[Fréttir 2010]  [Fréttir 2009]  [Fréttir 2008]  [Fréttir 2007]  [Fréttir 2006]  [Fréttir 2005]  [Fréttir 2004]  [Fréttir 2003]  [Fréttir 2002] 

Kristín Rós hóf að æfa sund árið 1982 með Íþróttafélagi fatlaðra í Reykjavík og meðal þjálfara hennar þar og í öðrum sundfélögum og deildum hafa verið Erlingur Jóhannsson, Inga Maggý Stefánsdóttir, Ingi Þór Einarsson, Kristín Guðmundsdóttir, Mark Taylor, Ólafur Þór Gunnarsson o.fl.
Kristín Rós, sem keppir í flokki hreyfihamlaðra, hefur verið spastísk vinstra megin frá því hún var 18 mánaða gömul en þá fékk hún vírus í höfuðið sem olli fötlun hennar.
Hún á að baki glæsilegan feril og hefur á undanförnum árum verið ókrýnd sunddrottning heimsins í sínum flokki. Á Ólympíumóti fatlaðra sem fram fór í Aþenu í september sl. sýndi hún enn og sannaði styrk sinn með því að vinna til gullverðlauna í 100 m baksundi ásamt því að setja nýtt heimsmet í greininni. Hún vann til silfurverðlauna í 100 m bringusundi þar sem hún setti m.a. heimsmet í undanrásunum. Í dag á hún 6 heimsmet í 50 m laug og 9 heimsmet í 25 metra laug. Elstu metin eru frá árinu 1999 og þau nýjustu frá Ólympíumótinu 2004.
Með þátttöku sinni í Ólympíumótinu í Aþenu vann Krístín Rós einnig það afrek að taka þátt í sínu fimmta Ólympíumóti og er fyrsti íþróttamaðurinn úr röðum fatlaðra sem nær þeim árangri. Kristín Rós hefur unnið 6 gullverðlaun, 2 silfurverðlaun og 4 bronsverðlaun á þeim Ólympíumótum sem hún hefur tekið þátt í.
Nánar

Gunnar Örn Ólafsson er fæddur 11. október 1984 og hans fötlun er þroskahömlun, flokkur S14.
Gunnar hefur æft sund frá 1993 fyrst hjá íþróttafélaginu Ösp, síðan með SH og KR og nú með sunddeild Ungmennafélags Selfoss. Þjálfarar hans hafa verið Anna Bjarnadóttir, Ingigerður M. Stefánsdóttir, Mads Claussen og Ingi Þór Einarsson.
Líkt og flest besta afreksfólk úr röðum fatlaðra hóf Gunnar Örn þátttöku sína í alþjóðlegum mótum með keppni á Norrænu barna- og unglingamóti sem fram fór í Svíþjóð árið 1997.
Gunnar Örn hefur undanfarin ár verið í stöðugri framför og er í dag einn af fremstu sundmönnum þroskaheftra í heiminum. Gunnar Örn hafði áunnið sér keppnisrétt á Ólympíumóti fatlaðra sem fram fór í Aþenu í september sl. en vegna deilna Alþjóðaólympíuhreyfingar fatlaðra (IPC) og samtaka þroskaheftra íþróttamanna (INAS-FID) um flokkunarmál varð ekki af þátttöku þroskaheftra á mótinu.

Gunnar Örn er mjög metnaðarfullur og er tilbúinn að leggja mikið á sig til að ná árangri í sinni íþrótt. Hann er góður félagi og öðru ungu sundfólki góð fyrirmynd.
Nánar

Sjónvarpsstöðin Eurosport, í samstarfi við Alþjóðaólympíuhreyfinguna (IOC) hefur frá árinu 2000 veitt viðurkenningar til þeirra íþróttamanna í Evrópu sem skarað hafa fram úr í hinum ýmsu íþróttagreinum. Í ár tilnefndu 28 alþjóðasambönd alls 54 íþróttamenn vegna framúrskarandi árangurs á árinu og veittu þessir einstaklingar viðurkenningum sínum viðtöku í hófi sem haldið var þeim til heiðurs hinn 18. október sl. höfuðstöðvum IOC í Lusanne í Sviss.
Meðal þeirra íþróttamanna sem viðurkenningu hlutu var Kristín Rós Hákonardóttir ...
Nánar

Fundur með formönnum aðildarfélaga ÍF var haldinn í Íþróttamiðstöðinni Laugardal 16. október sl. Aðalmálefni fundarins var sú staða sem komin er upp vegna kröfu IPC (Alþjóðaólympíuhreyfingar fatlaðra) um nýtt flokkunarkerfi þroskaheftra íþróttamanna auk þess sem kynnt var nýtt félagaforrit sem ÍSÍ hefur hannað í samstarfi við hugbúnaðarfyrirtækið IDEGA og kallst FELIX.
Samþykkti fundurinn m.a. að fela stjórn ÍF að leggja fram fyrir næsta sambandsþing ÍF nýtt flokkunarskírteini sem tilgreindi fötlunarflokk viðkomandi íþróttamanns og að frá og með haustinu 2005 yrðu þeir íþróttamenn einir gjaldgengir á Íslandsmót ÍF sem slík skírteini bæru.

Sundkonan Kristín Rós Hákonardóttir var í dag tilnefnd til alþjóðlegra verðlauna sem veitt eru af sjónvarpsstöðinni Eurosport og alþjóða Ólympíunefndinni. Verðlaunin eru veitt nokkrum íþróttamönnum eftir hverja sumar- og vetrarólympíuleika en Kristín Rós var tilnefnd fyrir góða frammistöðu á Ólympíumóti fatlaðra.
Kristín Rós vann til tvennra verðlauna á mótinu í ár, gullverðlauna í 100 metra baksundi og silfurverðlauna í 100 metra bringusundi.
Verðlaunaathöfnin fer fram í ólympíusafninu í Sviss þann 18. október næstkomandi en á meðal gesta verður Jacques Rogge, forseti alþjóða ólympíunefndarinnar.
[Frétt af ruv.is]

Kristín Rós keppti í 50 m skriðsundi. Í undanrásunum í morgun fékk hún þriðja besta tímann 35,76 sek, en Íslandsmet hennar var 35,63 sek.
Í úrslitasundinu í kvöld lenti hún í fjórða sæti á nýju Íslandsmeti, 35,47 sek. Sigurvegari varð Erin Popovich frá Bandaríkjunum á nýju heimsmeti 34,34 sek. Önnur varð Kirsten Bruhn frá Þýskalandi, tími 34,92 sek og þriðja Danielle Campo frá Kanada, tími 35,17 sek.
Jón Oddur keppti í kvöld í úrslitum í 200 metra hlaupi í flokki T 35.
Hann hafnaði aftur í öðru sæti, næst á eftir Suður-Afríkumanninum Teboho Mokgalagadi. Mokogalagadi hljóp á tímanum 26,80 sek og setti nýtt Ólympíumet (var 27,17 sek). Jón hljóp á tímanum 27,27 sek sem er nýtt Íslands- og Norðurlandamet eins og í 100 metra hlaupinu. Í þriðja sæti varð heimsmethafinn Lloyd Upsdell frá Bretlandi á tímanum 27,82 sek.
Nánar

Glæsileg frammistaða íslensku keppendanna þeirra KristínarRósar og Jóns Odds.
Óhætt er að fullyrða að dagurin í dag hafi verið einstaklega ánægjulegur. Hápunkturinn var silfurverðlaun Kristínar Rósar í 100 m bringusundi. Keppnin var allan tímann hnífjöfn milli hennar og hinnar bandarísku Erin Popovich þar sem Kristín Rós sneri fyrst eftir fyrstu 50 metrana nokkrum sekúndubrotum á undan þeirri bandarísku. Syntu þær Kristín og Erin síðan nánast samsíða seinni 50 metrana, Kristín þó að því er virtist örlítið á undan. Sú bandaríska tryggði sér síðan sigurinn á síðustu metrunum og kom í mark sjónarmun á undan Kristínu Rósu sem synti á tímanum 1:38.85 en sigurtími hinnar bandarísku var 1:38.69. Í þriðja sæti varð Win Huang frá Kína sem synti á tímanum 1:39.51.
Jón Oddur Halldórsson tók síðan þátt í undanúrslitum í 100 m hlaupi í flokki T 35. Tryggði Jón Oddur sér sæti í úrslitahlaupinu er hann hljóp á tímanum 13.30 sek. sem er bæði Íslands- og Norðurlandamet í hans flokki og betri tími en gildandi Ólympíumet í flokknum (13.46 sek). Sigurvegarinn í riðli Jóns, Suðurafríkumaðurinn Teboho Mokgalagadi, hljóp á tímanum 13.07 sek sem er nýtt Ólympíu- og heimsmet.
Nánar

VISA Ísland og Íþróttasamband fatlaðra undirrituðu á dögunum samning um samstarf vegna undirbúnings og þátttöku íslensks íþróttafólks fyrir Ólympíumót fatlaðra í Aþenu. VISA og Ólympíleikarnir tengjast órjúfanlegum böndum þar sem VISA Ísland er einnig styrktaraðili ÍSÍ og VISA International er alheims styrktaraðili Ólympíleikanna og Ólympíumóts fatlaðra. Þrír íslenskir íþróttamenn taka þátt í mótinu að þessu sinni en það eru þau Kristín Rós Hákonardóttir, sundkona, Jóhann Kristjánsson, borðtennis-maður og Jón Oddur Halldórsson, frjálsíþróttamaður. Ólympíumótið verður sett 17. september n.k. og mun sjónvarpið sýna frá mótinu daglega á meðan á því stendur.

Frá undirritun samningsins: Leifur Steinn Elísson, aðstoðarframkvæmdastjóri VISA, Sveinn Áki Lúðvíksson, formaður ÍF, Kristín Rós Hákonardóttir og Jóhann Kristjánsson.

Í dag, mánudaginn 20 september, keppti Kristín Rós Hákonardóttir 100 m skriðsundi flokki S7 en það var hennar fyrsta grein á Ólympíumóti fatlaðra sem nú stendur yfir í Aþenu.
Í undanrásum syndti Kristín Rós á tímanum 1:18.18 mín sem var sjötti besti tíminn inn í sjálft úrslitasundið. Í úrslitum hafnaði Kristín Rós í fimmta sæti, synti á tímanum 1:17.26 mín en hennar besti tími til þessa í 100 m skriðsundi er 1:16.98 mín. Sigurvegarinn Erin Popovich frá Banaríkjunum synti á tímanum 1:14.61 mín sem er nýtt Ólympíumet, áströlsk stúlka hafnaði í öðru sæti og þýsk í því þriðja. Tími þriðja manns í sundinu var 1:15.89 og því ljóst að þótt Kristín hefði synt á sínum besta tíma hefði það ekki dugað til verðlauna.
Á fyrramálið, þriðjudagsmorgun 21. september, mun Kristín Rós keppa í undanrásum 100 m bringusunds og Jón Oddur í undanrásum 100 m hlaups flokki T35.
Nánar

Í dag laugardaginn 18. september hóf Jóhann R. Kristjánsson keppni fyrstur Íslendinga á Ólympíumóti fatlaðra.
Jóhann keppti í frysta leik við Frakkan Stephane Molliens og tapaði í þremur lotum gegn einni. Jóhann vann fyrstu lotuna 11:3 en eftir það náði Frakkinn undirtökunum í leiknum en Jóhann veitti honum harða keppni. Hann vann þrjár næstu lotur sem allar fóru 11:7. Í kvöld keppti Jóhann síðan á móti Japananum Ninami og tapaði í þremur lotum gegn engri, 11:9, 11:7 og 11:7 eftir harða keppni.
Nánar

Síðdegis í dag, þann 16. september fór fram á hinu svokallaða “Alþjóðlega svæði” í Ólympíuþorpinu hátíðarathöfn þar sem íslenska liðið var boðið velkomið í þorpið af borgarstjóra þess. Borgarstjóri Ólympíuþorpsins og Sveinn Áki Lúðvíksson, formaður ÍF og aðalfararstjóri skiptust þar á gjöfum og þar á eftir var hlýtt á þjóðsöng Íslands um leið og íslenski fáninn var dreginn að húni, nokkuð sem ávallt blæs manni stolt í brjóst yfir því að vera Íslendingur. Viðstödd þessa athöfn voru nokkrir þeirra Íslendinga sem sérstaklega hafa gert sér ferð til að fylgjast með sínu fólki hér á Ólympíumótinu og var þeim eftir athöfnina boðið í vistarverur íslenska hópsins í þorpinu.
Nánar

Nú hafa allir íslensku keppendurnir skilað sér til Grikklands og komið sér fyrir í Ólympíuþorpinu. Sá síðasti, frjálsíþróttamaðurinn Jón Oddur Halldórsson kom til Aþenu að kvöldi þess 14. september ásamt þjálfara sínum Kára Jónssyni.
Miðvikudagurinn 15. september var síðan notaður til æfinga, skoðunar á þeim stöðum sem keppnin fer fram ásamt því að læra að koma sér milli staða í Ólympíuþorpinu og milli keppnisstaða.
Nánar

Hluti íslenska hópsins kom til Aþenu seint að kvöldi þess 11. september sl. eftir langt og strangt ferðalag frá Íslandi en þetta voru keppendurnir Kristín Rós Hákonardóttir og Jóhann Kristjánsson ásamt Sveini Áka Lúðvíkssyni aðalfararstjóra, Ludvig Guðmundssyni lækni og þjálfurunum Kristínu Guðmundsdóttur og Helga Gunnarssyni.
Íslenski hópurinn býr Cntaurus GA09 í hinu svokallaða græna svæði í Ólympíuþorpinu.
Nánar

Í undirbúningi fyrir Ólympíuleikana í Aþenu og fyrir Ólympíumót fatlaðra í Aþenu, hafa ÍSÍ og ÍF unnið sameiginlega að undirbúningi við val á fatnaði þannig að keppendur í báðum þessum mikilvægu íþróttaviðburðum klæðast eins fatnaði.
Á blaðamannafundi 4. ágúst sl. var einkennisfatnaður íslenska liðsins kynntur en hann er hannaður af Kristínu Halldórsdóttur hönnuði og saumaður af Saumastofunni Fasa-Föt ehf.
Vegna mikilla hita er efni fatnaðarins hör, blár jakki, ljósbrúnar buxur og hvít skyrta fyrir karla og jakki, pils og bolur fyrir konur. Skófatnaður við þennan klæðnað eru Nike sandalar. Allur íþróttafatnaður liðsins kemur frá Nike.

Það var sunddrottning ÍF Kristín Rós Hákonardóttir og handknattleiksmaðurinn Guðjón Valur Sigurðsson sem sýndu einkennisfatnaðinn.

Á miðvikudag fór fram kappleikur milli Stjörnuliðs KSÍ og Götuhernaðarins í íþróttahúsi ÍFR. Stjörnuliðið, sem skipað var þekktum núverandi og fyrrverandi knattspyrnumönnum, fékk að kynnast aðstæðum hreyfihamlaðra með því að notast við ýmis hjálpartæki í leiknum á borð við hjólastóla, göngugrindur og hækjur. Lið Götuhernaðarins var skipað hreyfihömluðum einstaklingum og aðstoðarfólki þeirra. Skemmst er frá því að segja að Götuhernaðurinn gjörsigraði Stjörnulið KSÍ með níu mörkum gegn einu. Þrátt fyrir góða takta náði Stjörnuliðið aðeins að setja eitt mark og var Arnór Guðjohnsen þar að verki.

Smella fyrir stærri mynd

Össur hf og Íþróttasamband Fatlaðra (ÍF) hafa framlengt samstarfssamningi sínum. Samningurinn er til fjögurra ára. Um er að ræða fjárhagslegan styrk sem er ætlaður til styrktar ÍF m.a. við undirbúning og þátttöku á Ólympíumóti fatlaðra í Peking 2008. Samningurinn gildir frá 2005 til 2008.
Fréttatilkynning

Stjórn ÍBR ákvað í nóvember síðastliðin að veita nokkrum reykvískum íþróttamönnum fjárhagslegan stuðning vegna undirbúnings fyrir Ólympíuleikana sem fram fara í Aþenu í ágúst.
Þeir sem hlutu stuðning í fyrstu atrennu voru þau Jakob Jóhann Sveinsson, sundmaður úr Sundfélaginu Ægi, Bjarni Skúlason, júdómaður úr Júdódeild Ármanns, Ragna Ingólfsdóttir, badmintonkona úr TBR, og Sara Jónsdóttir, badmintonkona úr TBR. Ljóst er orðið að Bjarni og Ragna komast ekki á leikana og hefur stuðningi við þau því verið hætt.
Nú í annari atrennu hefur stjórn ÍBR ákveðið að bæta við þremur íþróttamönnum. Þau eru:

• Hjörtur Már Reynisson úr KR sem 14. maí síðastliðin náði Ólympíulágmarki í flugsundi.
• Kristín Rós Hákonardóttir úr Fjölni og ÍFR sem mun keppa í sundi á Paralympics í september.
• Gunnar Örn Ólafsson úr KR og Ösp sem mun keppa í sundi á Global Games í Svíþjóð í sumar. Flokkur þroskaheftra á Paralympics 2004 verður eingöngu sýningagrein og keppir Gunnar Örn því á Global Games mótið í staðinn fyrir Paralympics.

Sjá fréttatilkynningu frá ÍBR

ÍF hélt blaðamannafund í tilefni komu Forseta IPC og EPC í húsnæði ÍSÍ og á fundinum var m.a. kynnt hvaða keppendur færu á ólympíumótið í Aþenu í september.
Á myndinni eru Kristín Rós Hákonardóttir, sundkona, Jóhann Kristjánsson, borðtennismaður og Jón Oddur Halldórsson, frjálsíþróttamaður ásamt Phil Craven, Forseta IPC og Sveini Áka Lúðvíkssyni, formanni ÍF

Phil Craven, Forseti alþjóðaólympíuhreyfingar fatlaðra (IPC) og Bob Price, Forseti Evrópudeildar ólympíuhreyfingar fatlaðra voru í heimsókn á Íslandi í byrjun júní. Íþróttasamband Fatlaðra skipulagði dagskrá fyrir þá hér á landi og m.a. var farið til Íshesta í Hafnarfirði í þeim tilgangi að kynna þeim íslenska hestinn.
Nánar

Ferðin gekk vel nema hópurinn tafðist um 1 sólarhring í Helsingi vegna verkfalls á flugvellinum!
Úrslit
Flokkur 1 - BC3 Kristinn Ásgeirsson og Margrét Edda Stefánsdóttir - BRONS
Flokkur 2 - Kristín Jónsdóttir, Árni Sævar Gylfason, Kjartan Ásmundsson - BRONS

Í einstaklingskeppni var keppt í riðlum þar sem Íslendingarnir lentu í 3 - 4 - 6 sæti í sínum riðli.

Dagana 13.-17. maí s.l. var haldið í Englandi, Opna breska frjálsíþróttamótið.
Mót þetta var liður í undirbúningi Jóns Odds Halldórssonar, Hellissandi, fyrir þátttöku hans í Ólympíumóti fatlaðra en Jóni Oddi var boðin þátttaka í þessu móti af breska frjálsíþróttasambandinu til þess að etja kappi við núverandi heims- og Ólympíumethafa, breska hlauparann Lloyd Upsedell. Jón Oddur æfir nú hjá Breiðablik.
Nánar

Íþróttasamband Fatlaðra var með opið hús í tilefni afmælisdagsins 17. maí í Íþróttamiðstöðinni Laugardal. Sveinn Áki Lúðvíksson, formaður ÍF bauð fólk velkomið og Ellert B Shram forseti ÍSÍ og Haukur Þorsteinsson, formaður Eikar Akureyri fluttu ávörp.
Skeyti, blóm og gjafir bárust og heimilisleg stemming ríkti í afmælinu þar sem saman voru komnir aðilar sem unnið hafa að starfi ÍF og aðildarfélaganna og aðrir gestir. Veitt voru brons, silfur og gullmerki og á myndinni má sjá þá sem hlutu viðurkenningu.
Nánar

Sjöundu Íslandsleikar SO í knattspyrnu voru haldnir í Boganum á Akureyri sunnudaginn 2. maí en þessir leikar eru samvinna ÍF og KSÍ en þeir leggja m.a. til dómara í leikina. Þetta voru fjórðu leikarnir sem haldnir eru innanhúss en þrír leikar hafa verið utanhúss en þeir hafa verið haldnir um miðjan september.
Nánar

Nýlega endurnýjuðu Íþróttasamband Fatlaðra og Radisson SAS hótelin á Íslandi með sér samning sinn um samstarf og stuðning Radisson SAS hótelana við strarfsemi Íþróttasambands Fatlaðra.
Samstarfssamningur þessi felur meðal annars í sér að fulltrúar sambandsins njóti ávallt hagstæðustu kjara varðandi mat og gistingu á hótelum Radisson SAS á Íslandi. Þá fær Íþróttasamband Fatlaðra ákveðna styrktarupphæð sem greiðist í formi peninga eða úttektar í gistingu og mat á hótelunum.
Nánar

ÍF hefur undanfarin ár verið með kynningu á íþróttum fatlaðra fyrir nemendur íþróttavals hjá Menntaskólanum við Sund.
Guðmundur Ólafsson íþróttakennari hefur árlega óskað eftir kynningu ÍF fyrir þennan nemendahóp og þann 19. mars heimsóttu fulltrúar ÍF nemendur.
Kynnt var helsta starfsemi ÍF, Anna Guðrún Sigurðardóttir ræddi við nemendur um áhrif íþróttastarfs á eigið líf og í lokin tóku nemendur þátt í verklegum æfingum.
Á myndinni má sjá nemendur sem sóttu kynninguna.

Undanfarin ár hefur ÍF verið í samstarfi við KHÍ á Laugarvatni vegna námskeiða um íþróttir fatlaðra. Umsjón námskeiða sem hafa gefið A stig ÍF voru upphaflega á vegum ÍF eru nú skipulögð af KHÍ á Laugarvatni í samvinnu við ÍF. Í vetur hefur námskeiðið verið tengt Íslandsmótum ÍF en nemendur sáu um framkvæmd Íslandsmóts ÍF í frjálsum íþróttum í febrúar og um dómgæslu í boccia á Íslandsmóti ÍF í mars.
Nánar

Íþróttasamband Fatlaðra í samvinnu við Ný-ung, ungliðahreyfingu Sjálfsbjargar hélt ráðstefnu á Hótel Sögu laugardaginn 6. mars sl.
Efni ráðstefnunnar var Íþrótta og tómstundastarf og var markhópur 16 - 25 ára hreyfihamlaðir einstaklingar.
Nánar

Rúmfatalagerinn afhenti á dögunum Íþróttasambandi Fatlaðra styrk að upphæð 3 milljónir króna m.a. til undirbúnings og þátttöku fatlaðra íþróttamanna vegna Ólympíumóts Fatlaðra í Aþenu 2004.
Þar með hefur Rúmfatalagerinn, sem er aðalstyrktar- og samstarfsaðili Íþróttasambands Fatlaðra, greitt til sambandsins 9 milljónir af 12 milljón króna styrk sem varið hefur verið til uppbyggingar og þjálfunar fatlaðra íþróttamanna.
Nánar

Heimsmeistaramót þroskaheftra fór fram í Hong Kong 9.-12. janúar sl.
Gunnar Örn Ólafsson vann til tveggja gullverðlauna, eins silfurverðlauna og þriggja bronsverðlauna ásamt því að setja fjögur íslandsmet.
Þá setti Bára B. Erlingsdóttir íslandsmet í 100m flugsundi.
Samantekt árangurs

Kaupþing-Búnaðarbanki, nú KB banki afhenti á dögunum, Íþróttasambandi Fatlaðra styrk að upphæð kr. 1.000.000.- vegna undirbúnings og þátttöku sambandsins í Ólympíumóti fatlaðra sem fram fer í Aþenu síðar á þessu ári. Búnaðarbanki Íslands hefur frá stofnun Íþróttasambands Fatlaðra verið viðskiptabanki sambandsins.

F.v. Sólon Sigurðsson bankastjóri KB banka, Sveinn Áki Lúðvíksson formaður ÍF, Jónas Þ. Þórisson framkvæmdastjóri Hjálparstofnunar kirkjunnar en Hjálparstofnun kirkjunnar fékk styrk frá bankanum við sama tækifæri, Hreiðar Már Sigurðsson, forstjóri KB banka.

Nýársmót fatlaðra barna og unglinga fór fram sunnudaginn 4. janúar 2004. Heiðursgestur mótsins var Árni Magnússon félagsmálaráðherra og afhenti hann verðalun mótsins.
Flest stig mótsins hlaut Guðrún Lilja Sigurðardóttir SH/ÍFR fyrir 50m flugsund, 547 stig. Í 2. stigasæti hafnaði Jóna Dagbjört Pétursdóttir ÍFR, með 524 stig fyrir 50m skriðsund og í 3. stigasæti Karen Björg Gísladóttir, Firði með 489 stig fyrir 50m bringusund.
Sigurvegari mótsins hlýtur Sjómannabikarinn sem gefinn var af Sigmari Ólasyni, sjómanni frá Reyðarfirði.
Skátar frá Skátafélaginu Kópum stóðu heiðursvörð og Ólafur Már Ásgeirsson sá um tónlistarflutning fyrir mótssetningu.
Á mótinu kepptu börn og unglingar og athygli vekur alltaf flokkur byrjenda þar sem keppt er í 25 m frjálsri aðferð, þar sem nota má hjálpartæki, kúta, korka og sumir hafa aðstoðarfólk sér við hlið í sundinu.
Úrslit mótsins

[Fréttir 2010]  [Fréttir 2009]  [Fréttir 2007]  [Fréttir 2006]  [Fréttir 2005]  [Fréttir 2004]  [Fréttir 2003]  [Fréttir 2002]