambandsins.

Þess má geta að fyrstu keppendur til Íslands í tengslum við EM eru væntanlegir þann 13. október n.k.

Mynd: Árni Stefánsson t.v. og Sveinn Áki Lúðvíksson t.h.

200 keppendur frá 15 aðildarfélögum Íþróttasambands fatlaðra tóku þátt í Íslandsmóti í boccia, einstaklingskeppni sem fram fór um helgina á Selfossi. Keppni var að ljúka en á sunnudagskvöld var haldið lokahóf á Hótel Selfossi.

Íþróttafélagið Suðri á Selfossi sem er eitt af aðildarfélögum ÍF sá um framkvæmd mótsins í samvinnu við boccianefnd ÍF. Keppt var í tveimur íþróttahúsum, íþróttahúsinu Iðu og íþróttahúsinu Sólvöllum. Nemendur FSU sáu um dómgæslu á mótinu ásamt félagsmönnum áhugafélags um íþróttir aldraðra og fleiri aðilum. Íþróttafélagið Suðri naut aðstoðar fjölda fólks á Selfossi og nágrenni við undirbúning og framkvæmd mótsins. Fyrirtæki styrktu verkefnið og íþróttafélagið nýtur greinilega mikils velvilja á Suðurlandi. Öll framkvæmd mótsins var íþróttafélaginu Suðra til mikils sóma og félagsmenn Suðra stóðu sig allir mjög vel á heimavelli.

Úrslit
1. deild
1. Hjalti B Eiðsson ÍFR 2. Guðlaugur J.B. Hannesson ÍFR 3. Kristbjörn Óskarsson,
Völsungi

2. deild
1. Kristín Ólafsdóttir, Eik 2. Kristófer Ástvaldsson, Viljanum 3. Benedikt
Ingvarsson, Ösp

3. deild
1. Reynir Ingólfsson, Suðra 2. Einar Sigurðsson Þjóti 3. Heiðrún S Jónasdóttir Snerpu

4.deild
1. Sigurrósk Karlsdóttir, Akri 2. Haukur Gunnarsson ÍFR 3. Hulda Sigurjónsdóttir Suðra

5. deild
1. Sigvaldi Heiðarsson ÍFR 2. Magnús H Guðmundsson Ívari, Sölvi Víkingsson Eik

6. deild
1. Þórarinn Á. Jónsson Ægi 2. Lúðvik Frímannsson ÍFR 3. Hallgrímur Hallgrímsson Suðra

7. deild
1. Jakob B Ingimundarson ÍFR 2. Jón Óskar Ísleifsson Eik 3. Lovísa H Pálsdóttir ÍFR

U flokkur
1. Díana Björk Friðriksdóttir , Akri 2. Sigríður Þ. Jósepsdóttir, Akri

Rennuflokkur
1. Kristófer Skúlason, Suðra 2. Ragnheiður Á Sveinbjörnsdóttir, Ívari 3. Árni Sævar
Gylfason, Ösp

Flokkur BC1 - BC4
1. Aðalheiður B Steinsdóttir Grósku 2. Kristín Jónsdóttir Ösp 3. Hulda Klara
Ingólfsdóttir Ösp

Myndasafn frá mótinu má nálgast hér.

Mynd: Frá mótinu á Selfossi um helgina.

Íslandsmót ÍF í boccia einstaklingskeppni, fer fram á Selfossi laugardaginn 3. og
sunnudaginn 4. október.

Íþróttafélagið Suðri á Selfossi sem er eitt af aðildarfélögum ÍF sér um framkvæmd
mótsins í samvinnu við boccianefnd ÍF. Mótið fer fram í íþróttahúsinu Iðu og
íþróttahúsinu Sólvöllum

Hjálagt er dagskrá mótsins

Laugardagur 3. okt.

Íþróttahúsið Iða                                      Íþróttahúsið Sólvöllum

09:00 Fararstjórafundur
09:30 - 11:20                                                   5. deild 6. deild
11:20-13:10 4. deild 7. deild, BC 1-4,

rennuflokkur og U-flokkur

13:30-14:00 Mótssetning
14:15-16:05 3. deild
16:05-17:55 2. deild
17:55-19:45 1. deild

Sunnudagur 4. okt.

Íþróttahúsið Iða
11:00-13:05 Úrslit 4. til 7. deild
13:05-15:10 Úrslit 1. til 3. deild

Verðlaunaafhending fer fram að úrslitum loknum í hverri deild

Mótsstjóri: Svanur Ingvarsson
Yfirdómari: Þröstur Guðjónsson
Tölvuvinnsla: Karl Þorsteinsson

Lokahóf Íslandsmótsins fer fram á Hótel Selfoss og er miðaverð 5.500 kr
Húsið opnar kl. 18:30, borðhald hefst kl. 19:00 og dansað verður til miðnættis.

Fjarðarmótið í sundi í 25m. laug fór fram í Ásvallalaug í Hafnarfirði um síðastliðna helgi og var þátttakan góð enda margir sundmenn í lokaundirbúningi fyrir Evrópumeistaramót fatlaðra sem fram fer í Laugardalslaug 15.-25. október næstkomandi. Tvö Íslandsmet féllu á mótinu en þar voru að verki þau Hjörtur Már Ingvarsson, ÍFR, og Anna Kristín Jensdóttir, ÍFR. Bæði Anna og Hjörtur munu taka þátt á EM í næsta mánuði.

Breski sunddómarinn Sue Prasad var sérlegur gestur á mótinu en hún stóð fyrir veglegum fyrirlestri fyrir Fjarðarmótið þar sem íslenskir sunddómarar urðu margsvísir um sund fatlaðra. Dómararnir sem sátu fundinn hafa boðað sig til dómgæslu á Evrópumótinu í Laugardal. Að loknum fyrirlestri hjá Sue dæmdi hópurinn á Fjarðarmótinu og tókst það vel til. Sue er síðan væntanleg aftur til landsins í október þar sem hún verður ein af yfirdómurum Evrópumeistaramótsins.

Metin á Fjarðarmótinu:

Anna Kristín Jensdóttir – 100m. bringusund – flokkur SB5 – 2:28,19 mín.
Hjörtur Már Ingvarsson – 400m. skriðsund – flokkur S5 – 8:45,55 mín.

Úrslit mótsins má nálgast hér.

Myndasafn frá mótinu má nálgast hér.

Videobrot frá mótinu má nálgast hér.

Mynd: Öflugir kappar hér á ferð.

Mótið Sterkasti fatlaði maður heims 2008 verður sýnt í sjónvarpinu (RUV) sunnudaginn 20. september n.k. Kl. 10.55. Undirbúningur að mótinu 2009 er hafinn og verður mótið haldið 2. og 3. október. Föstudaginn 2. október fer mótið fram í Fjölskyldu- og húsdýragarðinum og laugardaginn 3. október  í Íþróttahúsi ÍFR Hátúni 14.

Alls verða þrettán íslenskir sundmenn á meðal þátttakenda á Evrópumeistaramóti fatlaðra í sundi sem fram fer í innilauginni í Laugardal í október næstkomandi. Hópurinn var kynntur á blaðamannafundi Íþróttasambands fatlaðra í dag en fundurinn fór fram í húsi Orkuveitu Reykjavíkur þar sem skrifað var undir samning millum ÍF og Orkuveitunnar þess efnis að Orkuveitan yrði annar af tveimur stærstu styrktaraðilum mótsins. Hinn aðilinn er Össur hf. Það voru þeir Sveinn Áki Lúðvíksson formaður ÍF og Guðlaugur Gylfi Sverrisson stjórnarformaður OR sem undirrituðu samninginn.

Íslenska hópinn skipa eftirtaldir sundmenn:
Aníta Ósk Hrafnsdóttir, Fjörður
Anna Kristín Jensdóttir, ÍFR
Ragney Líf Stefánsdóttir, Ívar
Sonja Sigurðardóttir, ÍFR
Eyþór Þrastarson, ÍFR/Ægir
Pálmi Guðlaugsson, Fjörður/Sunddeild Fjölnis
Guðmundur Hermannsson, ÍFR/KR
Hjörtur Már Ingvarsson, ÍFR
Hrafnkell Björnsson, ÍFR
Adrian Óskar Sindelka Erwin, Ösp/Sunddeild Fjölnis
Skúli Steinar Pétursson, Fjörður
Ragnar Ingi Magnússon, Fjörður
Jón Margeir Sverrisson, Ösp/Sunddeild Fjölnis

Af þessum þrettán sundmönnum koma níu úr flokki hreyfihamlaðra/blindra og fimm úr flokki þroskaheftra. Í sundi fatlaðra er keppt í flokkum S1-10 fyrir hreyfihamlaða þar sem S1 táknar mestu fötlun og S10 minnstu fötlun. Flokkar S11-S13 eru flokkar blindra og sjónskertra og flokkur S14 er flokkur þroskaheftra íþróttamanna.

Búist er við 415 sundmönnum og um 250 aðstoðarmönnum á mótið að ótöldum erlendum gestum á borð við fjölmiðla, forsvarsmenn íþróttahreyfinga fatlaðra í Evrópu og fjölskyldumeðlimi keppenda og annarra þeirra sem mótið sækja.

Íþróttasamband fatlaðra ræðst nú í sitt stærsta verkefni frá upphafi og ekki amaleg áskorun á 30 ára afmælisárinu. Í fyrsta sinn síðan árið 2001 fer fram Evrópumeistaramót á vegum Alþjóðaólympíuhreyfingu fatlaðra (IPC) og í fyrsta sinn síðan árið 2000 fá þroskaheftir íþróttamenn keppnisleyfi á vegum IPC. Íþróttasamband fatlaðra hefur verið fremst á meðal jafningja í réttlætisbaráttu þroskaheftra íþróttamanna og nú hefur mikill áfangasigur verið unninn með framkvæmd EM á Íslandi þar sem þroskaheftir munu taka þátt.

Undirbúningur fyrir EM á Íslandi er nú vel á veg kominn en Íþróttasamband fatlaðra auglýsir eftir aðilum í sjálfboðaliðastörf við mótið og geta áhugasamir haft samband við skrifstofu ÍF ís síma 514 4080 eða á if@isisport.is

Mynd: Íslenski hópurinn í Orkuveituhúsinu í dag ásamt Kristínu Guðmundsdóttur landsliðsþjálfara og Kristínu Rós Hákonardóttur fyrrum afrekssundkonu en Kristín Rós er verndari Evrópumótsins á Íslandi. Á myndina vantar Ragney Líf Stefánsdóttur sundkonu frá Ívari á Ísafirði.

Laugardaginn 19. september fer fram Fjarðarmótið í Ásvallalaug í Hafnarfirði.  Upphitun hefst kl:13:00 og mót kl:14:00 en keppt er í 25m. laug. Greinar mótsins eru eftirfarandi:

Grein 1 og 2 50m skrið karla og kvenna
Grein 3 og 4 100m skrið karla og kvenna
Grein 5 og 6 25m frjáls aðferð karla og kvenna
Grein 7 og 8 50m flug karla og kvenna
Grein 9 og 10 100m flug karla og kvenna
Grein 11 og 12 50m bak karla og kvenna
Grein 13 og 14 100m bak karla og kvenna
Grein 15 og 16 50m bringa karla og kvenna
Grein 17 og 18 100m bringa karla og kvenna
Grein 19 og 20 100m fjór karla og kvenna
Grein 21 og 22 200m fjór karla og kvenna
Grein 23 og 24 400m skrið karla og kvenna
Grein 25 4x50m frjáls aðferð blandaðar sveitir

Þjálfarar vinsamlega skráið keppendur annaðhvort í 50m eða 100m greinar í sömu sundaðferð þ.e annaðhvort 50m eða 100m skrið, 100 eða 200 fjór o.s.frv. Góð regla að þeir sem eru lengra komnir t.d. í landsliði keppi í lengri vegalengdunum.

Skráið keppendur á besta tíma þeirra, ef viðkomandi á ekki löglegan tíma þá vinsamlega skráið þann tíma sem þið teljið raunhæfan fyrir keppandann.

Keppendum verður skipt í getuflokka eftir tímum og fjöldi flokka fer eftir fjölda skráninga. Veitt verða gull, silfur og brons verðlaun í hverjum getuflokki. Þetta er sama fyrirkomulag og á Asparmótinu.

Skráningum skal skila á Hy-Tek formi og senda á fjordur@fjordur.com

Íslandsleikar Special Olympics í frjálsum íþróttum og knattspyrnu verða haldnir laugardaginn 12. september 2009 í Egilshöll, Reykjavík. Íþróttafélagið Ösp er umsjónaraðili mótsins í samvinnu við ÍF og KSÍ. Keppni í frjálsum íþróttum hefst kl. 0930 og keppni í knattspyrnu hefst kl. 12.30.

Drög að dagskrá.

Kl. 09.00           Upphitun, frjálsar
Kl. 09.30           Keppni hefst, 60 m hlaup,  karlar og konur, undankeppni
Kl. 10.00           Langstökk, karlar og konur, undankeppni.
Kl. 10.30           Úrslit 60 m hlaup, karlar og konur
Kl. 10.50           Úrslit langstökk, karlar og konur
Kl. 11.30           Keppni lokið í frjálsum
Kl. 11.30           HLÉ
Kl. 12.00           Upphitun, knattspyrna
Kl. 12.30           Keppni hefst í knattspyrnu.

Kristmann Einarsson bogfimiskytta hjá ÍFR var nýverið að setja nýtt Íslandsmet í greininni utanhúss. Kristmann setti metið á móti sem fór fram í Hollandi en skotið var af 90 m. færi, 70m., 50m., og 30m. færi.

Árangur Kristmanns:

90m=324
70m=344
50m=336
30m=352

Samtals 1356 stig.

Sunnudaginn 6. september fer fram sparkvallaæfing Íþróttasambands fatlaðra og Knattspyrnusambands Íslands. Æfingin fer fram á sparkvellinum við Laugarnesskóla, gegnt KSÍ.

Það eru Marta og María Ólafsdætur sem stýra æfingunni ásamt góðum gestum en æfingin hefst kl. 13:00 og eru sem flestir hvattir til þess að mæta, stelpur jafnt sem strákar.

Dagana 2. október og 3. október 2009 verður  haldið heimsmeistaramót í aflraunum fatlaðra í Reykjavík. Er þetta í  sjöunda skiptið sem mót þetta er haldið á Íslandi. Mótið verður haldið 2. okt. í Fjölskyldu- og húsdýragarðinum og 3. okt. og við íþróttahús fatlaðra Hátúni 14.

Verðlaunaafhending fer fram í íþróttahúsi ÍFR að mótinu loknu. Keppt verður í tveimur flokkum þ.e. flokki hjólastóla og flokki standandi. Þroskaheftum er heimil þátttaka í báðum flokkum. Keppt verður í átta keppnisgreinu í flokki hjólastóla og átta keppnisgreinum í flokki standandi, alls sextán keppnisgreinar.

Keppt verður í að draga hönd yfir hönd, uxaganga, drumbalyftu, axlalyftu, bóndagöngu, steinatökum, herkulesarhaldi, dekkjaveltu, öxullyfta og hleðslugrein. Allar nánari upplýsingar er hægt að finna á heimasíðu Íþróttafélags fatlaðra í Reykjavík á www.ifr.is

Mótið verður sýnt í sérstökum þætti á RÚV árið 2010. Nánari upplýsingar fást hjá skipuleggjendum.

Arnar Már Jónsson þjálfari IFR
E-mail loggurinn@hotmail.com
Sími 868-6823

Gemma Magnússon
E-mail gemmamagnusson@gmail.com
Sími 696-4681

Mynd: Frá keppninni Sterkasti fatlaði maður heims í fyrra. Hér er Alexander Harðarson í hrikalegum átökum í Smáralind.

Þeir íslensku sundmenn sem taka munu þátt á Evrópumeistaramóti fatlaðra í sundi á Íslandi nú í október munu koma saman um helgina til æfinga. Hópurinn á langt og strangt sumar að baki og er nú á lokaspretti æfinga sinna fyrir átökin í október en von er á öllum bestu sundmönnum álfunnar til landsins. Þar á meðal verða heimsmeistarar og Ólympíumethafar svo vonir standa til þess að mótið verði eins sterkt og á verður kosið.

Hópurinn æfir í Laugardalslaug þar sem mótið fer fram. Tvær æfingar verða laugardaginn 5. september frá 9:30-12:00 og aftur 15:45-18:00. Sunnudaginn 6. september verður æft frá kl. 09:00-11:00.

Á næstu dögum mun Íþróttasamband fatlaðra kynna til leiks þá sundmenn sem skipa munu íslenska hópinn á meðan Evrópumeistaramótinu stendur.

Mynd: Eyþór Þrastarson er á meðal íslensku keppendanna sem prýða munu Evrópumeistaramótið. Þess má geta að Eyþór á Evrópumet í flokki S11 í 800m. skriðsundi en metið setti hann í Þýskalandi er hann synti á tímanum 10:32,16 mín.

Tæpar 7 milljónir króna söfnuðust til styrktar góðgerðarfélögum í Reykjavíkurmaraþoninu sem fram fór í ágústmánuði síðastliðnum en 11.400 manns tóku þátt í Reykjavíkurmaraþoninu í ár.

Eins og undanfarin ár gafst öllum hlaupurum, fyrir utan þátttakendur í Latabæjarhlaupinu, kostur á að hlaupa til góðs, þ.e. að láta heita á sig til styrktar góðgerðarfélagi. 4.332 nýttu sér þennan möguleika af þeim 7.400 sem stóð það til boða. Þar af voru 863 hlauparar sem einhver áheit fengu.

Í ár voru 80 manns á vegum Össurar sem hlupu til styrktar Íþróttasambandi fatlaðra og söfnuðu 323.500 krónum. Það var Edda Heiðrún Geirsdóttir forstöðumaður alþjóðamarkaðsdeildar Össurar sem afhenti Ólafi Magnússyni framkvæmdastjóra fjármála- og afrekssviðs ÍF styrkinn á skrifstofu ÍF síðastliðinn mánudag.

Íþróttasamband fatlaðra þakkar Össuri hf. veglegt framlag en Össur er einn af stærstu styrktar- og samstarfsaðilum ÍF.

Myndir: Frá afhendingu styrksins og frá Reykjavíkurmaraþoninu.

Alls voru níu iðkendur mættir á æfingu í sparkvallaátaki ÍF og KSÍ sem fram fór síðasta sunnudag á sparkvellinum við Laugarnesskóla, gengt KSÍ. Atli Viða Björnsson landsliðsmaður í knattspyrnu mætti á æfinguna og lét til sín taka en æfingin var undir stjórn þeirra Mörtu og Maríu Ólafsdætra.

Næsta æfing verður sunnudaginn 6. september kl. 13:00 við Laugarnesskóla og er allir hvattir til þess að fjölmenna á æfinguna, stelpur jafnt sem strákar.

Hér er hægt að nálgast smávegis myndasafn frá æfingunni:
http://if.123.is/album/default.aspx?aid=157876

Dagana 15.-25. október fer fram Evrópumeistaramót fatlaðra í sundi. Keppt verður í innilauginni í Laugardal og er von á rúmlega 400 sundmönnum til landsins og í fylgd með þeim verða um 200 aðstoðarmenn. Um risamót er að ræða þar sem allir helstu sundmenn úr röðum fatlaðra í Evrópu munu koma saman. Mótið er einstakt fyrir þær sakir að í fyrsta sinn síðan árið 2000 munu þroskaheftir keppa með á móti Alþjóðaólympíuhreyfingu fatlaðra. Prófsteinninn er því ærlegur og því leitar Íþróttasamband fatlaðra eftir sjálfboðaliðum til aðstoðar alla mótsdagana svo keppnin geti orðið sem veglegust og gengið sem best fyrir sig.
 
Áhugasömum er bent á að hafa samband við skrifstofu Íþróttasambands fatlaðra í síma 514 4080 eða á if@isisport.is
 
Sjálfboðaliðstörf sem óskast eru:
 
Aðstoð í tækniherbergi mótsins
Aðstoð við úrslit mótsins (hengja upp úrslit og koma þeim á keppendaþjóðir mótsins)
Aðstoð við riðlaherbergi mótsins (hleypa keppendum inn á laugarbakkann í keppni)
Aðstoð við körfuburð á sundbakka (fyrir keppendur)
Aðstoð við verðlaunaafhendingu (einungis frá 17:00 fram eftir kvöldi)
Aðstoð við rekstur kaffiteríu
Aðstoð við við rekstur upplýsingaskrifstofu í Laugardalslaug
Aðstoð við afhendingu einkennisspjalda
Aðstoð við hin ýmsu sendlastörf
Aðstoð í matsal keppenda
Aðstoð við fánamál í verðlaunaafhendingum
Aðstoð við gestaþjóðir mótsins fyrstu dagana á Íslandi (fer fram á Hótelum)
 
Áætlað er að dagana 15.-25. október muni vera þörf á aðstoð frá um kl. 08:00-10:30 og aftur 16:00-21:00. Keppnin sjálf mun fara fram 18.-24. október og þá verður þörfin fyrir aðstoð hvað einna mest.

Næstu tvo sunnudaga, 30. ágúst og 6. september, heldur Sparkvallaverkefni Íþróttasambands fatlaðra og Knattspyrnusambands Íslands áfram með tveimur æfingum við Laugarnesskóla. Tilgangur þessa verkefnis er að auka áhuga og þátttöku fatlaðra karla og kvenna í knattspyrnu.

Opnar æfingar verða á sparkvellinum við Laugarnesskóla sunnudaginn 30. ágúst og sunnudaginn 6. september. Æfingar verða frá kl. 13.00 til 15.00. Leiðbeinendur verða: Marta Ólafsdóttir og María Ólafsdóttir. Landsliðsmennirnir Atli Viðar Björnsson og Gunnleifur Gunnleifsson mæta á æfinguna sunnudaginn 30. ágúst og verða iðkendum innan handar á æfingunni.

Allir geta verið með, byrjendur sem lengra komnir, stelpur og strákar.

Á morgun, laugardaginn 22. ágúst, fer hið árlega Reykjavíkurmaraþon fram. Dagskráin við Lækjargötu verður sem hér segir:

08:40  Maraþon og hálfmaraþon ræst út
09:30 10 km hlaup ræst út
11:15 Upphitun fyrir Skemmtiskokk
11:30 Skemmtiskokk 3 km ræst út
15:40 Formlegri tímatöku hætt

Íslandsbanki mun halda áfram þeirri hefð að heita 1000 kr. á hvern viðskiptavin bankans sem hleypur í Reykjavíkurmaraþoninu, sem viðkomandi getur síðan ráðstafað til þess góðgerðarfélags sem hann eða hún kýs.

Nánar um Reykjavíkurmaraþonið á www.islandsbanki.is/marathon

Blindrafélagið, samtök blindra og sjónskertra á Íslandi, fagnaði 70 ára afmæli sínu þann 19. ágúst síðastliðinn. Hófið var hið veglegasta og fór fram á Hilton Reykjavík Nordica hótel þar sem kaffiveitingar voru gestum til boða.

Félagið var stofnað þann 19. ágúst árið 1939 af einstaklingum sem vildu stuðla að því að blindir einstaklingar tækju stjórn sinna mála í eigin hendur. Fyrsti formaðurinn var Benedikt Benónýsson en hann var einnig stofnfélagi.

Í dag á félagið fasteign að Hamrahlíð 17 þar sem öll starfsemi félagsins og Blindravinnustofunnar er til húsa.

Íþróttasamband fatlaðra óskar Blindrafélaginu innilega til hamingju með afmælið.

Eunice Kennedy Shriver lést í nótt 88 ára að aldri en hún er stofnandi Special Olympics samtakanna. Eunice er yngri systir fyrrum Bandaríkjaforsetans John F. Kennedy og móðir Mariu Shriver Schwarzenegger eiginkonu Arnolds Scwarzenegger fylkisstjóra í Kaliforníufylki í Bandaríkjunum. Dánarorsök hefur ekki verið tilgreind að svo stöddu en síðustu vikur hafði Eunice dvalið á Cape Cod sjúkarhúsinu í Massachusets.

Árið 1968 skipulagði Eunice fyrstu Special Olympics leikana og mun hún hafa snúið sér að íþróttum þroskaheftra af mikilli ástríðu í gegnum systur sína Rosemary sem var greindarskert. Í dag er sonur Eunice Kennedy, Timothy Kennedy Shriver forsvarsmaður samtakanna.

Eunice Kennedy Shriver var hugsjónamanneskja sem hefur frá stofnun Special Olympics
samtakanna látið sig varða málefni þroskaheftra einstaklinga. Samtökin voru upphaflega stofnuð sem íþróttasamtök þar sem boðið var upp á æfingar og keppni fyrir þroskahefta. Sífellt aukin áhersla hefur verið lögð á aðra þætti sem varða hagsmuni þroskaheftra og almenn mannréttindi s.s. aðgengi að menntun og heilbrigðiskerfi. Samtökin eru með starfsemi um heim allan og með alþjóðaskrifstofu í Washington og Evrópuskrifstofu í Brussel.

Mynd: Eunice Kennedy Shriver

Góður félagi okkar og vinur Hörður Barðdal lést þriðjudaginn 4. ágúst sl. langt um aldur fram.  Hörður var einn af frumherjum íþrótta fatlaðra á Íslandi og tók virkan þátt í undirbúningsstarfinu bæði sem keppandi og afreksmaður. Þannig var Hörður árið 1977 sá fyrsti sem valinn var  íþróttamaður ársins úr röðum fatlaðra auk þess sem hann var á meðal þátttakenda er Ísland árið 1980 sendi í fyrsta sinn þátttakendur á Ólympíumót fatlaðra sem þá var haldið í  Arnheim í Hollandi. Hann var auk þess mjög virkur í félagsstarfinu, bæði hjá ÍF en ekki síður hjá sínu eigin félagi ÍFR. Hörður var í fyrstu stjórn Íþróttasambands fatlaðra og sat í stjórn þess til ársins 1986.  Á undanförnum árum var Hörður mjög iðinn við að kynna fólki golfíþróttina og var aðal hvatamaður að stofnun GSFÍ (Golfsamtaka fatlaðra á Íslandi) og aðal driffjöður samtakanna.

Hörður Barðdal var þó fyrst og síðast maður með stórt hjarta sem gaf mikið af sér. Reglulegum heimsóknum hans á skrifstofu ÍF, hans dillandi hláturs og góðu nærveru verður sárt saknað.

Þakkir og söknuður eru efst í huga þegar góður félagi, liðsmaður og vinur er horfinn á braut.

Íþróttasamband fatlaðra sendir fjölskyldu hans samúðarkveðjur.

Mynd: Hörður Barðdal með golfkylfu við hönd í golfæfingaðstöðunni Hraunkoti í Hafnarfirði.

Alþjóðaólympíuhreyfing fatlaðra (IPC) sendi á dögunum tvo fulltrúa til Íslands til að taka út aðstæður fyrir Evrópumeistaramót fatlaðra í sundi sem fram fer í Laugardal í október næstkomandi. Um var að ræða Agnesi Szilak íþróttastjóra IPC í sundi og Susan Prasad fulltrúa tækninefndar IPC.

Undirbúningsnefnd mótsins á Íslandi tók vel á móti erlendu gestunum sem heimsóttu keppnissvæðið í innilauginni í Laugardal ásamt því að kanna næsta nágrenni og gistiaðstöðu keppenda og aðstoðarfólks þeirra.

Fulltrúar IPC voru ánægðir með framvindu mála en skemmst er frá því að segja að undirbúningur fyrir mótið stendur nú sem hæst. Von er á rúmlega 400 keppendum og um 200 aðstoðarmönnum og því er í mörg horn að líta. Af þessum sökum leitar Íþróttasamband fatlaðra til allra þeirra sem hug hafa á því að koma nærri mótinu sem sjálfboðaliðar og aðstoðarfólk. Áhugasamir geta gefið sig fram við skrifstofu í síma 514 4080.

Mynd: Susan t.v. og Agnes t.h.

Þeir Ragnar Ingi Magnússon, íþróttafélaginu Firði Hafnarfirði og Jón Margeir Sverrisson, íþróttafélaginu Ösp komu til landsins í dag eftir þátttöku á Heimsleikum þroskaheftra í Tékklandi. Heildarúrslit hafa áður verið send auk upplýsinga um leikana.

Sendi hjálagt mynd sem ég tók við heimkomuna í dag. Þessir ungu sundmenn bættu árangur sinn í hverri grein og eru framtíðarefni.

Mynd; f.v. Jón Margeir Sverrisson, Ragnar Ingi Magnússon

Ragnar Ingi Magnússon, íþróttafélaginu Firði Hafnarfirði og Jón Margeir Sverrisson, íþróttafélaginu Ösp Reykjavík hafa nú lokið keppni á Heimsleikum þroskaheftra. Þessir ungu drengir sem báðir eru fæddir árið 1992, bættu árangur sinn í öllum greinum og eiga án efa eftir að láta að sér kveða í framtíðinni. Keppni Íslendinga er nú lokið á heimsleikunum og er áætluö heimkoma þriðjudaginn 14. júlí FI205, kl. 15.10.

Ragnar Ingi Magnússon, íþróttafélaginu Firði, Hafnarfirði:
100m baksund 18. sæti á tímanum 1.20,48 bætti sig en átti fyrir 1.23,68
400m skriðsund 11. sæti á 5.07,46 en átti 5.19,52
100m skriðsund 17. sæti á tímanum 1.06,01 bætti sig en átti fyrir 1.07,13
50m baksund 15. sæti á 35,56 en átti 37,58
50m skriðsund 17. sæti á 28,98 en átti 29,67
50m flugsund 20. sæti á 35,14 en átti 39,12
200m skriðsund 16. Sæti á 2.24,69 en átti 2.28,71

Jón Margeir Sverrisson, íþróttafélaginu Ösp, Reykjavík:
100m baksund 14. sæti á tímanum 1.15,74 en átti fyrir 1.24,50
100m skriðsund 16. sæti á tímanum 1.02,55 en átti fyrir 1.05,21
50m baksund 14. sæti á 35,19 en átti 37,02
100m flugsund 12. sæti á tímanum 1.11,91 en átti fyrir 1.18,69
50m skriðsund 16. sæti á 28,89 en átti 28,98
50m flugsund 12. sæti á tímanum 31,13 en átti fyrir 31,77
200m skriðsund 12. sæti á 2.21,71 en átti 2.27,75

Eins og áður hefur komið fram eru Heimsleikar Þroskaheftra eða Global Games keppni sterkustu íþróttamanna úr röðum þroskaheftra. Keppt er í einum flokki kvenna og einum flokki karla. Þroskaheftir hafa verið útilokaðir frá keppni á ólympíumótum fatlaðra frá árinu 2000.

og hér er um að ræða sambærilega keppni og áður fór fram fyrir þennan hóp keppenda á ólympíumóti fatlaðra. Stefnt er að því að þroskaheftir taki aftur þátt ólympíumóti fatlaðra árið 2012 þegar leikarnir verða í London. Hér er því um sambærilegt mót að ræða fyrir sterkusta íþróttafólk úr röðum þroskaheftra og ólympíumót fatlaðra er fyrir aðra fötlunarhópa.

Sjá nánar viðhengi, fréttatilkynning vegna mótsins.

Úrslit frá síðasta keppnisdegi laugardag 11. júlí  -   enn bæta þeir sig í hverri grein.

Ragnar Ingi Magnússon:
50m flugsund 20. sæti á 35,14 en átti 39,12
200m skriðsund 16. Sæti á 2,24,69 en átti 2.28,71

Jón Margeir Sverrisson:
50m flugsund 12. sæti á tímanum 31,13 en átti fyrir 31,77
200m skriðsund 12. sæti á 2.21,71 en átti 2.27,75

Úrslit voru að berast frá Heimsleikum þroskaheftra í Tékklandi en keppni er lokið á þriðja keppnisdegi og aðeins einn keppnisdagur eftir.

Ragnar Ingi Magnússon og Jón Margeir Sverrisson eru meðal yngstu keppenda á mótinu og hafa báðir verið að bæta árangur sinn í hverri grein, þó þeir nái ekki úrslitasæti.

Á heimsleikum þroskaheftra er keppt í einum flokki karla og kvenna og keppni mjög hörð.

Mynd: Íslensku keppendurnir á keppnisstað, f.v. Jón Margeir, Ragnar Ingi.

Keppnisdagur 3, föstudagur 10. júlí.

Ragnar Ingi Magnússon:
50m skriðsund 17. sæti á 28,98 en átti 29,67

Jón Margeir Sverrisson:
100m flugsund 12. sæti á tímanum 1.11,91 en átti fyrir 1.18,69 50m skriðsund 16. sæti á 28,89 en átti 28,98

Frábær árangur hjá sundstrákunum enn og aftur. Á morgun synda þeir báðir 50m flugsund og 200m skriðsund.

Úrslit dagsins, mið. 8. júlí;
 
Ragnar Ingi Magnússon:
100m skriðsund 17. sæti á tímanum 1.06,01 bætti sig en átti fyrir 1.07,13
50m baksund 15. sæti á 35,56 en átti 37,58
 
Jón Margeir Sverrisson:
100m skriðsund 16. sæti á tímanum 1.02,55 en átti fyrir 1.05,21
50m baksund 14. sæti á 35,19 en átti 37,02
 
Mjög góður árangur og mikil bæting hjá báðum keppendum en dugði þó ekki í úrslitasund.

Fimmtudaginn 24. júní var afhentur styrkur til ÍF að upphæð 2000 dollarar frá ungum athafnamönnum í Bandaríkjunum. Fulltrúar samtakanna Young Presidents Organization voru staddir hér á landi í júní og áttu m.a. fund með Forseta Íslands, Hr. Ólafi Ragnari Grímssyni.

Í móttöku á Bessastöðum var Íþróttasambandi Fatlaðra afhentur styrkur frá samtökunum að upphæð 2000 dollarar. Íslenskur félagsmaður í samtökunum Eyþór Bender var með hópnum hér á landi og

skipulagði dagskrá í samvinnu við Helgu Láru Guðmundsdóttur hjá fyrirtækinu Iceland Congress.

Fulltrúar ÍF á Bessastöðum voru Sveinn Áki Lúðvíksson, formaður ÍF, Anna Karólína Vilhjálmsdóttir framkvæmdastjóri Special Olympics á Íslandi og fræðslu og útbreiðslusviðs ÍF og Jóhann Kristjánsson, afreksmaður ÍF í borðtennis.

www.globalgames09.com

Eins og áður hefur komið fram eru Heimsleikar Þroskaheftra eða Global Games keppni sterkustu íþróttamanna úr röðum þroskaheftra. Þroskaheftir hafa ekki fengið tækifæri til að vera með á ólympíumótum fatlaðra frá árinu 2000 og hér er um að ræða sambærilega keppni og áður fór fram fyrir þennan hóp keppenda á ólympíumóti fatlaðra. Stefnt er að því að þroskaheftir taki aftur þátt ólympíumóti fatlaðra árið 2012 þegar leikarnir verða í London. Mikilvægt er að fjölmiðlaumfjöllun taki mið af því að hér er um sambærilegt mót að ræða fyrir sterkusta íþróttafólk úr röðum þroskaheftra og ólympíumót fatlaðra er fyrir aðra fötlunarhópa.

Í dag miðvikudag 8 júlí keppa þeir í 100m skriðsundi og 50m baksundi

Nánar (úrslit frá fyrsta keppnidegi Íslendinga sem var þriðjudagur 7. júlí)

Global Games eða Heimsleikar þroskaheftra eru haldnir í Tékklandi dagana 5. - 14. júlí 2009.  Leikarnir eru skipulagðir af alþjóðaíþróttahreyfingu þroskaheftra ( INAS - FID) og íþróttasambandi fyrir þroskaheftra í Tékklandi. (CSAMH).   

Afreksfólk úr röðum þroskaheftra keppir þar í frjálsum íþróttum, hjólreiðum, körfubolta, knattspyrnu, sundi, borðtennis, tennis og júdó. 

Íþróttasamband fatlaðra sendir tvo keppendur á leikanna en þeir eru sundmennirnir Jón Margeir Sverrisson íþróttafélaginu Ösp og Ragnar Ingi Magnússon, íþróttafélaginu Firði, Hafnarfirði.  Þjálfarar og fararstjórar eru Ingi Þór Einarsson og Ingigerður Stefánsdóttir auk þess sem Þórður Árni Hjaltested, gjaldkeri ÍF og varaformaður INAS-Fid Evrópu verður viðstaddur leikanna.

Það verður spennandi að fylgjast með þessum ungu og efnilegu sundmönnum í keppni við þá bestu í heiminum en Ísland hefur í gegnum tíðina átt á að skipa sundmönnum í fremstu röð.  Sundkeppnin fer fram dagana 7. - 10. júlí og mun verða greint frá árangri þeirra Jóns Margeirs og Ragnar Inga jafnóðum og þau berast.

1.460 þátttakendur frá 40 löndum mæta á leikana sem eru stærstu leikar þroskaheftra og hugsaðir sem eins lags Ólympíumót þessa fötlunarflokks þar sem þroskaheftir íþróttamenn hafa ekki tekið þátt í Ólympíumótum fatlaðra síðan í Sydney árið 2000. 

Þetta er í annað skipti sem slíkir leikar eru haldnir en árið 2004 fóru þeir fram í Svíþjóð.  Þroskaheftir keppendur hafa verið útilokaðir frá þátttöku í mótum IPC ( alþjóðaíþróttahreyfingar fatlaðra) frá árinu 2000.  Þessi ákvörðun kom í kjölfar þess að upp komst að liðsmaður í körfuboltaliði Spánverja á Ólympíumótinu í Sydney var ófatlaður.  Maðurinn sem var blaðamaður hafði náð að villa á sér heimildir og í kjölfar þessa hófst vinna við endurskoðun flokkunarkerfis sem erfitt hefur reynst að finna lausn á.  Ísland hefur verið eitt af þeim löndum sem hvað harðast hefur barist fyrir því að málið verði endurskoðað og þroskaheftir verða í fyrsta skipti frá árinu 2000 þátttakendur á móti á vegum IPC en það er Evrópumót í sundi sem fram fer á Íslandi í október 2009.  Ísland neitaði að halda þetta mót nema þroskaheftir yrðu með og vonast er til þess að lausn finnist sem gerir þeim kleift að taka þátt í ólympíumóti fatlaðra 2012 í London.

Opnuanarhátíð leikanna er í dag, 6. júli.
Heimasíða leikanna er www.globalgames2009.com 

Mynd frá vinstri: Þórður Árni Hjaltested gjaldkeri ÍF og varaformaður INAS-Fid Evrópu, Jón Margeir Sverrisson, Sveinn Áki Lúðvíksson formaður ÍF, Ragnar Ingi Magnússon, Ingigerður M. Stefánsdóttir þjálfari og Ingi Þór Einarsson þjálfari.

Þá er Norræna barna- og unglingamótinu lokið og íslenski hópurinn kominn heim frá Svíþjóð en mótið fór fram þar í landi dagana 26. júní til 3. júlí. Alls voru 14 keppendur frá aðildarfélögum Íþróttasambands fatlaðra sem tóku þátt á mótinu fyrir Íslands hönd og 6 fararstjórar og því voru Íslendingar 20 talsins í Eskilstuna. Veðrið lék við hópinn alla vikuna ytra en þess má til gamans geta að fyrstu rigningardroparnir féllu þegar íslenski hópurinn hafði komið sér fyrir í rútunni á leið sinni til Arlanda flugvallarins í Stokkhólmi.

Að þessu sinni voru 11 keppendur í sundi og 3 í frjálsum íþróttum og stóðu þau sig öll með eindæmum vel. Margir hverjir voru við sinn besta árangur og sumir stórbættu sig enda stífar æfingar alla dagana ytra ásamt keppni. Þjálfarar í ferðinni voru þau María Ólafsdóttir og Egill Þór Valgeirsson og stýrðu þau æfingum og keppni af mikilli röggsemi.

Í íslenska hópnum gaf að líta marga efnilega einstaklinga sem vafalítið eiga eftir að láta vel að sér kveða í framtíðinni, ef þau eru dugleg að æfa áfram af sama kappi og þau gera nú.

Norræna barna- og unglingamótið er haldið á tveggja ára fresti og næst fer það fram í Finnlandi árið 2011. Mótið er fyrir krakka og unglinga á aldrinum 12-16 ára sem æfa íþróttir hjá aðildarfélögum Íþróttasambands fatlaðra. Fyrir þá sem hafa hug á því að komast í hópinn sem fer til Finnlands er ekki seinna vænna en að herða róðurinn við æfingar strax í dag og láta ljós sitt skína á erlendum vettvangi eftir tvö ár. Helstu afreksmenn ÍF í gegnum árin hafa jafnan stigið sín fyrstu skref á Norræna barna- og unglingamótinu sem er hugsað sem ein af fyrstu alþjóðlegu keppnunum sem fatlaðir íslenskir íþróttamenn reyna sig við.

Á fimmtudagskvöld fór fram lokaathöfn Norræna barna- og unglingamótsins og var deginum lokað með veglegu diskóteki þar sem íslenski hópurinn lét sitt ekki eftir liggja á dansgólfinu.

Nú er svo komið inn þriðja og síðasta myndasafnið á myndasíðu ÍF af íslenska hópnum í Eskilstuna en þarna eru m.a. myndir frá sundkeppninni, keppninni í frjálsum og frá lokakvöldinu.

Myndasafn: http://if.123.is/album/default.aspx?aid=151968

Mynd: Íslenski hópurinn á lokakvöldinu í Eskilstuna

Keppni í frjálsum íþróttum á Norræna barna- og unglingamótinu í Eskilstuna fór fram í dag í 33 stiga hita. Þrátt fyrir blíðviðrið fór íslenski frjálsíþróttahópurinn á kostum og rakaði til sín verðlaunum enda dyggilega studdur áfram í stúkunni.

Þau sem kepptu fyrir Íslands hönd í frjálsum voru Ingeborg Eide Garðarsdóttir, langstökk, 100m. hlaup og 400m. hlaup. Almar Þór Þorsteinsson, 100m. hlaup og kúluvarp og svo Sigurjón Sigtryggsson 100m. hlaup, 400m. hlaup og kúluvarp.

Skemmst er frá því að segja að Ingeborg vann silfur í langstokki, brons í 100m. hlaupi og brons í 400m. hlaupi. Almar vann til gullverðlauna í kúluvarpi og Sigurjón Sigtryggsson til silfurverðlauna. Þá vann Sigurjón til silfurverðlauna í 100m. hlaupi og til gullverðlauna í 400m. hlaupi. Sannarlega glæstur árangur hjá þessum efnilega hóp sem á vísast eftir að láta vel að sér kveða þegar fram líða stundir.

Þessa stundina fer fram lokahóf Norræna barna- og unglingamótsins þar sem grillaðir voru hamborgarar og nú innan skamms heldur hópurinn á diskótek þar sem dansað verður frameftir og svo beina leið í háttinn. Íslenski hópurinn heldur svo snemma af stað heim á leið og er væntanlegur með rútu við Íþróttamiðstöðina í Laugardal á milli kl. 17 og 18 á morgun.

Mynd: Íslenski hópurinn með verðlaunin sín úr frjálsíþróttakeppninni í dag. Með þeim á myndinni er frjálsíþróttaþjálfarinn í ferðinni, Egill Þór Valgeirsson.

Keppni í sundi fór fram í dag á Norræna barna- og unglingamótinu sem nú stendur yfir í bænum Eskilstuna í Svíþjóð. Íslenski hópurinn telfdi fram 11 sundmönnum sem allir stóðu sig með glæsibrag. Nokkuð var um bætingar og sumir voru að taka þátt á sínu fyrsta móti erlendis og gerðu svo af miklum myndarskap.

Að sundmótinu loknu í dag hélt keppnin áfram í nýjum og framandi íþróttum og var keppt í rafmagnshjólastólaknattleik, bogfimi og mini-golfi. Keppnin í rafmagnshjólastólaknattleiknum var æsispennandi og þurfti vítakeppni til að útkljá sigurinn þar sem Hjörtur Már Ingvarsson skoraði sigurmark Íslands gegn Norðmönnum. Með Hirti í liði var Bjarndís Sara Breiðfjörð en þau Hjörtur og Bjarndís sýndu sannkallaðar stáltaugar í keppninni og uppskáru mikið lófatak þegar sigurinn var í höfn.

Eftir mikinn keppnisdag var förinni heitið til Malarvíkur rétt utan við Eskilstuna en þar kom hópurinn saman í myndarlegri laut og grillaði ásamt því að keppa í boccia. Skemmst er frá því að segja að Ísland hafði 4-2 sigur gegn Færeyingum í boccia þar sem Ívar Egilsson fór gersamlega á kostum með kúlurnar og á ögurstundu tryggði hann Íslandi sigurinn.

Sannarlega glæsilegur dagur að baki en á morgun fer fram keppni í frjálsum íþróttum en þar keppa Sigurjón Sigtryggsson, Ingeborg Eide Garðarsdóttir og Almar Þór Þorsteinsson.

Mynd: Sunna Ósk Stefánsdóttir sýndi góða takta í bocciakeppninni í dag. Lengst til hægri er Ívar Egilsson sem tryggði Íslandi sigur gegn frændum okkar frá Færeyjum í bocciakeppninni.

Fimmti dagurinn á Norræna barna- og unglingamótinu í Eskilstuna er nú að baki og var margt forvitnilegt sem dreif á dag íslenska hópsins. Hápunktur dagsins var þó heimsókn á hjólabraut þar sem fylgst var með ofurhugum á mótorhjólum keppa í svokölluðu ,,drifti“ en drift er þegar ekið er í hringi á mótorhjólum og hjólin látin renna af mikilli færni í allar beygjur.

Að venju voru æfingar í morgun en eftir hádegi hélt keppnin áfram í nýjum og framandi íþróttum og í dag var röðin komin að skotfimi. Keppt var með loftriffla og fékk íslenski hópurinn veglegar útskýringar á íþróttinni áður en hafist var handa við að skora á skífurnar. Af sex keppnisþjóðum hafnaði Ísland í 5. sæti í skotfiminni enda er það kunn staðreynd að Íslendingar vilja lítið með skotvopn hafa. Ef það er ekki Atgeirinn hans Gunnars eða Grásíða hans Gísla þá er það ekki vopn í okkar huga! Að öllu gamni slepptu var íslenski hópurinn ansi sprækur miðað við að hafa enga reynslu í íþróttinni en það þótti lítið koma á óvart að Norðmenn hefðu unnið skotkeppnina enda margfrægir fyrir skotfimi sína.

Eftir kvöldmat var haldið rétt út fyrir Eskilstuna þar sem gefur að finna mótorhjólabrautina þar sem keppnin í ,,drifti“ fór fram. Hávaðinn var mikill og vankunnátta Íslendinga á íþróttinni leyndi sér ekki en þegar keppni lauk var hópurinn orðinn sprenglærður í fræðunum.

Á morgun hefst svo keppni í sundi og hefjast leikar eldsnemma eða kl. 09:00 í fyrramálið og upphitun hefst kl. 08:00. Á fimmtudag verður svo keppni í frjálsum íþróttum og á föstudag heldur hópurinn heim til Íslands og er væntanlegur í Laugardal með rútu um kl. 17:00.

Sjá nýtt myndasafn frá Norræna barna- og unglingamótinu:
http://if.123.is/album/default.aspx?aid=151577

Mynd: Breki Arnarson mundar loftriffilinn í skotkeppninni í dag.

Viðburðaríkurdagur er nú að kveldi kominn og sem fyrr hér á Norræna barna- og unglingamótinu í Svíþjóð var einmuna veðurblíða. Vafalítið var það heimsókn í nálægan dýra- og skemmtigarð sem stóð upp úr en þar gaf að líta strúta, krókódíla, flóðhesta, ljón, flamengóa og margt margt fleira.

Að vanda hófst dagurinn á æfingu, María Ólafsdóttir sundþjálfari í ferðinni, stjórnaði æfingunni af fáheyrðri röggsemi á bakkanum og sundhópurinn tók hressilega á því. Á sama tíma var frjálsíþróttahópurinn ekki langt undan í öðrum hluta bæjarins við sínar æfingar en æfingar þeirra hefjast jafnan hér í gistiaðstöðunni. Þá taka krakkarnir sér góðan tíma í að stútfylla öll þau ílát sem kló á festir af vatni enda hitinn gríðarlegur.

Eftir æfingarnar var haldið í dýragarðinn góða og mátti ekki á milli sjá hvort væri vinsælla, ískrapið sem selt var í garðinum eða dýrin sjálf. Aparnir höfðu vissulega aðdráttarafl enda annáluð sjarmatröll en að heimsókn lokinni í dýragarðinn tók við skemmtilegt kvöld í gistiaðstöðunni þar sem Norðurlöndin öttu kappi í hinum ýmsu ,,íþróttum.“

Í kvöld voru keppnisgreinarnar þrjár talsins: Þríhjólaspretthlaup, söngvakeppni í Singstar og blindra borðtennis. Í stuttu máli fór Ísland á kostum, hafði sigur í tveimur greinum en tapaði einni. Sigur vannst gegn Dönum í þríhjólaspretthlaupi þar sem Hjörtur Már Ingvarsson, Breki Arnarsson og Almar Þór Þorsteinsson fóru hamförum.

Þá kom annar sigur gegn Finnum í Singstar en þar reið Ívar Egilsson á vaðið og drottnaði yfir slagarnaum Working 9 to 5 með Dolly Parton. Næst á svið var Bjarndís Sara sem söng Tainted Love og þriðja á svið var Kristín Jónsdóttir og söng hún lagði Walking on sunshine. Þegar í blindra borðtennisið var komið steig Brynjar Sigurþórsson fyrstur á stokk en mátti sætta sig við ósigur. Slíkt hið sama mátti Sigurjón Sigtryggsson en það var svo Elsa Sigvaldadóttir sem náði í einn sigur í blindraborðtennisinum en það reyndist ekki nóg og höfðu Norðmenn þar betur gegn Íslandi.

Fjörugur og fjölbreyttur dagur að baki hér í Svíþjóð en á morgun er fyrirhuguð heimsókn á mótorhjólakeppni ásamt æfingum og hugsanlega verður farið í bæjarferð.

Myndir: Á efri myndinni er Hafnfirðingurinn Brynjar Sigurþórsson að keppa í blindraborðtennis en á þeirri neðri eru þau Elsa Sigvaldadóttir,  Ívar Egilsson og Sigurjón Sigtryggsson að virða fyrir sér mannblendinn strút í Parken Zoo.

Hitinn fór upp í allt að 35 stigum í Eskilstuna í dag á Norræna barna- og unglingamótinu. Íslensku krakkarnir fóru á tvær æfingar í dag, eina fyrir hádegi og aðra eftir hádegi svo nú undir kvöldmat var hópurinn ansi þreyttur. Í kvöld er opið hús þar sem Svíarnir hafa m.a. undirbúið skemmtilega stökkdýnu og vitaskuld verður látið reyna á þanþol tækisins með viðeigandi hoppum og skemmtilegheitum.

Eins og sönnum Íslendingum ber á sólarstað þá eru nokkrir ferðalangar sem hafa sólbrunnið en enginn alvarlega. Allir eru duglegir að bera á sig sólarvörn en á morgun er spáð 26 stiga hita og skýjuðu veðurfari á köflum.

Það var svo mikið fjör á frjálsíþróttaæfingu í dag en Egill Þór Valgeirsson frjálsíþróttaþjálfari í ferðinni tók að sér að stýra öllum Norðurlandaþjóðunum á æfingunni. Vel var tekið á því og að æfingu lokinn er óhætt að segja að Egill hafi ekki verið manna vinsælastur á staðnum og margir brigsluðu hann um hreinasta púl og pyntingar. Á æfingunni eftir hádegi var Egill enn við stjórnartaumana en sú æfing var þannig úr garði gerð að Egill endurheimti allar sínar vinsældir og var æfingin fjarri því jafn erfið og í morgun.

Á morgun verður nóg um að vera og fyrir utan venjubundnar æfingar er skipulögð heimsókn í nærliggjandi dýragarð þar sem einnig gefur að finna hin ýmsu tívolítæki.

Mynd: Egill Þór fer fyrir hópnum á frjálsíþróttaæfingunni fyrir hádegi í dag. Krakkarnir tóku vel á því undir handleiðslu Egils.

Í dag fór fram setningarathöfnin á Norræna barna- og unglingamótinu í Eskilstuna í Svíþjóð. Norðurlöndin gengu fylktu liði í miðbæ Eskilstuna með kröfuspjöld sem tíunduðu gildi þess að stunda íþróttir.

Íslenski hópurinn sýndi allar sínar bestu hliðar og að lokinni setningarathöfninni hófust æfingar. Sundhópurinn æfði í 50m. langri útilaug við Parken Zoo og gaf það vel en frjálsíþróttahópurinn æfði einnig í dag en hann skipa þau Ingeborg Eide Garðarsdóttir, FH, og Sigurjón Sigtryggsson, Snerpa. Egill Þór Valgeirsson, Eik, er frjálsíþróttaþjálfari í ferðinni.

Íslenski hópurinn hefur á að skipa 12 sundmönnum og tveimur frjálsíþróttamönnum. Í þessum rituðu orðum er hópurinn í Munktell Arenan, þar sem hann hefur aðstöðu, og ver síðustu klukkustundum dagsins við prufur á nýjum íþróttum á borð við El Hockey sem er boltaleikur í sérsmíðuðum rafmagnshjólastólum.

Á morgun halda æfingarnar áfram en einnig verður farið í skoðunarferð um bæinn. Á myndasíðu ÍF er nú hægt að nálgast snaggaralegt myndasafn frá deginum í dag en rétt eins og í gær var rjómablíða og munu vel flestir eftir því að maka á sig sólarvörninni.

Myndasafn frá deginum: http://if.123.is/album/default.aspx?aid=151209

Myndir: Á efri myndinni er Kristín Jónsdóttir, Óðni, en hún bar merki Íslands á lofti í skúrðgöngunni í dag og þá var Hjörtur Már Ingvarsson, ÍFR, fánaberi. Á neðri myndinni eru Marinó Ingi Adolfsson og Bjarndís Sara Breiðfjörð í El Hockey bílunum.

Tuttugu manna hópur er nú kominn út til Eskilstuna í Svíþjóð frá Íþróttasambandi fatlaðra. Um er að ræða 14 krakka á aldrinum 12-16 ára sem taka munu þátt í mótinu og 6 fararstjóra. Íslenski hópurinn lagði eldsnemma af stað í morgun og lenti í Stokkhólmi laust fyrir hádegi í brakandi blíðu eða um 25 stiga hita.

Ferðalagið hefur gengið ljómandi vel til þessa og aðstæður allar til fyrirmyndar í Munktell Arenan í Eskilstuna en þar eru Norðurlöndin með gisti- og mataraðstöðu. Þegar hópurinn hafði lokið við að koma sér fyrir var snæddur kvöldverður og loks farinn stuttur göngutúr í kringum nánasta umhverfi. Stefnt er að því að fara snemma í háttinn í kvöld enda langt ferðalag að baki og nóg um að vera á morgun.

Framundan er svo vegleg dagskrá við æfingar, keppni og prufu á nýjum íþróttum ásamt hinum ýmsu ferðum og heimsóknum.

Mynd: Margrét Kristjánsdóttir og Almar Þorsteinsson grandskoða bæjarkortið af Eskilstuna.

Golfsamtök fatlaðra á Íslandi standa að sínu fyrsta sumarmóti í golfi næsta sunnudag en mótið fer fram á par 3 vellinum hjá Golfklúbbnum Oddi, betur þekktur sem Ljúflingurinn. Mótið hefst kl. 10:00 og er 9 holu punktakeppni með forgjöf.

Að móti loknu fer fram verðlaunafhending í Setbergsskála og er ráðgert að hún hefjist á milli kl. 11:30 og 12:00. Mótið er opið öllum kylfingum með fötlun og fer skráning fram hjá Herði Barðdal formanni GSFÍ í síma 896 6111 eða á hordur@ehp.is

Sumarmótaröð GSFÍ hefur á að skipa þremur golfmótum. Næsta mót fer fram síðla júlímánaðar og það síðasta fer fram í ágúst. Þá minnum við einnig á golfæfingar í Hraunkoti fyrir fatlaða alla miðvikudaga í sumar frá kl. 16:00-18:00.

Mynd: Hörður Barðdal formaður GSFÍ.

Sumarhátíð CP félagsins fer að þessu sinni fram í Reykholti í Biskupstungum helgina 3.-5. júlí næstkomandi. 

Boðið er uppá stæði fyrir tjaldið eða gistingu í svefnpokaplássi. Þeir sem ekki vilja gista geta keyrt á staðinn að morgni laugardags og til baka um kvöldið. Sama gamla verðið, kr 2.500.- fyrir fullorðna, 1.500.- fyrir 6-12 ára  og frítt fyrir yngstu börnin. Tekið verður við VISA og Euro.

Hoppukastali verður á svæðinu ásamt leiktækjum. Innifalið í verðinu er tjaldaðstaða eða gisting í svefnpokaplássi í Reykholtsskóla, grillaðstaða á föstudag, sund, pulsur og drykkur í hádeginu á laugardag, glæsilegur kvöldverður um kvöldið, skemmtiatriði, dans og aðgangur að dýragarðinum í Slakka.

Skráið ykkur sem fyrst á http://www.cp.is eða í síma 691-8010 (Linda) endilega hafið samband ef það eru einhverjar upplýsingar sem ykkur vantar. Nauðsynlegt er að skrá þátttöku fyrir 1. júlí.

Fyrsti stjórnarfundur nýrrar stjórnar hjá Íþróttasambandi fatlaðra kjörtímabilið 2009-2011 fór fram mánudaginn 15. júní síðastliðinn. Á fundinum skipti stjórn með sér verkum. Þórður Árni Hjaltested var skipaður gjaldkeri, Jóhann Arnarson var skipaður ritari og Ólafur Þ. Jónsson varð meðstjórnandi. Frá Sambandsþingi voru réttkjörin til formennsku Sveinn Áki Lúðvíksson sem gengt hefur formannsembætti ÍF frá árinu 1996. Þá var Camilla Th. Hallgrímsson réttkjörinn varaformaður á Sambandsþingi.

Varastjórn Íþróttasambands fatlaðra kjörtímabilið 2009-2011 skipa þau Jón Heiðar Jónsson, Gunnar Einar Steingrímsson og Svava Árnadóttir. Þess má geta að einn einstaklingur hefur setið í stjórn ÍF frá stofnun sambandsins en það er Ólafur Þ. Jónsson sem var meðlimur í fyrstu stjórn ÍF kjörtímabilið 1979-1982.

Fyrstu stjórn ÍF skipuðu eftirfarandi: Sigurður Magnússon, formaður, Páll B. Helgason, Hörður Barðdal, Sigríður Níelsdóttir, Ólafur Þ. Jónsson, Magnús B. Einarsson, Guðbjörg Eiríksdóttir og Magnús Pálsson.

Mynd: Nýir menn í stjórn, frá vinstri skal telja Gunnar Einar Steingrímsson og til hægri er Jón Heiðar Jónsson.

Bikarkeppni Íþróttasambands fatlaðra í sundi fór fram í Akureyrarlaug um síðastliðna helgi þar sem Fjörður fór með sigur af hólmi annað árið í röð. Glæsilegur árangur hjá Firði sem rakaði saman alls 13112 stigum á mótinu. Öspin hafnaði í 2. sæti með 8761 stig en mótið þótti lukkast vel fyrir norðan í 25m. laug þeirra Akureyringa.

Í þriðja sæti hafnaði svo sveit ÍFR með 5768 stig og heimamenn í Óðni voru í fjórða og síðasta sæti með 5708 stig. Flestir fremstu sundmenn landsins úr röðum fatlaðra tóku þátt á mótinu en líka þeir sem hafa lagt sundtökin á hilluna en gerðu garðinn frægan hér í eina tíð. Í þeim hópi var m.a. sterki baksundsmaðurinn Gunnar Örn Ólafsson.

Úrslitin frá mótinu má nálgast hér: http://ifsport.is/sund/Bikarmot_2009.htm

Mynd: Sigurlið Fjarðar á Akureyri.

Bikarmót Íþróttasambands fatlaðra í sundi fer fram á Akureyri laugardaginn 13. júní þar sem fjögur aðildarfélög ÍF eru skráð til leiks en þau eru heimamenn í Óðni, bikarmeistarar 2008 frá Firði, Ösp og ÍFR. Alls verða 60 keppendur á mótinu sem fram fer í Akureyrarlaug sem er 25m. útilaug.

Ingi Þór Einarsson er formaður sundnefndar Íþróttasambands fatlaðra og á hann von á jöfnu og spennandi móti um helgina.

,,Fjörður vann þetta í fyrra og er sigurstranglegur í ár en hafa engu að síður misst sterka sundmenn á borð við Karen Gísladóttur, Huldu Hrönn og svo er Skúli meiddur svo það eru stórir póstar fjarverandi í Firði. Þetta verður annars virkilega spennandi keppni,“ sagði Ingi Þór sem að sjálfsögðu mun fylgjast grannt með gangi mála um helgina enda fjöldi sundmanna úr landsliðsbúðum ÍF að keppa á mótinu en öll stefna þau á þátttöku í Evrópumeistaramótinu sem fram fer í Laugardal í október á þessu ári.

Mynd: Ingi Þór Einarsson formaður sundnefndar ÍF á von á spennandi keppni um helgina.

Íslenski hópurinn sem tók þátt á Evrópumeistaramóti fatlaðra í borðtennis í Genova á Ítalíu er væntanlegur heim í dag. Hópinn skipuðu þeir Helgi Þór Gunnarsson, þjálfari, Jóhann Rúnar Kristjánsson, NES, og Tómas Björnsson, ÍFR. Heimasíða ÍF náði tali af Helga á Ítalíu og bað hann um stuttlegt mat á frammistöðu íslenska hópsins ytra.

,,Tómas var ekki að spila sinn besta leik á þessu Evrópumeistaramóti. Hann hafði verið að standa sig mjög vel á æfingum og því batt ég ákveðnar vonir við að hann myndi stríða þessum strákum eitthvað. Tómas átti samt sinn besta leik á móti Spánverja sem hafnaði í 4. sæti á mótinu. Við fórum aðeins yfir nokkur atriði sem við munum fara með heim og reyna að byggja meira ofan á,“ sagði Helgi um frammistöðu Tómasar en hvað Jóhann varðar þá landaði hann sínum fyrsta sigri á Evrópumeistaramóti þegar hann lagði keppanda frá Slóvakíu og komst áfram í 12 manna úrslit.

,,Jóhann var pínulítið brokkgengur. Hann spilaði ágætlega við strák frá Ísrael í Opna flokknum en samt var hann eitthvað ragur við spaðann hjá mótspilaranum en samt sem áður vorum við búnir að vera að æfa mörg afbrigði af spöðum til að reyna að undirbúa það óvænta. Síðan spilaði hann ekki nógu vel á móti Ólympíumótsmeistaranum frá Frakklandi og átti ekki möguleika þar en síðan spilaði hann vel á móti Slóvaka og vann sannfærandi 3-1 og hefði alveg getað unnið hann 3-0,“ sagði Helgi en þegar í 12 manna úrslitin var komið harðnaði róðurinn til muna.

,,Strákarnir stóðu sig að öðru leyri mjög vel og voru þjóðinni og sambandinu til sóma,“ sagði Helgi Þór að lokum.

Sumarnámskeið í golfi fyrir hreyfihamlaða eru farin af stað en námskeiðin munu í sumar fara fram á miðvikudögum frá kl. 16-18. Magnús Birgisson verður kennari á námskeiðunum sem fara fram í æfingaaðstöðu Golfklúbbsins Keilis í Hafnarfirði. ÍF hvetur sem flesta til að sækja námskeiðin og tilvalið að mæta í dag.

Allar nánari upplýsingar um golfsumarið í röðum fatlaðra er hægt að nálgast á skrifstofu ÍF í síma 514 4080 eða hjá Golfnefnd ÍF í síma 896 6111.

Leifur Karlsson góður félagi og ómetanlegur liðsmaður ÍF lést sunnudaginn 6. maí sl. í Danmörku. Hann var til margra ára einn af máttarstólpum bogfimiíþróttarinnar hér á landi og til að vinna að framgangi íþróttarinnar sat Leifur m.a. í bogfiminefnd ÍF og bogfiminefnd ÍSÍ.  Alltaf var hann tilbúinn að leggja vinnu í undirbúning og skipulag Íslandsmóta ÍF í bogfimi þar sem hann var einnig þátttakandi.  Þá vann hann sem keppandi til fjölda verðlauna á innlendum vettvangi auk þess að keppa og vinna til verðlauna á Norðurlandamótum fatlaðra í bogfimi.

Leifur var sérlega áhugasamur og fróður um það sem viðkom bogfimiíþróttinni. Ásamt félögum sínum í bogfiminefnd ÍFR byggði hann upp spennandi samstarfsverkefni á milli Íslands og Þýskalands og mikil vinátta hafði skapast á milli þeirra sem þátt tóku í þessu verkefni.

Leifur Karlsson var þó fyrst og fremst maður sem  gaf mikið af sér og hafði góða nærveru. Alltaf gaf hann sér tíma til að kíkja við á skrifstofu ÍF, fá sér kaffisopa og ræða málin. Hans var saknað á skrifstofunni eftir að hann flutti til Danmerkur en tengslin héldust alltaf og þegar hann kom til Íslands var alltaf tími til að kíkja við.

Þakkir og söknuður eru efst í huga þegar góður félagi, liðsmaður og vinur er horfinn á braut.

Íþróttasamband Fatlaðra sendir fjölskyldu hans samúðarkveðjur

Íslandsmót Íþróttasambands fatlaðra í frjálsum íþróttum utanhúss fór fram á Kópavogsvelli um síðastliðna helgi þar sem 33 keppendur frá 10 aðildarfélögum ÍF tóku þátt. Mótið heppnaðist einkar vel enda skörtuðu veðurguðirnir sínu bestu hliðum sem og keppendur sjálfir.

Keppt var í 100m. hlaupi, 400m. hlaupi, langstökki, kúluvarpi, spjótkasti og hástökki.

Úrslit frá mótinu má nálgast hér: http://ifsport.is/frjalsar/islmot_if_2009_frjalsar_uti.pdf

Myndasafn frá mótinu má nálgast hér: http://if.123.is/album/default.aspx?aid=149240

Íslendingar hafa lokið þátttöku sinni á Evrópumeistaramóti fatlaðra í borðtennis sem fer nú fram í Genova á Ítalíu. Þeir félagar Jóhann Rúnar Kristjánsson, NES, og Tómas Björnsson, ÍFR, eru báðir úr leik og eru því væntanlegir aftur heim til Íslands á fimmtudag. Í gær varð ljóst að Tómas kæmist ekki áfram upp úr sínum riðli en Jóhann komst hinsvegar upp úr sínum riðli og inn í 12 manna úrslit.

Jóhann Rúnar mætti sterkum spilara frá Úkraínu í 12 manna úrslitum í gærkvöldi og tapaði 3-0 í viðureigninni. Jóhann hóf viðureignina af krafti og leiddi 6-2 í fyrstu lotu en þá tók að halla undan fæti og Úkraínumaðurinn landaði öruggum sigri.

Keppni í opnum flokki hófst strax í byrjun móts fyrir helgi en eins og við höfum þegar greint frá féllu þeir Tómas og Jóhann strax út í fyrstu umferð.

Mynd: Tómas Björnsson, ÍFR.

Það hefur gengið upp og ofan hjá þeim félögum Jóhanni og Tómasi á Evrópumeistaramóti fatlaðra í borðtennis sem nú fer fram í Genova á Ítalíu. Jóhann Rúnar er kominn áfram í sitjandi flokki en Tómas er fallinn úr leik. Báðir duttu þeir snemma úr leik í opnum flokki en Jóhann heldur áfram á morgun.

Jóhann keppir í fötlunarflokki C2, en hann er lamaður fyrir neðan brjóst. Tómas keppir í flokki C6. Flokkum hreyfihamlaðra í borðtennis er skipt í 10 flokka þar sem C1 - C5 er sitjandi flokkur og flokkur C1 er flokkur mest fatlaðra. Flokkar C6 - C10 eru standandi flokkar þar sem C6 eru mest fatlaðir.

Á föstudag mætti Tómas keppanda í opnum flokki en Tómas náði sér ekki á strik og mátti sætta sig við ósigur gegn Slóvakanaum sem er keppandi í klassa 10. Helgi Þór þjálfari í ferðinni sagði að á betri degi ætti Tómas vel að geta strítt Slóvakanum en það hafðist ekki þennan föstudaginn.

Jóhann Rúnar mætti spilara frá Ísrael sem er í klassa 3 og mátti líka þola ósigur en það var ekki fyrr en í oddalotunni og fór hún 8-11. "Þetta var hörkuleikur en við lögðum ekki í að spila forhöndina á þessum spilara," sagði Helgi en á laugardag fór fram setningarathöfn leikanna þar sem piltarnir fengu smá frí.

Á laugardeginum varð það ljóst að Jóhann Rúnar væri í flokki með Ólympíumeistaranum frá Frakklandi og sterkum spilara frá Slóvakíu. Til þess að komast áfram varð Jóhann að vinna einn leik í riðlinum.

Tómas lenti í riðli með Spánverja, Rúmena og Þjóðverja og hafði hann áður mætt öllum nema Þjóðverjanum svo þar renndu Íslendingar nokkuð blint í sjóin.

Á sunnudag mætti Tómas svo keppendunum frá Rúmeníu og Þýsklandi og tapaði báðum leikjunum 3-0. Hann mætti Spánverjanum í dag en von er á úrslitum úr þeirri viðureign.

Í gær mætti Jóhann Rúnar Ólympíumótsmeistaranum frá Frakklandi og beið hann 3-0 ósigur. Í dag mætti Jóhann svo slóvenska spilaranum og hafði betur og er því kominn áfram og upp úr riðlinum sínum.

Nánari tíðanda af Evrópumeistaramótinu í borðtennis er að vænta síðar í dag eða á morgun.

Evrópumeistaramótið í borðtennis hefst í Genova á Ítalíu í dag en þar á meðal eru tveir íslenskir keppendur þeir Jóhann Rúnar Kristjásson, NES, og Tómas Björnsson, ÍFR. Þjálfari þeirra í ferðinni er Helgi Þór Gunnarsson en hópurinn hélt út á miðvikudag og þrátt fyrir nokkrar raunir í ferðinni eru kapparnir komnir til Genova á heilu og höldnu.

Nokkur vandræði urðu á farangri hópsins en hann skilaði sér á endanum og í gærdag tókst þeim félögum að ná inn tveimur æfingum. Önnur æfingin fór fram utandyra í 30 stiga hita en sú síðari fór fram í keppnishöllinni og gekk mjög vel að sögn Helga Þórs.

Í dag hefst svo keppnin í opnum flokki sem er útsláttarkeppni en þar mætir Jóhann Rúnar keppanda í flokki 3 en sá kemur frá Ísrael. Tómas dróst á móti keppanda frá Slóvakíu sem er í 10. flokki. Fyrirkomulagið í opnum flokki, útsláttarkeppnin, er miskunnarlaus og því þýðir ósigur að strákarnir eru úr leik en að lokinni keppni í opnum flokki hefst keppni í lokuðum flokkum.

Sundmaðurinn Eyþór Þrastarson, ÍFR/Ægir, keppti á opna þýska meistaramótinu í sundi um hvítasunnuhelgina þar sem hann setti nýtt og glæsilegt Íslandsmet í 800m. skriðsundi. Í 800m. skriðsundi synti hann á 10:32,16 mín. sem er nýtt met.

Eyþór bætti sig nokkuð í öðrum greinum og komst í úrslit í 200m. skriðsundi þar sem hann synti á tímanum 2:26,61 mín. Í 100m. skriðsundi náði Eyþór einnig að bæta sig á tímanum 1:06,75 mín. sem er bæting um 3 sekúndur hjá honum.

Á Ólympíumótinu í Peking komst Eyþór í úrslit í 400m. skriðsundi þar sem hann synti á tímanum 5:15,63 mín. en í undanrásum í því sundi setti hann persónulegt met á tímanum 5:11,54 mín. Í Þýskalandi um helgina synti Eyþór á tímanum 5:07,71 í undanrásum og var svo í úrslitum á tímanum 5:06,24 í úrslitum og bætti því besta tímann sinn um rúmar 5 sekúndur.

Ekki gekk jafn vel í 100m. baksundi þar sem Eyþóri tókst ekki að bæta sig en í 50m. skriðsundinu bætti hann sig lítillega og synti á 31,65 sek.

Ingi Þór Einarsson, annar tveggja landsliðsþjálfara ÍF í ferðinni, sagði í samtali við heimasíðu ÍF að Eyþór hefði lært mikið af mótinu í Þýskalandi: ,,Eyþór á mikið inni enda hefur hann æft mikið og vel undanfarið,“ sagði Ingi en var hæstánægður með bætingarnar.

Mynd: Eyþór Þrastarson bætti sig töluvert um helgina í Þýskalandi.

Sundamðurinn Eyþór Þrastarson ÍFR/Ægir setti í gær glæsilegt Íslandsmet í 800m. skriðsundi fatlaðra á opna þýska meistaramótinu. Eyþór synti á tímanum 10:32,16 mín. sem er nýtt Íslandsmet en það fyrra var í eigu Birkis Rúnars Gunnarssonar og var sá tími 10:48,02 mín. og því bætti Eyþór metið um 16 sekúndur! Frábær árangur hjá þessum unga og öfluga sundmanni.

Í morgun keppti Eyþór í 200m. skriðsundi og komst í úrslit á tímanum 2:29,65 mín. Fregnir frá úrslitasundinu berast í kvöld eða á morgun.

Hin árlega sumarhátíð CP félagsins verður haldin í Reykholti í Biskupstungum helgina 3. júlí - 5. júlí nk. Verið er að vinna í dagskrá fyrir helgina og mun hún koma síðar.

Boðið er uppá stæði fyrir tjaldið eða gistingu í svefnpokaplássi. Þeir sem ekki vilja gista geta keyrt á staðinn að morgni laugardags og til baka um kvöldið.

Sumarhátið CP félagsins er góður vettvangur fyrir bæði börn og foreldra í félaginu. Stemningin er að venju mjög góð, á laugardeginum skella flestir sér í sundlaug sem er á svæðinu og um kvöldið er kvöldverður í boði grill og gaman.

Í framhaldi af grillinu eru skemmtiatriði og diskó fyrir börn og fullorðna. Hoppukastalar og leiktæki eru á svæðinu.

Innan skamms mun koma inná heimasíðu félagsins skráningarform og þarf skráning að vera búin fyrir 1.júlí. 

www.cp.is

Mynd: Frá Sumarhátíð CP félagsins árið 2006

Laugardaginn 13. júní næstkomandi fer bikarkeppni ÍF í sundi fram á Akureyri í samstarfi við sundfélagið Óðinn. Keppt verður í sundlaug Akureyrar sem er 25 m. útilaug.

Skráningum í mótið ber að skila eigi síðar en 8. júní á póstfangið issi@islandia.is 

Nánari upplýsingar er hægt að fá á skrifstofu ÍF í síma 514 4080 eða hjá Ástu formanni Óðins í síma 864 6403 en þegar hafa ítarupplýsingar verið sendar á aðildarfélög ÍF.

Mynd: Sveit Fjarðar hafði sigur úr býtum á bikarmóti ÍF í fyrra.

Einn okkar mesti gleðigjafi, Sigmundur Erling Ingimarsson, Simmi okkar lést síðastliðinn fimmtudag. Hann ætlaði að taka þátt í Íslandsleikum Special Olympics á sunnudag með vinum sínum en var skyndilega kallaður á braut.

Simmi tók þátt í íþróttastarfi með íþróttafélaginu Þjóti og var virkur þátttakandi á Íslandsmótum ÍF auk þess sem hann var valinn til þátttöku á norrænu barna og unglingamóti og alþjóðaleikum
Special Olympics í Írlandi. Það sem einkenndi þennan góða dreng var glaðværð og kátína sem hafði jákvæð áhrif á allt hans umhverfi. Hann vakti mikla athygli sem frábær trommuleikari og sló rækilega í gegn þegar hann lék með hljómsveit vinabæjar Íslands, Newry í Norður Írlandi árið 2003.

Þakklæti er efst í huga fyrir að hafa fengið að kynnast þessum einstaka gleðigjafa.

Íþróttasamband fatlaðra sendir aðstandendum og vinum innilegar samúðarkveðjur.

Mynd: Sigmundur Erling á Alþjóðaleikum Special Olympics á Írlandi árið 2003.

Aðalfundur Íþróttafélags fatlaðra í Reykjavík (ÍFR) var haldinn hinn 23. maí sl. ÍFR fangar 35 ára afmæli sínu um þessar mundir og var að loknum venjubundnum aðalfundarstörfum boðið upp á afmæliskaffi. Á fundinum var Júlíus Arnarson endurkjörinn formaður ÍFR en Júlíus hefur verið formaður félagsins um árabil.

Íþróttasamband fatlaðra heiðraði þá Garðar Steingrímsson, varaformann ÍFR og Eirík Ólafsson, stjórnarmann ÍFR til margra ára, með silfurmerki sambandsins en merkið er veitt þeim einstaklingum sem inna af höndum skipulags- stjórnunar eða þjónustustörf í þágu íþrótta fatlaðra.

Íþróttasamband fatlaðra færir félaginu hamingjuóskir sínar og óskar því heilla í framtíðinni.

Borðtenniskappinn Jóhann Rúnar Kristjánsson gerði góða ferð til Rúmeníu um helgina þar sem opna rúmenska borðtennismótið fór fram. Jóhann landaði gullverðlaunum í liðakeppninni eða ,,team play“ þar sem Ítalinn Julius Lampachaer var liðsfélagi hans. Sigurinn kom ekki á silfurfati þar sem Jóhann og Julius léku til úrslita gegn andstæðingum sínum á þriðju klukkustund.

Í einliðaleiknum komst Jóhann upp úr sínum riðli en mátti þola ósigur í 8 manna úrslitum. Mótið var alþjóðlegt punktamót og sigurinn hjá Jóhanni mikilvægur fyrir framhaldið. Næst á dagskrá er Evrópumeistaramótið sem fram fer á Ítalíu dagana 3.-11. júní n.k. og sagði Jóhann í samtali við heimasíðu ÍF að hann ætlaði sér að reyna að koma á óvart í opna flokknum á Ítalíu því þar hefði hann engu að tapa.

Glæstur árangur hjá Jóhanni og óskar ÍF honum innilega til hamingju.

Umsjónaraðili Íslandsleikanna var KR í samstarfi við ÍF og KSÍ.  Íslandsleikar Special Olympics hafa undanfarin ár verið samstarfsverkefni ÍF og KSÍ en árið 2009 hófst samstarf ÍF og KSÍ við KR í þeim tilgangi að efla þátttöku fatlaðra í knattspyrnu. Íslandsleikar Special Olympics eru haldnir í tengslum við knattspyrnuviku UEFA (knattspyrnusamband Evrópu) en aðildarlönd Special Olympics í Evrópu standa fyrir slíkum leikum.

Grétar Sigfinnur Sigurðsson varnarjaxl úr herbúðum KR sá um upphitun og Sveinn Jónsson, fyrrverandi formaður KR setti leikana.

Ólafur Ragnar Grímsson, Forseti Íslands og Geir Þorsteinsson, formaður KSÍ afhentu verðlaun. Í lok keppni bauð KR upp á grillaðar pylsur og gos.

Á leikum Special Olympics er skipt í jafna getuflokka.  2 lið frá Ösp, 2 lið frá Nes og 1 sameiginlegt lið frá Suðra á Selfossi og Gný á Sólheimum voru skráð í flokk getumeiri liða en eitt lið frá Ösp í flokk getuminni liða. Til að gefa þessu eina liði kost á að taka þátt voru mynduð  2 lið með þátttöku ungra leikmanna frá KR og var það mjög skemmtileg tilraun.

Úrslit urðu þau að Ösp 1  hlaut gullið og Ösp 2 og Nes 1 fengu silfur en liðin urðu
jöfn að stigum.  Önnur lið fengu brons en allir keppendur fá verðlaun á leikum
Special Olympics.

Myndasafn frá leikunum má finna hér: http://if.123.is/album/default.aspx?aid=147542

Nánari upplýsingar um leikana veitir Guðlaugur Gunnarsson gulli@ksi.is GSM 6618183

Heiðursfélagi ÍF, Sigurður Magnússon,
virðulegu gestir og félagar.

Hér fer fram í dag 14. sambandsþing Íþróttasambands fatlaðra.

Enn höldum við sambandsþing okkar hér á Radisson SAS, Hótel Sögu og vil ég þakka stjórnendum hótelsins fyrir að styðja við bakið á okkur og færi ég þeim bestu þakkir fyrir þeirra trygglyndi og áhuga á okkar starfi. Ástæða þess að við erum með þingið okkar í Reykjavík að þessu sinni er, fyrir utan að geta verið á þessu glæsilega hóteli, er að á morgun fagnar ÍF 30 ára afmæli og er ætlunin að gera sér dagamun af því tilefni, og munum við halda upp á afmælisdaginn í Krika, sumarhúsi Sjálfsbjargar við Vatnsenda við Elliðavatn. Eru allir þingfulltrúar boðnir velkomnir að vera með okkur og hefst samkoman kl 14:00.

Síðast þegar við komum hér saman til þingstarfa vorum við full bjartsýni og litum björtum augum til framtíðarinnar, enda spennandi verkefni fram undan. Og öll þau verkefni gengu eftir og tók hver stórviðburðurinn við af öðrum.
Ekki ætla ég að nefna öll þessi verkefni hér, þau eru tíunduð í ársskýrslunni en mig langar þó að minnast á þrjá stórviðburði sem stóðu upp úr að mínu áliti.
Þetta voru Norræna barna- og unglingamótið sem haldið var hér á landi s.l. sumar og heppnaðist einstaklega vel, svo vel, að þeir sem stjórnuðu mótinu voru svo vel tengdir og fengu veðurguðina í lið með sér svo hressilega að þá daga sem mótið var, var veður best í Reykjavík í allri Evrópu og t.d höfðu erlendu gestirnir að orði að þeir hefðu aldrei trúað því að hægt væri að spila borðtennis utanhúss, á miðnætti!

Nánar...

Þann 6. júní næstkomandi fer fram Íslandsmót Íþróttasambands fatlaðra í frjálsum íþróttum. Mótið fer fram á Kópavogsvelli og stendur frá kl. 10:00 um morguninn til kl. 14:00. Lágmörkum í langstökki hefur verið breytt í 1.10 m. hjá konum og 1.20 m. hjá körlum (sjá í viðhengi)

Skráningar í mótið berist á astakata@fss.is og teddik@mi.is með cc á if@isisport.is - síðasti skráningarfrestur í mótið er 2. júní
 
Íslandsmót ÍF í frjálsum íþróttum á Kópavogsvelli , laugardaginn 6. júní 2009.
 
Upphitun hefst kl. 9.30,
Keppni hefst kl. 10.00
Mótslok áætluð um kl. 14.00
 
Mótsstjóri: Linda Kristinsdóttir
Hlaupstjóri/ræsir: Kári Jónsson
Stökkstjóri: Teódór Karlsson
Kaststjóri: Ásta Katrín Helgadóttir

Íþróttasamband fatlaðra fagnaði 30 ára afmæli sínu sunnudaginn 17. maí síðastliðinn. Eins og auglýst var fór afmælishátíðin fram í Krika við Elliðavatn í blíðskaparviðri. Fjölmargir lögðu leið sína í Krika og gæddu sér á grilluðum pylsum og vitaskuld var boðið upp á 30 ára afmælissúkkulaði köku sem mældist vel fyrir hjá gestunum.

Afmælisnefnd ÍF skipuðu þær Camilla Th. Hallgrímsson varaformaður ÍF, Svava Árnadóttir meðlimur í varastjórn ÍF, Margrét Kristjánsdóttir sem m.a. er handhaf Guðrúnarbikarsins frá árinu 2007 og Guðbjörg Eiríksdóttir fyrrverandi stjórnarmaður hjá ÍF. Er afmælisnefnd hér með þakkað innilega fyrir frábæra hátíð.

Fjölmargir komu færandi hendi og má m.a. nefna að Kiwanisklúbburinn Hekla afhendi ÍF myndarlegan fjárstyrk, félögin Eik og Akur gáfu ÍF íslenska fánann, félagar frá Nord-HIF samtökunum gáfu forláta listaverk eftir unga og öfluga færeyska listakonu. Þá voru fleiri sem komu færandi hendi eða sendu skeyti og er þessum aðilum þakkað innilega fyrir sýndan hlýhug á 30 ára afmæli ÍF.

Nú er hægt að nálgast myndasafn á myndasíðu ÍF frá afmælishátíðinni við Krika:
http://if.123.is/album/default.aspx?aid=146926

Um helgina fór fram 14. Sambandsþing Íþróttasambands fatlaðra. Þingað var á Radisson SAS hóteli Sögu í Reykjavík þar sem tveir nýjir stjórnarmenn voru kosnir til starfa í varastjórn. Á myndasíðu ÍF er komið inn myndasafn frá Sambandsþinginu sem nálgast má hér:

http://if.123.is/album/default.aspx?aid=146922

Á laugardag syntu þeir Jón Margeir Sverrisson og Ragnar Ingi Magnússon báðir í A-úrslitum í 400m. skriðsundi og stóðu þeir sig með prýði að sögn Ingigerðar M. Stefánsdóttur sem er þjálfari strákanna. Laugardagurinn var annar keppnisdagurinn hjá þeim félögum á opna breska meistaramótinu sem fram fer í Sheffield.

Á laugardag synti Ragnar Ingi í undanrásum á tímanum 5.32,76 mín. sem var ekki nógu gott en synti svo í úrslitum á tímanum 5.19,52 mín. og hafnaði fyrir vikið í 8. sæti.

Jón Margeir tvíbætti sinn besta árangur í þessu sundi, í undanrásum synti hann á tímanum 5.12,78 mín og svo í úrslitum á 5.09,80 mín. og varð í 6. sæti.

Gærdagurinn, sunnudagurinn, var síðasti keppnisdagurinn hjá þeim Jóni og Ragnari. Ragnar Ingi gerði ógilt í 100m. flugsundi en synti samt undir sínum besta tíma. Þá synti hann 50m. skriðsund á tímanum 30,06 sek. og í B-úrslitum synti hann á 29,81 sek. sem er við hans besta árangur.

Jón Margeir Sverrisson bætti sig í 100m. flugsundi í gær er hann synti á tímanum 1.15.12 mín. og varð tíundi inn í A-úrslitin. Jón var síðar skráður úr A-úrslitunum til að einbeita sér að 50m. skriðsundskeppninni þar sem hann kom í mark í undanrásum á tímanum 29,34 sek. Í A-úrslitunum í skriðsundinu bætti hann sig svo er hann kom í mark á tímanum 28,91 sek. og hafnaði í 8. sæti í sínum flokki.

Íslenski hópurinn getur vel unað við árangurinn í Sheffield en hópurinn er væntanlegur heim til Íslands síðar í dag.

Mynd: Jón Margeir Sverrisson í miðju flugsundstaki.

Rétt í þessu var tilkynnt um nýja stjórn Íþróttasambands fatlaðra á 14. Sambandsþingi ÍF sem fer fram á Radisson SAS hóteli Sögu. Fyrir þingið var vitað að þeir Kristján Svanbergsson gjaldkeri ÍF og Erlingur Þ. Jóhannsson myndu ekki gefa áframhaldandi kost á sér í stjórnarsetu. Er þeim þakkað kærlega fyrir mikil og ómetanleg störf í þágu sambandsins í gegnum tíðina.

Tillaga uppstillingarnefndar var svohljóðandi;
Sveinn Áki Lúðvíksson, áfram formaður ÍF,
Camillu Th. Hallgrímsson, áfram varaformaður ÍF
og meðstjórnendur;
Jóhann Arnarson, færist upp í aðalstjórn, var áður í varastjórn ÍF
Þórður Árni Hjaltested, áfram stjórnarmaður ÍF
Ólafur Þór Jónsson. áfram stjórnarmaður ÍF.
Í varastjórn lagði uppstillingarnefnd til eftirfarandi einstaklinga:
Svava Árnadóttir, áfram í varastjórn,
Gunnar Reynir Steingrímsson, nýr í varastjórn,
Jón Heiðar Jónsson, nýr í varastjórn.

Formaður uppstillingarnefndar sagði frá því að eitt framboð til viðbótar hefði borist. Það var framboð Arnórs Péturssonar í stöðu varaformanns.
Kosning fór fram um embætti varaformanns þar sem Camilla Th. Hallgrímsson hafði sigur úr býtum með 32 atkvæðum gegn 14.

Nýja stjórn ÍF kjörtímabilið 2009-2011 skipa:

Sveinn Áki Lúðvíksson, formaður
Camilla Th. Hallgrímsson, varaformaður.
Þórður Árni Hjaltested
Ólafur Þ. Jónsson
Jóhann Arnarson

Varastjórn
Svava Árnadóttir
Jón Heiðar Jónsson
Gunnar Einar Steingrímsson

Myndir: Á efri myndinni sést fjöldi þinggesta á Radisson SAS Hóteli Sögu í dag og á þeirri neðri eru nýkjörnir meðlimir í varastjórn ÍF, þeir Gunnar Einar Steingrímsson t.v. og Jón Heiðar Jónsson t.h.

Sundgarparnir Jón Margeir Sverrisson og Ragnar Ingi Magnússon eru nú staddir í Bretlandi á opna breska sundmótinu sem fram fer í Sheffield. Jón og Ragnar héldu ytra síðastliðinn fimmtudag ásamt þeim Ingigerði M. Stefánsdóttur og Helenu Ingimundardóttur sem eru þjálfarar í ferðinni.

Keppni hófst í gær þar sem Jón Margeir tvíbætti tímann sinn í 200m fjórsundi, fór í A-úrslit og lenti í 5.sæti á tímanum 2.45,74 mín. Ragnar synti svo 100m bak í B-úrslitum og bætti tímann sínn um rúma sekúndu, synti á 1.23,68 mín.

Drengirnir syntu svo báðir í B-úrslitum í 100m skriði, Ragnar bætti sig er hann synti á tímanum 1.07,13 og Jón var alveg við sinn besta tíma á 1.05,63.

Nánari fréttir af hópnum verða birtar um leið og þær berast.

Mynd: Félagarnir Ragnar og Jón Margeir í lauginni í Sheffield.

Í morgun hófst 14. Sambandsþing Íþróttasambands fatlaðra á Radisson SAS Hóteli Sögu í Reykjavík. Sveinn Áki Lúðvíksson formaður ÍF setti þingið og í kjölfarið tóku til máls Hafsteinn Pálsson ÍSÍ, Halldór Sævar Guðbergsson ÖBÍ, Ásta Friðjónsdóttir og síðar heiðraði ÍF þá einstaklinga sem unnið hafa til verðlauna á EM, HM, Ólympíumótum fatlaðra eða hafa verið útnefndir íþróttamenn ársins. Norrænir félagar frá Nord-HIF funduðu í gær á Radisson SAS hótelinu og við þingsetningu í dag komu þeir færandi hendi og gáfu ÍF góðar gjafir í tilefni af 30 ára afmælinu.

Áætluð þingslit í dag eru á milli 17 og 18 en nánar verður greint frá þinginu síðar í dag eða á morgun.

Hér að neðan má sjá þá íþróttamenn sem heiðraðir voru við þingsetninguna í morgun. Þeir íþróttamenn sem ekki áttu þess kost að mæta við athöfnina geta sótt heiðursverðlaun sín á skrifstofu ÍF alla virka daga á skrifstofutíma.

Nánar...

Sambandsþing Íþróttasambands fatlaðra fer fram um næstu helgi sem og 30 ára afmælisfögnuður sambandsins sem stofnað var þann 17. maí árið 1979. Af þessu tilefni verður blásið til afmælisveislu í Krika við Elliðavatn á sunnudaginn frá kl. 14:00-17:00.

Þeir sem þess óska geta fengið sent til sín í tölvupósti leiðarlýsingu um hvernig komast skuli í Krika sem er sumarhús Sjálfsbjargar við Elliðavatn.

Dagskrá sambandsþingsins og afmælishátíðarinnar

Föstudagur 15. maí-Radisson SAS Hótel Saga - Princeton salur 2. hæð, norðanverðu
20:00: Afhending þinggagna
20:20: Fyrirlestrar

Laugardagur 16. maí - Radisson SAS Hótel Saga - Harvard II, 2. hæð, norðanverðu
09.30 Þingsetning
10:00 Heiðranir íþróttamanna
10.15 Kaffihlé
10:30 Þingstörf hefjast
12.00 Hádegishlé
13.30 Þingstörf
15.30 Kaffihlé
16.00 Þingstörf
17:00-18:00 Þingslit og léttar veitingar - Yale salur, 2. hæð, norðanverðu.

Sunnudagur 17. maí - Kriki
14:00-17:00: Amælishátíð ÍF
Lalli Töframaður skemmtir veislugestum á milli kl. 15 og 15:30.

Íslandsleikar Special Olympics í knattspyrnu verða haldnir í Reykjavík, sunnudaginn 24. maí 2009. KR verður umsjónaraðili leikanna í samvinnu við ÍF og KSÍ.

Keppni hefst kl. 13.00 á íþróttasvæði KR. Yfirleitt tekur keppni 2 tíma en það fer eftir þátttöku.

Stefnt er að keppni fari fram utanhúss en ef veður verður slæmt er gert ráð fyrir möguleika á innanhússkeppni. Keppt verður eins og áður í tveimur flokkum, getumeiri og getuminni.

Skila þarf skráningum á if@isisport.is fyrir þriðjudaginn 19. maí.

Skráningarblað

Laugardaginn 9. maí næstkomandi fer Asparmótið í sundi fram í Laugardalslaug. Upphitun hefst kl. 13:00 en mótið hefst stundvíslega kl. 14:00.

Skráningum er hægt að skila á imaggy@visir.is fram til hádegis miðvikudaginn 6. maí.

Þá er búið að ákveða göngur í vor hjá ,,Ganga og gaman hópnum.“

Allar göngurnar eru á laugardögum kl. 13.00 frá Bjarkarási í Stjörnugróf. Gangan
er búin kl. 14.00.

9.  maí er næsta ganga en þá verður gengið svolítið lengra og ekki hafðar neinar veitingar á eftir þannig að hafið með ykkur vatn í brúsa.

Síðasta gangan verður 23. maí, þá verður sest niður eftir gönguna og rætt um hvernig við ætlum að halda áfram að hreyfa okkur í sumar og  hvort við byrjum ekki aftur með gönguhópinn í haust.

Við hvetjum alla til að koma með í þær göngur sem eftir eru. Bjóðið  líka foreldrum ykkar, vinum, starfsfólki og öðrum með í gönguna. Því  fleiri því skemmtilegra.

Íþróttasamband Fatlaðra fagnar því að á Andrésar Andar leikunum á Akureyri 2009 kepptu fötluð börn og unglingar á skíðum og skíðasleðum. Sérstakur flokkur, "stjörnuflokkur" var settur upp fyrir þennan hóp. Alls átta mættu til leiks og stóðu sig öll mjög vel. Þeir sem eru hreyfihamlaðir kepptu á sérstökum skíðasleðum sem sérhannaðir eru fyrir hreyfihamlað skíðafólk.  
 
Íþróttasamband Fatlaðra og Vetraríþróttamiðstöð Íslands á Akureyri hafa byggt upp samstarf frá árinu 2000 í þeim tilgangi að efla þátttöku fatlaðra í vetraríþróttum. Samstarfsaðilar hafa verið frá Challenge Aspen og Winter Park í Colorado.  Haldin hafa verið námskeið í Hlíðarfjalli þar sem fólk hefur komið saman víða af landinu. Síðast var haldið námskeið ÍF, VMÍ og Winter Park í febrúar 2009 og var þátttaka mjög góð.
 
Skíðafélag Akureyrar, Undirbúningsnefnd Andrésar Andar leikanna 2009, starfsfólk í Hlíðarfjalli og aðrir þeir sem aðstoðuðu við undirbúning og framkvæmd þessa verkefnis fá innilegar þakkir frá Íþróttasambandi Fatlaðra. Sérstakar þakkir fær Hermína Gunnþórsdóttir, móðir Breka Arnarssonar, skíðamanns en hún tók að sér hlutverk "sendiherra" foreldra fyrir ÍF og hefur reynst mikilvægur liðsmaður í kynningarstarfinu.

Nánar...

Sundmaðurinn Pálmi Guðlaugsson Fjörður/Fjölnir setti um helgina nýtt Íslandsmet í 200m. skriðsundi á tímanum 3:18,97 í flokki hreyfihamlaðra S6, hann átti sjálfur gamla metið sem var 3:21.62 mín. Glæsilegur árangur hjá Pálma sem hafnaði í 4. sæti með Fjölnismönnum í bikarkeppni SSÍ.

Árleg vorráðstefna Greiningar- og ráðgjafarstöðvar ríkisins verður haldin á Grand hóteli 14. og 15. maí n.k. Titillinn að þessu sinni verður: Fatlanir barna: Ný þekking - ný viðhorf.

Auk almennrar dagskrár verða kynningar á nýjum íslenskum rannsóknum og þróunarverkefnum á sviði fatlana barna, bæði í stuttum erindum í ráðstefnusal og á veggspjöldum í anddyri. Einnig munu nokkur fyrirtæki kynna vörur og þjónustu.

Lokahóf, uppskeruhátíð og Aðalfundur.
Verður í B sal Laugardalshöllini sunnudaginn 10. maí og hefst kl. 15.00 með Aðalfundi Aspar.
Venjuleg aðalfundarströf.
Önnur mál og lokahófi sem hefst kl 16.00 með kaffi eða gosi. 

Áhersla á útbreiðslu knattspyrnu á meðal þroskaheftra

Dagana 25. apríl til 3. maí verður knattspyrnuvika Special Olympics haldin, sem hefur það að markmiði að styðja við og auka knattspyrnuiðkun þroskaheftra, og er þetta í 9. sinn sem þessi knattspyrnuvika er haldin. 

Knattspyrnuvikan nýtur öflugs stuðnings UEFA og er jafnan einn af hápunktum hvers árs hjá Special Olympics. Áætlað er að um 50.000 leikmenn í 45 löndum taki þátt í knattspyrnuvikunni, og á meðal þeirra eru leikmenn hér á landi.

Stefnt er að þátttöku þroskaheftra einstaklinga í knattspyrnu í félagi við leikmenn sem ekki eru þroskaheftir (Unified Football). Þannig munu þroskaheftir leikmenn og leikmenn sem ekki eru þroskaheftir leika saman í liði.  Markmiðið er að breiða út almennan áhuga þroskaheftra á íþróttinni og að vinna gegn fordómum. 

Settur verður upp stuttur sýningarleikur í hálfleik í úrslitaleik Lengjubikars karla, sem fram fer í Kórnum föstudaginn 1. maí.  Þar verður leikið í blönduðum liðum, þ.e. þroskaheftir saman í liði með leikmönnum sem ekki eru þroskaheftir. Þess má geta að KR og ÍA hófu í vetur að bjóða upp á æfingar þar sem þessir hópar leikmanna leika saman og hefur það verkefni byrjað mjög vel.

Nánar á vefsíðu Special Olympics
http://www.specialolympics-eu.org/

Dagana 15.-25. október næstkomandi mun Íþróttasamband fatlaðra standa að Evrópumeistaramóti fatlaðra í sundi í innilauginni í Laugardal. Gert er ráð fyrir að 500-600 sundmenn taki þátt í mótinu og er skráning þegar hafin. Undirbúningur fyrir mótið er vel á veg kominn en þann 23. ágúst n.k. verður endanlegur keppendafjöldi staðfestur.

Á blaðamannafundi ÍF miðvikudaginn 22. apríl sagði Sveinn Áki Lúðvíksson formaður ÍF það ánægjulegt hve margir keppendur væru skráðir til leiks og sagði það sérstakt fagnaðarerindi að þroskaheftir sundmenn yrðu með á mótinu. Síðan á Ólympíumóti fatlaðra í Sydney árið 2000 hafa þroskaheftir íþróttamenn ekki fengið að taka þátt í mótum á vegum Alþjóðaólympíuhreyfingu fatlaðra (IPC). Sökum svindlmáls sem komst upp um í herbúðum Spánverja var þroskaheftum meinaður aðgangur að mótum IPC en nú í fyrsta sinn síðan árið 2000 verður breyting þar á. Evrópumeistaramótið á Íslandi verður fyrsta skrefið í því að innleiða að nýju þroskahefta íþróttamenn inn í mótahald IPC. Samnorræn samstaða hefur verið allar götur síðan 2000 um að hafa þroskahefta íþróttamenn áfram á mótum IPC en það hefur ekki tekist fyrr en nú og því hefur mikill áfangasigur verið unninn í þessum málefnum.

Nánar...

Frumsýning: Fimmtudaginn 23. apríl - klukkan 15:00
Leikritið Skógarheimar fjallar um mikilvægi þess að bursta tennur reglulega og hugsa vel um náttúruna. Persónur leikritsins koma úr hinum ýmsu áttum en allar eru þær þekktar meðal Íslendinga. Mikki, Lilli klifurmús, Hérastubbur bakari, Bakaradrengurinn, Karíus og Baktus, Soffía frænka, Jesper, Kasper og Jónatan koma öll úr smiðju Thorbjörns Egner. Lína Langsokkur kemur frá Astrid Lindgren og Rauðhetta úr ævintýrum Grims bræðra.

Leikritið er eftir Magnús J. Magnússon og skrifaði hann það fyrir Leikhópinn Lopa sem frumsýndi verkið árið 2006. Leikritið heitir upprunalega Skógarlíf en við fengum
aðeins að fikta í því eins og okkar er háttur og endurskýrðum það Skógarheimar, með
tilvísun í Sólheima. Við bættum einnig við nokkrum valinkunnum persónum eins og
Gísla, Eirík og Helga, Mjallhvíti, Dvergunum 7, o.fl. svo að allir gætu verið með,
söng og fjöri eins og tíðkast á Sólheimum.

Nánar...

Keppendur frá Íþróttasambandi fatlaðra tóku þátt í sundmóti Ármanns sem fram fór í Laugardalslaug 18. – 19. apríl sl. og var árangur þeirra glæsilegur en 7 Íslandsmet féllu á mótinu í flokkum fatlaðra. Eyþór Þrastarson í flokki S11,(blindir) setti sitt fyrstu Íslandsmet um helgina. Birkir Rúnar Gunnarsson átti metin og voru þau frá árunum 1995 og 1996.

Íslandsmet í 25m braut, sem voru sett um helgina:

Eyþór Þrastarson, Ægir / ÍFR        S11  200 frjáls aðferð   2:26,73  18/04/09
Pálmi Guðlaugsson, Fjölnir/Fjörður  S6   100 fjórsund        1:49,63  18/04/09
Eyþór Þrastarson, Ægir / ÍFR        S11  400 frjáls aðferð   5:08,59  19/04/09
Pálmi Guðlaugsson, Fjölnir/Fjörður  S6   100 flugsund        1:39,72  19/04/09
Pálmi Guðlaugsson, Fjölnir/Fjörður  S6   100 frjáls aðferð   1:24,59  19/04/09
Hjörtur Már Ingvarsson, ÍFR         S5   50 frjáls aðferð    0:54,99  19/04/09
Hjörtur Már Ingvarsson, ÍFR         S5   100 frjáls aðferð   1:56,18  19/04/09

Nánar

Þann 16. maí næstkomandi fer Sambandsþing Íþróttasambands fatlaðra fram að Radisson SAS Hóteli Sögu. Þegar hafa kjörbréf verið send til héraðssambanda og íþróttabandalaga og eru aðildarfélög ÍF beðin um að hafa samband við sín héraðssambönd og íþróttabandalög vegna þessa.

Gróf drög að dagskrá þingsins eru eftirfarandi:

Föstudagur 15. maí:
19:30: Afhending þinggagna
20:00-21:00: Kynningar og fyrirspurnir

Laugardagur 16. maí:
09:30-17:00: Sambandsþing ÍF-dagskrá skv. hefð
17:00-18:00: Þingslit

Við minnum á að skiladagur á málefnum inn á þing er í dag, fimmtudaginn 16. apríl! Gögn skilist á if@isisport.is

Sunnudaginn 17. maí er svo 30 ára afmælisdagur ÍF þar sem boðið verður til afmælisfagnaðar í Krika við Elliðavatn.

Nánari upplýsingar er hægt að nálgast á skrifstofu ÍF í síma 514 4080 eða á if@isisport.is

Þann 21. júní næstkomandi kl. 14:00 verður haldið alþjóðlegt hjólastólarallý á Thorsplani í Hafnarfirði.
 
Keppt verður í 3 flokkum

•Stjörnuflokkur, þekktir einstaklingar munu reyna sig í sprettrallý á handstólum.
•Handknúnir stólar. Þrjár sérleiðir verða tímamældar.
•Rafknúnir stólar. Þrjár sérleiðir verða tímamældar.

Glæsilegir vinningar í boði fyrir alla flokka.

Rallýið er hluti af dagskrá Alþjóðlegs dags MND félaga. Skráning fer fram hjá Gauja í S. 823 7270 og gudjon@mnd.is 

Lokaskráning fyrir 1. júní 2009

Nánar...

Íþróttasamband fatlaðra hefur lagt mikla áherslu á mikilvægi þess að aðstandendur fatlaðra barna fái upplýsingar um tæki, búnað og annað sem getur auðveldað aðgengi að íþróttastarfi. Þjálfun í vatni er ekki síst mikilvæg fjölfötluðum börnum og sjúkraþjálfun byggir oft að hluta á slíkri þjálfun. 

Á myndunum má sjá vesti sem, foreldrar fjölfatlaðs drengs á Húsavík keyptu fyrir son sinn. Sundferðir eru reglulegur þáttur í daglegu lífi fjölskyldunnar en mikil vinna fylgir því að fara með fjölfatlað barn í sund eins og þeir vita sem til þekkja. Með tilkomu þessa vestis þarf lágmarksaðstoð í vatninu og fjölskyldan öll getur slakað á saman. 

Vestið er nokkuð dýrt, kostaði á síðasta ári um 60.000 kr.- Foreldrarnir á Húsavík (Erla Sigurðardóttir og Óskar Óli Jónsson ) telja það vera þess virði og bentu á að það kostaði líka sitt að kaupa reiðhjól og skíðabúnað fyrir ófötluð börn.

Vestið var sérpantað af Á.Óskarssyni. 

Þeir sem hafa áhuga á að fá nánari upplýsingar um vestið geta haft samband við Erlu Sigurðardóttur í síma 8672669.

Stefna stjórnmálaflokkanna í velferðarmálum, áherslur og forgangsröðun á Grand hótel, Reykjavík, Sigtúni 38, miðvikudaginn 15. apríl kl. 20.00-22.00.

Sjötti og síðasti fundurinn í fundaröðinni "Verjum velferðina" sem haldinn er af Öryrkjabandalagi Íslands og Landssamtökunum Þroskahjálp í aðdraganda Alþingiskosninga 2009.

Forsvarsmenn þeirra stjórnmálaflokka sem bjóða fram á landsvísu í Alþingiskosningunum þann 25. apríl svara spurningunni: Hvernig ætlar þinn flokkur að verja velferðina?

Frummælendur á fundinum verða:
*Jóhanna Sigurðardóttir, forsætisráðherra og formaður Samfylkingarinnar.
*Ögmundur Jónasson, heilbrigðisráðherra og þingmaður Vinstri grænna.
*Bjarni Benediktsson, alþingismaður og formaður Sjálfstæðisflokksins.
*Guðjón Arnar Kristinsson, alþingismaður og formaður Frjálslyndaflokksins.
*Sigmundur Davíð Gunnlaugsson, formaður Framsóknarflokksins.

Pallborðsumræður að loknum framsögum.
Þátttakendur í pallborði verða frummælendur ásamt forsvarsmönnum ÖBÍ og Landssamtakanna Þroskahjálpar

Fundurinn er öllum opinn!
Táknmálstúlkar verða á staðnum og tónmöskvakerfi.

Mynd: Jóhanna Sigurðardóttir, forsætisráðherra og formaður Samfylkingarinnar verður á mælendaskrá annað kvöld.

Íslandsleikar Special Olympics í knattspyrnu verða haldnir í Reykjavík, sunnudaginn 24. maí 2009. KR verður umsjónaraðili leikanna í samvinnu við ÍF og KSÍ og fer keppni fram á íþróttasvæði KR. Stefnt er að keppni fari fram utanhúss en ef veður verður slæmt er gert ráð fyrir möguleika á innanhússkeppni.

Nánari tímasetning og skráningarblöð send út síðar. 
Vinsamlega staðfestið ef sérstakar óskir eru varðandi tímasetningu keppni m.t.t. flugáætlunar/ferðatilhögunar.

Nánari upplýsingar gefur Guðlaugur K. Gunnarsson, KSÍ
Móta og landsliðsmál KSÍ.
Sími: 510 2902
GSM: 661 8183
Fax: 568 9793

Í ár mun Norræna barna- og unglingamótið fara fram í Eskilstuna í Svíþjóð dagana 26. júní til 3. júlí. Að þessu sinni fer Íþróttasamband fatlaðra með 14 keppendur á mótið sem jafnan er ætlað til þess að íþróttafólk úr röðum fatlaðra keppi í sínum fyrstu keppnum á erlendum vettvangi.

Keppnisíþróttir mótsins eru sund, frjálsar íþróttir og borðtennis. ÍF sendir 12 keppendur í sundi á mótið og 2 í frjálsum íþróttum en að þessu sinni keppir enginn í borðtennis.

Hópurinn sem fer út er eftirfarandi:

Ingeborg Eide Garðarsdóttir, FH
Sunna Ósk Stefánsdóttir, Ösp
Laufey María Vilhelmsdóttir, Þjótur
Almar Þór Þorsteinsson, Suðri
Kristín Jónsdóttir, Óðinn
Ívar Egilsson, NES
Sigurjón Sigtryggsson, Snerpa
Elsa Sigvaldadóttir, Fjörður
Hjörtur Már Ingvarsson, ÍFR
Breki Arnarson, Óðinn
Bjarndís Sara Breiðfjörð, ÍFR
Brynjar Sigþórsson, Fjörður
Marinó Ingi Adolfsson, ÍFR
Sandra Valgeirsdóttir, Fjörður

Nánari upplýsingar um mótið er hægt að nálgast á skrifstofu ÍF í síma 514 4080.

Dagana 1.-2. maí næstkomandi fer 27. Hængsmótið fram á Akureyri. Mótið fer fram í Íþróttahöllinni fyrir Norðan þar sem keppt verður í boccia, einstaklings- og sveitakeppni, borðtennis sem og lyftingum ef næg þátttaka næst.

Stefnt er að því að mótið verði sett kl.13.00 og keppni ljúki seinnipart á laugardeginum. Um kvöldið, væntanlega um kl. 19.00 verður síðan mjög veglegt lokahóf að vanda með veislumat, lifandi tónlist og ýmsum glæsilegum uppákomum. Miðaverð er áætlað um 4.500,- kr. á mann.

jha@raftakn.is  

Eins og áður hefur komið fram á heimasíðu ÍF hafa Átak, Fjölmennt, Ás styrktarfélag, Íþróttasamband fatlaðra, Hitt húsið, Öspin og Þroskahjálp stofnað gönguhóp sem ber heitið; "Ganga og gaman". Skemmtileg samverustund þar sem útivist og hreyfing er höfð að leiðarljósi er aðalmarkmið þessa samstarfsverkefnis.  

Næsta ganga verður laugardaginn 18. apríl, frá Bjarkarási. Reiknað er með að stafgöngustafir verði í boði fyrir þá sem vilja. Í maí verða göngur frá Bjarkarási laugardagana 9. og 23. maí

Allir þeir sem áhuga hafa eru velkomnir að að mæta og taka með sér fjölskyldu, vini og kunningja.

Andrésar Andarleikarnir í Hlíðarfjalli verða haldnir dagana 22.-25. apríl 2009. Eins og áður hefur verið kynnt á skíðanámskeiðinu í Hlíðarfjalli sem fram fór fyrr í vetur verður settur upp flokkur fyrir fatlaða á þessum leikum, "Stjörnuflokkur" 

Þeir sem óska eftir því að fá lánaða sleða þurfa að leita eftir því en sleðar eru til staðar í Hlíðarfjalli, Bláfjöllum og einnig á Austurlandi og Vestfjörðum. 

Nánari upplýsingar um leikana má sjá á www.skidi.is

Þeir sem áhuga hafa á að kynna sér málið eru hvattir til þess að hafa samband  við Alla í síma 8408191 / netfang; fjah@simnet.is

Viðbygging við íþróttahús Íþróttafélags fatlaðra í Reykjavík að Hátúni 14 í Reykjavík var formlega tekin í notkun laugardaginn 28. mars.

Boðað var til móttöku þar sem flutt voru ávörp og ný aðstaða kynnt. Júlíus Arnarson, formaður ÍFR bauð gesti velkomna og kynnti dagskrá.

Arnór Pétursson formaður bygginganefndar ÍFR rakti sögu hússins og sjá má ræðu hans
á heimasíðu ÍFR www.ifr.is

Forseti Íslands, Ólafur Ragnar Grímsson, Menntamálaráðherra, Katrín Jakobsdóttir og Borgarstjóri Reykjavíkur, Hanna Birna Kristjánsdóttir ávörpuðu gesti. Júlíus Arnarson, formaður ÍF og Ólafur Ragnar Grímsson, forseti Íslands afhentu Sigurði Magnússyni, heiðurfélaga ÍF og frumkvöðli að íþróttastarfi fatlaðra á Íslandi sérstakan heiðursskjöld í tilefni þess að hann var valinn heiðursfélagi ÍFR. Hann er fyrsti heiðursfélagi ÍFR. Formaður ÍFR staðfesti að ÍFR hefði hlotið styrk frá ÖBÍ í tilefni dagsins og gjafabréf frá ÍF þar sem fram kom að ÍF mun styrkja kaup á lyftingabekk sem hentar fyrir hreyfihamlaða. Í lok dagskrár var fólki boðið að fá veitingar og að skoða nýju aðstöðuna þar sem margir prófuðu glæsileg lyftinga- og þjálfunartæki sem aðgengileg eru fyrir fólk í hjólastólum

Íþróttasamband Fatlaðra óskar ÍFR innilega til hamingju með þennan mikilvæga áfanga.

Myndasafn frá opnun viðbyggingarinnar: http://if.123.is/album/default.aspx?aid=141068

Mynd: Sundkonan Sonja Sigurðardóttir tekur á því í nýja lyftingasalnum hjá ÍFR.

Dagana 2. - 7. apríl verður á Íslandi danskur kennari sem hefur mikla reynslu af því að kenna fötluðu fólki köfun Námskeið verður haldið fyrir fatlað fólk sem áhuga hefur á því að læra köfun og er námskeiðið að kostnaðarlausu. Kjartan Þór Birgisson sími 8485873 gefur allar nánari upplýsingar um námskeiðið.  

Íslandsmót ÍF í borðtennis fór fram í TBR húsinu í Reykjavík laugardaginn 28. mars síðastliðinn. Þátttaka í mótinu var með besta móti og sáust glæst tilþrif sem nú er hægt að sjá í myndasafni á myndasíðu ÍF á www.123.is/if eða á http://if.123.is/album/default.aspx?aid=141295

Helgina 21.-22. mars fóru fram Íslandsmót ÍF í fimm greinum. Í sundinu sem fram fór í Ásvallalaug í Hafnarfirði voru sett hvorki fleiri né færri en fimm Íslandsmet og eru þau eftirfarandi:

Hjörtur Már Ingvarsson, S5-100 frjáls aðferð-1:58,57-ÍFR
Pálmi Guðlaugsson, S6 50 flug-0:44,13-Fjölnir / Fjörður
Hjörtur Már Ingvarsson S5 50 frjáls aðferð-0:54,23-ÍFR
Pálmi Guðlaugsson S6 50 frjáls aðferð-0:37,85-Fjölnir / Fjörður
Bjarndís Breiðfjörð S8 50 bak-1:02,67-ÍFR
Karen Axelsdóttir S2 50 bak-2:14,61-Ösp
Pálmi Guðlaugsson S6 50 bak-0:50,76-Fjölnir / Fjörður
Hrafnkell Björnsson S5 50 bak-1:02,19-ÍFR
Anna Kristín Jensdóttir SB5 100 bringa-2:29,86-ÍFR

ÍFR-kvk max34 4*50 skrið-4:34,26-(Boðsund, sveit íFR kvenna)
Sonja Sigurðard. / Bjarndís Breiðfjörð / Karen Jóhannesd. / Thelma Björnsd.

ÍFR-kk max 34 4*50 skrið-3:22,39- (Boðsund, sveit ÍFR karla)
Guðmundur Hermanss. / Vignir Haukss. / Hjörtur M. Ingvarss. / Hrafnkell Björnss.

Einnig var veittur bikar til þess félags sem átti besta kvattningarliðið og vann Íþróttafélagið Fjörður hvatningarbikarinn.

Mynd: Liðsmenn úr Firði með klappbikarinn 2009.

Í tengslum við Íslandsmót ÍF sem haldin voru um þarsíðustu helgi endurnýjuðu Rúmfatalagerinn og Íþróttasamband fatlaðra með sér samstarfssamning sem kveður á um 12 milljón króna styrk Rúmfatalagersins sem verður varið til uppbyggingar og þjálfunar fatlaðs afreksfólks í íþróttum. Samningurinn er til fjögurra ára og nær fram yfir Ólympíumót fatlaðra sem haldið verður í London árið 2012 en síðustu ár hefur Rúmfatalagerinn verið einn stærsti og helsti samstarfs- og styrktaraðili ÍF.

Við mótssetningu Íslandsmótanna um þarsíðustu helgi undirrituðu Sveinn Áki Lúðvíksson formaður ÍF og Magnús Sigurðsson framkvæmdastjóri Rúmfatalagersins samninginn og var Frú Hanna Birna Kristjánsdóttir borgarstjóri Reykjavíkurborgar vottur að undirrituninni.

Magnús Sigurðsson, framkvæmdastjóri Rúmfatalagersins sagði við þetta tækifæri að allir sem fylgdust með íþróttum fatlaðra gerðu sér grein fyrir að samkeppnin þar yrði sífellt meiri og keppni þeirra á milli engu minni en á stórmótum ófatlaðra íþróttamanna. Vonandi gerði þess styrktar- og samstarfssamningur fötluðum íþróttamönnum kleift á að vera áfram meðal þeirra bestu. Þannig gæti Íþróttasamband fatlaðra einbeitt sér að þjálfun og uppbyggingu afreksfólks, án þess að þurfa að hafa verulegar áhyggjur að fjármálum og fjáröflun.

Sveinn Áki Lúðvíksson, formaður ÍF sagði eftir undirritunina að fyrir tilstuðlan þessa samnings við Rúmfatalagerinn teldi Íþróttasamband fatlaðra sig geta að veitt afreksfólki sínu þann stuðning sem það þarf á að halda til þess að geta byggt sig upp fyrir stórátök á íþróttasviðnu fram yfir Ólympíumótið í London 2012. Þá gat Sveinn Áki þess jafnframt að Rúmfatalagerinn hafi um áratugaskeið verið aðalstyrktaraðili sambandsins og að gott væri til þess að vita að þetta öfluga fyrirtæki geti sent út jákvæð skilaboð í þjóðfélagið í því efnahagsástandi sem nú ríkir.

Íslandsmót ÍF í borðtennis fór fram síðastliðinn laugardag þar sem félagarnir Jón Þorgeir Guðbjörnsson og Tómas Björnsson úr ÍFR stöðvuðu áralanga sigurgöngu Jóhanns Rúnar Kristjánssonar og Viðars Árnasonar í tvíliðaleik. Jóhann Rúnar var þó ekki af baki dottinn eftir tvíliðaleikinn og varð Íslandsmeistari í sitjandi flokki og í opnum flokki.

Nánar...

Laugardaginn 28. mars næstkomandi fer fram Íslandsmót ÍF í borðtennis og verður keppt í TBR húsinu. Að þessu sinni eru þrjú aðildarfélög ÍF með skráða keppendur í mótið en það eru ÍFR, Akur og Nes.

Keppni hefst á laugardeginum kl. 10:30 og lýkur um kl. 14:00. Þetta er í fyrsta sinn sem ÍF stendur að Íslandsmóti í TBR húsinu sem jafnan er þekkt sem höfuðvígi borðtennisíþróttarinnar á Íslandi. 

Olíuverslun Íslands hf – Olis hefur skrifaði undir styrktarsamning við Íþróttasamband fatlaðra um beinan fjárstuðning vegna Norræns barna- og unglingamóts fatlaðra sem fram fer í Eskilstuna í Svíþjóð í júlíbyrjun n.k. Olís hefur um margra ára skeið stutt starfssemi sambandsins og var nú endurnýjaður formlegur samningur um fjárhagslegan stuðning vegna undirbúnings og þátttöku íslensku keppendanna á mótinu.

Auk þessa býðst aðildarfélögum Íþróttasambands fatlaðra aðgangur að ýmsum þeim tilboðum og fríðindum Olís sem hefur upp á að bjóða s.s. Olískortum, fríðindakorti sem hægt er að sækja um á www.olis.is
 
Norræna barna og unglingamótið er haldið annað hvert ár, til skiptis á hverju Norðurlandanna. Megintilgangur mótsins er að skapa þessum hópi aðstæður til að hittast við æfingar og keppni en ekki síður að taka þátt í fjölbreyttri dagskrá.   Þetta mót á sér langa sögu og margir hafa þar stigið sín fyrst skref í íþróttakeppni.  Þar má nefna sundfólkið, Kristínu Rós Hákonardóttur, Eyþór Þrastarson, Sonju Sigurðardóttur og frjálsíþróttamanninn Jón Odd Halldórsson,  allt einstaklingar sem verið hafa í fremstu röð fatlaðra íþróttamanna í heiminum.

Íþróttasamband Fatlaðra hefur lagt metnað sin í að eignast íþróttamenn í fremstu röð sem séu landi og þjóð til sóma og vill Olís með samningi þessum renna styrkari stoðum undir starfssemi Íþróttasambands Fatlaðra.

Myndatexti: Camilla Th Hallgrímsson, varaformaður Íþróttasambands fatlaðra og Sigurður K. Pálsson, markaðsstjóri Olís við undirritun samningsins.

Nánari upplýsingar veitir:
Ólafur Magnússon, framkvæmdastjóri Íþróttasambands fatlaðra
GSM 89602115   olafurm@isisport.is

Íslandsmót ÍF í fimm greinum fóru fram um síðustu helgi. Í Laugardal var mikið um að vera en keppni í boccia fór fram í Laugardalshöll og var hún æsispennandi alla helgina. Að þessu sinni var það sveit ÍFR sem hafði sigur í 1. deild en sveitina skipuðu Haukur Gunnarsson, Hjalti Bergmann Eiðsson og Ragnhildur Ólafsdóttir.

Sveit B frá Suðra sigarði í 2. deild og ÍFR (sveit F) hafði sigur í 3. deild. Í rennuflokki var það blönduð sveit Ívars sem sigraði og í flokki BC 1 – 4 var það blönduð sveit Þjótar sem bar sigur úr býtum.

Sigurvegarar síðustu ára í sveitakeppni í boccia í 1. deild:

2009: ÍFR
2008: Viljinn (A sveit)
2007: Akur (A sveit)
2006: Akur (A sveit)
2005: Nes (sveit 4)
2004: Þjótur (A sveit)

Hægt er að sjá myndasafn frá keppninni í boccia inni á myndasíðu ÍF www.123.is/if eða með því að smella á tengilinn hér að neðan: http://if.123.is/album/default.aspx?aid=140567

Helgina 20.-22. mars síðastliðinn fóru fram Íslandsmót ÍF í fimm greinum, sundi, boccia, bogfimi, lyftingum og frjálsum íþróttum. Keppt var í frjálsum íþróttum á föstudag en hinar greinarnar fóru fram á laugardag og sunnudag. Keppni í sundi fór fram í Ásvallalaug í Hafnarfirði.

Við mótssetningu Íslandsmóta ÍF um síðustu helgi undirrituðu Íþróttasamband fatlaðra og Rúmfatalagerinn áframhaldandi samstarfs- og styrktarsamning. Sveinn Áki Lúðvíksson formaður ÍF og Magnús Sigurðsson framkvæmdastjóri Rúmfatalagersins undirrituðu samninginn og var Frú Hanna Birna Kristjánsdóttir borgarstjóri Reykjavíkurborgar vottur að undirrituninni. Samningurinn gildir til næstu fjögurra ára og sagði Ólafur Magnússon framkvæmdastjóri fjármála- og afrekssviðs ÍF við mótssetninguna að Rúmfatalagerinn hafi um áratugaskeið verið aðalstyrktaraðili sambandsins og að gott væri til þess að vita að þetta öfluga fyrirtæki geti sent út jákvæð skilaboð í þjóðfélagið í því efnahagsástandi sem nú ríkir.

Úrslit mótanna:
Boccia - sveitakeppni
Bogfimi
Frjálsar íþróttir
Lyftingar
Sund

Nánar

Íslandsmót ÍF í fimm íþróttagreinum fór fram um síðastliðna helgi. Keppt var í frjálsum íþróttum, sundi, boccia, bogfimi og lyftingum og á sunnudagskvöld var efnt til veglegs lokahófs í Gullhömrum í Grafarholti.

Að vanda var vel mætt á lokahófið þar sem dýrindis matur var borinn á borð og að borðhaldi loknu léku Sigga Beinteins og Grétar Örvars fyrir dansi fram á miðnætti þar sem allir tóku hressilega á því á dansgólfinu.

Myndasafn frá lokahófinu má sjá inni á myndasíðu ÍF eða með því að smella á tengilinn: http://if.123.is/album/default.aspx?aid=140383

Nú eru komnar svipmyndir frá lyftingakeppninni á Íslandsmóti ÍF sem fram fór um helgina í Laugardal og í Ásvallalaug í Hafnarfirði.

Hægt er að sjá svipmyndir frá lyftingamótinu inni á myndasíðu ÍF eða með því að smella á tengilinn: http://if.123.is/album/default.aspx?aid=140239

Þá er komið að síðasta keppnisdeginum á Íslandsmóti Íþróttasambands fatlaðra. Keppni í frjálsum íþróttum lauk á föstudag þar sem sáust mögnuð tilþrif og þá lauk keppni í lyftingum í gær, laugardag, þar sem Þorsteinn Magnús Sölvason Ólympíumótsfari fór á kostum og setti glæsilegt Íslandsmet.

Sundkeppnin fer fram í Ásvallalaug og hófst síðari keppnisdagurinn kl. 10:00 í morgun og í þessum rituðu orðum er síðari keppnisdagurinn í boccia að hefjast í Laugardalshöll. Keppni í bogfimi lýkur svo kl. 15:00 í frjálsíþróttahöllinni í Laugardal.

Tilþrif gærdagsins eins og áður greinir átti Þorsteinn Magnús Sölvason í lyftingakeppninni þegar hann pumpaði upp 150 kg. í bekkpressu og setti fyrir vikið nýtt Íslandsmet. Þá var þetta þyngsta bekkpressulyfta sem íslenskur keppandi með fötlun hefur lyft! Glæstur árangur hjá Þorsteini sem stefnir ótrauður að því að vinna sér sæti á Ólympíumóti fatlaðara í London árið 2012.

Þess má svo geta að lokahóf Íslandsmóts ÍF fer fram í Gullhömrum í Grafarholti í kvöld og verður húsið opnað kl. 18:00 þar sem Sigga Beinteins og Grétar Örvars munu leika fyrir dansi fram á miðnætti.

Meira síðar...

Hinar árlegu Sumarbúðir ÍF fara fram að Laugarvatni í sumar og sem fyrr verður boðið upp á tvö vikulöng námskeið. Fyrri vikan er 19.-26. júní og sú síðari 26. júní - 3. júlí.

Nánari upplýsingar um Sumarbúðirnar má finna hér. Skráningareyðublað fyrir Sumarbúðirnar má finna hér.

Íslandsmót Íþróttasambands fatlaðra fer fram um helgina og á sunnudeginum 22. mars fer fram lokahóf mótsins í Gullhömrum í Grafarholti. Húsið opnar kl. 18:00 en borðhald hefst kl. 19:00. Miðaverð kr. 5500,-

Að lokinni venjulegri dagskrá á lokahófinu munu Sigga Beinteins og Grétar Örvars leika fyrir dansi fram á miðnætti.

Átak, Fjölmennt, Ás styrktarfélag, Íþróttasamband fatlaðra, Hitt húsið, Öspin og Þroskahjálp hafa tekið saman höndum og stofnað gönguhóp. Markmiðið er að hittast einu sinni í mánuði og oftar með hækkandi sól, ganga í 20-30 mín. og fá sér smá hollustu á eftir.

Fyrsta gangan var 17. janúar og var vel mætt. Önnur ganga var laugardaginn 14. febrúar.  Fyrstu tvær göngurnar hófust við skrifstofu Þroskahjálpar Háaleitisbraut en þriðja gangan þann 14. mars hófst við Bjarkarás. Þrátt fyrir leiðindaveður mætti góður hópur sem fékk leiðsögn í stafgöngu undir stjórn Jónu Hildar Bjarnadóttur. Allir fengu lánaða göngustafi og kennsla fór fram við Bjarkarás þar sem farið vary fir helstu atriði. Í kjölfarið var farið í gönguferð og hópurinn skemmti sér mjög vel við að læra stafgöngu sem er orðin mjög vinsæl á Íslandi.

Í lok göngu voru gerðar teygjuæfingar og síðan var farið í  Bjarkarás þar sem boðið var upp á ávexti. Einnig var þar kynnt forrit ÍSÍ sem gerir öllum kleift að skrá sig í Lífshlaupið. Stofnaður var hópurinn ,,Ganga og gaman“ og stefnt er að því að skrá þátttakendur í Lífshlaupið.

Næsta ganga verður um miðjan apríl, kynnt nánar síðar.

Íslandsmót ÍF fara fram helgina 20.-22. mars næstkomandi í Laugardalshöll og í Ásvallalaug í Hafnarfirði. Hér meðfylgjandi er tímaseðill Íslandsmótsins.

boccia - bogfimi - frjálsar íþróttir - lyftingar - sund

Föstudagur 20 mars:
18:00
mæting í frjálsar íþróttir
Salur B (Frjálsíþróttahöll)

Nánar...

Borðtenniskappinn Jóhann Rúnar Kristjánsson, NES, fór mikinn um helgina þegar hann sigraði í 1. flokki karla á Íslandsmóti ófatlaðra. Þetta mun vera í fyrsta sinn sem slíkt gerist og var Jóhann að vonum himinlifandi með árangur sinn um helgina.

„Maður hefur verið að berjast við þetta í nokkur ár, ein tíu, og aldrei náð svona langt í þessu hér heima hjá ófötluðum. Mér gekk vel í úrslitaleiknum við Hlöðver Hlöðversson úr KR. Ég hafði nokkra yfirburði og vann 3:1,“ sagði Jóhann í samtali við Morgunblaðið en nánar má lesa um afrek Jóhanns um helgina í blaði Moggans í dag.

Jóhann lék einnig gríðarvel í undanúrslitum mótsins um helgina þar sem hann vann Jóhannes Tómasson úr KR 3-2 eftir að hafa sigrað oddalotuna 11-9.

Mótið var síðasta keppni Jóhanns áður en hann heldur til Ungverjalands dagana 19.-23. mars næstkomandi þar sem hann tekur þátt í opna ungverska borðtennismótinu sem er 20 punkta mót. Þaðan liggur leiðin næst til Slóvakíu þann 21. apríl en það mót verður 40 punkta mót. Allt er þetta liður í undirbúningi Jóhanns sem ætlar sér að komast á Ólympíumót fatlaðra í London árið 2012.

Þá er það einnig á dagskrá hjá Jóhanni að komast á heimsmeistaramótið í Kóreu á næsta ári.

Átak, Fjölmennt, Ás styrktarfélag, Íþróttasamband fatlaðra, Hitt húsið, Öspin og Þroskahjálp hafa tekið saman höndum og stofnað gönguhóp. Markmiðið er að hittast einu sinni í mánuði og oftar með hækkandi sól, ganga í 20-30 mín. og fá sér smá hollustu á eftir. Fyrsta gangan var 17. janúar og var vel mætt. Önnur ganga var laugardaginn 14. febrúar. 

Þriðja gangan verður  laugardaginn 14. mars og verður gengið frá Bjarkarási. Mæting er við Bjarkarás kl. 13.00, ganga hefst kl. 13.30.  Jóna Hildur Bjarnadóttir, verður með stafgöngukennslu fyrir þátttakendur.

Þátttaka hefur verið mjög góð og allir hafa skemmt sér vel.   

Allir velkomnir

Rannsóknastofa í Íþrótta- og heilsufræðum við Háskóla Íslands (RÍH) og Íþróttasamband fatlaðra (ÍF) hafa gert með sér samkomulag um rannsóknir og þróunarstarf með fötluðu íþróttafólki. Samkomulagið felur í sér rannsóknir sem beinast að hreyfigetu og heilsufari einstaklinga með fötlun. Verkefnisstjóri yfir verkefninu verður Ingi Þór Einarsson aðjunkt á Menntavísindasviði Háskóla Íslands.

Samstarfsamningurinn er til þess ætlaður að meistaranemar við Háskóla Íslands geti unnið meistaraverkefni sín á sviði íþrótta, hreyfigetu og heilsu fatlaðra. Gagnaöflun og gagnavinnsla verkefnisins mun fara fram á RÍH en ÍF styrkir verkefni fjárhagslega og aðstoðar rannsakendur við að komast í samband íþróttafólk með fötlun.

Íþróttasamband fatlaðra gerir væntingar um að rannsóknir á þessu sviði stuðli að framförum á afrekssviði hjá íþróttafólki með fötlun.

,,Við hjá ÍF teljum verkefnið mikið framfaraspor og erum þess fullviss að þetta muni skila sér í fleiri afreksmönnum í íþróttum fatlaðra," sagði Sveinn Áki Lúðvíksson formaður Íþróttasambands fatlaðra við undirritun samningsins.

Mynd: Samstarfssamninginn undirrituðu frá vinstri, Ingi Þór Einarsson aðjunkt, Sveinn Áki Lúðvíksson formaður ÍF og Sigurbjörn Árni Arngrímsson dósent í íþróttafræðum við íþróttafræðasetur Háskóla Íslands.

Sundnefnd ÍF stendur að æfingabúðum í sundi um helgina hjá landsliðshópi ÍF og fara æfingarnar fram föstudag, laugardag og sunnudag. Fyrsta æfingin er í dag frá kl. 16-18.

Fyrstu æfingabúðirnar á þessu ári fóru fram helgina 30. janúar – 1. febrúar og gáfu þær góða raun þar sem 23 sundmenn frá fimm aðildarfélögum ÍF voru boðuð á æfingarnar. Tveir athyglisverðir fyrirlestrar verða haldnir í æfingabúðunum um helgina og fara þeir fram á laugardeginum í fundarsal ÍSÍ í Íþróttamiðstöðinni í Laugardal (sama hús og skrifstofur ÍF eru staðsettar).

Á laugardeginum frá kl. 13:15-14:14 mun hópeflismaðurinn Brian Marshall vera með fyrirlestur um liðsanda (team spirit) og kl. 14:15-15:15 mun næringarfræðingurinn Klemenz Sæmundsson halda fyrirlestur um næringu íþróttamanna. Íþróttafólk úr röðum aðildarfélaga ÍF er boðið velkomið á fyrirlesturinn.

Nánari upplýsingar um æfingabúðir ÍF í sundi veita Kristín Guðmundsdóttir krigu@simnet.is og Ingigerður Stefánsdóttir imaggy@visir.is

Erna Friðriksdóttir sendi heimasíðu ÍF mynd frá Winter Park í Colorado þar sem hún er nú við æfingar og keppni með landsliði USA. Fyrirtækið 66° Norður styrkir ÍF um ákveðna upphæð á ári og á myndinni er Erna í fatnaði frá 66° Norður sem hún fékk frá ÍF áður en hún hélt utan í janúar. Hún verður við æfingar og keppni í 3 mánuði. Erna hefur fengið staðfest keppnisleyfi til þátttöku á mótum IPC sem gefur stig til keppni á Paralympics (Ólympíumótum fatlaðra).

Ásta Ragnheiður Jóhannesdóttir, félags og tryggingamálaráðherra, bauð Katrínu Guðrúnu Tryggvadóttur ásamt fjölskyldu og þjálfara í bolludagskaffi í félags- og tryggingamálaráðuneytinu á mánudag, til að fagna frábærum árangri Katrínar í keppni í listhlaupi á skautum á alþjóðavetrarleikunum Special Olympics í Boise Idaho í Bandaríkjunum nýverið.

Eins og kunnugt er var árangur Katrínar á leikunum glæsilegur en hún lenti í 5. sæti í sínum flokki. Þá er þrautsegja Katrínar við æfingar ekki síður eftirtektarverð en hún hefur æft listhlaup á skautum undir leiðsögn Helgu Olsen í fjögur ár hjá skautafélaginu Birninum.

Ráðherra afhenti Katrínu Guðrúnu ljósmyndabók, óskaði henni hjartanlega til hamingju með þennan góða árangur og sagði að „Katrín hefði verið landi og þjóð til sóma og staðið vel undir því álagi sem óneitanlega fylgdi því að vera eini íslenski keppandinn á svona stórum íþróttaviðburði. Frammistaða Katrínar sýni hversu mikilvægt það sé að styðja við það frábæra starf sem unnið er hjá Íþróttasambandi fatlaðra.“

Á leikunum Special Olympics er skipt í hópa þannig að þátttakendur keppa við jafningja sína. Aðalmarkmiðið er að allir eigi jafna möguleika hvar sem þeir standa og þannig er byggð upp virðing fyrir öllum þátttakendum, hvar í flokki sem þeir standa.

Mynd: Vel fór á með Katrínu og Ástu Ragnheiði félags- og tryggingamálaráðherra.

Skautakonan Katrín Tryggvadóttir vakti töluverða athygli á nýafstöðnum Vetrarleikum Special Olympics sem fram fóru í Idaho í Bandaríkjunum. Katrín hafnaði í 5. sæti í sínum flokki í listdansi á skautum og verandi eini keppandinn frá Íslandi höfðu fjölmiðlar Vestanhafs mikinn áhuga á því að ræða við Katrínu og íslenska hópinn.

Hér að neðan fylgir tengill á frétt þar sem rætt er við Katrínu er hún undirbýr sig fyrir dansinn á ísnum og þá er einnig rætt við Helgu Olsen þjálfara Katrínar sem og Tryggva föður Katrínar en foreldrar hennar létu sig ekki vanta til Idaho á þennan stórviðburð.

Fréttin hjá KTVB Idaho News: http://www.ktvb.com/video/index.html?nvid=331627

Hinn 22 ára gamli hlaupagarpur frá Suður-Afríku, Oscar Pistorius, ætti að ná sér að fullu eftir að hafa gengist undir aðgerð á höfði og andliti, eftir að hann lenti í slysi í heimalandi sínu.

Pistorius sem er einn sigursælasti hlauparinn í flokki fatlaðra var í bátsferð með vini sínum nálægt Jóhannesarborg á laugardag á ánni Vaal þegar hann lenti í slysi en sögum ber ekki saman um hvernig slysið orsakaðist nákvæmlega. Hann gekkst svo undir aðgerð á sunnudag á spítala í Jóhannesarborg.

„Heilinn í honum starfar eðlilega eftir slysið,“ sagði Anchen Laubcher, læknirinn sem meðhöndlaði Pistorius eftir slysið en hann skaddaðist mest á höfði.

Lesa nánar um málið hjá MBL.IS: http://mbl.is/mm/sport/frettir/2009/02/23/hlaupagarpurinn_oscar_pistorius_aetti_ad_na_ser_ad_/

Mynd: Oscar Pistorius á spjalli við Adolf Inga Erlingsson íþróttafréttamann hjá RÚV á kynningarfundi Össurar í Peking 2008.

Ljósmyndarinn góðkunni Björn Pálsson og eiginkona hans Sigurlaug Björnsdóttir færðu Íþróttasambandi fatlaðra veglega gjöf á 30 ára afmælisári sambandsins en ÍF var stofnað þann 17. maí árið 1979. Björn og Sigurlaug afhentu ÍF filmusafn sem Björn hafði haldið til haga af miklum myndarskap en allt frá árinu 1985-2000 var Björn sérlegur hirðljósmyndari Íþróttasambands fatlaðra. Á þessum 15 árum var Björn iðinn við kolann og verður það ÍF sérleg ánægja að fara í gegnum filmurnar sem eru ómetanlegar í söguskráningu sambandsins.

Hjónin afhentu Camillu Th. Hallgrímsson varaformanni ÍF filmusafnið á heimili sínu í Garðabæ síðastliðinn þriðjudag. Filmusafnið verður ÍF til frjálsra afnota á allan hátt er við kemur starfi sambandsins. Hjónin Björn og Sigurlaug gáfu filmusafnið fyrir sína hönd og Hraðmynda en Björn var m.a. eigandi og starfsmaður hraðmynda um áratugaskeið.

ÍF vill koma á framfæri innilegu þakklæti til handa Birni, Sigurlaugu og Hraðmyndum fyrir þetta glæsta framtak.

Myndir: Á efri myndinni eru Björn og Camilla þar sem Björn afhenti varaformanninum gjafabréf en á neðri myndinni eru frá vinstri Ólafur Magnússon framkvæmdastjóri afreks- og fjármálasviðs ÍF, Björn Pálsson ljósmyndari, Camilla Th. Hallgrímsson varaformaður ÍF og Sigurlaug Björnsdóttir eiginkona Björns Pálssonar.

Sundkonan Anna Kristín Jensdóttir var þann 10. febrúar síðastliðinn útnefnd íþróttakona ársins á Seltjarnarnesi en þetta er annað árið í röð sem Anna verður fyrir valinu. Snorri Sigurðsson hlaupari úr röðum ófatlaðra var kjörinn íþróttamaður ársins.

Á heimasíðunni www.seltjarnarnes.is segir eftirfarandi um Önnu:

Anna Kristín Jensdóttir hefur æft sund hjá Íþróttafélagi fatlaðra í Reykjavík frá 8 ára aldri og hefur verið með yfir 90% æfingasókn frá upphafi. Hún hefur tekið hröðum framförum í sundíþróttinni og unnið til fjölda verðlauna bæði hérlendis og erlendis. Árið 2007 var viðburðaríkt og gott ár hjá Önnu og setti hún fjölda Íslandsmeta ásamt því að vinna sér inn Íslandsmeistaratitla. Þá má geta þess að Anna á eitt Norðurlandamet.

Á árinu 2008 bætti hún Íslandsmetið í 100 m bringusundi þrívegis og í 50 metra bringusundi tvívegis. Hún á nú Íslandsmetin í 100 m bringusundi í 25 metra braut og í 50 metra braut og í 50 metra bringusundi í 25 metra laug í sínum fötlunarflokki.

Árangur hennar í 100 metra bringusundi í hennar fötlunarflokki skipar henna sess meðal tuttugu og fimm bestu sundkappa heims. Anna er nú í úrvalshópi landsliðsnefndar vegna þátttöku í Ólympíuleikunum 2012. Anna Kristín hefur lagt afar hart að sér við æfingar og keppni auk þess að vera góð fyrirmynd ungra og upprennandi íþróttamanna.

Námskeið Íþróttasambands fatlaðra og Vetraríþróttamiðstöðvar Íslands í samstarfi við NSCD í Winter Park fór fram í Hlíðarfjalli dagana 13. - 15. febrúar. Námskeiðið var fullbókað en þátttakendur voru um tuttugu m.a. hreyfihamlaðir, blindir og sjónskertir.   

Hreyfihamlaðir þátttakendur fengu sérhannaða skíðasleða til afnota og gátu valið um sleða með tveimur eða einu skíði. Þrír þátttakendur komu frá endurhæfingardeild Grensás þar sem þeir hafa notið endurhæfingar eftir slys. Aðalleiðbeinandi var Beth Fox, forsvarsmaður NSCD í Winter Park (National Sport Center for disabled). Auk hennar var leiðbeinandi Herbert Wintel frá Þýskalandi og kona hans Hannelore. Herbert er fatlaður skiðamaður sem hefur byggt upp vetraríþróttir fyrir fötluð  börn og unglinga í Þýskalandi og hefur m.a. þjálfað Breka Arnarsson, ungan og efnilegan skíðamann sem bjó erlendis en er nú aftur komin til Akureyrar.  

Markmiðið er að þjálfa íslenska leiðbeinendur á þessu sviði og var áhersla lögð á ráðgjöf og aðstoð við aðstoðarfólk, jafnt skíðakennara, þjálfara sem aðstandendur.

Námskeiðið gekk mjög vel og allir þátttakendur tóku virkan þátt í dagskránni með aðstoð leiðbeinenda og aðstoðarfólks. Alls var hópur fatlaðra þátttakenda, aðstandenda, leiðbeinenda og aðstoðarfólks um 60 manns.

Þátttakendur komu frá Reykjavík og nágrenni, Selfossi, Akureyri, Ísafirði, Egilstöðum og Húsavík.

Í tengslum við námskeiðið var haldinn opinn kynningarfundur á Akureyri föstudaginn 13. febrúar og kynning Háskólanum á Akureyri fyrir nemendur í iðjuþjálfun.

Fleiri myndir frá námskeiðinu eru á www.123.is/if  - Myndataka; AKV

Æfingabúðir Íþróttasambands fatlaðra í frjálsum íþróttum fara fram á Laugarvatni dagana 20.-21. febrúar næstkomandi. Sex iðkendur frá fimm aðildarfélögum hafa verið valdir í búðirnar og eru þeir eftirfarandi:

Baldur Ævar Baldursson, Snerpa
Jón Oddur Halldórsson, Reynir Hellissandi
Jakob Gunnar Lárusson, Nes
Jósef W. Daníelsson, Nes
Ágúst Þór Guðnason, Gný
Ingeborg Eide Garðarsdóttir, FH

Íþróttasamband fatlaðra óskar viðeigandi félögum og íþróttamönnum til hamingju með að vera valdir í búðirnar.

Mynd: Baldur Ævar Baldursson frá Snerpu í langstökki á Ólympíumóti fatlaðra í Peking 2008.

Malmö Open mótið í Svíþjóð fer nú fram í 33. sinn en mótið er stærsta árlega fjölgreina íþróttamótið fyrir fatlaða í heiminum þar sem 2500 íþróttamenn leiða saman hesta sína í 15 íþróttagreinum. Myndarlegur hópur frá Íþróttafélagi fatlaðra í Reykjavík lagði í dag land undir fót og er á leið til Svíþjóðar.

Alls skipar hópur ÍFR 36 manns en þar af eru 19 keppendur, 10 í sundi, 6 í boccia og 3 í borðtennis.

Katrín Guðrún Tryggvadóttir hafnaði í 5. sæti í gær á Vetrarleikum Special Olympics þar sem hún tók þátt í listdansi á skautum. Að sögn Helgu Olsen þjálfara Katrínar stóð skautakonan sig mjög vel og fékk mikil og góð viðbrögð frá áhorfendum. Að loknum bæði skylduæfingum og frjálsum æfingum hafnaði Katrín eins og fyrr greinir í 5. sæti. Frábær árangur hjá þessari efnilegu skautakonu sem var eini fulltrúi Íslands á mótinu og vakti það töluverða athygli.

,,Þess má geta að CNBC var að sjálf sögðu mætt á svæðið og tóku myndir af undirbúningnum, frjálsa prógraminu, viðbrögðum foreldra og svo að sjálf sögðu var tekið heilmikið viðtal við bæði Katrínu og Helgu þjálfara. Þegar CNBC hafði lokið sér af kom enn önnur beiðni um viðtal. Sjónvarpslið Special Olympics ákváðu að gera heimildarmynd um eina íþróttamann Íslands á þessum leikum. Þannig að þegar við vorum rétt búin að kveðja fréttamenn CNBC tók annað lið við. Tekin voru viðtöl við alla í liðinu ásamt foreldrum Katrínar. Þegar því var svo lokið fylgdi ljósmyndari frá Special Olympics okkur. Hann myndaði okkur við nánast öll tækifæri. Katrín hafði orð á því að nú vissi hún hvernig stjörnunum í Hollywood liðið þegar þær gætu ekki borðað hádegismat án þess að teknar væru af því myndir. Hún hefur tekið þá ákvörðun um að feta ekki þann veg þar sem henni fannst athyglin aðeins of yfirþyrmandi,“ sagði Helga þjálfari Katrínar og ljóst að hópurinn hefur skemmt sér konunglega í Idaho í Bandaríkjunum.

Heimildarmyndin verður svo sett inn á netið undir: http://live.specialolympics.org

Eftir um 30 klukkustunda langt ferðalag komst íslenski hópurinn til Idaho í Bandaríkjunum þar sem Vetrarleikar Special Olympics fara fram. Ísland teflir fram einum keppanda í listdansi á skautum en það er hún Katrín Guðrún Tryggvadóttir. Með Katrínu í för eru þær Helga Olsen þjálfari Katrínar og Lilja Sólrún Guðmundsdóttir íþróttagreinastjóri vetraríþrótta Special Olympics á Íslandi.

Móttökurnar voru ekki af verri endanum, glæst móttökusveit ytra fagnaði hópnum við dynjandi lófatak. "Ég held að ég geti fullyrt að svona móttökur hefur enginn af okkur upplifað áður," sagði Helga Olsen þjálfari Katrínar.

Á opnunarhátíð leikanna hélt skautameistarinn Scott Hamilton stutta ræðu og Arnold Schwarzenegger fylkisstjóri í Kaliforníu og fyrrum Tortímandi hélt stutt erindi en hann verður gestur á leikunum. Eftir vel heppnaða opnunarhátíð tóku æfingarnar við en hótelið hjá íslenska hópnum er í göngufæri frá skautahöllinni. Katrín keppir í dag í listdansi á skautum en hún var í 3. sæti eftir skylduæfingarnar og verður fróðlegt að sjá hvernig henni muni ríða af í dag.

Framkvæmdastjórn Íþrótta- og Ólympíusambands Íslands samþykkti nýverið tillögur stjórnar Afrekssjóðs ÍSÍ og Styrktarsjóðs ungra og framúrskarandi efnilegra íþróttamanna fyrir árið 2009. Styrkveitingar ÍSÍ að þessu sinni nema samtals rúmlega 46 milljónum króna en úthlutað er rúmlega 37 milljón krónum úr Afrekssjóði og rúmlega 9 milljón krónum úr sjóði ungra og efnilegra íþróttamanna.

Til afrekssjóðs bárust umsóknir vegna 29 einstaklinga og 28 verkefna. 21 einstaklingur hlýtur styrk að þessu sinni og 18 verkefni. Samtals var heildarúthlutun til handa íþróttamönnum úr röðum ÍF þetta árið 3.380.000,-kr.

Að þessu sinni voru það 8 íþróttamenn úr röðum Íþróttasambands fatlaðra sem hlutu styrk og eru þeir eftirfarandi:

Baldur Ævar Baldursson, Snerpa -  B styrkur – 960.000kr.
Jóhann Rúnar Kristjánsson, NES -  B styrkur – 960.000kr.
Eyþór Þrastarson, ÍFR -   C styrkur – 480.000kr.
Sonja Sigurðardóttir, ÍFR -  C styrkur – 480.000kr.
Erna Friðriksdóttir, Örvar  Ungir og efnilegir – 150.000kr.
Tómas Björnsson, ÍFR -  Ungir og efnilegir – 150.000kr.
Jón Margeir Sverrisson, Ösp -  Ungir og efnilegir – 100.000kr.
Ragney Líf Stefánsdóttir, Ívar -  Ungir og efnilegir – 100.000kr.

Íþróttasamband fatlaðra óskar styrkþegum sínum innilega til hamingju með styrkina og væntir að styrkirnir muni hvetja þau til enn frekari dáða.

Mynd: www.isi.is – mynd frá úthlutun ÍSÍ.

Sundgarpurinn Jakob Jóhann Sveinsson mætti föstudaginn 6. febrúar síðastliðinn sem gestakennari á æfingu hjá bringusundsmönnum ÍFR. Jakob er eins og alþjóð veit Ólympíuþátttakandi og margfaldur Íslandsmeistari í bringusundi.

Á æfingunni miðlaði Jakob af sinni reynslu til bringusundsfólks ÍFR og fór yfir galdra bringusundsins auk þess að fara ítarlega í stört og snúninga með sundfólkinu. Átti Jakob athygli þeirra allra óskerta og mun kennsla hans og þær æfingar sem hann fór yfir með sundmönnunum án efa nýtast þeim í keppnum í framtíðinni.

Þá er einnig hægt að sjá stutt myndasafn frá æfingunni á myndasíðu ÍF undir þessum tengli:
http://if.123.is/album/default.aspx?aid=135222 

Borðtenniskappinn Jóhann Rúnar Kristjánsson, NES, heldur áfram að gera það gott í innlendri keppni ófatlaðra en um helgina tók Jóhann þátt á Pepsimóti Víkings en það er keppni hjá ófötluðum.

Jóhann keppti í 1. flokki og hafnaði þar í 3.-4. sæti. Þá tók hann einnig þátt í keppni í meistaraflokki þar sem Jóhann hafði sigur á Daða Frey sem var sigurvegari á síðasta punktamóti Víkings. Jóhann æfir nú af kappi fyrir Opna ungverska mótið í borðtennis sem fram fer dagana 19.-.23 mars næstkomandi en um næstu helgi fer Jóhann á Malmö Open með ÍFR svo það er í mörg horn að líta hjá honum á næstunni.

Sundgarpurinn Jakob Jóhann Sveinsson verður gestaþjálfari masterclass bringusundsmanna hjá Íþróttafélagi fatlaðra í Reykjavík í dag föstudaginn 6. janúar. Æfingin hefst kl. 16:00 í innilauginni í Laugardal en Jakob mun hefja kennslu sína með bringusundsmönnum ÍFR um kl. 17:00.

Jakob Jóhann er einn fremsti sundmaður þjóðarinnar og Íslandsmeistari og Ólympíufari í bringusundi. Erlingur Þ. Jóhannsson yfirþjálfari ÍFR í sundi sagði að það væri virkilega ánægjulegt að fá Jakob Jóhann á æfinguna.

,,Það er gaman að hann geri þetta fyrir okkur og veiti sundmönnum ÍFR innsýn í sínar æfingar,“ sagði Erlingur sem er einn reyndasti þjálfari fatlaðra sundmanna á Íslandi.

Mynd: Jakob Jóhann Sveinsson einn fremsti sundmaður þjóðarinnar.

Síðasti skiladagur tilnefninga fyrir Norræna barna- og unglingamótið í Svíþjóð 2009 er næstkomandi mánudag þann 2. febrúar 2009. Þegar hafa nokkrar tilnefningar borist til ÍF en athygli er vakin á því að ekki verður gefinn lengri frestur en til mánudagsins 2. febrúar.

Norræna barna- og unglingamótið fer fram í Eskilstuna í Svíþjóð þar sem keppt verður í frjálsum íþróttum, sundi og borðtennis. Að þessu sinni hefur ÍF lagt áherslu á að hreyfihamlaðir verði tilnefndir en sú áhersla er liður í nýliðun hjá ÍF.

Tilnefningum er skilað á póstfangið if@isisport.is

Eftirtaldar upplýsingar eiga að koma fram með tilnefningunum:
Nafn
Kennitala
Fötlun
Íþróttagrein
Nafn aðstandanda/ tengiliðs
Heimilisfang / símanúmer / netfang
Stutt lýsing á einstaklingnum og rök fyrir vali
Lyf ef eru
Staðfesting fulltrúa félags/annarra aðila -nafn og símanúmer-

Mynd: Frá Norræna barna- og unglingamótinu á Íslandi.

Fötluðum börnum og unglingum er nú gefið tækifæri á að vera virkir þátttakendur á æfingum hjá almennu knattspyrnufélagi. Íþróttasamband fatlaðra er umsjónaraðili starfsemi Special Olympics á Íslandi. Evrópusamtök Special Olympics og UEFA hafa byggt upp samstarf á sviði knattspyrnu fyrir fatlaða en óskað var eftir því að aðildarlönd samtakanna starfi með knattspyrnusamböndum í hverju landi að þessu verkefni.

Samstarf ÍF og KSÍ hefur tengst Íslandsleikum Special Olympics og sparkvallaverkefni þar sem boðið er upp á opnar æfingar fyrir fatlaðra. Markmið samstarfsins er að efla þátttöku fatlaðra í knattspyrnu og stuðla að því að knattspyrna sé í boði fyrir fatlaða um land allt.  

Þriðjudaginn 16. desember fóru fulltrúar KSÍ og ÍF á fund KR þar sem rætt var samstarf á þessu sviði.  Áhugi kom fram hjá KR að standa að æfingum fyrir fötluð börn og unglinga á árinu 2009.

Mánudaginn 2.febrúar nk. munu hefjast  knattspyrnuæfingar fyrir fatlaða hjá KR ,markmiðið er að gefa fötluðum börnum og unglingum tækifæri að vera virkir þátttakendur hjá almennu knattspyrnufélagi. 

Æfingatímar verða eftirfarandi: mánudagar kl. 20:30 fyrir eldri hóp (13 ára og eldri) og laugardagar kl. 15:30 fyrir yngri hóp (12 ára og yngri).

Jafnframt verður reynt að stuðla að því að þeir sem þess óska geti verið á æfingum með sínum jafnöldrum. Meginmarkmið er að skapa valkost sem gerir fötluðum börnum og unglingum kleift að vera virkir þátttakendur á æfingum hjá almennu knattspyrnufélagi og leika undir merkjum KR.

Nánari upplýsingar gefa Rúnar Kristinsson í síma: 5105306, e-mail rkr@kr.is og Stefán Arnarson í síma: 510-5310 og e-mail stefan@kr.is

Katrín Guðrún Tryggvadóttir, mun keppa í Listhlaupi á skautum á Alþjóðaleikum Special Olympics sem fara fram í Boise iIdaho 7. - 13. febrúar 2009. Katrín Guðrún sem æfir hjá Skautafélaginu Birninum, mun sýna æfingar sínar á Þorramóti Bjarnarins sem fram fer dagana 30. - 31. janúar í Egilshöll.

Hún mun opna mótið á laugardagskvöldið kl. 18:15 með því að sýna skylduæfingar og frjálst programm.

Íþróttasamband Fatlaðra óskar Katrínu Guðrún til hamingju með þann heiður sem henni er sýndur og hvetur fólk til að mæta og sýna henni stuðning.

Átak, Fjölmennt, Ás styrktarfélag, Íþróttasamband fatlaðra, Hitt húsið, Öspin og Þroskahjálp hafa tekið saman höndum og stofnað gönguhóp. Markmiðið er að hittast einu sinni í mánuði og oftar með hækkandi sól, ganga í 20-30 mín. og fá sér smá hollustu á eftir. Fyrsta gangan var 17. janúar og var vel mætt. Næsta ganga verður Laugardaginn 14. febrúar, mæting að Háaleitisbraut 13, kl. 13:00. Allir velkomnir.

Borðtenniskappinn Jóhann Rúnar Kristjánsson, NES, hafnaði í 2. sæti í 1. flokki á punktamóti Víkings sem fram fór í TBR-húsinu um síðastliðna helgi.

Jóhann var að keppa í flokki ófatlaðra þar sem hann mætti Vigni Kristmundssyni úr HK í úrslitum. Vignir sigraði Jóhann 3-0 (11-7, 11-7, 11-8). Vignir, sem er gamall Arnarmaður, hefur tekið upp spaðann að nýju og keppir nú fyrir HK. Jóhann er að hefja keppni að nýju eftir hlé, en hann tók sér frí þegar honum tókst ekki að komast á Ólympíuleika fatlaðra í Peking.

Sundkonan Ragney Líf Stefánsdóttir var útnefnd íþróttamaður Ísafjarðarbæjar árið 2008. Ragney Líf er 16 ára og hefur æft sund hjá Íþróttafélaginu Ívari í níu ár. Á síðasta ári keppti hún á þremur stórum mótum; Malmö-open í Svíþjóð, Íslandsmóti ÍF í 50 metra laug og Íslandsmóti ÍF í 25 metra laug. Á öllum mótunum stóð hún sig með prýði og vann m.a. til fjögurra verðlauna á Malmö-open, þar á meðal tvö gullverðlaun. Fimm verðlaun á Íslandsmótinu í 50 metra laug ,þar af tvö gull og eitt brons, og þrjú gullverðlaun á Íslandsmótinu í 25 metra laug. Samtals vann hún fimm Íslandsmeistaratitla á árinu 2008.

Þess má einnig geta að Ragney Líf keppti á Nýárssundmóti Í þann 3. janúar og var þriðja stigahæst á mótinu. Hún setti Íslandsmet í 50 m bringusundi, bætti sig í öllum greinum og komst inn í landliðsæfingarhóp Íþróttasambands fatlaðra. Ragney Líf stundar nám við Menntaskólann á Ísafirði og er á afreksbraut skólans.

Greinina í heild sinni má lesa á vefsíðu BB – www.bb.is
http://bb.is/?PageID=26&NewsID=127051

Mynd: Af www.bb.is – Ragney Líf ásamt foreldrum sínum Valdísi og Stefáni.

Um næstu helgi mun Sundnefnd ÍF standa að fyrstu æfingabúðum ársins fyrir æfingahóp landsliðs ÍF. Fimm aðildarfélög ÍF eiga sundmenn sem náð hafa lágmörkum fyrir búðirnar sem standa munu frá föstudeginum 30. janúar til sunnudagsins 1. febrúar. Æfingabúðirnar fara fram í innilauginni í Laugardal og vill Íþróttasamband fatlaðra óska þeim aðildarfélögum sem eiga sundmenn í búðunum til hamingju með góðan árangur.

Nánari upplýsingar verða sendar aðildarfélögum og þjálfurum þeirra síðar í vikunni en einnig er hægt að hafa samband við Ingigerði imaggy@visir.is eða Kristínu krigu@simnet.is

Þeir sem verða í æfingabúðunum og hafa náð lágmörkum:

Ívar á Ísafirði
Ragney Líf Stefánsdóttir
Kristín Þorsteinsdóttir

ÍFR
Eyþór Þrastarson
Sonja Sigurðardóttir
Anna Kristín Jensdóttir
Guðmundur H. Hermannsson
Vignir Gunnar Hauksson
Hjörtur Már Ingvarsson
Hrafnkell Björnsson

Fjörður
Bjarnar Þór Jónsson
Kolbrún Alda Stefánsdóttir
Agnar Már Björgvinsson
Aníta Ósk Hrafnsdóttir
Ragnar Ingi Magnússon
Skúli Steinar Pétursson
Ragnar Ingi Magnússon
Pálmi Guðlaugsson

Ösp
Jakob Birtingur Ingimundarson
Jón Margeir Sverrisson
Andrian Oscar Erwin
Kristján Jónsson

Óðinn Akureyri
Jón Gunnar Halldórsson
Vilhelm Hafþórsson

Laugardaginn 24. janúar næstkomandi mun Guðbjörg Kristín Eiríksdóttir standa að kynningu og gegnumferð á alþjóðlegu boccia-reglunum fyrir hönd Stanislavs Doskocil. Stanislav hefur full réttindi sem alþjóðlegur dómari og hefur kynnt sér stöðu og áherslur í boccia hér á Íslandi það tæpa ár sem hann hefur dvalist hérlendis.

Stanislav talar tékknesku og honum til aðstoðar ásamt Guðbjörgu við kynninguna verður túlkur sem þýða mun yfir á ensku. Vonast er til þess að sem flestir sjái sér fært um að vera með á kynningunni sem fer fram á milli kl. 14:00 og 15:30 í íþróttahúsi ÍFR í Reykjavík að Hátúni 14.

Nánari upplýsingar veitir Guðbjörg Kristín í síma 895 0593

Mynd: Frá Íslandsmóti ÍF í Boccia á Akureyri 2008.

Samkomulag hefur tekist á millum Golfsamtaka fatlaðra og Magnúsar Birgissonar um að hefja golfæfingar og kennslu fyrir hreyfihamlaða.

Næsta miðvikudag, 28. janúar, kl. 17:00-18:00 verða æfingar í æfingastöð Golfklúbbs Keilis í Hafnarfirði.

Nánari upplýsingar veitir Hörður Barðdal – hordur@ehp.is

Íþróttafélagið Suðri afhenti sjálfboðaliðakort ÍF á jólafundi Suðra.Á myndinni má sjá þá sem fengu fyrstu kortin afhend en þau eru; Aftari röð frá vinstri: Hulda Sigurjónsdóttir, Sigríður Sigurjónsdóttir og María Sigurjónsdóttir. Fyrir framan Svanur Ingvarsson

Auk þess að keppa með félaginu eru systurnar Hulda, Sigríður og María óþreytandi við að finna upp á ýmsum skemmtilegheitum fyrir Suðrafélaga.
M.a. hafa þær samið nokkra texta sem sungnir eru við ýmis tækifæri, þær hafa útbúið plagöt til að hafa á áhorfendapöllum til hvatningar fyrir keppendur félagsins, þær gáfu félaginu tvö lukkudýr sem fylgja í keppnum og þær gáfu þjálfurum félagsins málbönd svo hægt væri að mæla nákvæmt á æfingum. Einnig eru þær í nýstofnaðri skemmtinefnd Suðra.
Svanur Ingvarsson er fyrrverandi formaður Suðra. Eftir að hann lét af þeim störfum hefur hann verið félaginu ómetanlegur , t.d. verið fundarstjóri á aðalfundum, gítaristi á skemmtikvöldum og komið að ý.k. vinnu á vegum félagsins.

Reykjavík International Games fóru fram í Reykjavík um síðastliðna helgi þar sem fatlaðir tóku þátt í fyrsta sinn. Fatlaðir kepptu aðeins með í sundi en vonir standa til þess að keppt verði í fleiri íþróttagreinum í framtíðinni á þessu stóra og veglega móti. Af þessu tilefni bauð Íþróttasamband fatlaðra tveimur sterkum dönskum sundmönnum á mótið sem gerðu góða ferð á Frón.

Christian Bundgaard (S 11) var stigahæsti sundmaður mótsins með 846 stig fyrir 50m. bringusund á tímanum 36,67 sek. Þá varð Cecilie Christiansen (S 2) stigahæsta sundkona mótsins með 497 stig fyrir 50m. bringusund á tímanum 1.34,91 mín.

Pálmi Guðlaugsson (S 6) frá sunddeild Fjölnis gerði einnig góða ferð á mótið þegar hann setti þrjú Íslandsmet. Pálmi setti met í 50m. skriðsundi á tímanum 37,92 sek. Þá setti hann Íslandsmet í 50m. baksundi á tímanum 51,62 sek. og loks var þriðja met Pálma í 100m. baksundi þegar hann kom í mark á tímanum 1.51,99 mín.

Sjá öll úrslit mótsins

Myndir: Að ofan er Pálmi sem fór á kostum á mótinu og að neðan er danska sveitin sem skemmti sér konunglega í Íslandsförinni og fóru á kostum í lauginni.

Skautadrottningin Katrín Guðrún Tryggvadóttir mun opna Þorramót Bjarnarins dagana 30.-31. janúar næstkomandi með því að sýna skautaæfingar sínar fyrir Special Olympics 2009.

Katrín er á leið til Idaho í Bandaríkjunum þar sem hún mun taka þátt í Alþjóða vetrarleikum Special Olympics. Æfingar sínar fyrir Bandaríkjaferðinni mun Katrín gera á laugardagskvöldinu kl. 18:15. Þjálfari Katrínar er Helga Olsen.

Hlíðarfjalli, Akureyri 13.-15. febrúar 2009

Föstudagur 13. febrúar;    

Kl. 12:30: Mæting í Hlíðarfjall. Kynning á útbúnaði og  ráðgjöf  fyrir skíðakennara, starfsfólk skíðasvæða, þá sem koma á einn eða annan hátt að fötluðum og aðra þá sem áhuga hafa á að kynna sér þessi mál. Reiknað er með að flestir taki einnig þátt í námskeiðinu á laugardag og sunnudag.

Kl.15: Allir þátttakendur helgarinnar mæta í Hlíðarfjall. Fá upplýsingar um námskeiðið og máta skíðabúnað.

Kl. 18: Opinn kynningarfundur um skíðamennsku og útivist fatlaðra í Íþróttahöllinni.
Allir velkomnir

Laugardagur 14. febrúar og sunnudagur 15. febrúar;    (9:30 – 16)

Námskeið þar sem fatlaðir einstaklingar / aðstandendur og aðstoðarfólk fá kennslu og ráðgjöf með verklegum æfingum og fræðslu.  Á sunnudeginum kl. 15:30 verður stuttur fundur og námskeiðsslit.

Ath. Takmarka þarf þátttökufjölda fatlaðra einstaklinga m.t.t. tækja og fjölda leiðbeinenda.   

Íslenskir leiðbeinendur og aðstoðarfólk verða á staðnum og þeim til ráðgjafar verður Beth Fox,  frá Winter Park í Colorado.  Hún mun einnig veita ráðgjöf varðandi val á útbúnaði s.s. skíðasleðum sé áhugi á að kaupa slík tæki.

Þátttakendur sjá sjálfir um gistingu og fæði.
Námskeiðsgjald kr; 5.000 - 

Opinn kynningarfundur um skíðamennsku og útivist fatlaðra verður haldinn föstudagsvöldið 13. febrúar kl. 18 í Íþróttahöllinni Akureyri

Nánari upplýsingar gefa fulltrúar vetraríþróttanefndar ÍF;
Þröstur Guðjónsson, 896 1147 sporri@internet.is  / Guðný Bachmann, 820 1663 gudnybachmann@hotmail.com

Staðfesta þarf skráningar fyrir 1. febrúar 2009

Vetraríþróttamiðstöð Íslands             Íþróttasamband Fatlaðra 
 hliðarfjall@hliðarfjall.is  /4622280    annak@isisport.is / 5144080

Íþróttasamband fatlaðra hvetur aðildarfélög ÍF og fólk sem starfar að málefnum fatlaðra til að kynna sér verkefnið "Lífshlaupið" sem er hvatningar og átaksverkefni Íþrótta- og Ólympíusambands Íslands.

Jafnt einstaklingar sem hópar geta tekið þátt og viðurkenning er veitt fyrir góðan árangur. Hægt er að skipuleggja hvetjandi samkeppni á milli einstaklinga eða hópa sem getur verið skemmtileg og jafnframt árangursrík leið til aukinnar hreyfingar.

Stöndum saman að því að hvetja fatlað fólk til þátttöku í Lífshlaupinu 2009

Hjálagt eru upplýsingar um Lífshlaupið sem finna má á vef Íþrótta og ólympíusambands
Íslands: http://www.olympic.is/?nwr_more4688=1752&iw_language=is_IS

Búist er við fjölda gesta og keppenda á Reykjavík International Games sem fram fara í Reykjavík um næstu helgi, dagana 16.-18. janúar. Keppt er í fjölda íþróttagreina og nú í fyrsta sinn í sögu RIG mótsins munu fatlaðir íþróttamenn taka þátt. Sundfólk úr röðum fatlaðra mun keppa á mótinu og er vonast til þess að í framtíðinni muni fatlaðir taka þátt í fleiri greinum.

Keppnisgreinar á leikunum eru: sund, sund fatlaðra, frjálsar, badminton, dans, hópfimleikar, skylmingar, keila, listhlaup og júdó.

Alls verða um 50 sundkeppendur með fötlun á mótinu frá fjórum íslenskum aðildarfélögum en Íþróttasamband fatlaðra hefur af þessu tilefni boðið tveimur dönskum sundumönnum á mótið. Það er ÍF mikið gleðiefni að þessir tveir dönsku sundmenn hafa þegar þekkst boðið og mun þeim sérstaklega vera stillt upp í keppni gegn Ólympíumótsförum Íslands 2008 þeim Sonju Sigurðardóttur og Eyþóri Þrastarsyni.

Dagskrá mótsins:
http://rig.is/images/stories/veggspjald.pdf 

Fötluðum börnum og unglinum gefið tækifæri á að vera virkir þátttakendur á æfingum hjá almennu knattspyrnufélagi.

Á næstunni verður hleypt af stokkunum knattspyrnuæfingum fyrir fatlaða hjá KR og munu þeir kynna verkefnið á næstunni og æfingar hefjast í kjölfarið. Markmiðið er að gefa fötluðum börnum og unglinum tækifæri að vera virkir þátttakendur hjá almennu knattspyrnufélagi.

Æfingatímar verða eftirfarandi: mánudagar kl. 20:30 fyrir eldri hóp og laugardagar kl. 15:30 fyrir yngri hóp en þessir tímar verða kynntir betur síðar.

Íþróttasamband fatlaðra er umsjónaraðili starfsemi Special Olympics á Íslandi. Evrópusamtök Special Olympics og UEFA hafa byggt upp samstarf á sviði knattspyrnu fyrir fatlaða en óskað var eftir því að aðildarlönd samtakanna starfi með knattspyrnusamböndum í hverju landi að þessu verkefni.

Samstarf ÍF og KSÍ hefur tengst Íslandsleikum Special Olympics og sparkvallaverkefni þar sem boðið er upp á opnar æfingar fyrir fatlaða. Markmið samstarfsins er að efla þátttöku fatlaðra í knattspyrnu og stuðla að því að knattspyrna sé í boði fyrir fatlaða um land allt.  

Þriðjudaginn 16. desember fóru fulltrúar KSÍ og ÍF á fund KR þar sem rætt var samstarf á þessu sviði. Áhugi kom fram hjá KR að standa að æfingum fyrir fötluð börn og unglinga á árinu 2009.

Jafnframt verður reynt að stuðla að því að þeir sem þess óska geti verið á æfingum með sínum jafnöldrum. Meginmarkmið er að skapa valkost sem gerir fötluðum börnum og unglingum kleift að vera virkir þátttakendur á æfingum hjá almennu knattspyrnufélagi.

Nánari upplýsingar gefur Stefán Arnarson í síma: 510-5310 og e-mail stefan@kr.is

Ef önnur félög eru áhugasöm um æfingar sem slíkar er þeim bent á að hafa samband við Guðlaug Gunnarsson, starfsmann KSÍ, gulli@ksi.is

Fimmtudaginn 29. janúar 2009 kl. 16.00 - 17.30 heldur Arne Lykke Larsen fyrilestur um Sjálfstætt líf með aðstoð tækninnar í stofu 102 á Háskólatorgi í Háskóla Íslands. Í fyrirlestrinum fjallar Arne Lykke um notendastýrða þjónustu í Danmörku og hvernig hún gerir fötluðu fólki kleift að lifa sjálfstæðu lífi. Hann talar einnig um gildi tækninnar varðandi lífsgæði fatlaðs fólks og möguleika á samfélagsþátttöku, en Arne Lykke notar tölvu til tjáskipta, sondu til að nærast og öndunarvél.

Arne Lykke er dósent í kenningalegri eðlisfræði við University of Southern Denmark í Óðinsvéum, hann var greindur með ALS/MND í nóvember 2000 og hefur notað öndunarvél frá janúar 2006. Hann er mikið hreyfihamlaður og tjáir sig með aðstoð tölvu. Arne Lykke talar út frá eigin reynslu og flytur fyrirlesturinn á ensku með aðstoð tjáskiptatækja.

Allt áhugafólk um ofangreind málefni er hvatt til að mæta. Góður tími gefst til umræðna og fyrirspurna. Að fyrirlestrinum standa Rannsóknasetur í fötlunarfræðum við Háskóla Íslands og Öryrkjabandalag Íslands.

Þeir sem þurfa á táknmálstúlk vinsamlegast tilkynnið það til Hrefnu K. Óskarsdóttur hko@hi.is ekki síðar en 26. janúar 2009.

Nýárssundmót fatlaðra barna og unglinga fór fram í innilauginni í Laugardal þann 4. janúar síðastliðinn þar sem Jón Margeir Sverrisson sundmaður frá Ösp hampaði Sjómannabikarnum fyrir besta afrek mótsins. Jón Margeir synti á tímanum 28,82 sek. í 50m. skriðsundi og fékk fyrir vikið 676 stig og varð þar með aðeins fjórði sundmaður Aspar í 25 ára sögu Nýárssundmóts ÍF til þess að vinna Sjómannabikarinn. Forverar hans eru Bára B. Erlingsdóttir, Sigrún H. Hrafnsdóttir og Gunnar Örn Ólafsson.

Jón Margeir verður 17 ára á þessu ári en tími hans í sundinu 28,82 sek. er ekki langt frá heimsmeti fullorðinna í flokki ófatlaðra sem er 21,28 sek. en það met á Ástralinn Eamon Sullivan.

Lesa nánar...

Ég vil byrja á að óska öllum gleðilegs árs og friðar og þakka fyrir árið 2008 sem nú er ný liðið.

Mikilvægi íþrótta þarf ekki að útskýra fyrir neinum en þó má með sanni segja að í því ástandi sem nú ríkir í þjóðfélaginu séu íþróttir mikilvægari en nokkurn tíma fyrr. Á það ekki síst við um fatlaða einstaklinga sem oft eiga ekki jafna möguleika á að stunda önnur áhugaefni. Æfingarnar eru mikilvægur þáttur í lífi margra fatlaðra einstaklinga, einstaklinga sem margir hverjir eiga erfitt með að breyta út af vananum. Því er það einkar mikilvægt að hægt sé að halda starfseminni óbreyttri.

Því er áríðandi að þau íþróttafélög sem hafa æfingar fyrir fatlaða iðkendur geti haldið áfram hefðbundnu starfi og haldið áfram því mikilvæga starfi sem þau vinna á þessum vettvangi.

Í ár fagnar Íþróttasamband fatlaðra 30 ára afmæli sínu og verður starfinu af því tilefni meira beint að innanlandsverkefnum. Íslandsmót í hinum ýmsu greinum verða haldin eins og venjulega og margt annað verður á döfinni. Útgáfa ýmissa bæklinga og upplýsingarita er mikilvæg í útbreiðslustarfi sambandsins. Eins hafa sumarbúðir á Laugarvatni sem hafa undanfarin ár fengið veglegan styrk úr Pokasjóði verið mikilvægar fjölfötluðum einstaklingum sem margir hverjir hafa þetta eina tækifæri til að stunda íþróttir og útiveru. Annað atriði er að gefa mismunandi fötluðum börnum og unglingum tækifæri á vettvangi Norðurlandanna en þátttaka í norrænum
barna- og unglingamótum hefur oft verið hvati fyrir börn víðs vegar að af landinu og mörg þeirra hafa síðar meir orðið okkar mesta afreksfólk.

Eins má nefna að til stendur að Ísland verði mótshaldari fyrir Evrópumeistaramót í sundi á haustmánuðum þessa árs og ef svo verður mun þetta verða stærsti íþróttaviðburður sem Íþróttasamband fatlaðra hefur staðið fyrir.

Það má því með sanni segja að starfið sé fjölbreytt og skemmtilegt. Því er vonandi spennandi ár fram undan hjá fötluðu íþróttafólki og vonandi að allt gangi upp varðandi starfið á árinu og að afmælisársið verði árangursríkt og ánægjulegt þrátt fyrir að útlitið í þjóðfélaginu sé ekki eins bjart eins og venjulega.

Sveinn Áki Lúðvíksson, formaður Íþróttasambands fatlaðra.

Samstarfsverkefni KSÍ, ÍA og Þjóts

Næstkomandi laugardag hefjast knattspyrnuæfingar fyrir fatlaðra á Akranesi og fara þær fram í íþróttahúsinu á Jaðarsbökkum.  Þessar æfingar eru samstarfsverkefni á milli Knattspyrnusambands Íslands, ÍA og Þjóts sem er íþróttafélag fatlaðra á Akranesi.

Æfingarnar verða á hverjum laugardegi fram í maí og hefjast kl. 11:00.  Á fyrstu æfingunni nú á laugardaginn, 10. janúar, munu þeir Sigurður Ragnar Eyjólfsson landsliðsþjálfari A kvenna og Gunnleifur Gunnleifsson landsliðsmarkvörður taka þátt í æfingunni.

Æfingarnar eru fyrir strákar og stelpur, konur og kalla á öllum aldri hvattir til að láta sjá sig.  Foreldrar eru einnig velkomnir að koma og fylgjast með fjörugum æfingum.

Hið árlega Nýárssundmót Íþróttasambands fatlaðra fór fram í innilauginni í Laugardag sunnudaginn 4. janúar síðastliðinn. Alls var 81 keppandi skráður til leiks frá sjö félögum. Skólahljómsveit Kópavogs sá um tónlistarflutning á mótinu og Halldór Guðbergsson formaður Öryrkjabandalags Íslands var heiðursgestur mótsins og sá um verðlaunaafhendingu. Keppendur á mótinu fengu að gjöf frá ÖBÍ forláta handklæði en Halldór hélt einnig skemmtilega tölu yfir mótsgestum þar sem hann var m.a. þátttakandi á fyrsta Nýárssundmóti ÍF árið 1984.

Allir keppendur fengu sérstakan afmælisþátttökupening á mótinu og að lokum var það Jón Margeir Sverrisson úr Ösp sem hlaut Sjómannabikarinn fyrir besta afrek mótsins. Jón Margeir er fyrstu sundmaður Aspar til að vinna Sjómannabikarinn síðan árið 2001 en þá varð Gunnar Örn Ólafsson hlutskarpastur.

Halldór Guðbergsson varð síðan annar formaður ÖBÍ til þess að verða heiðursgestur á mótinu en fyrstur var Sigursteinn Másson árið 2006.

Hér að neðan eru tenglar á myndasafn frá mótinu sem og tenglar á fréttir frá hinum ýmsu miðlum er greindu frá mótinu:

Myndasafnið: http://if.123.is/album/default.aspx?aid=130790

Vísir.is: http://visir.is/article/20090105/IDROTTIR/218618561

Mbl.is: http://www.mbl.is/mm/sport/frettir/2009/01/04/jon_margeir_sverrisson_hlaut_sjomannabikarinn/

Sjónvarpsfréttir RÚV: http://dagskra.ruv.is/sjonvarpid/4456481/2009/01/04/15/

Sjónvarpsfréttir Stöðvar 2: http://vefmidlar.visir.is/VefTV/?channelID=STOD2&programID=7821563b-9165-4085-a32a-7d7d079d9558&mediaSourceID=bec3df62-6a56-4b7c-8e60-74e2d8faf188 

Nýárssundmóti Íþróttasambands fatlaðra fyrir börn og unglinga árið 2009 var rétt í þessu að ljúka þar sem sundmaðurinn Jón Margeir Sverrisson hlaut Sjómannabikarinn fyrir besta afrek mótsins. Jón Margeir syndir fyrir Íþróttafélagið Ösp og vann besta afrekið í 50m. skriðsundi er hann kom í mark á tímanum 28.82 sek. og hlaut fyrir vikið 676 stig. Stigin eru reiknuð út frá heimsmeti sem gildir 1000 svo árangur Jóns er frábær og ljóst að hér er á ferðinni sterkur og efnilegur sundmaður.

Ragnar Ingi Magnússon átti næststigahæsta sund mótsins, einnig í 50 m. skriðsundi, er hann kom í mark á tímanum 29.47 sek. og hlaut fyrir vikið 632 stig. Ragney Líf Stefánsdóttir frá ÍVARI á Ísafirði hafnaði í 3. sæti en hún var líka í 50m. skriðsundi og kom í mark á tímanum 36.67 sek.

Halldór Guðbergsson formaður Öryrkjabandalags Íslands var heiðursgestur mótsins og afhenti Jóni Margeiri Sjómannabikarinn en þess má til gamans geta að Halldór var keppandi á fyrsta Nýárssundmóti ÍF sem fram fór árið 1984.

Nánar verður greint frá mótinu í máli og myndum á morgun, mánudag.

Mynd: Jón Margeir með sigurlaunin.

Handknattleiksmaðurinn Ólafur Stefánsson var í kvöld útnefndur Íþróttamaður ársins við hátíðlega athöfn á Grand Hótel í Reykjavík. Kynntir voru þeir tíu íþróttamenn sem hlutu flest stig í kjöri íþróttafréttamanna en þar fékk sundmaðurinn Eyþór Þrastarson ÍFR/Ægir eitt stig og hafnaði þar með í 25. sæti.

Ólafur Stefánsson er vel að útnefningunni kominn og vill Íþróttasamband fatlaðra óska honum innilega til hamingju með nafnbótina.

Sundfólkið úr röðum fatlaðra þau Eyþór Þrastarson og Sonja Sigurðardóttir eru Íþróttafólk ÍF árið 2008 og við athöfnina í kvöld voru þau heiðruð af Íþrótta- og Ólympíusambandi Íslands líkt og allir íþróttamenn ársins úr röðum hvers sérsambands.

Mynd: Eyþór og Sonja á Grand Hótel í kvöld

Íþróttasamband fatlaðra óskar landsmönnum öllum farsældar á nýju ári og þakkar samfylgdina á árinu 2008.